ئه‌ڤرۆ نيوز:

چێکرنا رێیا گشتی ژ دھۆک بۆ ھەولێر و ئاڤرابوونێن سالا بۆری مەترسی ل سەر پرا ‏چەمەی ل ناحیا رۆڤیا ل قەزا بەردەرەش پەیداکریە و رێڤەبەریا سەخبێریا رێک و پرا ‏ژی ب ھووری سەرەدەریێ ل گەل ڤێ مەترسیێ دکەن، وەلاتی و شۆفێر ژی ‏نەسەخبێرکرنا پرا “چەمە” ل دووڤ ستاندەرەکێ تایبەت یێ رێک و پرا د مەترسی ‏دبینن ژ ھاتنا بارانەک زۆر ببیتە ئەگەرێ دووبارە ژناڤ برا پرا چەمە.‏

محەمەد حەمید، ئێک ژ شوفێرێن تەکسی کوردستان بۆ رۆژناما ئەڤرۆ دیار کر، رۆژانە ‏ھاتن و چوونا من ل سەر پرا “چەمە” د رۆژانێن بارانی وی دا مەترسی دبینن، ژ بەر ‏کو ل دووڤ ستاندەرێ تایبەت ب پران ڤە نەھاتیە نووژەنکرن پپێدڤیە پێداچوون ل ‏دووڤ دووبارە دروستکرنا ڤێ پرێ بھێت کرن، ل دووڤ شێوازەکێ باش کو دووبارە ‏لافاو بارانێن ھێز ئەڤێ پرێ تێک نەدەن ببیتە ئەگەرێ گرتنا ڤێ رێیا یان مەترسیی ل ‏سەر ژیانا وەلاتیان دروست بیت، داخواز ژ جھێن ب رێک و پرا ڤە گرێدایی دکەین کو ‏کاربکەن ژ بۆ دووبارە دروستکرنا ڤێ پرێ بەری زیانێن گیانی دروست بن.‏

ژلایەکێ دی ڤە عیسا ئەحمەد، ئێک ژ وەلاتیێن وێ دەڤەرێ بۆ رۆژناما ئەڤرۆ دیار کر، ‏ھەر رۆژەکا باران بیت مەترسی ل دەڤ وان گوندێن دەوروبەر دروست دبیت، ژبەر ‏ھەبوونا لەھیان و بارانێن بھێز، ژ بەر کو چاوانیا خەلکێ گوندێن نێزیک دەربازی لایێ ‏دی یێ رووباری دبن ھەر وەختەکی لەھی رابن ئەو کەس نەشێن ب ئاسانی بزڤرنە ‏مالێن خوە، ئەم نزانین جھێن شولەژێ بۆچی ب ئێکجاری ڤێ پرێ دروست ناکەن ‏دبینین چەند مەھەکا ئامیرێن وان کاری ل سەر دکەن بۆ ھەیامەکێ جارەک دی ‏دووبارە دھێتە تێک دان.‏

ناڤبری دیار کر کو ب دەھان وەلاتیان فروشگەە ب خوە ل سەر پرێ دروست کرینە، ‏دەمێ رۆژێن باران دھێت بەردەوام چاڤێ وان ل پرێ یە، ژبەر مەترسیا ژناڤ چوونێ.‏

ئەندازیارێ شارەزا دێوالی حەمێ بریندار، رێڤەبەرێ سەخبێریا رێک و پرا ل پارێزگەھا ‏دھۆکێ بۆ رۆژناما ئەڤرۆ دیارکر، ماوەیێ سالەکێ پتر رێڤەبەریا مە کار د چێکرنا رێیا ‏دھۆک بۆ ھەولێر دا دکەت کو رێیەکا نوویە دھۆکێ ب ھەولێرێ ڤە گرێددەت و یا ‏ستراتیژیە، بەلێ ئەڤ رێیە د رووبارێ چەمەی را دبۆریت و پرەک دێ ل سەر ھێتە ‏چێکرن، بەلێ ئەو بارانێن ل دووماھیا زڤستانا سالا بۆری بارین، گەلەک ب ھێز بوون و ‏مەترسی ل سەر چێکرنا وێ پرێ پەیداکرینە.‏

دێوالی حەمێ بریندار ئەو یەک ژی ئاشکرا کر، ئەم وەکو رێڤەبەریا سەخبێریا رێک و ‏پرا ل پارێزگەھا دھۆکێ گەلەک ب ھووری سەرەدەریێ ل گەل وێ مەترسیێ دکەین و ‏د ئەڤ سالە دا رێڤەبەریا مە دوو جاران ب کارێ پاقژکرنا وی رووباری رابوویە و ‏ڤەدیتنەک ژی بۆ رێیا ئاڤا رووبارێ چەمەی ھاتینە درۆستکرن و بۆ جھێن پەیوەندیدار ‏ھاتیە بلندکرن و گۆت: پێدڤیە ب زووترین دەم ئەڤ پرۆژە ب دووماھی بھێت، بەری ‏باران و ئاڤرابوون دژوار ببنن، دا کو چو مەترسیێن دی ل سەر رووباری پەیدانەبن.‏