ئەڤرۆ نیوز، نەوزاد ھلۆری:

حەیدەر عەبادی شاندێ حوکمەتا ھەرێما کوردستانێ ب شاندێ ھەرێما کوردستانێ بناڤکر ، چاڤدێرەکێ سیاسی ددەت دیارکرن کو حوکمەتا ھەرێما کوردستانێ ھەتا ھەلبژاردنان شەرعیەتا خوە ھەیە و حەیدەر عەبادی ژ ئەنجامێ ریفراندۆما ھەرێما کوردستانێ ئەو یەک وەکو کارتەکا فشارێ بکارئینایە.

سامی ئەترۆشی چاڤدێرێ سیاسی و ئەندامێ بەرێ یێ پەرلەمانێ عیراقێ دیارکرکو حوکمەتا ھەرێما کوردستانێ ب سیفەتێ رسمی و لسەر داخوازیا سەروکوەزیرێن عیراقێ سەرەدانا بەغدا کریە و دیسان ب فەرمی ژی سەرەدانا ئیرانێ کریە ، ئەڤ یەک رامانە کو ب چوو شێوەیان شەرعیەتا خوە ژ دەستنەدایە و بو ئەڤرۆ نیوز گۆت: (دەما کو حەیدەر عەبادی سەروکوەزیرێن عیراقێ ھەرێما کوردستانێ شوونا حوکمەتا ھەرێما کوردستانێ بو شاندێ حوکمەتێ بکارئینایی رامان ئەو نینە کو حوکمەتێ شەرعیەتا خوە ژ دەستدایە بەلکو ھێشتا عیراق لسەر کەلەژانێن ریفراندۆما ھەرێما کوردستانێ دچیت و ئەڤ یەک تنێ کارتەکا فشارێ بوویە ، بەلکو ئەو دزانن کو ب گورەی دەستوور و قانونێ حوکمەتا ھەرێما کوردستانێ ھەیە).

زێدەتر گۆت: (حوکمەتا ھەرێما کوردستانێ ب رێیا پەرلەمانێ کوردستانێ و ب دەنگێ خەلکی ھاتیە درۆستکرن و ھەر پەرلەمان و خەلک ژی دکارن د ھەلبژاردان داب گوھرن ، ژبەرڤێ بو چوو لایەنان نینە بێژیت کو حوکمەتا ھەرێمێ نە شەرعی یە).

ئەترۆشی د درێژاھیا ئاخفتنێ، خودا دیارکر ژی کو پێدڤی یە بەغدا و ھەولێر بو چارەسەرکرنا کێشەیێن خوە پەنایێ ژ بو گوتوبێژ و دانوستاندنان ببەن و گۆت ژی: ( خەلکەکێ زور چاڤەرێ عیراق و ھەرێما کوردستانێ ژی دکە تکو بارودوخێ ژین و ژیارا وان بھێتە گوھرین و نەبیتە قوربانێ بەرژەوەندیێن بەرتەنگێن حزبی، بەروڤاژی ئەگەر بارودوخێ خەلکی نەھێتە گوھرین بێگومان دێ کەڤنە بەر سزایێ خەلکی).

ل بارا ھەلبژاردنێن عیراقێ و روولێ کوردان ، ناڤبری گۆت: ( دڤی دەمی دا زێدەتر ژ ھەر دەمەکێ کورد پێدڤی ب ئێکگرتن و ئێک ھەلویستی نە، کێمبوونا دەنگێن کوردان و چارەسەرنەکرنا کێشەیان ب تایبەتی کەرکووک و دەڤەرێن کوردستانیێن سەر ب کارگێریا ھەرێما کوردستانێ دێ کارتێکرنێن رەھا لسەر کێشا کوردان کەت، ژ بەر ڤێ گرنگە کورد ب ھزرەکا باشتر پشکداریێ د ھەلبژاردنێن عیراقێ دا بکەن).

ئه‌ڤرۆ نيوز:

نوونەرێ ئەرمەنان ل پەرلەمانێ کوردستانێ راگەھاند، بڕیارا نەدانا کورسیەکێ بۆ ئەرمەنێن ‏کوردستانێ ئەم گەلەک دلگرانکرینە، ژ بەر ڤێ چەندێ ژی ئەم دێ داخوازیا خوە گەھینینە ‏دادگەھا فیدرالی و دێ تانێ ل بڕیارا پەرلەمانێ عیراقێ دەین.‏

یەروانت نیسان ئەمینیان، نوونەرێ ئەرمەنان ل پەرلەمانێ کوردستانێ، بۆ ئەڤرۆ ئاشکرا کر، 83 ‏ئیمزایێن پەرلەمانتارێن عیراقێ بۆ زێدەکرنا کورسیەکا کۆتا بۆ ئەرمەنان ل عیراقێ ھاتبوونە ‏کۆمکرن، بەلێ ل دووماھیێ ل گۆرەی بڕیارا سەرۆکێ پەرلەمانێ عیراقێ، پێشنیازا دانا کۆتایەکێ بۆ ‏ئەرمەنان ھاتە رەتکرن.‏

ناڤبری ئاماژە ب وێ چەندێ ژی کر، کریستیان ب چو رەنگان نوونەریا مە ل پەرلەمانێ عیراقێ ‏ناکەن، ئەم ژ وان د جوداینە و چەندین سالە پەرلەمانێ عیراقێ ھاتیە دانان و ھێشتا نوونەرەک بۆ ‏ئەرمەنان نەھاتیە دانان و گۆت: “یونادەم کەنا، سەرۆکێ کوتلا رافیدەین یا کریستیانان و رائید ‏ئیسحاق، سەرۆکێ کۆتلا جڤاتا سریانی کلدانی ئاشووری ل پەرلەمانێ عیراقێ و سەرۆکێ پەرلەمانێ ‏عیراقێ دژی ھندێ بوون کۆتایەک بۆ ئەرمەنان ل پەرلەمانێ عیراقێ بھێتە دان”.‏

نوونەرێ ئەرمەنان ل پەرلەمانێ کوردستانێ خویا ژی کر کو دێ ئەو وەکو ئەرمەن ئێکسەر بەرەڤ ‏دادگەھا فیدرالی چن و دێ تانێ ل بڕیارا پەرلەمانی دەن، چونکو ئیمزا ھاتینە کۆمکرن و ھوسا ‏مافێ ئەرمەنان ب ئاشکرایی یێ دھێتە خوارن.‏

ئه‌ڤرۆ نيو:
ئەندامەکێ جڤاتا ناوەندی یا ئێکەتی نیشتیمانی کوردستان دخوازیت ئێکەتی ل ‏ھەلبژارتنێن داھاتی یێن ھەرێما کوردستانێ پشکداریێ نەکەت و ل دەرڤەی ‏پڕۆسا سیاسی بمینیت، ھەروەسا ل دۆر چارەسەرکرنا پرسێن دناڤبەرا ھەرێما ‏کوردستانێ و بەغدایێ دا ژی دبێژیت، جوداھی دناڤبەرا سەرکردەیێن عیراقێ دا ‏نینە و ھەموو وەکی سەدام حوسێنی نە.‏

عەتا سەراوی، ئەندامێ جڤاتا ناوەندی یا ئێکەتی نیشتیمانی کوردستان بۆ ‏رۆژناما ئەڤرۆ گۆت” ئێکەتی ھەموو دەمەکی دگەل ئەنجامدانا ھەلبژارتنان دایە، ‏بەلێ خواستەک یا ھەی کو ھەلبژارتن ل عیراقێ و ھەرێما کوردستانێ نەھێنە ‏ئەنجامدان و بھێنە گیرۆکرن، چونکی ھەکە ئەم بەرێ خوە بدەینە عیراقێ، ‏دەڤەرێن سونە مەزھەب رەوشا ئەمنی تێدا یا جھگیر نینە و خەلکێ وان یێ ‏ئاوارەیە، ل ھەرێما کوردستانێ ژی چەندین قەیران یێن ھەین مینا قەیرانا ‏ئابووری، ئەو ھێزێن نوکە ل ھەرێما کوردستانێ دخوازن ھەلبژارتن بھێنەکرن ‏دلسۆزی نەبوون بۆ گۆھۆڕینا دەستھەلاتێ، ھندی مەرەم بۆ شکاندنا ھەڤدو”.‏

عەتای گۆت ژی” ئێکەتی دگەل رێڤەچوونا ھەلبژارتنان دایە ددەمێ خوەدا ‏سەرەرای تێبینیێن مە، بەلێ بۆچوونا من یا باشترە ئەوە ئێکەتی ل ھەلبژارتنێن ‏داھاتیێن پەرلەمانێ کوردستانێ و جڤاتێن پارێزگەھان دا پشکداریێ نەکەت و ‏وەکو ھێزەکا سیاسی ل دەرڤەی پڕۆسا سیاسی بمینیت و دەلیڤێ بدەینە ھێزێن ‏دی بچنە ھەلبژارتنان و دپڕۆسا سیاسی دا پشکداربن، ئانکو بۆ چار سالێن داھاتی ‏ئێکەتی پشکداریێ نەکەت، ھندەک سەرکردەیێن ئێکەتی دگەل ئەنجامدانا ‏ھەلبژارتنانە و ھندەک ژی بەرۆڤاژی دڤێ قۆناغێ دا دگەل ئەنجامدانا ‏ھەلبژارتنان دا نینن”.‏

ل دۆر ئاریشەیێن دناڤبەرا ھەولێرێ و بەغدا، عەتا سەراوی گۆت” ھەر کوردەکێ ‏دلسۆز ڤان سەرکردەیێن عیراقی باش دنیاسن، بۆ کوردان جوداھی دناڤبەرا ‏عەلاوی و سەدر و حەکیم و مالکی و عەبادی دا نینە، عیراق د ھەموو بیاڤاندا ‏شکەستن ئینایە و خوە ب سەرکەفتی دزانیت ھەمبەر ھەرێما کوردستانێ، ب ‏دیتنا من ھەتا ھەلبژارتنێن داھاتی بەغدا دگەل ھەرێما کوردستانێ ناگەھیتە ‏رێککەفتنێ، لەوڕا نابیت چاڤێ مە ل دەستێ بەغدا بیت و پێدڤیە ناڤمالا خوە ‏رێکبێخین نەکو چاڤێ مە ل وێ چەندێ بیت عەبادی بچیت و عەلاوی دێ ھێت ‏وئاریشەیێن مە چارەسەرکەت، ب باوەریا من عەرەب ھەر عەرەبە وجوداھیا یێن ‏نوکە دگەل سەدام حوسێنی نینە، ئەز وەکی کوردەک جوداھیێ دناڤبەرا ‏عەرەباندا ناکەم وباوەرناکەم ل سەر سێنیەکی مافێ مللەتێ کورد بدەن و ‏پێشکێشی مە بکەن”.‏

ئەڤرۆ نيوز:‏
سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ دیارکر ‏کو ئێکریزی وھەڤپەیمانی ددروستکرنا حوکمەتێ دا ل دەف ھندەکان تەکتیک ‏بوو ول دەف مە ستراتیژ بوو.‏

ئومێد خوشناو سەرۆکێ فراکسیۆنا پارتی ل پەرلەمانێ کوردستانێ دبەرپەرێ ‏خوە دا ل سەر تۆرا جڤاکی یا فەیسبووکی بەلاڤکر” ل ھەموو وەلات ‏وسیستەمەکی وشێوازەکێ ئیدارەدانێ وحوکمرانیێ، پێدڤی دکەت ھێزێن سیاسی ‏پشتەڤانیا سیاسەتا حوکمەتێ وحوکمرانیێ بکەن، بەلێ ئەوا ل کوردستانێ دھێتە ‏کرن دروست بەروڤاژی یە”.‏

ئومێدی زێدەتر گۆت” لەوما دەرکەفت ئەو رێککەفتن وھەڤپەیمانیا ددروستکرنا ‏کابینا حوکمەتێ دا ھاتیە کرن، یا سەرکەفتی ودروست نەبوو، ئێکرێزی ‏وھەڤپەیمانی ل دەف ھندەکا تەکتیک بوو و ل دەف پارتی ستراتیژ بوو”.‏

سەرۆکێ فراکسیۆنێ پارتی خویاکر” نوکە ب فەرمی ھەرسێ لایەنێن گۆران ‏وئێکگرتوو وکۆمەلە ئێکلابوون وبریارا ڤەکێشانێ ژکابینا حوکمەتێ بەرچاڤکر، ‏ئێکەتی یا مای، ئەوژی ھەتا نوکە پشتەڤانەکا دروست یا حوکمەتێ نینە، یا ‏پشکدارە ویا پشکدار نینە”.‏

ب دیتنا ئومێد خوشناوی” رێیا دروست یا ل بەر مە، جەماوەرە وسەنگێ ‏مەحەکی خەلکێ کوردستانێ یە، لەوما بلا بۆ رایا گشتی بزڤرین ودەرکەفت ‏کۆمبوون وروونشتنێن دو قۆلی وچەند قۆلی چو ئەنجام بۆ نەبوون”.‏

دیسا داخوازیەک کر وگۆت” فەرموون دا ل گەل خوە وخەلکێ خوە راست بین ‏وراستیێ بێژین، ئێدی فێلان ل خوە وخەلکی نەکەین، رێیا راست یا ل بەرمە ‏ئەوژی ھەلبژارتنە وچو بژاردەیێن دی یێن باش نینن ونابن”.‏

دیارکر ژی” بلا ئێدی بزاڤێ نەکەین بۆ پاشخستنا ھەلبژارتنان، بەلکو بەروڤاژی ‏ھەکە ئەم خەما ئاخێ ونیشتمانی وخەلکی ب ھەلگرین، دێ داخوازکەین ب ‏زووترین دەم ھەلبژارتن بھێنە ئەنجامدان ول شوونا نەخشاندنا مێزێن ‏دانوساندنان ب سێڤ ومۆز وپرتەقالان، بلا خەلک سندۆقێن دەنگدانێ ب دنگی ب ‏نەخشینن”.‏

ل دووماھیێ دبێژیت” چ ھێجەتەک بۆ پاشخستنا ھەلبژارتنان نەما وپێدڤیە ب ‏زووترین دەم ھەلبژارتن بھێنە ئەنجامدان”.‏