ئه‌ڤرۆنيوز:
يانا به‌رشه‌لونا يا ئيسپانى دبه‌ياننامه‌كێ دا كو ل سه‌ر مالپه‌رێ خوه يێ فه‌رمى به‌لاڤكريه ره‌تكر كو نێزيك ببيت ژ گرێدانا گرێبه‌سته‌كێ ل گه‌ل ئه‌نتوان گريزمان ياريكه‌رێ هه‌لبژارتيێ فه‌ره‌نسا و يانا ئه‌تله‌تيكۆ مه‌دريد.
يانا به‌رشه‌لونا دياركر” وان پێزانينێن د هنده‌ك ده‌زگه‌هێن راگه‌هاندنێ دا به‌لاڤبووين ره‌ت دكه‌ين كو گرێزمان دێ هێته يانا مه”.
ئه‌ڤرۆنيوز:
سه‌ركرده‌كێ ده‌وله‌تا قانوونێ ونێزيك ژ حه‌يده‌ر عه‌بادى راگه‌هاند، ل نيزيك گه‌ره‌كا نوو وبه‌رفره‌هتر يا دانوستاندنان دناڤبه‌را حوكمه‌تا عيراقێ وحوكمه‌تا هه‌رێما كوردستانێ ب شێوه‌كێ فه‌رمى تر دێ ده‌ستپێكه‌ن.
په‌رله‌مانتار عه‌لى عه‌لاق كو ئێكه ژ سه‌ركردێن ده‌وله‌تا قانوونێ ونێزيكى سه‌رۆك وه‌زيرێن عيراقێ يه گۆت” عه‌بادى بزاڤێ دكه‌ت دچارچۆڤێ دستوورێ عيراقى دا كێشان ل گه‌ل هه‌رێما كوردستانێ چاره بكه‌ت”.
گۆت ژى” هه‌موو شايستێن دارايى يێن هه‌رێما كوردستانێ، ب مووچه‌ى ژى ڤه، وه‌كو پارێزگه‌هين دى يێن عيراقێ دێ هێنه مه‌زاختن، ته‌نها مه‌رج ژى ئه‌وه كو هه‌رێما كوردستانێ پێگيريێ ب وان ئه‌ركان بكه‌ت كو دچارچۆڤێ عيراقێ دا ل سه‌ر ملێن وێ نه”.
عه‌لى عه‌لاق دداخۆيانيا خوه‌ا بۆ ده‌زگه‌هێن راگه‌هاندنێ ل عيراقێ دياركر” دانوستاندنێن لژنێن ته‌كنيكى وديدارا عه‌بادى ونێچيرڤان بارزانى دانوستاندن يێن گه‌هاندينه قۆناغه‌كا باش وگه‌شه‌كا ڤه‌كرى دناڤبه‌را وان دا يا دروست كرى”.
ئه‌ڤرۆنيوز:
شيره‌تكارێ بلند يێ فه‌رماندێ گشتيێ هيزێن چه‌كدارێن ئيرانى، ليوا يه‌حيا ره‌حيم سه‌فه‌وى، راگه‌هاند، ئيران يا بزاڤێن پێكئينانا هه‌ڤپه‌يمانيه‌كا له‌شكرى ل گه‌ل عيراقێ وپاكستانێ دژى تيرۆرێ ل به‌رامبه‌ر هه‌ڤپه‌يمانيا ئه‌مريكى.
ل دووڤ ئاژانسا (ته‌سنيم) يا ئيرانى، ليوا سه‌فه‌وى گۆت” ئه‌مريكا داعش يا دروستكرى وسعوديێ وئيماراتێ وقه‌ته‌رى پشته‌ڤانيا دارايى وله‌شكرى يا داعشێ كريه وتوركيا وئوردنێ مه‌شق پێ كريه”.
گۆت ژى” داعش ل عيراقێ وسووريێ په‌قيژك بوو وهاته په‌قاندن وقوربانيێن حوكمه‌تێن عيراقێ وسووريێ وپشته‌ڤانيا شيره‌تكارى يا ئيرانێ وهاريكاريا رووسيا ئه‌گه‌رێن شكه‌ستنا داعشێ بوون”.
وى به‌رپرسێ له‌شكريێ ئيرانى دياركر” ستراتيژيه‌تا ئه‌مريكا بۆ سالا 2018 پاراستن ولاوازكرنا ده‌ڤه‌رێن شه‌ر لێ بۆ بكارئينانا وان ژلايێ ئابوورى وسياسى ڤه”.
خوياكر ژى” ئيرانێ ل به‌ره هه‌ڤپه‌يمانيه‌كێ ل به‌رامبه‌ر هه‌ڤپه‌يمانيا ئه‌مريكى پێكبينيت وپێدڤيه به‌ر ب گريدانا هه‌ڤپه‌يمانيه‌كێ ل گه‌ل عيراقێ وپاكستانێ ڤه بچين بۆ به‌هنگاريا تيرۆرێ وتوندره‌ويێ”.
ئاماژه دا ژى” 20 ليوايێن حه‌شدا شه‌عبى ل گه‌ل له‌شكرى ل عيراقێ سه‌قامگيريێ دابين دكه‌ن”.
ل دووماهيێ گۆت” سعوديه بزاڤێن بده‌ستڤه‌ئينانا شيان وجهان بكه‌ت ب رێيا ده‌ستێوه‌ردانێ ل عيراقێ ويه‌مه‌نێ ولوبنانێ كو چو جاران ئه‌ڤ چه‌نده دروست نابيت وهه‌ڤركيێن هه‌رێمى ونێڤده‌وله‌تى بۆ چه‌ندين سالان دێ دبه‌رده‌وام بن”.
ئەڤرۆ نیۆز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:ئەڤرۆ وەلاتیەک دروودانەکا ترافیکێ دا برینداربوویە.
ناڤهاتی زێدەتر گوت:ئەڤرۆ سێشەمبی 2018/1/23 ل دەمژمێر (2:00) پشتی نیڤرۆ ل سەر جادا سەرەکی یا گەلیێ زاخۆ و ل نێزیک گوندێ حەسەن ئاڤا ترۆمبێلەکا تایبەت تویوتا جیب مونیکا رەنگێ رەش خوە ل کلبستونێ نیڤا جادێ دایە و دئەنجامێ وێ روودانێدا کەسەک بریندار بوویە ،هه‌روه‌سا زیانێن ماددی یێن به‌رچاڤ ژی ب ترۆمبێلێ كه‌فتینه.
ئەڤرۆنيوز:
دلاوەرئاژگەیی نوونەرێ حوكمەتا هەرێما كوردستانێ ل ئێكەتیا ئورۆپی راگەهاند، ئێكەتیا ئورۆپی ستراتیژیەتا نوو ل دۆر عیراقێ دارێشت وپەسەندكر.
دلاوەر ئاژگەیی دبەرپەرێ خوە ل سەر تۆرا جڤاكی یا فەیسبووكی بەلاڤكر” دخالا پێنجێ دا دستراتیژیەتا نوو یا ئێكەتیا ئورۆپی ل دۆر عیراقێ، داخواز ا دەستپێكرنا دانوستاندنان دناڤبەرا حوكمەتا عیراقێ وحوكمەتا هەرێما كوردستانێ دكەت ل دووڤ دستوورێ بەردەوامێ عیراقی”.
دیاركر یە” ئێكەتیا ئورۆپا دووپاتیێ ل سەر مانا قەوارێ هەرێما كوردستانێ دكەت وداخوازا بجهئینانا هەموو برگە ومادێن دستووری دكەت، ژبلی داخوازیا رێككەفتنا بەغدا وهەولێرێ ب جۆرەكی عیراق وهەرێما كوردستانێ ژێ مفادار بن”.
ئه‌ڤرۆنيوز:
فراكسيۆنا پارتى ل په‌رله‌مانێ كوردستانێ ئه‌ڤرۆ سێشه‌مبى 23/1/2018، داخواز ژ سه‌رۆكاتيا په‌رله‌مانى كر كۆمبوونه‌كا نه ئاسايى يا په‌رله‌مانى هيرشێن ل سه‌ر عفرينێ دهێنه كرن، بهێته گريدان.
فراكسيۆنا پارتى ديموكراتى كوردستان ل په‌رله‌مانێ كوردستانێ داخوازه‌كا فه‌رمى ب ئيمزايێن سرۆكێ فراكسيۆنێ وجێگرا وى و9 ئه‌ندامێن فراكسيۆنێ، ئاراسته‌ى سه‌رۆكاتيا په‌رله‌مانێ كوردستانێ كريه وتێدا هاتيه” داخوازێ ژ هه‌وه دكه‌ين ب گۆره‌ى برگا ئێك ژ مادێ 6 يێ په‌يره‌وێ ناڤخوه‌يێ په‌رله‌مانێ كوردستانێ، روونشتنه‌كا نه‌ئاسايى بهێته ئه‌نجامدان ل سه‌ر وان هێرشێن دهێنه كرن ل سه‌ر خه‌لكێ سڤيلێ عفرينێ ل رۆژئاڤايێ كوردستانێ”.
ئه‌ڤرۆنيوز:
رێڤه‌به‌رێ گشتيێ ساخله‌ميێ ل پارێزگه‌ها دهۆكێ، ئه‌ڤرۆ سێشه‌مبى 23/1/2018، راگه‌هاند، قەیرانا دارایی یا سەخت کارتێکرنەکا گه‌له‌ك نەرینی ل سەر پلانێن مە ھەبوویە و ب تایبەت ژی راوەستاندنا پرۆژێن ستراتیژی بۆ ب ھێزکرنا ژێرخانا ساخلەمیێ.
نزار عسمه‌ت رێڤه‌به‌رێ گشتيێ ساخله‌ميێ ل پارێزگه‌ها دهۆكێ دچارچۆڤێ كونفرانسێ سالانه يێ رێڤه‌به‌ريا گشتى يا ساخله‌ميا دهۆكێ گۆت” دومدرێژى وسه‌ختيا قه‌يرانين دارايى وئاكامێن شه‌رێ داعشێ دده‌مێ سێ سالێن بۆرى دا شيانين مه سنوردار كرينه وكارێ مه ژ ئاڤه‌دانكرنێ وگه‌شه‌پێدانێ گوهارتيه بۆ به‌رهنگاريا قه‌يرانان وبه‌رده‌واميا پێشكێشكرنا خزمه‌تێن ساخله‌مى يێن گرنگ”.
نزارى گۆت ژى” قه‌يرانا دارايى بوويه ئه‌گه‌رێ راوه‌ستاندنا پرۆژێ ئاڤاكرنا پێنج نه‌خوه‌شخانان ل پارێزگه‌ها دهۆكێ ب سه‌رجه‌مێ 900 ته‌ختان و لاوازکرنا پرۆژێن پەرەپێدان و چاکسازیکرنێ د ساخلەميێ دا، وەکو ژێک جۆداکرنا کەرتێ تایبەت و گشتی، ھەروەسا سیستەمێ بیما ساخلەميێ و ئەلکترۆنیکرنا پێزانێنێن ساخلەمیێ و ئەنجامدانا ڤەکۆلینان و پیدڤیا ژێرخانا ساخلەمیێ بۆ سەخبیریکرنێ و چاکسازیکرن و ئێدارەکرنا دەرمان و پێدڤى و ئامیرێن نوشدارى”.
دياركر ژى” قه‌يران بوويه ئه‌گه‌رێ راوەستاندنا پرۆژێ پەرەپێدانا مرۆڤی کو پێک دھات ژ کورسێن خاندنا تایبەتمەندیێن ھو وربينيێن نوشدارى بۆ 50 نوشدارێن تایبەتمەند و پەرپێدانا شیانێن پەرستاری بۆ 500 پەرستاران”.
ئەڤرۆ نیوز ، نەوزاد هلوری:
ژبەر ئەگەرەکێ تەکنیکى ل چەند روژێن بۆری بهایێ غازێ ب رێژەیەکا بەرچاڤ ل قه‌زا سۆران بلند بوو، پشتی چەندین گازندە ل سەر بلندبوونا بهایێ قەنیتێ غازێ هاتیەکرن ، لایەنێن شولەژێ بریاردا کو بهایێ قەنینێ غازێ بۆ 7500 دیناران ئەرزان بیت.
لژنا ئابووریا قەزا سۆران دياركر کو ژبەر کێشەیەکا ، ل چەند رۆژێن بۆری هاتنا غازێ بۆ سوران گیروبو و گوت” لژنا ئابووریا سۆران ل گەل لایەنێن شولەژێ هەر زوو دەست ب چارەسەرکرنا کێشا غازێ کر ونها جاره‌كادى بهایێ قەنینێ غازێ بۆ 7500 دینار”.
زێدەتر گوت”رۆژا شەمبیا بۆری، دو هزار و 600 قەنینێن غازێ و ئەڤرو ژی دو هزار و 600 قەنینێن دى يێن گەهشتینە سۆران و نها چو قەیرانێن غازێ ل سۆران نینن و هەر کەسێ سەرپێچیەکێ بکەت دێ هێتە سزادان”.
ئه‌ڤرۆ نیوز ، زنار تۆڤى:
خانما شانۆكار كه‌ڤال سدقى كو ماموستایا زانكۆیا دهۆكێ یه ل فاكۆلیتا زانستێن مرۆڤایه‌تى و پشكداره د شانۆگه‌ریا “دێ ل بن بارانێ چاڤه‌رێ كه‌ین”،كو ئه‌ڤ شانۆگه‌ریه ژ نڤێسین و ده‌رهێنانا هونه‌رمه‌ندێ كورد ئیحسان ئۆسمانیه و به‌رهه‌مێ شانۆیا وه‌لاتێ ئه‌لمانیا یه ل باژێرێ ڤیزبادن ل سالا 2017 و د دیداره‌كێدا بۆ ئه‌ڤرۆ نیوز دیاركر:كو شانۆیا “دێ ل بن بارانێ چاڤه‌رێ كه‌ین” ئێك ژ 38 شانۆیێن هه‌ره باشه یێن سالا 2017 ل وه‌لاتێ ئه‌لمانیا و ئه‌ڤ شانۆگه‌ریه هاتیه به‌ربژێركرن بۆ وه‌رگرتنا ناسناڤێ 10 ژ بلندترین كارێن شانۆیێ ل هه‌ر سێ وه‌لاتێن نه‌مسا و ئه‌لمانیا و سویسرا،گوت ژى:مالپه‌رێ ناڤدارێ ئه‌لمانى یێ ب ناڤێ “ره‌خنا شه‌ڤێ” رابوویه ب هه‌لسه‌نگاندنا وان شانۆگه‌ریان و هه‌روه‌سا هه‌موو هه‌نه‌رمه‌ند و هونه‌ردوست ل سه‌رانسه‌رى جیهانێ دشێن پشكداریێ د ده‌نگدانێ دا بكه‌ن،دیسا ئه‌ڤه بۆ جارا ئێكێ یه كو هونه‌رمه‌نده‌كێ شانۆكار یێ كورد دهێته هه‌لبژارتن بۆ وه‌رگرتنا ڤى خه‌لاتى،له‌ورا ده‌نگدانا خه‌لكێ مه یێ كوردستانى دێ ڤێ شانۆگه‌ریێ هه‌لبژێریت ئێك ژ 10 باشترین شانۆگه‌ریا و هه‌روه‌سا ماوێ ده‌نگدانێ ژى هه‌تاكو 24/1/2018 یه.
ئه‌ڤرۆ نیوز ، زنار تۆڤى:
رۆژناما شه‌رقولئه‌وسه‌ت یا عه‌ره‌بى دایه دیاركرن،كو ئه‌وا نه‌دهاته چاڤه‌رێكرن د چه‌ند رۆژێن بوریدا هاته روودان،كو ئه‌و ژى ڤه‌كێشانا حه‌شدا شه‌عبى بۆ ژ هه‌ڤپه‌یمانیا عه‌بادى،ئه‌ڤه‌ژى دربه‌كێ هه‌لبژارتنان بوویه،كو ئیرانێ ل عه‌بادى داى،ڤێ چه‌ندێ وه‌كریه كو موقته‌دا سه‌درى و هێزێن سوننى ژى باوه‌رى ب عه‌بادى نه‌مینیت،هه‌روه‌سا پێشتر عه‌بادى مه‌رج ب سه‌ر وان لایه‌نان دا د سه‌پاندن،لێ نوكه ئه‌و یێ مه‌رجان بۆ عه‌بادى ددانن.
هه‌روه‌سا وێ رۆژنامێ دیاركریه،ئیرانێ دربه‌كێ كۆژه‌ك بۆ هه‌لبژارتنان ل عه‌بادى دایه،دیسا هه‌تاكو به‌رى چه‌ند رۆژان ژى عه‌بادى خواستى ترین كه‌سایه‌تیێ سیاسى بوو،كو لایه‌نان دڤیان هه‌ڤپه‌یمانیێ ل گه‌ل دا رابگه‌هینن و وى ژى ژلایێ خوه‌ڤه،ئه‌و پابه‌ند دكرن ب كۆمه‌كا مه‌رجان،لێ ل ڤان رۆژێن بوریدا ئه‌و هه‌ڤپه‌یمانیا كو عه‌بادى راگه‌هاندى،به‌ره‌ف هه‌رفتنێ ڤه‌چوو،ئه‌و هاوكێشه ژى به‌رۆڤاژى بوو،نوكه عه‌بادى یێ ل دووڤ لایه‌نێن سیاسى دگه‌ریت بۆ گرێدانا هه‌ڤپه‌یمانیێ ل گه‌لدا،لێ ئه‌و لایه‌ن یێ مه‌رجان ل سه‌ر عه‌بادى دسه‌پینن.
هه‌ر چه‌نده چاڤدیرێن سیاسى و شیكارى هێشتا نه‌شیاینه وى وێنه‌ى ب ته‌مامى ب گه‌هینن،به‌لێ ئه‌وا روون بووى ئه‌وه،كو ئیرانێ ته‌لهه‌ك بۆ عه‌بادى دانایه و عه‌بادى شكاندیه،ده‌مێ كو رێك دایه حه‌شدا شه‌عبى كو ل گه‌ل عه‌بادى بچنه ناڤ وێ هه‌ڤپه‌یانیێ،لێ نوكه ئێك ل دووڤ ئێك یێ خوه ژ وێ هه‌ڤپه‌یمانیێ ڤه‌دكێشن،له‌ورا نوكه دۆخه‌ك بۆ عه‌بادى خولقاندیه،كو نزانیت چاوا ژێ ده‌ربكه‌ڤیت؟،هه‌روه‌سا عه‌بادى ژى چاڤه‌رێ نه‌دكر،كو هه‌ڤپه‌یمانیا فه‌تح یا میلیشیاتێن شیعى بچیته ده‌رڤه‌ى هه‌ڤپه‌یمانیا نه‌سر،له‌ورا نوكه ئه‌و وێنه دێ روون بیت،كو به‌رى نوكه ئه‌وان ل گه‌ل نورى مالكى هه‌ڤپه‌یمانى ب سپۆنسه‌ریا ئیرانێ گرێدایه،لێ چووینه ناڤ وێ هه‌ڤپه‌یمانیا ل گه‌ل عه‌بادى و پاشى هاتینه ژ ده‌رڤه،له‌ورا ب تنێ ئارمانجا وان وه‌شاندنا دربه‌كێ بوو،كو ل عه‌بادى بده‌ن بۆ هه‌لبژارتنان.
وێ رۆژنامێ دیاركریه ژى،نوكه عه‌بادى یێ بزاڤێ دكه‌ت ل گه‌ل وان لایه‌نێن سیاسى،یێن كو ب ئه‌گه‌رێ هه‌ڤپه‌یمانیێ ل گه‌ل میلیشیاتێن حه‌شدێ ژ ده‌ست دایین،لێ موقته‌دا سه‌در و هێزێن سوننى و باسکێن مه‌ده‌نى،كو د هیچ بارۆدوخه‌كێدا هه‌ڤپه‌یمانیێ ل گه‌ل نورى مالى گرێناده‌ن،له‌وما د ڤێرێ ژى دا دێ ئه‌ركێ عه‌بادى ب زه‌حمه‌ت كه‌ڤیت،چونكى به‌رى نوكه وى ئه‌و پشتگوه خستبوون،ب ئه‌گه‌رێ میلیشیاتێن حه‌شدا شه‌عبى،ئه‌ڤه ژى وه دكه‌ت،كو ل جهێ عه‌بادى مه‌رجان ل سه‌ر وان بدانیت،دێ سازشێ بۆ وان كه‌ت.
عه‌دنان عیسا سه‌ركرده‌یه‌كه ل هه‌ڤپه‌یمانیا مه‌ده‌نى دیاركریه،كو عه‌بادى په‌یوه‌ندى ب وان كریه،به‌لێ ده‌مێ وى هه‌په‌یمانى ل گه‌ل میلیشیاتێن حه‌شدا شه‌عبى گرێداین،وان هیڤى ب عه‌بادى نه‌مایه،له‌ورا ڤه‌گه‌ریانا نوكه بۆ لایێ هه‌ڤپه‌یمانیا مه‌ده‌نى و موقته‌دا سه‌درى د ده‌مه‌كێ دایه،كو وان باوه‌رى پێ نه‌مایه،ئه‌ڤه ژى وه دكه‌ت كو عه‌بادى روو ب روو ئاسته‌نگێن مه‌زن ببیت،هه‌كه مه‌رج ژى ل سه‌ر بهێنه دانان،هه‌روه‌سا گوتیه”هه‌كه عه‌بادى مه‌رجان قه‌بوول نه‌كه‌ت،دێ روو ب روو شكه‌ستنه‌كا مه‌زن بیت،به‌لێ بزاڤێن وى د به‌رده‌وامن بۆ گرێدانا هه‌ڤپه‌یمانیه‌كێ”،لێ پشتى خوه ڤه‌كێشانا میلیشیاتێن حه‌شدا شه‌عبى و موقته‌دا سه‌درى،نوكه نورى مالكى دڤێت هه‌موو رێیان ل هه‌مبه‌ر عه‌بادى بگریت و نه‌هێلیت چو هه‌ڤپه‌یمانیان دروست بكه‌ت،به‌لێ چاڤدێر دبێژن،یا ب زه‌حمه‌ته نورى مالكى و موقته‌دا سه‌در نێزیكى ئێك ببن.
هه‌ڤده‌م عادل زۆبێعى چاڤدێره‌كێ سیاسیه دبێژیت:عه‌بادى خوه ئێخستیه ره‌وشه‌كێ،كو كه‌س حه‌سوودیێ پێ نابه‌ت و دیسا وى چاڤه‌رێى زیانه‌كا مه‌زن یا چاڤه‌رێنه‌كرى كریه،له‌ورا بۆ گرێدانا هه‌ڤپه‌یمانیا نوو،وى پێدڤى ب ده‌مى و سازشكرنێ هه‌یه،لێ گرێدانا هه‌ڤپه‌یمانیێ دناڤبه‌را مالكى و سه‌درى دا یا دووره،چونكى كۆمه‌كا دوسه‌یان دناڤبه‌را وان دا هه‌نه و ب ساناهى ناهێنه چاره‌سه‌ر كرن،لێ پرانیا بوچوونان دبێژن،ئیران ل پشت هه‌لوه‌شاندنا هه‌ڤپه‌یمانیا نه‌سر بوو،ژبۆ شكاندنا عه‌بادى،لێ بۆ جۆدابوونا حه‌شدا شه‌عبى بوچوونه‌كا دیتر هه‌یه،كو هه‌ڤپه‌یمانیا فه‌تح یا حه‌شدێ،كه‌یف ب چاره‌سه‌ریا عه‌مار حه‌كیمى نه دهات،له‌ورا گرێدانا هه‌ڤپه‌یمانیێ ل گه‌ل عه‌مار حه‌كیمى ژ لایێ عه‌بادى ڤه بۆ هوكارێ چوونا وان بۆ ژ ده‌رڤه،هه‌روه‌سا نوكه عه‌مار حه‌كیم ب ئه‌گه‌رێ شكه‌ستنا عه‌بادى دهێته دانان.
ئاماژه ب هندێ ژى دایه،نوكه ل عێراقێ 200 حزبێن سیاسى ب سه‌ر 27 هه‌ڤپه‌یمانیان دا دابه‌شبووینه،ل دوماهیك جار ژى كۆمسیۆنا بلند یا سه‌ربه‌خۆ یا هه‌لبژارتنان پێكئینانا 27 هه‌ڤپه‌یمانیان راگه‌هاندیه،كو ژ 143 پارت و لایه‌نێن سیاسى پێكهاتیه و دێ پشكداریێ د هه‌لبژارتنێن په‌رله‌مانێ عێراقێ دا كه‌ن،لێ بۆ جڤاتێن پارێزگه‌هان دێ زێده‌تر ژ 200 حزبان پشكداریێ تێدا كه‌ن،له‌ورا دڤێت لیستا ناڤێن پالێوراوان هه‌تاكو 10/2/2018 بهێنه پێشكێش كرن،هه‌روه‌سا په‌رله‌مانێ عێراقێ ژ 328 كورسیان پێكهاتیه و ب سه‌ر پارێزگه‌هان دا هاتیه دابه‌شكرن و هه‌لبژارتن دێ ب بازنێ فره‌ه برێڤه‌چن،هه‌روه‌سا ل سه‌رانسه‌رى عێراقێدا 24 ملیۆن كه‌سان مافێ ده‌نگدانێ هه‌یه.
دیسا پشتى راگه‌هاندنا هه‌ڤپه‌یمانیێ دناڤبه‌را عه‌بادى و هادى عامرى دا سه‌ركردێ میلیشیاتێن حه‌شدا شه‌عبى،ژ پشت ڤه عه‌بادى هه‌ڤپه‌یمانى ل گه‌ل عه‌مار حه‌كیمى گرێدایه،له‌ورا حه‌شدا شه‌عبى خوه ڤه‌كێشایه،هه‌روه‌سا پشتى خوه ڤه‌كێشنا هه‌ر ئێك ژ رێكخراوێن به‌در،قه‌واره‌یا سادیقون یا سه‌ر ب عه‌سائیب ئه‌هل حه‌ق،كه‌تائیب حزبوللا،بزاڤا ئسلامى ل عێراقێ،كه‌تائیب جوندول ئیمام،بزاڤا سدق و عه‌تا،حزبا ته‌لیعه یا ئیسلامى،سه‌رایا خوراسانى،قه‌واره‌یا مونته‌سیرون،كه‌تائیب سه‌یدولشوهه‌دا،بزاڤا جیهاد و بینا،سه‌رایا جیهاد،قه‌واره‌یا وه‌فا،جڤاتا بلند یا ئیسلامى،رێكخراوا عه‌مه‌ل یا ئیسلامى،بزاڤا 15 شه‌عبانێ و كه‌تائیب ئیمام عه‌لى،كو زێده‌تر ب هه‌ڤپه‌یمانیا فه‌تح یا میلیشیاتێن چه‌كدارى یێن حه‌شدێ دناسیارن،لێ وێنێ گشتى یێ نوكه ب وى ئاراسته‌ى دا دچیت،كو هه‌ڤپه‌یمانیا فه‌تح یا حه‌شدێ دێ ل گه‌ل ده‌وله‌تا قانوونێ ب سه‌رۆكاتیا نورى مالكى هه‌ڤپه‌یمانیێ راگه‌هینن،له‌ورا نوكه عه‌بادى یێ ب ئاراسته‌یا سونیان دچیت و وى دڤێت سه‌لیم جبوورى و هه‌روه‌سا ئه‌یاد عه‌لاوى ژى هه‌ڤپه‌یمانیێ ل گه‌ل وى رابگه‌هینیت،لێ ژێده‌ره‌كێ ژ هه‌ڤپه‌یمانیا سائیروون كو ره‌وتێ سه‌در سه‌ركردایه‌تیێ لێ دكه‌ت،ره‌تكریه كو هه‌ڤپه‌یمانیێ ل گه‌ل عه‌بادى گرێبده‌ن،هه‌ر چه‌نده ئه‌و ژێده‌ر ترسا موقته‌دا سه‌درى ڤه‌ناشێریت،كو پشتى گرێدانا هه‌ڤپه‌یمانیێ ل گه‌ل عه‌بادى،جاره‌كا دیتر رێكێ ل به‌ر ڤه‌گه‌ریانا هه‌ڤپه‌یمانیا فه‌تح یا میلیشیاتێن شیعى بده‌ت،كو ڤه‌گه‌ریته ناڤ وێ هه‌ڤپه‌یمانیێ،ئانكو ب وێ مانایێ كو ڤه‌كێشانا وان ته‌كتیكه‌ك بیت،چونكى عه‌بادى باوه‌رى ژ ده‌ستدایه.
نيشاندان