ئه‌ڤرۆنيوز:

پشتى ئه‌نجامدانا ديداره‌كێ ل گه‌ل حه‌يده‌ر عه‌بادى سه‌رۆك وه‌زيرێن عيراقێ ل به‌غدا، به‌رى ده‌مه‌كێ كێم نێچيرڤان بارزانى سه‌رۆك وه‌زيرێن هه‌رێما كوردستانێ گه‌هشته‌ ته‌هران.

به‌رى نوكه‌ نازم ده‌باغ، نوونه‌رێ حوكمه‌تا هه‌رێما كوردستانێ ل ئيرانێ راگه‌هاندبوو” نێچيرڤان بارزانى وشاندێ دگه‌لدا دێ ل گه‌ل مه‌زنه‌ به‌رپرسێن ئيرانى كۆمبن”.

ئه‌ڤرۆنيوز:

ل دۆر پێدانا مۆله‌تا بێ مووچه‌ وڤه‌گۆهاستنا ميلاك وراژا مامۆستايان ل وه‌رزێ دويێ يێ ئه‌ڤ ساله‌، ئێكه‌تيا مامۆستايان پێزانينين نوو ئاشكرا دكه‌ت.

عه‌بدولواحد محه‌مه‌د، جێگرێ سه‌رۆكێ ئێكه‌تيا مامۆستايان راگه‌هاند” ل ده‌ستپێكا وه‌رزێ دويێ يێ خواندنێ، ڤه‌گۆهاستنا ميلاك وراژه‌ى بۆ مامۆستايان ناهێته‌ ئه‌نجامدان، به‌لێ سه‌رپه‌رشتيارێ بسپۆر ب هه‌ماهه‌نگى ل گه‌ل سه‌رپه‌رشتيارێ كارگێرى دشێن ڤه‌گۆهاستنا راژێ ب گۆره‌ى پێدڤيا ميلاكاتا ورێكخستنا وان بجهبينن”.

ناڤبرى زێده‌تر بۆ snn گۆت” ئه‌و ڤه‌گۆهاستن دوه‌رزێ دويێ دا دێ هێنه‌ كرن، تنێ دحاله‌تێن پێدڤى دا، هه‌كه‌ نه‌، ژڤانێ ڤه‌گۆهاستنا مامۆستايان وراژێن وان دناڤبه‌را په‌روه‌ردان دا وهه‌تا دناڤ ئێك په‌روه‌رده‌ دا يا هاتيه‌ راگرتن”.

سه‌باره‌ت پێدانا مۆله‌تا بێ مووچه‌ ب مامۆستايان، يان ژى هه‌لوه‌شاندنا وان ژى، جێگرێ سه‌رۆكێ ئێكه‌تيا مامۆستايێن كوردستانێ دبێژيت” ژڤانێ هه‌لوه‌شاندنا مۆله‌تا بێ مووچه‌ يا هاتيه‌ راگرتن ود سالێن دى دا دووماهى ژڤان بۆ هه‌لوه‌شاندنا مۆله‌تا بێ مووچه‌ 1/10 بوو ژ هه‌موو ساله‌كێ، به‌لێ ئه‌ڤ ساله‌ ئه‌و ژڤانه‌ يێ هاتيه‌ درێژكرن وهه‌تا 31/12/2017 ژى مامۆستايان ده‌ليڤه‌ هه‌بوو مۆله‌تا بێ مووچه‌ ب هه‌لوه‌شينن”.

گۆت ژى” پێدانا مۆله‌تا ب مووچه‌ ل وه‌رزێ دويێ، ژ ده‌ستهه‌لاتێن وه‌زيرێ په‌روه‌ردێ يه‌ ودشێت ل دووڤ پێدڤيا مامۆستاى، بريارێ ل سه‌ر بده‌ت”.

 ئه‌ڤرۆنيوز:

سكرتێرێ جڤاتا وه‌زيران ل هه‌رێما كوردستانێ، ئامانج ره‌حيم ئاشكراكر كو شرۆڤه‌كرنا مه‌ترسيدار يا دادگه‌ها فيدرالى يا عيراقێ يا هه‌ى ل دۆر مادێ 140 يێ دستوورى سه‌باره‌ دياركرنا رامانا ده‌ڤه‌رێن ناكۆكى ل سه‌ر.

ئامانج ره‌حيم دبه‌رپه‌رێ خوه‌ دا ل سه‌ر تۆرا جڤاكى يا فه‌يسبووكى به‌لاڤكر” ل دووڤ بريارا دادگه‌ها فيدرالى هژمار 113 ل رۆژا 29/10/2017، ل سه‌ر داخوازا جڤاتا نوونه‌ران، پێناسا ده‌ڤه‌رێن ناكۆكى ل سه‌ر دمادێ 140 يێ دستوورى بۆ زڤرنێ بۆ مادا 53/أ ژ قانوونا ب رێڤه‌برنا ده‌وله‌تێ بۆ قۆناغا ڤه‌گۆهاستنێ ب ڤى شێوه‌يه‌ ( ده‌ڤه‌رێن ناكۆكى ل سه‌ر، وان ده‌ڤه‌ران ڤه‌دگريت كو ل پاريزگه‌هێن (كه‌ركووك، ديالا ونه‌ينه‌وا) ژلايێ حوكمه‌تا وى ده‌مى يا هه‌رێما كوردستانێ ل 19/3/2003 هاتينه‌ ب رێڤه‌برن).

ئامانج ره‌حيم، كو دكتۆرا با قانوونێ هه‌يه‌، دبێژيت” ل دووڤ ڤێ شرۆڤه‌كرنێ، كه‌ركووك ب ده‌ڤه‌ره‌كا ناكۆكى ل سه‌ر ناهێته‌ هژمارتن، به‌لێ ئاكرێ وكفرى دێ بنه‌ ده‌ڤه‌رێن ناكۆكى ل سه‌ر وئه‌ڤ برياره‌ ل سه‌ر داخوازا ده‌سته‌يا سه‌رۆكاتيا جڤاتا نوونه‌ران بوو ب رێيا ئه‌مينداريا گشتى يا جڤاتا نوونه‌ران”.

دبێژيت ژى” پێدڤيه‌ سه‌رۆك كۆمار وپه‌رله‌مانتارێن فراكسيۆنێن كوردستانى ل سه‌ر ڤى بابه‌تى بهێنه‌ ده‌نگ كو سويند خواريه‌ پارێزه‌رێن دستوورى بن دده‌مه‌كى دا دبرگا دويێ ژمادێ 140 يێ دستوورى ب ئاشكرا كه‌ركووك ب ده‌ڤه‌ره‌كا ناكۆكى ل سه‌ر هاتيه‌”.

گۆت ژى”ئه‌وا جهێ تێبينيێ ئه‌وه‌ كو دادوه‌رێن كورد يێن دادگه‌ها فيدرالى يا عيراقى ئيمزا يا ل سه‌ر ڤێ بريارا دادگه‌هێ كرى”.

ئه‌ڤرۆنيوز:

ئێكگرتوويا ئيسلامى كوردستان راگه‌هاند، بريارا خوه‌ڤه‌كێشانێ ژ كابينا هه‌شتێ يا حوكمه‌تا هه‌رێمێ، حوكمه‌تێن خوه‌جهى يێن پارێزگه‌هان ڤه‌ناگريت.

فه‌رهاد ياسين ئه‌ندامێ سه‌ركرداتيا ئێكگرتوو گۆت” بريارا مه‌ تنێ خوه‌ڤه‌كێشانه‌ ژ كابينا هه‌شتێ يا حوكمه‌تا هه‌رێمێ ومه‌ نه‌ڤێت ژ حوكمه‌تا خوه‌جهى ل پارێزگه‌هان ڤه‌كێشين”.

فه‌رهادى گۆت ژى” نوونه‌رێن ئێكگرتوو دحوكمه‌تێن خوه‌جهى دا ل پاريزگه‌هان دێ مينن، چونكى وه‌رگرتنا پۆستان ل سه‌ر بنه‌مايێ هه‌لبژارتنێن جڤاتێن پارێزگه‌هان بوو”.

ل دۆر ده‌ركرنا نوورێن ئێكگرتوو د حوكمه‌تين خوه‌جهى دا، فه‌رهاد ياسين بۆ دوارۆژ گۆت”مه‌ داخواز ژ حوكمه‌تێ يا كري كو (موراعاتا) مه‌ بهێته‌ كرن، چونكى چه‌ند ساله‌ پێكڤه‌ دحوكمه‌تێ داينه‌ ورێ د پشكداريا مه‌ د حوكمه‌تێن خوه‌جهى دا نه‌هيته‌ گرتن، به‌لێ مه‌ چو گره‌نتيه‌ك وه‌رنه‌گرتيه‌ ونزانين پشتى خوه‌ڤه‌كێشانا مه‌ ژ حوكمه‌تێ، دێ نوونه‌رێن مه‌ هێنه‌ هنارتن بۆ مال يان نه‌”.

ئێكگرتوويا ئيسلامه‌ كوردستان ل هه‌ردو پاريزگه‌هێن دهۆك وسلێمانيێ چه‌ندين پۆستێن ريڤه‌به‌ر ورێڤه‌به‌رێن گشتى ورێڤه‌به‌رێن ناحيان وه‌رگرتينه‌.