ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 29ى كانوونا دويێ 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1245 |
| 1 يۆرۆيێ ئه‌ورۆپى | 1540 |
| 1 ليرێ توركى | 330 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
به‌رپرسه‌كێ ده‌سته‌يا ده‌سپاكيا هه‌رێما كوردستانێ ژماره وه‌زير و بريكار و شيره‌تكارێن ب ره‌نگه‌كێ نه‌قانوونى هاتينه خانه‌نشينكرن ئاشكه‌را دكه‌ت.
مشير ره‌شيد، رێڤه‌به‌رێ فه‌رمانگه‌ها قانوونى ل ده‌سته‌يا ده‌سپاكى راگه‌هاند كو ژماره‌ك ژ وان كه‌سێن ب نه‌قانوونى هاتينه خانه‌نشينكرن “ئێك رۆژ ژى فه‌رمانبه‌رێن حوكمه‌تێ نه‌بووينه”.
مشير ره‌شيد بۆ K24 خۆيا ژى كر كو 461 كه‌س ب پله‌يا وه‌زير، بريكار و شيره‌تكار ل هه‌رێما كوردستانێ ب ره‌نگه‌كێ نه‌يێ قانوونى هاتينه خانه‌نشينكرن.
ئه‌وى به‌رپرسى ئاماژه ب وێ چه‌ندێ ژى كر كو هنده‌ك ژ وان خانه‌نشينان ب بلندتر ژ مافێ وان هاتينه خانه‌نشينكرن.
ئه‌ڤرۆ نيوز:
ئەندامەکێ پەرلەمانێ کوردستانێ بۆ رۆژناما ئەڤرۆ ئاشکراکر کو درونشتنا سوباھی 30ى كانوونا دويێ 2018 یا پەرلەمانێ کوردستانێ دا دێ گەنگەشە ل سەر پرۆژێ راستڤەکرنا برگە و مادێن قانوونیێن پەیرەوێ نافخو ھێتەکرن.
حاجی کاروانی ئەندامێ پەرلەمانێ کوردستانێ بۆ رۆژناما ئەڤرۆ ئاشکراکر کو ھەر ژ دەسپێکا خولا ئەڤ جارە یا پەرلەمانێ کوردستانێ کار ل سەر راستڤەکرنا بەرگە و مادێن قانونیێن پەیرۆێ نافخو ھاتنەکرن و 80% کار ل سەر ب دووماھی ھاتیە و ئەڤە ب رازیبوونا ھەموو فراکسیونێن پەرلەمانێ کوردستانی بوویە و دبینم ئەڤە دێ گەلەک مفایی گەھینتە خەلکێ کوردستانێ.
ھەمان ئەندامێ پەرلەمانێ کوردستانێ ئەو ژی ئاشکراکر پەیرەوێ نافخوە یێ پەرلەمانێ کوردسنانێ یێ نوکە وەکی مەتاتی یە و ھەر مادەکێ چەندین چارەسەری و بەرسڤ بۆ دھێنە دیتن و د راستڤەکرنێ دا ئەڤ ھەموو برگە ل بەرچاڤ ھاتینە وەرگرتن.
حاجی کاروان نەڤەشارت کو پێشبینی دھێـتەکرن دخولا چارێ یا پەرلەمانێ کوردستانێ دا ئەف پرۆژە قانوونە بھێتە پەسەندکرن و بکەڤیتە خزمەتا وەلاتیان دا.
ئه‌ڤرۆ نيوز:
ئەندامەکێ پەرلەمانێ کوردستانێ ئاشکراکر کو پێشبینی دھێتەکرن وەزارەتێن حوکمەتا ھەرێما کوردستانێ ژ 24 وەزارەتان بۆ دوازدە وەزارەتان بھێنەکێمکرن و ئەڤە دێ ب پرۆژە قانوونەکێ ڤە ھێتە جێبەجێکرن.
بەھزاد زێباری ئەندامێ پەرلەمانێ کوردستانێ بۆ رۆژناما ئەڤرۆ گۆت: ل دەمێ ھەرسێ ئالیێن سیاسی (گوران، کومەل، ئێکگرتوو) خوە ژ حوکمەتێ ڤەکێشاین دڤیابا ھزر ل پرکرنا جھێن وەزیرێن ھەرسێ ئالیان ھاتباکرن، نوکە حوکمەتا ھەرێما کوردستانێ نەچارە پرۆژە قانوونەکێ پێشکێشی پەرلەمانی بکەت و ھەژمارا وەزارتێن حوکمەتێ بھێنەکێمکرن.
بەھزاد زێباری گۆت ژی : ھندەک وەزارەتێن ھەین نێزیکی ئێکن کو ببنە ئێک وەک (پەروەردە و خواندنا بلند)، چونکە ئەڤ دو سالە وەزارەتێن حوکمەتێ چ پارە ل بەر دەستی نینە خزمەتا خەلکێ کوردستانێ بکەن و بتنێ برێڤەبرنا کارێ روتینی یە و ئەڤ کارە پێدڤی ب وەزیران ناکەن و بتنێ رێڤەبەرێ گشتی دشێن بڤی کاری بکەن، رەنگە حوکمەتا ھەرێما کوردستانێ ژ ھەبوونا 24 وەزیران بۆ 12 وەزیران بھێنە کێمکرن و ئەڤە دێ کارەکێ باش بیت.
بەھزادی ئەو ژی ئاشکراکرکو وەزیرێن دەست ژکاری بەرداین نوکە بتنێ (10) وەزیرن (14) وەزیر ماینە، ئەڤجا چ وەزارەت بیت یان دەستەکا پلە وەزیر بیت کو پشکدارێن کومبوونێن ئەنجوومەنێ وەزیران ببیت و پێشتر (24) کەس وەک وەزیر پشکدار بووینە ب پلە وەزیر، دبینم (14) نەشێن (24) وەزارەتا برێڤەبەن، لەوما پێشبینی دکەم دوازدە وەزارت بمینن.
ئه‌ڤرۆ نيوز:
مەریوان نەقشەبەندی بەرپرسێ پەیوەندی و راگەھاندنێ ل وەزارەتا ئەوقاف و کارۆبارێن ئاینی ل حوکمەتا ھەرێما کوردستانێ بۆ رۆژناما ئەڤرۆ گۆت: ل دووڤ قانوونا حوکمەتا عیراقێ یا گرێدایی ب مولکێ وەزارەتا ئەوقاف و کارۆبارێن ئاینی چ کەسان ئەو ماف نینە مولکێ وەزارەتا ئەوقافێ بفرۆشیت نە وەزیر و نە سەرۆک وەزیران و نە سەرۆک کومار ژی و ھەتا سەردەمێ حوکمەتا بەعسی ژی سەرۆک کومار مەزنترین دەست ھەلات بوو وی دەمی ژی ماف نەبوو مولکێ ئەوقافێ بفروشیت.
مەریوان نەقشەبەندی زێدەر گۆت: سالانە داھاتەک بۆ ئەوقافێ ژ پارچە زەڤیان و دوکان و جێھن چاندنێ وەک کرێ دھێت، سالانە داھاتێ ئەوقافێ گرێدایە ب کاوادانێن وێ سالێ ڤە و ئەگەر کاودانێن ئابووری دباش بن دێ داھت ژی باش بیت و ئەگەر کاودان نەباش بن داھات ژی باش نابیت.
مەریوانی ئەو ژی ئاشکراکر کو سالا بوری 2017 داھاتێ وەزارەتا ئەوقاف و کارۆبارێن ئاینی نێزیکی پێنچ ملیار دیناران بووینە، ئەڤە داھاتە دچیتە سەر ھەژمارەکا تایبەت یا وەزارەتا ئەوقافێ زو دھێتە مەزاختن بۆ پرۆژێن ئاینی و ئەڤ داھاتە ناچیتە سەر داھاتێ حوکمەتێ وەک گومرکێ.
مەریوانی ئەو ژی ئاشکراکر کو بتنێ پارێ مەزاختنا کارەبێ یا مزگەڤت و کەنیسان سالانە چەندین ملیار دینارن، ئەڤە وێ چەندێ دیاردکەت کو مەزاختیێ کارەبێ زێدەترە ژ داھاتێ ئەوقافێ بگشتی، دیسا ئەم نەشێن مووچێ فەرمانبەرێن سەر ب وەزارەتێ ڤە ژ ڤی داھاتی بدەین و نێزیکی پازدە ھزار فەرمانبەران مە ھەنە و ئەڤە گەلەک یا بزحمەتە و حوکمەت ژی رێکێ نادەت و بتنێ رێنما ئەون کو ھەموو وەزارەت داھاتێ خوە زێدەبکەن بۆ ھاریکاریا حوکمەتێ بۆ دابینکرنا مووچەی.
ئەڤرۆ نيوز:
ژێدەرەکێ ئێمناھیێ ل وەزارەتا عیراقێ راگەھاند، پشتی حوکمەتا عیراقێ تانکێن ئەمبرامز یێن ئەمریکی رادەستێن حەشدا شەعبی کرین، کۆمپانیا دروستکرن تانکێن ناڤبری، کارێن خوە ل عیراقێ راگرتن و ھاتنە پاشڤەکێشان.
ژێدەرێ ئێمناھیێ ھەروەسا راگەھاند، حوکمەتا عیراقێ ئێک ژوان تانکێن ئه‌مبرامز وەک دیاری بۆ فەرماندەکێ ھێزا چکدارێن حەشدا شەعبی ھنارت، کۆمپانیا ناڤبری گەفێن دژوار ل حوکمەتا عیراقێ کرینە، ھەکە ل سەر کارێ خوە یا بەردەوامبیت، ئەڤە بئێکجاری دێ ژعیراقێ ھێنە ڤەکێشان.
ھەروەسا دیارکر، کۆمپانیا دروستکرنا تانکێن ئه‌مبرامز ل فرۆکخانا مووسەنا کارێن دروستکرن و چاککرنا تانکێن ناڤبری ل عیراقێ راگرتن و پاشڤەھاتن ڤەکێشان ب تایبەتی، پشتی شەرێ پردێ و مەحموودیە و پەقاندنا تانکێن ئراھامز ب دەستێن پێشمەرگەی.
ئەڤرۆ نيوز:
ل گۆڕ راپۆرتێن رۆژنامەڤانی و ئالیێن ئاگەھدار، ھاتە ئاشکراکرن کو پێنچ ئالی و گرۆپێن د ناڤا چەکدارێن حەشدا شەعبی دا، بڕیارا حوکمەتا عەبادی ل دۆر چوولکرنا 800 بارەگایێن چکدارێن حەشدا شەعبی ل دەڤەرێن ھاتینە داگیرکرن ھاتە رەتکرن.
رۆژناما ئەلعەرەبی ئەلجەدید ژ زاردەڤێ بەرپرسێ حوکمەتا عیراقێ ل بەغدا ڤەگوھاست و دووپاتکر، خەوە ڤەدزین و پشتگۆھخستنا ژمارەکا گرۆپێن چەکدارێن حەشدا شەعبی ل دۆر بجھئینانا بڕیارا حوکمەتا حەیدەر عەبادی سەبارەت دەستبەردان ژ بارەگایێن وان باژێرێن ھاتینە داگیر کرن گرۆڤە ل سەر رەتکرنا وێ بڕیارێ.
ھەر ل گۆر وی بەرپرسێ یێ نەڤیایی ناڤێ خوە ئاشکرا بکەت، گرۆپێ حزبوللا و خروسانی و عسائب ئەھلوحەق و بەدر و نوجەبا، خوەڤەکێشانا ژ وان دەڤەران رەتکریە، کو بارەگایێن ل مووسل و بەعاج و فەلوجە و رەمادی و تکریت و بێجێ ژی ھەنە.
ھەروەسا دیارکر، پلانا سەرۆک وەزیرێن عیراقێ ئەو بۆ کو ئەو گرۆپێن ناڤبری خوە ژ ناڤەندا باژێران ڤەکێشن و بتنێ ل دەردورێن باژێران بیمنن،داکو بادەکا ئێمناھیێ رادەستێ پۆلیسێن فیدرالی بھێتە کرن،بتنێ مانا حەشدا شەعبی بۆ ھەر روودانەکا نەخوازیار و ھێرشەکا بنشکەکێ ڤە بھێتە کرن بۆ پشتەڤانیا پۆلیسان بیت.
ژێدەرێ ھەروەسا ئاشکراکر، بەلێ ئەو بڕیار وەسا ھاتیە تێگەھشتن کو رەنکڤەدانا عەبادی بوویە ل دۆر ھەلوەشاندنا لیستا بناڤێ (الفتح و النصر) بۆ ھەلبژارتنان پشتی حەشدا شەعبی خوە ژوێ لیستێ ڤەکێشان و عەبادی بتنێ ھیلان و ھەڤپەیمانیا وی رەتکرن،بەلێ براستی ئەو د چارچۆڤێ پێدڤیێن کریارێن ھەلبژارتنێن تەشریعی بوویە، کو گرۆپێن میلیشیاتێن حەشدا شەعبی بھێنە ڤەکێشان ژوان دەڤەران، کو ئێک ژ مەرجێن نەتەوەیێن ئێکگرتی و وەلاتێن ئەورۆپی و ئەمریکا و ھێزێن سونی و کوردان ژی بوویە.
ھژمارا بارەگا و نڤیسینگەھێن حەشدا شەعبی ل وان باژێران پتر ژ 800 بارەگایان ھەنە، کو چالاکیێن جودا جودا بخوەڤە دگرن، ژوان پرۆسا دەستەسەرکرن و گرتن و پشکنین و دوڤچوون بێی کو ھیچ بڕیارەکا دادگەھی و فەرمی بوو ھەبیت،ھەروەسا پشکەک ژوان گرۆپان ب توومەتا ئازراندن و ھەلێخستنا شەری و وەرگرتنا بەرتیل ھەمبەری ھندەک بەرژوەندیێن تایبەت بوانا ڤە دھێنە توومەتبار کرن.
ئەڤرۆ نيوز:
بەرپرسێ دەزگەھێ ھەلبژارتنان یێ پارتی دیمۆکراتی کوردستان راگەھاند، کو نوکە مژوولی بەرھەڤکرنا لیستا بەربژارێن خوە نە بۆ ھەلبژارتنێن پەرلەمانێ عیراقێ کو ل 12ى گۆلانا سالا بهێت دێ ھێنە ئەنجامدان و پارتی جودا دێ پشکداریێ د وان ھەلبژارتنان دا کەت.
خسرۆ گۆران بۆ مالپەرێ فەرمی یێ پارتی راگەھاند، وان داخواز یا ژ لق و جڤاتێن سەرکرداتیا کری ناڤێن خوە بۆ وان رەوانە بکەن و گۆت:(ئەم ژی دێ وان ناڤان پۆلێن کەن و پاشی ل گەل سەرکرداتیا خوە دێ گەنگەشە کەین).
خسرۆ گۆان گۆت ژی:(بۆ دیارکرنا بەربژاران بۆ ڤان ھەلبژارتنان، مە رێنمایی و پیڤەر و فلتەرێن نوو یێن داناین و دێ د وان فلتەران را دەرباز بن، ژ وانا بەلاڤکرنەکا دادپەروەرانە بیت ژ لایێ جوگرافی ڤە و پێدڤیە کەسێن بسپۆر و ژێھاتی و شارەزا بن و ل دەڤ خەلکی د خۆشتڤی و پاقژ بن و شەعبیەتەکا باش ھەبیت، لەورا مە دڤێت یێن ئەڤ جارە د جیاواز بن و یێن گەلەکێن باش ھەلبژێرین).
ل دۆر پشکداریکرنا وان ل دەڤەرێن کوردستانی یێن دەرڤەی ئیدارا ھەرێما کوردستانی، ناڤبری گۆت:(ژ بلی پارێزگەھا کەرکووک، ل دەڤەرێن دی گەلەک ب ھێز دێ پشکداریێ کەین و دێ بزاڤێ کەین زۆرترین کورسیان ب دەست خوە ڤە بینین).
ئەڤرۆ نيوز:
جێگرێ وەزیرێ دەرڤە یێ ئەمریکا پشتی دوھی سەرەدانا عیراقێ کری بڕیارە ئەڤرۆ سەرەدانا ھەولێرێ بکەت و ل گەل نێچیرڤان بارزانی سەرۆکوەزیرێن ھەرێما کوردستانێ کۆم بیت.
جۆن سولیڤان دوھی ل بەغدا داخواز ژ سەرکردێن عیراقێ کر سەرەدەریێ ل گەل نێچیرڤان بارزانی و جێگرێ وی بکەن و کێشێن گرێدای مووچێ فەرمانبەرێن ھەرێمێ چارە بکەن و دورپێچا ل سەر گەشتێن نێڤدەولەتی یێن فرۆکخانێن ھەرێمێ ژی را کەن.
سولیڤان راگەھاند، پشتەڤانیێ ل دیالۆگا د ناڤبەرا ھەولێر و بەغدا دا دکەت و پێشڤەچوونێن باش د ڤی واری دا یێن پەیدا بووین و گۆت: (بەغدا ھان ددەم بۆ گەھشتنا رێککەفتنەکا کریاری ل گەل ھەرێما کوردستانێ).
جێگرێ وەزیرێ دەرڤە یێ ئەمریکا ئاشکرا ژی کر وەلاتێ وی پشتەڤانە کو ھەلبژارتنێن عیراقێ د دەمێ خوە یێ قانوونی دا بھێنە ئەنجامدان و عیراقیێن دەربەدەر ژی بشێن پشکداریێ تێدا بکەن.
ئه‌ڤرۆ نيوز:
ژ ئەگەرێ مەترسیا ڤەگوھاستنا ئەنفلۆنزا بالندان بۆ ناڤ ھەرێمێ، بڕیار ھاتە دان ژ نوکە و پێڤە ئینانا مریشکان بۆ ناڤ ھەرێمێ بھێتە قەدەغەکرن، بەرپرسەک ژی رادگەھینیت کو جڤاتا وەزیران کۆژمێ 470 ملیۆن دیناران بۆ رێگریکرن ل ڤێ نەخۆشیێ تەرخان کرینە.
میقداد ئیبراھیم، رێڤەبەرێ گشتی یێ ساخلەمیا پەلەوەران ل وەزارەتا چاندن و ژێدەرێن ئاڤێ ل ھەرێما کوردستانێ راگەھاند کو ئەنفلۆنزا بالندان ل ھندەک باژێرێن عیراقێ و وەلاتێن دوروبەر بوویە جھێ مەترسیێ بۆ سەر ھەرێما کوردستانێ ژی.
رێڤەبەرێ گشتی یێ ساخلەمیا پەلەوەران گۆتژی: “دا کو ئەنفلۆنزا بالندان بۆ ناڤ ھەرێمێ نەھێتە ڤەگوھاستن، د قووناغا ئێکێ دا ب ھەموو رەنگەکی ئینانا بەروبوومێن بالندان ل عیراقێ و وەلاتێن دەوروبەری ھەرێمێ ھاتیە قەدەغەکرن، حوکمەتا ھەرێمێ ژی 470 ملیۆن دینار بۆ روو ب رووبوونا ڤێ نەخۆشیێ تەرخان کرینە”.
دەربارەی ھەبوونا ئەوێ نەخۆشیێ ل ھەرێما کوردستانێ ئەوی بەرپرسێ وێ وەزارەتێ ئاماژە ب وێ چەندێ ژی کر کو ھەتا نوکە چو حالەت ل چو جھێن ھەرێما کوردستانێ نە ل مرۆڤان و نەژی ل بالندان نەھاتیە تۆمارکرن.
ھەڤدەم دوھی رۆژا ئێکشەمبی 28ی کانوونا دویێ وەزارەتا ساخلەمیێ ل حوکمەتا ھەرێما کوردستانێ راگەھاندنەک بەلاڤکر و تێدا ئاشکەرا کر کو چو حالەتێن ئەنفلۆنزا بالندان ل ھەرێما کوردستانێ نەھاتینە تۆمارکرن و ھەموو رێیێن پێدڤی بۆ رێگریکرن ل ڤێ نەخۆشیێ گرتینە بەر.
نيشاندان
