ئه‌ڤرۆ نیوز، نه‌وزاد هلۆرى:
به‌رپرسه‌كا ئافره‌تان ل سنوورێ قه‌زا ئامێدیێ دیاركر كو دجڤاكێ مه‌دا گه‌له‌ك گرنگه زێده‌بارى ڤه‌كرنا خول و سمینار و كار و چالاكیێن هزرى و ره‌وشه‌نبێرى و په‌روه‌رده‌ى دهه‌مان ده‌م دا كار و چالاكیێن پێشه‌ىى ژى بهێنه‌ڤه‌كرن ژ به‌ركو دا كه‌شه‌كێ ئازاد وه‌ربگرن و ره‌نگه‌ك ژ ره‌نگان داهاتیه‌كێ ب ده‌ستخوه‌ڤه بینیت و ب ده‌ستێ خوه ئه‌رك و مافێن خوه دابین بكه‌ت ، و دیاركر ژى كو ل ڤان چه‌ند رۆژێن بۆرى كێشه‌یێن نوو دناڤبه‌را كچ و كوران دهێنه روودان ل سنوورێ قه‌زا ئامێدیێ.
بارین حه‌سه‌ن سێرى، چالاكڤان و به‌رپرسا ئه‌نجومه‌نێ ئافره‌تێن دێره‌لۆكێ دیاركر كو جڤاكێ كوردى رێ ناده‌ت كو رێكخرا و و ئه‌نجومه‌ن و لايه‌نێن په‌یوه‌ندیدارێن ئافره‌ت و خێزانێ ژ نێزیك بچنه دناڤا هوكاریێن كێشه‌یێن ئافره‌تان و خێزانى دا ب تایبه‌تى دناڤبه‌را ژن و مێران دا و بۆ ئه‌ڤرۆنيوز گۆت” گه‌له‌ك گرنگه زێده‌بارى ڤه‌كرنا خول و راهێنان و سمينار و كار و چالاكیێن هزرى و ره‌وشه‌نبیرى و په‌روه‌رده‌يى، دهه‌مان ده‌م دا كار و چالاكیێن پێشه‌ىى ژى بۆ ژنان بهێنه ڤه‌كرن داكو كه‌شه‌كێ ئازاد وه‌ربگرن و ره‌نگه‌ك ژ ره‌نگان داهاتیه‌كێ ب ده‌ستخوه‌ڤه بینن و ب ده‌ستێ خوه ئه‌رك و مافێن خوه دابین بكه‌ن ، نها دجڤاكێ مه‌دا رێ ناهێته‌دان كو لایه‌نێن په‌یوه‌ندیدار راسته‌وخوه بچنه دناڤا كێشه‌یێن خێزانى و هه‌ڤژینان دا خوه ئه‌گه‌ر ب چو مه‌ره‌م بیت ، به‌لێ ل گه‌ل ڤێ یه‌كێ ژى ئه‌م وه‌كو ئه‌نجومه‌ن ژ نێزیك ل گه‌ل لایه‌نێن شوله‌ژێ دچینه دناڤا كێشێ دا و ل گه‌ل د روونین خوار داكو جاره‌كا دى تێگه‌هشتن ڤه‌گه‌رێته ناڤا خێزانێ و به‌رده‌وامى پێ بهێته‌دان”.
بارينێ زێده‌تر گۆت”پتريا ئه‌و كیشه‌یێن كو ل سنورێ قه‌زا ئامێدیێ و ده‌ردورێن وێ هه‌ین دزڤرن بۆ نه‌تێگه‌هشتنا خێزانى و نه‌دانپێدانا هه‌ڤژینان ب شاشيان كو ئه‌ڤ یه‌ك ژى كاره‌ك نه‌یێ درۆسته د خێزانێ دا دهێته‌كرن و نها پێكهاته‌يا ژینگه‌ها ده‌ڤه‌رێ ل سه‌ر سێ سكته‌ران هاتیه دابه‌شكرن ئه‌و ژى زارۆك و گه‌نج و پیرن، به‌لێ پتريا وان گه‌نجن دناڤبه‌را ژیێ 16 بۆ 30 سالیێ و پتريا كێشه‌یان ژى هه‌ر ئه‌ڤ سكته‌ره دكه‌ت”.
ل چه‌ند رۆژێن بۆرى كێشه‌یه‌كا نوو ل سنورێ ناحیا دێره‌لوكێ په‌یدابوویه، ئه‌و ژى كو كچ و كور پێكڤه ب شه‌ڤ ده‌ردكه‌ڤن و ل دووڤ هنده‌ك به‌رپه‌رێن تۆرێن جڤاكى، هژماره‌كا وان ژلایێ ده‌زگه‌هێن ئێمناهیێ ڤه يێن هاتینه ده‌سته‌سه‌ركرن كوه هژمارا وان نێزیكێ 13 كچ و كورایه ، دڤى ده‌ربارى دا بارین سێرى دبێژيت” به‌لێ ئه‌ڤ كێشه ل ده‌ڤه‌رێ په‌یدابوویه و یا نوویه ژى ، و زێده‌تر ژ وێ هژمارا كو هاتیه به‌لاڤكرن يێن هه‌ين ونها لایه‌نێن شوله‌ژێ و ئه‌م ژى ب رێيێن خوه ب تایبه‌تى تێگه‌هاندن و ره‌وشه‌نبیركرن و پێگه‌هاندنا وان ژ روویێ هزرى و ئه‌قلى ڤه ئه‌وان هوشیار دكه‌ین داكو توشى چو كێشه‌یان نه‌بن ، ئه‌ڤ كه‌سه نه تنێ خه‌لكێ دێره‌لوكێ نه بهل‌كو ژ شێلادزێ هه‌تا ئامێدیێ بخوه‌ڤه دگریت و نابیت چو كچ و كور ئازادیێ بده‌ن خوه و ڤان ده‌ركه‌فتنان بكه‌ن، ژبه‌ركو دێ بنه جهێ چاڤلێكرنێ و به‌ره‌لایێ بۆ جڤاكى”.
بارين ل سالا 1990 ژ باژێرێ موشێ ل باكوورێ كوردستانێ ژ دایكبوویه و ل سالا 2008 چویه دناڤا رێكخستنێن ئافره‌تان و ل سالا 2016 به‌رپرسیاره‌تیا ئه‌نجومه‌نێ ئافره‌تێن دێره‌لۆكێ وه‌ردگریت و هه‌تا نها هه‌ڤژینیى پێكنه‌ئینایه و سه‌ر كار و چالاكى و خزمه‌تێن خوه وه‌كو خوه‌به‌خش يا به‌رده‌وامه و هه‌تا رێزا 12ێ ئاماده‌یى خواندیه و دخوازیت خواندنا خوه ته‌مام بكه‌ت و ل دووماهیێ دبێژيت” ئاواره و په‌نابه‌ران كارتێكرن سه‌ر ره‌وشت و سلۆكێ خه‌لكێ ده‌ڤه‌رێ كریه ، ژبه‌رڤێ پێدڤیه راهێنانێن ده‌روونى و ره‌وشتى و هزرى و هه‌تا خوه یێن پێشه‌يى ژى ب وان بهێنه‌كرن، چونكى ئه‌و ژى يێن بووینه پێكهاته‌یا جڤاكى هه‌تا دزڤرن سه‌ر وار و جهێن خوه”.
نيشاندان