ئه‌ڤرۆنيۆز:
سه‌رۆكێ يانا زاخۆ يا وه‌رزشى، به‌رهه‌ڤيا يانێ بۆ پشكداريێ دخۆلا پلا ناياب يا ته‌پێ ل عيراقێ راگه‌هاند.
بارزان مسته‌فا سه‌رۆكێ يانا زاخۆ گۆت، يانا زاخۆ يا به‌رهه‌ڤه بۆ پشكداريێ دوه‌رزێ نوو يێ خولا پلا ناياب يا عيراقێ، سه‌ره‌راى كو كێشێن دارايى ب تمامى چاره‌سه‌ر نه‌بووينه ومه كێشه ژى ل دۆر هژمارا يانان نينه.
ل دۆر هه‌لويستێ وان ژبريارا ئێكه‌تيا ته‌پا پێ يا عيراقى كو ئه‌ڤ ساله سێ يانێن كوردستانێ بێ به‌شكرن ژ خۆلا ياناب يا عيراقى، سه‌رۆكێ يانا زاخۆ بۆ رووداو گۆت، ئه‌م دپێگيرين ب بريارێن رێڤه‌به‌ريا گشتى يا وه‌رزشى ل هه‌ريمێ، هه‌كه بێژيت خوه ڤه‌كێشن، بێگومان پشكداريێ دخۆلێ دا ناكه‌ين
ئه‌ڤرۆ نيوز:
حه‌یده‌ر عه‌بادى سه‌رۆك وه‌زیرێن عیراقێ راگه‌هاند: ئه‌م پێشوازیێ ل هه‌لویستێ حوكمه‌تا هه‌رێما كوردستانێ دكه‌ین.
حوكمه‌تا هه‌رێما كوردستانێ راگه‌هاندنه‌ك ل دۆر بریارا دادگه‌ها فیدرال سه‌باره‌ت جودابوونێ ژ ئیراقێ به‌لاڤكر و راگه‌هاند: هه‌رێم رێزێ ل وێ بریارا دادگه‌ها فیدرال دگریت ئه‌وا تایبه‌ت ب شروڤه‌كرنا مادده‌یێ ئێكێ ژ ده‌ستوورێ ئیراقێ، لێ پێدڤییه ئه‌ڤ هه‌لوێستێ هه‌رێمێ، ببیته بنه‌مایێ ده‌ستپێكرنا دیالۆگه‌كا نیشتیمانی یا گشتگیر بۆ چاره‌یا هه‌موو ناكوكییان و بجهئینانا ته‌ماما مادده‌یێن ده‌ستووری.
حه‌یده‌ر عه‌بادى داخواز ژ حوكمه‌تا هه‌رێمێ كر كو بۆ په‌یره‌وكرنا ده‌ستوورى و برێڤه‌برنا خالێن سنورى د هه‌ڤكارین و گۆت” حوكمه‌تا عیراقێ یا پابه‌نده ب دانا مووچێ فه‌رمانبه‌رێن هه‌رێما كوردستانێ”.
سه‌باره‌ت به‌نداڤا ده‌ربه‌ندیخان، سه‌رۆك وه‌زیرێن عیراقێ راگه‌هاند” چو كێشه بۆ به‌نداڤا ده‌ربه‌ندیخان دروست نه‌بووینه و مه‌ترسى ل سه‌ر نینه”.
ئه‌ڤرۆنيۆز:
قايمقامێ ده‌ربه‌نديخان راگه‌هاند، ئه‌ڤرۆ ئێڤارى بيڤه‌له‌رزه‌كا دى ل قه‌زا ده‌ربه‌نديخان دا.
ناسح حه‌سه‌ن قايمقامێ ده‌ربه‌نديخان، ل دووڤ خه‌ندان، گۆت، بيڤه‌له‌رز يا ب هێز نه‌بوو وپلا وێ گه‌له‌ك يا كێم بوو، له‌وما چو زيان نه‌بوون.
دياركر ژى، ژبه‌ركو وه‌لاتيێن ده‌ربه‌نديخان ژ بيڤه‌له‌رزا رۆژا ئێكشه‌مبيابۆرى ترسابوون، له‌وما ئه‌و تاخێن هه‌ست ب بيڤه‌له‌رزا ئه‌ڤرۆ كرى ژمالێن خوه ده‌ركه‌فتن.
ئه‌ڤرۆنيۆز:
گرۆپێ رۆسى يێ په‌ترۆلى يێ زه‌به‌لاح (روسنه‌فت) ، راگه‌هاند، ل به‌رامبه‌ر وه‌رگرتنا په‌ترۆلێ ل سالا 2017 ، وێ دوێ سالێ دا گوژمێ مليار و300 مليۆن دۆلاران بۆ حوكمه‌تا هه‌رێما كوردستانێ مه‌زاختيه.
ئاژانسا رويته‌رز، ئه‌ڤرۆ سێشه‌مبى به‌لاڤكر، روسنه‌فت دئه‌نجامێن خوه يێن دارايى (پشكا سيێ) ژسالا 2017 به‌لاڤكرينه وتێدا دبێژيت، گۆژمێ مليار و300 مليۆن دۆلار بۆ حوكمه‌تا كوردستانێ هاتينه مه‌زاختن دچارچۆڤێ گرێبه‌ستا كرينا په‌ترۆلا خام ل گه‌ل حوكمه‌تا كوردستانێ.
روسنه‌فت ل چريا ئێكێ يا بۆرى راگه‌هاندبوو كو وێ رێكه‌فتنێن هه‌ڤپشكيێ دبه‌رهه‌مئينانا پێنج كێلكێن په‌ترۆلى ل كوردستانێ ئيمزاكرينه ول سالا 2018 دێ ده‌ست ب ئه‌نجامدانا به‌رنامێ هه‌ڤپشك يێ ڤه‌ديتنا پترۆلى هێته كرن وهه‌كه يێ به‌رهه‌مدار بيت، دێ روسنه‌فت ده‌ست ب پرۆسا پێشڤه‌برنا هه‌موو بيرێن په‌ترۆلى ل سالا 2021 كه‌ت .
ئه‌ڤرۆنيۆز:
فيليب كوتينۆ هێرشبه‌رێ يانا لێڤه‌رپۆل يا ئينگليزى و هه‌لبژارتيێ به‌رازيلێ يێ ته‌پا پێ به‌رسڤا به‌رشه‌لونا دا وبێ هيڤى كر كو بچيته دناڤ رێزێن وێ دا.
كوتينۆى دنووترين داخۆيانى دا گۆت، ئه‌ز ل ليڤه‌رپۆل يێ ئاسووده مه ويێ به‌رهه‌ڤ نينم رێزێن وێ بجه بهێلم.
ل ده‌مێ بۆرى رۆژناما ماركا يا نيزيك ژ ريال مه‌دريد ئاشكراكربوو كو به‌رشه‌لونا دخوازيت دوه‌رزێ ڤه‌گۆهاستنا ياريكه‌ران دا ل زڤستانا بهێت، كوتينيۆى بينيته رێزێن خوه و رێكه‌فتنا ده‌ستپێكهى ژى ل گه‌ل راهێنه‌رێ لێڤه‌رپۆل هاتيه كرن، به‌لێ كوتينيۆى هه‌موو ئه‌و ده‌نگوباس رتكرن
ڤى ياريكه‌رێ به‌رازيلى گۆت ژى په‌يوه‌نديێن من ل گه‌ل راهێنه‌رى يانێ يورگن كلوب وياريكه‌ران دباشن وئه‌ز ل ئێك ژ مه‌زنترين يانێن جيهانێ يێ ياريێ دكه‌م، له‌وما من نه‌ڤيت ژ يانا خوه بچم.
د وه‌رزێ ڤه‌گۆهاستنا ياريكه‌ران دا ل هاڤينا 2017، يانا به‌رشه‌لونا چار گرێبه‌ستێن جودا جودا ئاراسته‌ى لێڤه‌رپۆل كرن بۆ بده‌ستڤه‌ئينانا وى ياريزانى، به‌لێ هه‌موو بزاڤێن به‌رشه‌لونا شكه‌ستن خار.
ئه‌ڤرۆنيۆز:
ژئه‌نجامێ به‌ربوونا ئاگرى ب موه‌ليدا كاره‌بێ ل مالا وه‌زيره‌كێ عيراقى ل به‌غدا، دو كه‌س برينداربوون.
په‌يڤدارێ وه‌زاره‌تا كار وكاروبارێن جڤاكى يا عيراقى، راگه‌هاند ئه‌ڤرۆ سێشه‌مبى ئاگر به‌ربوو موه‌ليدا كاره‌بێ ل مالا وه‌زيرێ كار وكاروبارێن جڤاكى محه‌مه‌د شياع ئه‌لسودانى.
دياركر ژى، ژ ئه‌نجامێ وى ئاگرى دو كه‌س كو كريكار بوون برينداربوون وتيمێن ئاگر ڤه‌مراندنێ شيان كونترۆلى ل سه‌ر ئاگرى بكه‌ن.
گۆت ژى، وه‌زير يێ ل ده‌رڤه‌ى عيراقێ ژبۆ پشكداريێ دكۆمبوونێن جڤاتا وه‌زيرين كار وكاروبارێن جڤاكى يێن عه‌ره‌ب ل كوێتێ.
ئه‌ڤرۆنيۆز:
ئه‌ندامه‌كێ لژنا دارايى ل جڤاتا نوونه‌رێن عيراقێ ئاشكراكر كو جڤاتا وه‌زيرێن عيراقێ دێ مووچێن فه‌رمانبه‌ران ب رێژا 20% كێم كه‌ت د بودجا سالا 2018 دا ودياركر كو به‌غدا خوه ب رێكه‌فتنه‌كێ ڤه ل گه‌ل سندووقا دراڤى يا نيڤده‌وله‌تى ب مه‌رجێن زه‌حمه‌ت ڤه گرێدايه.
مه‌سعود حه‌يده‌ر ئه‌ندامێ لژنا دارايى ل جڤاتا نوونه‌رين عيراقێ دكونگره‌كێ رۆژنامه‌ڤانى دا ل ئاڤاهيێ جڤاتا نوونه‌ران راگه‌هاند، جڤات چاڤه‌رێ هاتنا قانوونا بودجێ ژ حوكمه‌تێ دكه‌ت وگه‌له‌ك تێبينى يێن ل سه‌ر ره‌شنڤيسا بودجێ هه‌ين ژبه‌ر رێژا كورتهێنانا تێدا.
دياركر ژى،تێبينى ل سه‌ر گۆژمێن حوكمه‌ت دێ ل سالا 2018 قه‌ر كه‌ت كو دێ بن بارگرانى ل سه‌رنه‌ڤيێن داهاتى، زێده‌بارى تێبينيان ل سه‌ر رێژا هاتيه دياركرن بۆ هه‌رێما كوردستانێ.
خوياكر، ل دووڤ رێكه‌فتنا ل گه‌ل سندووقا دراڤێ نێڤده‌وله‌تى وبه‌نكا نێڤده‌وله‌تى هاتيه كرن ل دۆر كێمكرنا مه‌زاختيان، پێزانينێن دوپاتكرى يێن هه‌ين كو حوكمه‌تێ رازيبوونا خوه يا دياركرى ل سه‌ر كێمكرنا مووچێن فه‌رمانبه‌رێن ده‌وله‌تا عيراقى ب هه‌موو پارێزگه‌هێن خوه‌ڤه، ژ بچووكترين فه‌رمانبه‌ر هه‌تا سه‌رۆكێ كۆمارى، گۆژمێ وێ كێمكرنێ دێ بيته هه‌فت تريليۆن دينار ژ سه‌رجه‌مێ گۆژمێ مووچێن فه‌رمانبه‌رێن ده‌وله‌تا عيراقێ كو 36 تريليۆن دينارن.
گۆت ژى ، رێژا كێمكرنا مووچان دێ 20% بيت.
ئه‌ڤرۆنيۆز:
وه‌زاره‌تا ساخله‌ميێ ل هه‌رێما كوردستانێ ئامارێن توشبوويێن نه‌خوه‌شيا شه‌كرێ ل سێ پارێزگه‌هێن هه‌رێما كوردستانێ ئاشكراكرن كو رێژا توشبوويێن وێ نه‌خوه‌شيێ ل دهۆكێ كێمترن ژ هه‌ولێرێ وسلێمانيێ.
دكتۆر خالس قادر په‌يڤدارێ وه‌زاره‌تا ساخله‌ميێ دداخۆيانيه‌كێ دا گۆت، زێده‌تر 85 هزار نه‌خوه‌شێن شه‌كرێ ل هه‌رێما كوردستانێ يێن هه‌ين كو هژماره‌ك ژوان ئاوارێن ئاكنجي نه ل هه‌رێمێ.
قادر ئاماژه ب ئامارێن نه‌خوه‌شيا شه‌كرێ ل هه‌رێمێ كر و بۆ رووداو گۆت، 85 هزار و492 حاله‌تێن وێ نه‌خوه‌شيێ ل هه‌رێما كوردستانێ يێن هه‌ين كو 34 هزار و866 كه‌س ل هه‌ولێرێ و 23 و492 كه‌س ل سلێمانيێ و21 هزار و 134 كه‌س ل دهۆكێ، دياركر ژى كو دناڤ وان هژماران دا 10 هزار و360 كه‌س ژئاوارانه.
خوياكر ژى، رێژا تووشبويان ب شه‌كرا جۆرێ ئێكێ كو زێده‌تر دناڤ زارۆكان دا يا هه‌ى ل هه‌رێمێ، دو هزار 18 كه‌سن وتوشبوويێن شه‌كرا جۆرێ دويێ دگه‌هيته 73 هزار و114 كه‌سان.
ئه‌ڤرۆنيۆز:
ژێده‌ره‌كێ به‌رپرس ل به‌نكا ناڤه‌ندى يا عيراقى هه‌لوه‌شاندنا بريارا داخستنا هنده‌ك به‌نكان ل هه‌رێما كوردستانێ راگه‌هاند.
ژێده‌رێ ناڤبرى دياركر كو هه‌لوه‌شاندنا وێ بريار هاته دان پشتى ئه‌نجامدانا هنده‌ك كۆمبوونان ل گه‌ل رێڤه‌به‌رێن به‌نكان ل به‌غدا و هه‌رێمێ، ل دووڤ ئاژانسا به‌ترا يا ده‌نگوباسان يا ئوردنى.
دياركر ژى كو رێكه‌فتنه‌ك ل دۆر ده‌ستپێكرنا كارى وب رێڤه‌برنا كارێ حه‌والا هاته كرن ونوكه چاڤه‌ريێ بريارا فه‌رمى دكه‌ن.
پشتى ئه‌نجامدانا ريفراندۆمێ ل هه‌رێما كوردستانێ ل 25 ئه‌يلولا بۆرى، حوكمه‌تا عيراقى هه‌موو مامه‌لێن بازرگانى ودارايى ل گه‌ل هه‌رێمێ راوه‌ستاندبوون
نيشاندان