ئه‌ڤرۆنيۆز:

هيزێن له‌شكرێ عيراقى، ئه‌ڤرۆ چارشه‌مبى 22/11/2017، گۆره‌كێ ب كۆم يێ كوردێن ئێزدى ل رۆژئاڤايێ مووسل ديت، كو  ل دووڤ ئاخڤتنێن به‌رپرسێن ده‌ڤه‌رێ قوربانيێن دناڤ وى گۆرى دا ژلايێ داعشێ ڤه‌ هاتينه‌ شه‌هيدكرن.

دوى گۆرێ ب كۆم دا، ل دووڤ ئاژانسا فرانس پرێس، رووفاتێن 73 كوردێن ئێزدى هاتينه‌ ديتن كو هنده‌ك ژوان ژن وزارۆكن.

شه‌كر حامد ئه‌لياس رێڤه‌به‌رێ ناحيا قه‌حتانيه‌ يا سه‌ر ب شنگالێ ڤه‌ راگه‌هاند، دوێ گۆرێ ب كۆم دا رووفاتێن ژن وزه‌لام وزارۆكان يێن هه‌ين كو ل ده‌مێ داگيركرنا  ده‌ڤه‌رێ يێن هاتينه‌ شه‌هيدكرن وپاشى ل ده‌ڤه‌را (ره‌مببوورسى) يا سه‌ر ب وێ ناحيێ ڤه‌ هاتينه‌ بن ئاخكرن.

مه‌حما خه‌ليل قايمقامێ قه‌زا شنگالێ گۆت، پشتى ئازادكرنا شنگالێ ژداعشێ  ژلايێ پێشمه‌رگه‌ى ڤه‌ ل 2015، هه‌تا نوكه‌ 37 گۆرێن ب كۆم ل ده‌ڤه‌رێن جودا جودا ل شنگالێ يێن هاتينه‌ ئاشكراكرن.

مه‌حماى دووپاتكر كو هه‌موو قوربانيێن دناڤ وان گۆرين ب كۆم دا، كوردێن ئێزدى نه‌، هه‌ڤده‌م ره‌خنێن توند ل حوكمه‌تا عيراقێ گرت كو هاريكارى پێشكێشى كه‌سوكارێن قوربانيان نه‌كريه‌.

ئه‌ڤرۆنيۆز:

سكرتێرێ مه‌كته‌با سياسى يا پارتى ديموكراتى كوردستان، فازل ميرانى، ل دۆر ريفراندۆمێ وئه‌نجامێن ددووڤدا هاتين، دگۆتاره‌كێ دا دبێژيت، ب مه‌به‌ستا ئارامكرنا وان گرژيێن به‌رى ئه‌نجامدانا ريفراندۆمێ وپشتى ئه‌نجامدانا وێ سه‌رهلداين، بزاڤێن هه‌رێمى ونێڤده‌وله‌تى ب ئاشكرا ونه‌ئاشكرا يێن كه‌فتينه‌ كارى.

دگۆتاره‌كێ دا ل هه‌ردو رۆژنامێن زه‌مان وخه‌بات به‌لاڤبووين، فازل ميرانى دبێژيت، قوربانيێن ملله‌تى كه‌ره‌سته‌ نينن كو بازرگانى پێ بهێته‌ كرن، يان بهێنه‌ ژبيركرن، دبێژيت ژى، ئه‌م دسياسه‌تێ دا گازنده‌يان بۆ قۆناغه‌كا دى دێ هێلين، كو يا هه‌ژى وگونجاى بيت، هه‌تاكو ئه‌وا دناخێ ده‌روونى دايه‌ به‌رچاڤ بكه‌ين.

سكرتێرێ مه‌كته‌با سياسى يا پارتى ديموكراتى كوردستان ب ئاماژه‌دان ب ريفراندۆمێ وئاكامێن وێ هوكارێ ژيانێ بوو، نه‌كو بۆ بانگه‌شا شه‌ر وسزادانێ.گۆت ژى، ئه‌م ب خوه‌ هه‌ڤ خه‌باتێن بۆرى بووين، ئه‌وێن ل گه‌ل هه‌ڤالێن خوه‌ ژ خه‌باتكێر وئازاديخوازێن دى بێ ڤه‌قه‌تيان ژبۆ هه‌بوونا عيراقه‌كا ئازاد، عيراقه‌كا يه‌كسان، عيراقه‌كا شارستانى وسه‌رده‌ميانه‌، مه‌ پشكداريه‌كا راستگويى كر، نه‌كو عيراقه‌كا گرتى وده‌مارگرژيا نه‌ته‌وى وئاينى.

ميرانى دووپاتى ل سه‌ر وێ چه‌ندێ كر كو هه‌ر ژده‌ستپێكێ مه‌ بانگه‌شه‌ بۆ دانوستاندنێ يا كرى وبۆمه‌ گرنگ نينه‌ كى بۆ وێ دانوستاندنێ دێ ده‌ستپێشخه‌ر بيت، به‌لكو وه‌كو دبێژيت، يا گرنگ ئه‌وه‌ دانوستاندنێن راستگۆيانه‌ وبه‌رهه‌مداربن، نه‌ خوه‌دزين تێدا بيت و نه‌ مه‌رج ب ئارمانجا بده‌ستڤه‌ئينانا كورسيان.

فازل ميرانى دوێ گۆتارا خوه‌دا رۆهن دكه‌ت كو شايسته‌بوونا مافێ هه‌ڤنيشتمانبوون ل سه‌ر پشكه‌كا كێم نابۆريت، به‌لكو ل سه‌ر پشكا مه‌زنتر وپێدڤيێن دابينكرى وه‌كو ئاراميێ وده‌ليڤێن گره‌نتيكرى ب كارى وشيانا پشكداريێ ددروستكرنا بريارێ دا، نه‌كو ب فشار وخوه‌ ب هێز زانين. دبێژيت ژى، ئه‌م ب گه‌لێ خوه‌ڤه‌ ب هه‌موو پێكهاتێن وى ڤه‌ دمه‌زنين، كه‌سێ مه‌زن ژى تۆره‌ نابيت.

دياركر ژى، ل رۆژا 25 ئه‌يلوولێ، كوردستانى رازى نه‌بوون ده‌ڤێ خوه‌ بگرن..  ميرانى ب پێداگرى گۆت، ل وێ رۆژێ مه‌ بۆ جيهانێ وعيراقێ وكوردستانێ دگۆت هه‌ر ئێك ژ هه‌وه‌ هه‌ژى ژيانه‌كا شكۆمه‌ندارن، نوكه‌ ژى هه‌ر وى كارى دێ كه‌ين وبێژين.

ددووماهى گۆتارا خوه‌دا ميرانى هيڤى دخوازيت كو ئه‌و ئاخڤتنێن وى گوتين، گوهداره‌ك هه‌بيت گوهێ خوه‌ بده‌تێ وعه‌قله‌ك هه‌بيت هه‌ست پێ بكه‌ت وژێ تێ بگه‌هيت.