ئه‌ڤرۆنيوز:
ل دووڤ ده‌ستپێشخه‌ریا پارێزگه‌رێ‌ دهوكێ‌ بۆ هاریكاریكرنا قۆتابیێن كێم ده‌رامه‌ت كو ببیته‌ هانده‌ره‌ك قۆتابی پتر حه‌ز ل خاندن وزانینێ‌ بكه‌ن ئه‌ڤرۆ سپێدێ‌ 11-1-2018 ل قۆتابخانا راڤیار ل گوندێ‌ ئه‌ڤریكێ‌ ب ئاماده‌بوونا  فه‌رهاد ئه‌مین  پارێزگه‌رێ‌ دهوكێ‌ وعمر علی ته‌ها رێڤه‌به‌رێ‌ گشتی یێ‌ په‌روه‌ردێ‌ ب وه‌كاله‌ت و (سالی مورسن) رێڤه‌به‌را رێكخراوا سیمیتریان پێرس یا ئه‌مریكی، هاریكاری وجلكێن زڤستانێ‌ وه‌كو قۆناغا دويێ‌ ل سه‌ر قۆتابیێن قۆتابخانا ناڤبری هاتنه‌ به‌لافكرن.
پارێزگه‌رێ‌ دهوكێ‌ سوپاسیا رێكخراوا سیمیتریان پێرس یا ئه‌مریكی كر كو به‌ری نوكه‌ ژی هاریكاری بۆ زارۆكێن بێ‌ سه‌میان دابینكرینه‌ ونوكه‌ ژی ب هه‌ڤكاریا پارێزگه‌ها دهوكێ‌ ئه‌ڤ هاریكاریه‌ بۆ قوتابیێن كێم ده‌رامه‌ت دابینكرینه‌ داببیته‌ هانده‌ره‌ك بۆ قۆتابییان كو پتر حه‌ز ل خاندنێ‌ وقۆتابخانێ‌ بكه‌ن، هه‌روه‌سا سوپاسیا رێڤه‌به‌ریا گشتی یا په‌روه‌ردێ‌ وسازیێن په‌روه‌ردێ‌ كر كو دهه‌ڤكاربن ئه‌ڤ به‌رنامه‌ بهێته‌ بجهئینان وئه‌ڤرۆ 710 قۆتابی ژڤی به‌رنامه‌ی مفاداربون ومه‌ به‌رنامه‌ هه‌یه‌ ل روژێن بهێت ژی ل هنده‌ك قۆتابخانان بهێته‌ بجهئینان.
ل قۆناغا ئێكێ‌ یا ڤی به‌رنامه‌ی، سه‌لكێن زانستی ل سه‌ر پتر ژ 2000 قۆتابییان ل سه‌نته‌رێ‌ دهوكێ‌ ل تاخێن گژه‌به‌را هاتبوونه‌ به‌لاڤكرنودچارچۆڤێ‌ قۆناغا دويێ‌ دا بریار ئه‌وه‌ ئه‌ڤ هاریكاریه‌ ل سه‌ر پتر ژ1500قۆتابییان ل ده‌وروبه‌رێن دهوكێ‌ وقه‌زا بهێنه‌ به‌لافكرن.

ئه‌ڤرۆ نیوز، نه‌وزاد هلورى:

ئه‌ڤرۆ سه‌ندیكا رۆژنامه‌نڤیسێن كوردستانێ ئامارا بنپێكرنێن سالا بۆرى به‌رامبه‌ر رۆژنامه‌ڤانان راگه‌هاندن ، و ب گۆره‌ى ئامارا وان، ل سالا بۆرى 137 حاله‌تێن پێشیلكریان به‌رامبه‌ر رۆژنامه‌ڤانان هاتینه‌ كرن.

ئازاد محەمەد ئەمین، نەقیبێ سەندیكا رۆژنامەنڤیسێن كوردستانێ د كۆنگرەیەكی رۆژنامەڤانى دا  ل هه‌ولێرێ دیاركر كو  سالا بۆرى به‌رامبه‌ر سالێن به‌رى وێ پێشیلكاریێن به‌رامبه‌ر رۆژنامه‌ڤانان زێده‌بوینه‌ و گۆت ژى”  سالا 2016 ب تنێ 45 پێشیلكارى هه‌مبه‌رى 65  رۆژنامه‌ڤانان هاتینه‌كرن ، و دبه‌رامبه‌ر دا ل سالا 2017 ئه‌و پێشیلكارى بۆ 137 حاله‌تان بلندبوویه‌”.

زێده‌تر گۆت” ناكۆكیێن سیاسى وروودانێن شه‌رى و ئالۆزیێن دناڤبه‌را هه‌رێمێ و عیراقێ ب تایبه‌تى پشتى 16ێ ئوكتۆبه‌را 2017 و شه‌رێ داعشێ، ئه‌گه‌رێن سه‌ره‌كى یێن وان پێشیلكاریان بوون ، ژ وان سێ حاله‌تێن تیرۆرێ ، ئێك كوشتن و دو حاله‌تێن شه‌هیدكرنا رۆژنامه‌ڤانان هه‌بوون”.

ناڤبرى دیاركر ژى كو  ل سالا بۆرى 13 ده‌زگه‌هێن راگه‌هاندنێ هاتینه‌ گرتن و 30 رۆژنامه‌ڤان هاتینه‌ ده‌سته‌سه‌ركرن و 25 حاله‌تێن قوتانێ و 54 حاله‌تێن رێگریێن كارێ رۆژنامه‌ڤانیێ هاتینه‌ تۆماركرن.

ئەڤرۆنیۆز، ئەمیر ئەترووشی

بەرپرسێ‌ راگەهاندنا رێڤەبەریا چاكسازیا زركا ل دهۆكێ‌ راگەهاند، ئەڤرۆ رۆژا پێنج شەمبی رێكەفتی 2018/1/11 و ل دەمژمێر 8:30 سپێدێ، لژنا لێبورینا گشتی ل دهۆكێ دەست ب كارێ خوه‌ كر و ل دانێ‌ ئێڤاری 75 زیندانی ئازادكرن.

عرفان محەمەد ئەمین، بەرپرسێ‌ راگەهاندنا رێڤەبەریا چاكسازیا زركا ل دهۆكێ‌ بۆ ئەڤرۆنیۆز راگەهاند” پشتی لژنا لێبورینا گشتی پێداچوون د باده‌كێن دادگەهكریێن دهۆكێ‌ دا كرین، ئەڤرۆ رۆژا پێنچ شەمبی ل دەمژمێر 3:30 ئێڤاری، 75 دادگەهكری هاتنە ئازادكرن، ژ وان ژی 37 دادگەهكری ئەو بوون یێن مادێن بێهوشكەر بكاردئینان نەكو بازرگانی پێ‌ دكر، هەروەسا 35 دادگەهكریێن ب تۆمەتا كۆشتنێ‌ هاتینە  دادگەهكرن و سێ‌ دادگەهكریێن ب تۆمەتا سەختەكاریێ‌ هاتینە ئازادكرن”.

ناڤبری ئاشكرا كر” ل گۆرەی لێبورینا گشتی ئەوا ژ پەرلەمانێ كوردستانێ دەرچووی، پشتی رۆژناما (وقائیع كوردستان) ماددەیێن لێبورینا گشتی ژێ دگریت بەلاڤكرین، لژنا ناڤبری دێ ل سەر كارێ خوه‌ بەردەوام بیت و ل رۆژێن دەواما فەرمی هەتاكو باده‌كێن لێبورینا گشتی ژێ دگریت ب دووماهى دهێن”.

ئه‌ڤرۆنيوز:

سه‌رۆك بارزانى سه‌ره‌دانا سه‌نگه‌رێن پێشمه‌رگێ كوردستانێ ل ميحوه‌رێ باشيكێ دكه‌ت.

ليوا به‌هرام عه‌ريف ياسين، فه‌رماندێ پێشمه‌رگه‌ى ل ميحوه‌رێ باشيكێ ل به‌رپه‌رێ خوه‌ ل سه‌ر تۆرا جڤاكى يا فه‌يسبووكێ چه‌ند وێنه‌يێن خوه‌ وسه‌رۆك بارزانى ل سه‌نگه‌رێن پێشمه‌رگه‌ى به‌لاڤ كرينه‌ وئاماژه‌ ب وێ چه‌ندێ كريه‌ كو بارزانى سه‌ره‌دانا سه‌نگه‌رێن پێشمه‌رگه‌ى كريه‌.

ليوا به‌هرامى به‌لاڤكريه‌ ژى كو سه‌ره‌دانا سه‌رۆك بارزانى ب مه‌ره‌ما ئاگه‌هداربوونه‌ ل سه‌ر ره‌وشا هێزێن پێشمه‌رگه‌ى وپێدڤيێن گرنگ بۆ پاراستنا سنورێن هه‌رێما كوردستانێ بوو وگه‌شبينيا  سه‌رۆك بارزانى بۆ ده‌ربازبوونێ ژڤێ ره‌وشێ دبه‌رژه‌وه‌ندا كێشا ره‌وا يا گه‌لێ مه‌ دا وپێشڤه‌برنا ده‌ستكه‌فتان وپاراستنا وان وگره‌نتيا به‌رده‌واميا ڤێ ئه‌زموونا گه‌لێ مه‌، ل سه‌ر ئاستێ نێڤده‌وله‌تى سه‌ره‌ده‌ريكرن ل گه‌ل هێزا پێشمه‌رگێ كوردستانێ ئه‌و هێزه‌  زێده‌تر وره‌ بلندكريه‌ وخوراگرتر كريه‌ ب ئێكرێزى ورێكخستنا هه‌ر چ زووتر يا ناڤمالا خوه‌ ب سه‌ر هه‌موو رێگريان ودێ سه‌ركه‌ڤين وئه‌زموونا گه‌لێ كوردستانێ دێ يا پاراستى بيت ودێ پێنگاڤان به‌ر ب پێشڤه‌ هاڤێژين.