ئه‌ڤرۆنيوز، باسم قاسم شنگالی
ئەڤرۆ دوو شەمبی 12/2/ 2018، کچەکا ئێزیدی ژ ناڤ دەستێ داعشێ هاتە رزگارکرن,
مالباتا وێ كچێ بۆ ئەڤرۆ گۆت” ئەڤرۆ ئەڤ کەچا مە ژ باژێرێ ره‌قه ل سووریێ هاتە رزگارکرن كو ژيێ وى 12 سالن”.
دياركر ژى” هیشتا دو خۆوشك و دایکا وێ يێن دناڤ دەستێن تیرۆرستێن داعشێ دا ماين”.
ئاماژه دان ژى كو وێ زمانێ خوه يێ كوردى يێ ژبيركرى و تنێ ب زمانێ عه‌رەبی د ئاخڤيت.
ئه‌ڤرۆنيوز:
پێشمه‌رگه وخه‌باتكه‌رێ دێرێن نجم الدين يوسفى وه‌غه‌ركر.
- نجم الدين سعيد على يوسفى
- ژدايكبوون: 1941
- باوه‌رناما خواندنێ: په‌يمانگه‌ها كشاوه‌رزى ل به‌غدا 1958
- ل سالا 1957 ل به‌غدا په‌يوه‌ندى ب رێزێن پارتى ديموكراتى كوردستان كريه
- ل هه‌يڤا 10 سالا 1961 هاتيه دناڤ رێزێن شوره‌شێ دا
- ل سالا 1962 پێشمه‌رگه وكادر بوو ول سالا 1963 ئه‌ندامێ لژنا ناوچا ئامێديێ بوو، ل سالا 1964 بوويه به‌رپرسێ لژنا ناوچا ئامێديێ، ل سالا 1965 بوويه قايمقامێ قه‌زا ئامێديێ، ل سالا 1970 بوويه ئه‌ندامێ كارگێريا لقێ ئێك، ل سالا 1979 بوويه ئه‌ندامێ لژنا ناڤه‌ندى يا پارتى، ل سالا 1984هه‌تا 1983 به‌رپرسێ لقێ ئێك بوو، ل سالا 1985 هه‌تا 1986 به‌رپرسياره‌تى ل گه‌له‌ك ده‌ڤه‌ران وه‌رگرتيه ب تايبه‌تى خرێنه ولۆلان وشنۆ ول سالا 1987 پشكدارى كريه وه‌كو لژنه دلقێ د دا ل دۆلا باليسان.
- پشكدارى وسه‌رپه‌رشتيا گه‌له‌ك چالاكيێن له‌شكرى كريه دهه‌ردو شۆره‌شێن ئه‌يلولێ وگۆلانێ
- ل كۆنگرێن پارتى ل سالێن 1964 و1966 و1970 ول ده‌رچوونا خۆلا ئێكێ يا كادرێن پارتى ل سالا 1969 چوويه خزمه‌تا بارزانيێ نه‌مر
- ئێك په‌رتۆك يا هه‌ى ل سه‌ر شۆره‌شێن ئه‌يلۆل وگۆلانێ ل سالا 1981
- هيڤى يا وى يا سه‌ره‌كى ئێكرێزى وئێكگرتنا گه‌لێ كورد بوو وسه‌ربخوه‌ياكوردستانێ بوو وژيه‌كێ درێژ بۆ سه‌رۆك بارزانى
- ل سالا 2000 كۆمه‌لا ئاكنجيكرنا خێزانێن شه‌هيدان دامه‌زراند وهاته هه‌لبژارتن وه‌كو به‌رپرسێ وێ كۆمه‌لێ كو ئه‌و كۆمه‌له شيا چه‌ندين كاران بكه‌ت وه‌كو
أ- دروستكرنا 2150 خانيان بۆ خێزانێن شه‌هيدان وپێشمه‌رگێن په‌ككه‌فتى ل پارێزگه‌ها دهۆكێ
ب- هاريكاريا هزاران خێزانێن شه‌هيدان وپێشمه‌رگێن په‌ككه‌فتى وپێشمه‌رگێن هه‌ژار وخه‌لكه‌كێ لێ قه‌وماى وهه‌مى ب به‌لگه وب ليست
ت- 10 پێشمه‌رگێن په‌ككه‌فتى ژبه‌ر برينێن له‌شێ وان يێن زۆر وكه‌سێ خوه لێ نه‌كرى خودان، ل گه‌ل 10 هزمه‌تكاران هاتينه هنارتن بۆ ستانبۆلێ بۆ ده‌مێ دو هه‌يڤان بۆ چاره‌سه‌ريێ وبۆ ده‌مێ هه‌يڤه‌كێ ل هندستانێ بۆ چاره‌سه‌ريێ
ث- ژ رۆژا تيرۆرستێن داعشێ هاتينه مووسل هه‌ر شه‌هيده‌كێ شه‌رێ داعشێ مالا وى ل سنورێ پارێزگه‌ها دهۆكێ بيت ژ چ نه‌ته‌وه وئايين ولايه‌ن وپارت بيت، ته‌نها مه‌رج ل به‌رۆكێن شه‌رێ داعشێ هاتبيته شه‌هيدكرن، بۆ خێزانا هه‌ر شه‌هيده‌كى كوژمێ سێ مليۆن دينار هاتينه مه‌زاختن وكۆژمێ 500 هه‌تا 600 مليۆن ديناران هايتنه مه‌زاختن بۆ كرينا ئاڤێ وئازوقه‌ى وگازێ وپانزينێ وهاريكاريێن جۆراوجۆر بۆ پێشمه‌رگه‌ى ل به‌رۆكێن شه‌رێ دژى داعشێ ل ميحوه‌رێن شنگالێ وزومار وتا دگه‌هيته تلسقوف
- ئه‌ڤرۆ 12/2/2018 وه‌غه‌ركر.
ئه‌ڤرۆنيوز:
وه‌زيرێ ده‌رڤه يێ فه‌ره‌نسا ئه‌ڤرۆ دوشه‌مبى 12/2/2018 ب سه‌ره‌دانه‌كا فه‌رمى گه‌هشته هه‌ولێرێ.
ئێڤاريا ئه‌ڤرۆ، يان ئيڤ لۆدريان وه‌زيرێ ده‌رڤه يێ فه‌ره‌نسا گه‌هشته هه‌ولێرێ وژلايێ نێچيرڤان بارزانى سه‌رۆك وه‌زيرێن هه‌رێما كوردستانێ هاته پێشوازيكرن.
سپێده‌يا ئه‌ڤرۆ وه‌زيرێ فه‌ره‌نسى گه‌هشتبوو به‌غدا ول گه‌ل به‌رپرسێن بلند يێن حوكمه‌تا عيراقێ كۆمببوو.
ئه‌ڤرۆنيوز:
تايبه‌تمه‌نده‌كێ نه‌خوه‌شيێن دلى ل سه‌نته‌رێ نه‌خوه‌شيێن دلى ل نه‌خوه‌شخانا ئازادى راگه‌هاند كو رۆژانه چه‌ندين قه‌سته‌رێن دلى بۆ نه‌خوه‌‌شان دكه‌ن و ئاماژه ب وێ چه‌ندێ ژى كر كو جگاره و نارگيله مه‌زنترين ئه‌گه‌رێن تووشبوونێ نه ب نه‌خوه‌شيێن دلى.
عەبدولعەزیز محسن بریفکانی نوشدارێ تایبەتمەندێ قه‌سته‌را دلى بۆ (نۆش نیوز) گۆت “ل سەنتەرێ نەخوه‌شیێن دلی ل نەخوه‌شخانا ئازادی، مە دو پشک يێن هه‌ين؛ پشکا (نشتەرگەریان) كو سینگێ نه‌خوه‌شى دھێتە ڤەکرن، یان قەپاخ و ده‌مارێن دلی دھێنە گوھۆڕین و ل پشکا دی کو پشکا (قەستەرا دلی) يه، ئەم پتر ژ (10) نوشداران ل وێ پشکێ کار دکەین و ھەر ئێک ژ مە رۆژەکا ھەى بۆ دەواما سەنتەری”.
تایبەتمەندێ نەخوه‌شیێن دلی دیارکر ژی كو دلێ مرۆڤی ب دو رێيان دھێتە چارەسەرکرن؛ یان ب رێيا وێ چەندێ کو دڤێت سینگێ مرۆڤی بھێتە ڤەكرن، یان ژى ب رێيا (قەستەرا دلی) کو بوریەك ب رێيا (پیێن مرۆڤی) یان ب رێيا (دەستێ مرۆڤی) دچیتە د ناڤ له‌شێ مرۆڤی دا و ئەو دەمارێن گرتی دھێنە ڤەکرن و گۆت “ ئەو نوشدارێن رۆژانە چارەسەریا نەخوه‌شان دکەن تایبەتمەندن و ھەر نوشداره‌ك دشێت رۆژانە (پێنج هه‌تا شه‌ش) نەخوشان چارە بکەت و ژ بلی وان نەخوه‌شان ئەوێن نەچاڤەرێکری و نەخوه‌شیا وان ب لەزئەم چارە دکەین و رۆژانە پتر ژ (12) قەستەرێن دلی ئەم بۆ خەلکێ خوە د دانین و ب شەڤ و رۆژ مە خەفەر يێن هه‌ين و چارەسەریا نەخوه‌شان دکەن”.
ناڤبرى ئاشکرا ژی کر كو نوكه رێژەکا مەزن یا گەنجان تووشی نەخوه‌شیا دلی دبن ب تایبەت رێژا گەنجێن پێشمەرگە یا زۆرە بۆ نەخوه‌شیێن دلی و جەلتەیان، چونکى ھەر چەند پێشمەرگەیەك د ژۆرەکێ دانە و جگارە دھێتە کێشان و کارتێکرنەکا مەزن ل سەر دلی دروست دبیت و گۆت “جگارە و کێشانا نارگیلێ مەزنترین ئەگەرن بۆ تووشبوونێ ب نەخوه‌شیا دلی، زێدەباری وێ چەندێ ژی ترس، ئەڤجا ھەر چ ترس بیت ئەگەرەکێ دی يە بۆ تووشبوونێ ب نەخوه‌شیا دلی”.
ل دۆر چاره‌سه‌ريان ژى ئاماژه ب وێ چه‌ندێ كر كو باشترین چارەسەری بۆ خوه‌پاراستن ژ نەخوه‌شیا دلی، ئەنجامدانا وەرزشێ یە و وەرزشکرن بەرامبەری خوارنا چەندین دەرمانان دھێتە بکار ئینان و خوارنێن مە ب گشتی ھەموو ئەگەرن بۆ په‌يدابوونا نەخوه‌شیا دلی ب تایبەت خوارنا ب شەڤ و درەنگی گەلەك مەترسی ل سەر ھەر تاکە مرۆڤەکێ يا هه‌ى، چونکى ئەو خوارنا دھێتە خوارن ژبه‌ركو د ناڤ له‌شێ مرۆڤی دا دهێته عه‌مبار كرن و دبیتە دوھن و کارتێکرنێ ل له‌ش و دلێ مرۆڤی دکەن.
گۆت ژى: “ھندەك کەسێن جگاره‌کێش دبێژن جگارێ ھەلناکێشم، خرابی ل سەر من نینە، به‌لێ ئەو د شاشن، چونکى هه‌كه کەسەك ل ده‌ف مرۆڤی يێ روونشتی بیت و جگارێ ب کێشیت ھەر کارتێکرن يا هه‌ى، ئەڤجا چاوان ئەو ھەلما جگارێ ھەتا د ناڤ دەڤێ مرۆڤی دا بچیت و کارتێکرن نەبیت؟”.
ل دووماهيێ ژى تايبه‌تمه‌ندێ نه‌خۆشيێن دلى دا زانين كو خوارنێن سڤك کارتێکرنەکا مەزن یا ل سەر مرۆڤی ھەی، مرۆڤ پێ قەلەو دبیت و کارتێکرنێ ل سەر له‌شی ب گشتی دكه‌ن و خوارنا کەسکاتی و فێقی و ئەنجامدانا وەرزشێ و چەند ھەیڤان جارەکێ پشکنین بھێتە ئەنجام دان رامانە بۆ وێ چەندێ نەخوه‌شیا دلی ژ مرۆڤی دوور بکەڤیت.
ئه‌ڤرۆنيوز، ئه‌ياد به‌روارى
ل دووڤ وان پێزانينێن ئه‌ڤرۆنيوز ب ده‌ستخوه خستين ژ ژێده‌ره‌كێ رۆژنامه‌ڤانيێ نێزيك ژ حوكمه‌تا به‌غدا ل دۆر به‌رنامێ كارێ كۆنگرێ ئاڤه‌دانكرنا عيراقێ ل كوێتێ كو ئه‌ڤرۆ دوشه‌مبى12/2/2018 ده‌ست ب كارێن خوه كرى وهه‌تا 14/2/2018 دێ به‌رده‌وام بيت، ديار دبيت كو چو پرۆژێن ستراتيژى يێن مه‌زن بۆ هه‌رێما كوردستانێ نه‌هاتينه دانان وتنێ هنده‌ك رێێن ئاسنى وشه‌مه‌نده‌فه‌ران دێ د هه‌رێما كوردستانێ را چن ئه‌وژى رێيا هێلا ئاسنى وشه‌مه‌نده‌فه‌رێ ( مووسل – دهۆك – زاخۆ – توركيا) و رێيا ئاسنى وشه‌مه‌نده‌فه‌رێ 6- هێلا ئاسنى (به‌غدا – به‌عقوبه – كه‌ركووك – ئه‌ربيل- مووسل- به‌عقوبه – خانه‌قسن – مونزريه – ئيران).
وى ژێده‌رى دياركر كو د وى كۆنگره‌ى دا دێ چه‌ندين پرۆژێن وه‌به‌رهێنانێ هێنه به‌رچاڤكرن ل عيراقێ ل سه‌ر پتر ژ 1300 كۆمپانيێن جيهانى وعه‌ره‌بى كو پتريا وان پرۆژێن وه‌به‌رهێنانێ دێ ل باشوورێ عيراقێ بن وپاشى ل ناڤه‌راستا عيراقێ بن.
ل دووڤ وى به‌رنامه‌ى پشكداريا كه‌رتێ تايبه‌تێ عيراقێ دكۆنگره‌ى دا 10% ويێ عه‌ره‌بى وبيانى 90% يه.
ل دووڤ وى به‌رنامه‌يێ هاتينه به‌رهه‌ڤكرن ژلايێ حوكمه‌تا عيراقێ وكوێتێ ڤه، سوباهى رۆژا سێشه‌مبى دێ بابه‌تێ سه‌ره‌كيێ كۆنگره‌ى يێ تايبه‌ت بيت ب وه‌به‌رهێنانێ ڤه كو تێدا حوكمه‌تا عيراقێ ب هه‌ڤكارى ل گه‌ل ژۆرا بازرگانيا يا كوێتێ وده‌سته‌يا وه‌به‌رهێنانێ 157 پرۆژێن ستراتيژى به‌رچاڤ كه‌ن كو 41 ژوان پرۆژێن مه‌زنن و116 ژى پرۆژێن ناڤينن و55 پرۆژه ژى دبچووكن.
ژوان پرۆژێن ستراتيژى ومه‌زن يێن دناڤ به‌رنامێ سوباهى دا هه‌ين 18 پرۆژه دكه‌رتێ كيميايا چاندنێ وپه‌ترۆكيمياوياتان وپالاگه‌هان ئه‌وژى كاراكرن ودوباره ڤه‌كرن وچێكرنا كارگه‌هێن كيميا چاندنێ ل بێجى ل پارێزگه‌ها سه‌لاحه‌دين ول ئه‌بو لخه‌سيب وزوبێر كو هه‌ردو ل پارێزگه‌ها به‌سرانه كو به‌رهه‌مێ وان هه‌ردو كارگه‌هان دێ بۆ هنارتنێ بيت بۆ ده‌رڤه، زێده‌بارى نووژه‌نكرن و پێشڤه‌برنا كارگه‌هێن فوسفاتى ل قائيم وعه‌كاشات كو هه‌ردو ل پارێزگه‌ها ئه‌نبارێ نه وبه‌رهه‌مێن وان دێ بۆ ناڤخوه‌يا عيراقێ وبۆ هنارتنێ بۆ ده‌رڤه بيت.
ل دۆر پرۆژێن ستراتيژى دبياڤێ پترۆكيمياويات وپالاوگه‌هان دا، دبه‌رنامه‌ى دا هاتيه، كاركرن و پێشڤه‌برنا پرۆژێن پترۆكيمياوياتان وئاڤاكرنا چه‌ندين پالاوگه‌هان كو ئێك ژوان ل به‌نده‌رێ فاو ل به‌سرا 300 هزار به‌رميل درۆژه‌كێ دا وئێك ژى ل پارێزگه‌ها ئه‌نبارێ 150 هزار به‌رميل درۆژه‌كێ دا وئێك ژى ل پارێزگه‌ها ناسريه 150 هزار به‌رميل درۆژه‌كێ دا.
سه‌باره‌ت پرۆژێن رێيێن بله‌ز ونێڤده‌وله‌توهێلێن ئاسنى وشه‌مه‌نده‌فه‌رێ، 16 پرۆژه دێ هێنه به‌رچاڤكرن كو پێك دهێن ژ فرۆكخانه وهێلێن ئاسنى ورێێن بله‌ز وميترۆ وبه‌نده‌ر.
ل دۆر فرۆكخانان تنێ به‌حسێ شياندن وپێشڤه‌برنا هه‌ردو فرۆكخانێن مووسلێ وناسريێ يێن نێڤده‌وله‌تى تێدا هاتيه كرن، پرۆژێن هێلێن ئاسنى وشه‌مه‌نده‌فه‌رێ ژى چه‌ندين ده‌ڤه‌ر وپارێزگه‌هان بخوه‌ڤه دگريت ئه‌وژى
1- هێله‌كا نوو (به‌غدا – كۆت- عماره- به‌سرا).
2- شياندن وپێشڤه‌برنا هێلا ئاسنى ( به‌غدا – ديوانيه- سه‌ماوه – به‌سرا).
3- هێله‌كا نوو ( مسه‌يب – كه‌ربه‌لا – نه‌جه‌ف – سه‌ماوه).
4- هێلا (به‌سرا – شه‌لامجه – ئيران).
5- هێلا ئاسنى (مووسل – دهۆك – زاخۆ – توركيا).
6- هێلا ئاسنى (به‌غدا – به‌عقوبه – كه‌ركووك – ئه‌ربيل- مووسل- به‌عقوبه – خانه‌قسن – مونزريه – ئيران).
سه‌باره‌ت چێكرنا هنده‌ك رێيێن بله‌ز دو جۆره رێ نه، ئه‌وژى يێن بله‌ز يێن ده‌رڤه ونێڤده‌وله‌تى ويێن ناڤخوه‌يى، يێن ده‌رڤه ڤان رێيان بخوه‌ڤه دگريت:
1- نووژه‌نكرن وشياندن وپێشڤه‌برنا رێيا هاتنوچوونا بله‌ز ( به‌غدا – به‌سرا) ب درێژيا 580 كيلۆمه‌تران.
2- نووژه‌نكرن وشياندن وپێشڤه‌برنا هێلا هاتنوچوونا بله‌ز (به‌غدا- مووسل – ره‌بيعه – پێشابيرێ) ب درێژيا 570 كيلۆمه‌تران.
3- چێكرنا رێيا بله‌ز (به‌غدا – به‌عقوبه- سنورێ ئيرانى – مونزريه) ب درێژيا 180 كيلۆمه‌تران.
ل دۆر رێێن ناڤخوه‌يى ژى، تێدا هاتيه:
1- نووژه‌نكرنا رێيا (بسمايه – به‌غدا – محه‌مه‌دلقاسم) ب درێژيا 25 كيلۆمه‌تران.
2- چێكرنا رێيا (دوره – يوسفيه وگرێدانا پرا دو قات ب رێيا دوره يا بله‌ز به‌غدا – به‌سرا) ب درێژيا 14 كيلۆمه‌تران.
3- چێكرنا رێيا پرا مه‌دائين وگرێدانا وێ ب رێيا (به‌غدا –كۆت – بسمايه – رێيا بله‌ز).
4- رێيا (به‌غدا – به‌سرا د رێيا مه‌دائين را) ب درێژيا 21 كيلۆمه‌تران.
هه‌ر دوى به‌رنامه‌ى دا به‌حسێ چێكرنا ميترۆيان وشه‌مه‌نده‌فه‌رێن هه‌لاويستى ژى هاتيه كرن ئه‌وژى:
1- ميترۆيا به‌غدا
2- شه‌مه‌نده‌فه‌را هه‌لاويستى ل به‌غدا
3- شه‌مه‌نده‌فه‌را هه‌لاويستى ل كه‌ربه‌لا
4- ميترۆيا به‌سرا
ل دۆر به‌نده‌ران ژى تنێ به‌حسێ چێكرنا به‌نده‌رێ فاو يێ مه‌زن هاتيه ل پارێزگه‌ها به‌سرا.
هه‌ر دوى به‌رنامه‌ى دا به‌حسێ چه‌ندين پرۆژێن دى هاتيه كرن ، به‌لێ بێ ئاماژه دان ب جۆرێ پرۆژان ول كيش پارێزگه‌هان دێ هێنه ئه‌نجامدان وئايا كا دێ پشكا هه‌رێما كوردستانێ دوان پرۆژان دا هه‌بيت يان نه، ئه‌وژى:
1- چار ده‌ڤه‌رێن ئابوورى بۆ وه‌به‌رهێنانێ
2- سێ پرۆژێن ئاكنجيبوونێ
3- شه‌ش پرۆژه دكه‌رتێ پيشه‌سازيا ئه‌ندازريارى دا
4- 12 پرۆژه دكه‌رتى بازرگانى دا
5- دو پرۆژه دكه‌رتێ گه‌شتوگوزارى دا
6- 10 پرۆژه دكه‌رتێن ساخله‌ميێ وپه‌روه‌ردێ دا
7- 86 پرۆژێن چاندنێ
ئه‌ڤرۆ نیوز ، نه‌وزاد هلۆرى:
نێزیكێ 10 قوتابیێن گوندێ ( خاستو ژێرى ) يێ سه‌ر ب ناحیا شێلادزێ ڤه ل سنوورێ قه‌زا ئامێدیێ ب ماتوره‌كا سه‌یر و سه‌رنجراكێش دچنه قوتابخانه‌كا ده‌رڤه‌یێ گوندێ خوه ، وه‌كو ئه‌و دده‌ن دیاركرن گه‌له‌ك جاران د رێدا كێشه بۆ وان درۆست دبن و دخوازن ترومبێله‌كا تایبه‌ت بۆهاتنوچوونا وان بهێته دابینكرن.
ویداد قوتابیه‌كا گوندێ خاستو ژێرى یه و رۆژانه ب ماتورێ دچیته قوتابخانا گوندێ خاستو ژورى بۆ ئه‌ڤرۆ نیوز گۆت” ژبه‌ر نه‌بوونا ترومبێلا تایبه‌ت ب ڤه‌گۆهاستنا قوتابیانڤه، نه‌چارین رۆژانه ب ماتورێ هاتنوچوونێ بكه‌ینو ئه‌ڤ یه‌ك ژى بوویه ئه‌گه‌ر كو هنده‌ك جاران كێشه بۆمه درۆست ببن”.
نیهاد نائیف خودانێ ماتورێ و قوتابیێ هه‌مان گوند دیاركر كو ئه‌وى ژ نه‌چارى ماتوره‌ك بۆ خوه كریه و ل گه‌ل خوه نێزیكێ 10 قوتابیان به‌رامبه‌ر پاره‌كێ كێم دبه‌ت قوتابخانێ وبۆ ئه‌ڤرۆ نیوز گۆت” ئه‌ز رۆژانه ب ماتورێ دچمه قوتابخانێ و ب رێڤه گه‌له‌ك ئاسته‌نگ و كێشه بۆمه درۆست دبن، ژ به‌ركو رێیا گوندێ مه بۆ قوتابخانێ نێزیكێ نیڤ ده‌مژمێرێ يا دووره و هه‌موو ژى ئاخه ب تایبه‌تى د وه‌رزێ زڤستانێ دا كو دبیته ته‌قن”.
گۆت ژى” دخوازین كو لایه‌نێن شوله‌ژێ ترومبێله‌كا تایبه‌ت بۆ ڤه‌گۆهاستنا قوتابیان دابین بكه‌ن داكو ژ كێشه‌یان ب دووماهى بهێن”.
نزار عوبێد رێڤه‌به‌رێ قوتابخانا خاستو ژوورى دیاركر كو هاتنوچوونا قوتابیان ب پیا و ماتورێ كێشه بۆ قوتابیان درۆستكرینه و بۆئه‌ڤرۆ نیوز گۆت” ژ سه‌رجه‌مێ 75 قوتابیان، نێزیكێ 45 قوتابیێن قوتابخانا مه ژ ده‌رڤه‌ى گوندى دهێن ب تایبه‌تى قوتابیێن هه‌ردو گوندێن خاستو ژێرى و دێویكێ وپتريا قوتابیان ب پیان دهێن و هنده‌كان ژى بۆ خوه كوسته‌ر گرتیه و هنده‌ك ژى ب ترومبێلێن بابێن خوه دهێن و هنده‌كان ژى بۆ خوه ماتوره‌كا تایبه‌ت چێكریه و هاتنوچوونێ پێ دكه‌ن به‌لێ هاتنوچوونا قوتابیان ب پیا و ماتورێ كێشه بۆ وان چێكرینه و پێشتر قوتابى هه‌بوویه ب رێڤه كه‌فتیه و برینداربوویه و دیسان قوتابى هه‌بوویه گه‌له‌ك گیروبوویه “.
زێده‌تر گۆت” ئه‌م وه‌كو كارگێریا قوتابخانێ هه‌ڤكاریا قوتابیان دكه‌ین ب تایبه‌تى ئه‌وێن ژده‌رڤه ى گوندى دهێن و كێشه ب رێڤه بۆ درۆست دبنو مه چه‌ندین جاران داخوازى ژ ناحیا شێلادزێ و باژێرڤانیا شێلادزێ كریه كو رێیا سه‌ره‌كى یا وان گوندان درۆست بكه‌ن وهه‌كه هه‌تا نه‌هێته قێركرن ژى، بلا بهێته سه‌خبێركرن و زفتكرن داكو قوتابیێن وان گوندان بشێن كوسته‌ره‌كێ بۆخوه بگرن و ژ پیا و ماتور و ترومبێلێن تایبه‌ت رزگار ببن”.
ئه‌ڤرۆنيوز:
هاريكارێ پارێزگه‌رێ دهۆكێ بۆ كاروبارێن مرۆڤايه‌تى، راگه‌هاند، ب هه‌ڤكاریا بوردێ كاروبارێن مروڤایه‌تی ل پارێزگه‌ها دهۆكێ، به‌رنامێ نه‌ته‌وێن ئێكگرتى بۆ پێشڤه‌برنێ (UNDP) دێ (10) پرۆژان ب كوژمێ دوملیۆ ن 224 هزار دۆلاران د كه‌رتێن باژێرڤانیێ وكاره‌بێ وئاڤ وسولین وپه‌روه‌ردێ دا دێ بجهئینیت.
ئيسماعيل محه‌مه‌د، هاريكارێ پارێزگه‌رێ دهۆكێ بۆ كاروبارێن مرۆڤايه‌تى گۆت” ئه‌ڤ پرۆژه ب هه‌ڤكاری دگه‌ل فه‌رمانگه‌هێن په‌یوه‌ندیدار دێ هێنه بجهئینان ول ڤان رۆژان دێ كه‌ڤنه دبیاڤێ راگه‌هاندنێ دا”.
ل دۆر وان پرۆژان، ئيسماعيلى گۆت” چێكرنا رێكا ناحیا كه‌له‌كچی – چێكرنا رێكێن ناڤخوه‌یی ل سه‌نته‌رێ باژێرێ دهۆكێ ل تاخێن مالتایێ وگژه‌به‌را – چێكرنا رێكێن ناڤخوه‌یی ل قه‌زا به‌رده‌ره‌ش – دانانا وێستگه‌هه‌كا رێكخستنا به‌لاڤكرنا كاره‌بێ وتۆرا كاره‌بێ ل شێخان – چێكرنا تۆرا كاره‌بێ ل قه‌زا زاخۆ – چێكرنا تۆرا كاره‌بێ بۆ پرۆژێ ئاڤا ناحیا بجێل ل ئاكرێ – چێكرنا پرۆژێ ئاڤێ ل سه‌نته‌رێ قه‌زا زاخۆ – چێكرنا ئاڤرێژ و سولینان ل سه‌نته‌رێ باژێرێ دهۆكێ ل تاخێن شندۆخا ومالتا وزركا وره‌زا – چێكرنا ئاڤرێژ و سولینان ل ئاكرێ ل تاخێن گۆلان و 11ئادارێ – نووژه‌نكرنا هۆلێن كولیژا په‌روه‌ردا بنیات ل قه‌زا ئامێدیێ”.
ئه‌ڤرۆ نیوز، نه‌وزاد هلۆرى:
ب هه‌لكه‌فتا رۆژا جیهانیا رادیۆیێ، رێڤه‌به‌ریا راگه‌هاندن و چاپ و به‌لاڤكرنێ دێ رۆژا رادیۆیێ ل دهوكێ ب چه‌ند چالاكیان ساخكه‌ت.
په‌یڤدارێ رێڤه‌به‌ريا راگه‌هاندن و چاپ و به‌لاڤكرنا پارێزگه‌ها دهۆك، بورهان يه‌حيا، بۆ ئه‌ڤرۆ نیوز گۆت” ب هه‌لكه‌فتا رۆژا جیهانیا رادیۆیێ و ل بن درووشمێ ” رۆل و كارتێكرنا رادیۆیێ ل سه‌ر ده‌مێ سوشیال میدیایێ” رێڤه‌به‌ریا مه دێ سوبه‌هى رۆژا جیهانیا رادیۆیێ ل دهۆكێ ب چه‌ند چالاكیه‌كان ساخكه‌ت”.
زێده‌تر گۆت” ته‌وه‌رێن ساخكرنا رۆژا جيهانيا راديۆيێ دێ ژلایێ هه‌ردو ماموستایێن دبیاڤێ راگه‌هاندنێ دا هه‌كار ف‌ندى و حه‌مید سه‌برى هێنه پێشكێشكرن، زێده‌بارى دێ راپۆرته‌كا ڤیدیۆیى ل سه‌ر دیرۆكا دانانا رادیۆیێ و چه‌ند بوچۆنه‌ك ل دۆر گرنگیا رادیۆيێ دناڤ جڤاكى دا هێته نیشاندان و هه‌موو چالاكى ژى دێ ل هۆلا سه‌نته‌رێ ره‌وشه‌نبیرى و جڤاكى ل زانكۆیا دهۆك ب رێڤه‌چیت”.
ئەڤرۆ ، زنار تۆڤی:
لیستا مووچێن فەرمانبەرێن وه‌زاره‌تا ساخلەمیێ و په‌روه‌ردێ بۆ به‌غدا هاتینە هنارتن،لێ ناڤێ مووچه‌خۆرێن گرێبه‌ست تێدا نه‌بوویه و په‌رله‌مانتارەک دبێژیت،نوکە لیژنا هووربینیێ ل هه‌رێما كوردستانێ یە و کارێ هووربینیێ دكه‌ن،ئەو دێ د رپۆرتا خوە دا بەحسێ ڤی بابه‌تی ژی كه‌ن.
خالس قادر پەیڤدارێ وه‌زاره‌تا ساخلەمیێ ل حوکمه‌تا هه‌رێما كوردستانێ رااگه‌هاندیە،کو هژمارا وان كارمه‌ند و نۆشدارێن كو گرێبه‌ستن ل وه‌زاره‌تا ساخلەمیێ ل هه‌ر سێ پارێزگەهێن هەرێمێ 720 نۆشدار و كارمه‌ندن و سەرجەمێ گشتی یێ مووچێ وان پێکهاتیه ژ 394 ملیۆن و 900 هزار دینارا.
ناجیبیا نەجیب ئەنداما پەرلەمانێ عێراقێ بۆ ئەڤرۆ نیوز گوتیە،کو لیستا ناڤێن مووچه‌خۆرێن هه‌ردو وه‌زاره‌تێن په‌روه‌ردێ و ساخلەمیێ ژ بەغدا بۆ هەرێمێ هاتینە زڤراندن، ناڤێ گرێبه‌ستان تێدا نه‌بوویه، ئه‌ڤێ ژی وەکریە،کو داخواز بهێته کرن،جارەکادی پێداچوون تێدا بهێتە کرن.
هەروەسا گوتیە، ئه‌و فه‌رمانبه‌ر و مامۆستایێن گرێبه‌ستن ناڤێن وان د وان لیستاندا نینه، ل گەل ئه‌وێن كو مۆله‌تا بێ مووچه‌یێ چێكرین،د لیستا ئێکێ دا ناڤێ وان نه‌چووینه به‌غدا،لێ پێدڤیە ب زووترین دەم ناڤێن وان بهێنە ره‌وانه کرن،چونکی ناڤێن گرێبەستان ژی د قانوونی نە و عێراقێ چەندین فەرمانبەرێن گرێبەست دامەزراندینه،هەروەسا ئەم هەرێمەکا فیدرالین لەورا وان ماف نینە،کو کارێ هووربینیێ بکەن.
ئه‌ڤرۆنيوز:
رێڤه‌به‌ريا هاتنوچوونا پارێزگه‌ها دهۆكێ راگه‌هاند، ئه‌ڤرۆ دوشه‌مبى 12/2/2018 چار روودانێن هاتنوچوونێ ل چه‌ندين ده‌ڤه‌رێن پارێزگه‌هێ په‌يدابوون.
رێڤه‌به‌ريا هاتنوچوونا دهۆكێ دبه‌رپه‌رێ خوه دا ل سه‌ر تۆرا فه‌يسبووكى به‌لاڤكر” ئه‌ڤرۆ ل دەمژمێر ١٠:٣٠ سپێدێ ل جادا سەرەکی یا دناڤبەرا کومەلگەها مەهەتێ بۆ شێخان ل نێزیك گوندێ بێتنار روودانەك ژ جۆرێ وەرگەریان په‌يدابوويه كو ترومبێلەکا تایبەت ژ جۆرێ شوفرلێت ئوپترا ژ ئەگەرێ لەز هاژوتنێ و پەقینا تایرێ ترومبێلێ تووشی وەرگەریانێ بوویە و دئەنجامدا تنێ زیانێن دراڤى ب ترومبێلێ کەفتن وگيان د سلامه‌ت بوون”.
دياركر ژى” هه‌ر ئەڤرو ل دەمژمێر ١١:٢٥ سپێدێ ل جادا سەرەکی یا دناڤبەرا شێخان بۆ کومەلگەها مەهەتێ ل نێزیك گوندێ بێتنار روودانەك ژ جۆرێ وەرگەریان په‌يدا بوويه كو ترومبێلەکا بارهەلگر ژ جۆرێ (ترێلە تانکه‌ر مارسیدس) ژ ئەگەرێ لەز هاژوتنێ تووشی وەرگەریانێ بوویە و دئەنجامدا تنێ زیانێن دراڤى ب ترومبێلێ کەفتن وگيان ب سلامه‌ت بوون”.
ئاماژه دا ژى” ئه‌ڤرۆ ل ده‌مژمێر 11:30 سپێدێ ل سـەر رێيا سه‌ره‌كى يا سێمێل_ زاخۆ ل نێزيك كومەلگەها مرینا، رووودانەكا لێگدانێ دناڤبەرا دو ترومبيلان دا په‌يدابوو، يا ئێكێ ژ جۆری تویۆتا لاندگروزا و يا دويێ ژجۆرێ ئۆپل ڤیکترا ود ئەنجامێ وێ لێگدانێ دا، كـەسه‌ك بريندار بوو”.
رۆهنكر ژى” ديسا ئه‌ڤرۆ ل سه‌ر رێيا سه‌ره‌كێ دناڤبه‌را قه‌زا به‌رده‌ره‌ش بۆ كه‌له‌كێ ل نێزيك گوندێ گرده‌پان روودانه‌ك ژ جۆرێ وه‌رگه‌ريان په‌يدابوو وشۆفێرێ وێ ب بريندارى هاته هنارتن بۆ نه‌خوه‌شخانێ”.
نيشاندان