ئه‌ڤرۆنيوز:

په‌رله‌مانێ كوردستانێ ل رۆژا چارشه‌مبى 10/1/2018 دێ كۆمبيت وتێدا دێ خواندنا ئێكێ بۆ پرۆژێ قانوونا چاكسازيێ دكارێ گشتى ومووچه‌ى وخانه‌نشينيێ دا هێته‌ ئه‌نجامدان.

ئه‌و پرۆژه‌ قانوونه‌ ژلايێ جڤاتا وه‌زيرێن هه‌رێمێ پشتى په‌سه‌ندكرنێ هاتبوو هنارتن بۆ په‌رله‌مانى وپشتى خواندنا ئێكێ ل په‌رله‌مانێ ل سه‌ر دهێته‌ كرن، دێ هيته‌ ئاراسته‌كرن بۆ لژنێن په‌يوه‌نديدار ل په‌رله‌مانى.

ئه‌ڤرۆنيوز:

به‌رپرسێ نڤيسينگه‌ها پارێزگه‌ها كه‌ركووكێ يا مادێ 140 راگه‌هاند، عه‌شيره‌تا شه‌مه‌ر ب بريارا حزبا به‌عس هاتبوو كه‌ركووكێ ونوكه‌ ژى دخوازيت ب هاريكاريا هێزه‌كا له‌شكرى ناحيه‌كا ب سه‌ر كه‌ركووكێ ڤه‌ ته‌عريب بكه‌ت.

كاكه‌ ره‌ش سديق، به‌رپرسێ نڤيسينگه‌ها پارێزگه‌ها كه‌ركووكێ يا مادێ 140 دكۆنفراسه‌كێ رۆژنامه‌ڤانيدا گۆت” عه‌شيره‌تا شه‌مه‌ر وهنده‌ك ژ خه‌لكێ پارێزگه‌ها نه‌ينه‌وا به‌رى سالا 2003 ب بريارا حزبا به‌عس يا ژناڤچووى هاتبوونه‌ كه‌ركووكێ، پشتى 16 ئوكتۆبه‌را 2017 جاره‌كادى زڤرين ودخوازن ب زۆرى خوه‌ ب سه‌پينن ب سه‌ر ناحيا سه‌رگه‌ران ل رۆژئاڤايێ كه‌ركووكێ كو ئه‌و ناحيه‌ دكه‌ڤيته‌ سنورێ مادێ 140 يێ دستوورێ عيراقێ دا وپێدڤيه‌ رێ نه‌هێته‌ دان بهێته‌ ته‌عريب كرن.

كاكه‌ ره‌ش گۆت ژى” پارێزگه‌رێ كه‌ركووكێ ب وه‌كاله‌ت وێ پرسێ پشت گوه دهاڤێت وئه‌ڤه‌ شاشى يه‌ ودێ زيانێ گه‌هينيته‌ پاشه‌رۆژا كه‌ركووكێ”.

ئه‌ڤرۆنيوز:

وه‌زاره‌تا ده‌رڤه‌ يا ئيرانێ، ئه‌ڤرۆ دوشه‌مبى 8/1/2018، داخۆيانيا به‌رپرسه‌كێ ئيرانى ره‌تكر كو هه‌رێما كوردستانێ ده‌ست دئالۆزيێن ئيرانێ دا هه‌بيت.

بەهرام قاسمی په‌يڤدارێ وه‌زاره‌تا ده‌رڤه‌ يا ئيرانى دكونفرانسێ رۆژنامه‌ڤانيێ هه‌فتانه‌ يێ خوه‌ دا، ل دۆر داخۆيانى وئاخڤتنێن چه‌ند به‌رپرسه‌كێن له‌شكرى وسياسى يێن ئيرانى ل دۆر هه‌بوونا ده‌ستێ هه‌رێما كوردستانێ دئالۆزيێن ئيرانێ دا، گۆت” چو به‌لگه‌ك ل به‌رده‌ست نينه‌ كو هه‌رێما كوردستانێ ده‌ست دئالۆزيێن ئيرانێ دا هه‌بيت وگه‌له‌ك ب دوورى دبينم ئه‌و بزاڤه‌كێ دژى ئاسايشا نيشتمانى يا ئيرانى ئه‌نجام بده‌ن”.

موحسين ره‌زائى ئه‌ميندارێ گشتيێ ده‌ستنيشانكرنا به‌رژه‌وه‌نديێن ئيرانێ راگه‌هاندبوو” ل هه‌ولێرێ پلان بۆ خوه‌پيشادانێن ئيرانێ هاتيه‌ دانان و برێڤه‌برن”.

ژلايێ خوه‌ڤه‌، فه‌لاح مسته‌فا، به‌رپرسێ په‌يوه‌نديێن ده‌رڤه‌ يێن هه‌رێما كوردستانێ دكۆمبوونه‌كێ دا ل گه‌ل سیامەك بورهانی جێگرێ كونسۆلێ گشتيێ ئيرانێ ل هه‌رێمێ گۆتبوو” هه‌كه‌ ئه‌ميندارێ گشتيێ ده‌ستنيشانكرنا به‌رژه‌وه‌نديێن ئيرانێ هه‌ر به‌لگه‌ك هه‌بيت ل سه‌ر ده‌ستێوه‌ردانا هه‌رێمێ دخوه‌پيشادانێن ئيرانێ، بلا به‌رچاڤ بكه‌ت”.

ئه‌ڤرۆنيوز:

فه‌لاح مسته‌فا به‌رپرسێ په‌يوه‌نديێن ده‌رڤه‌ يێن هه‌رێما كوردستانێ راگه‌هاند، داخۆيانيا ئه‌ميندارێ گشتيێ ده‌ستنيشانكرنا به‌رژه‌وه‌نديێن ئيرانێ به‌رۆڤاژى بنه‌ما وقانوونێن نێڤده‌وله‌تى يه‌ بۆ په‌يوه‌نديێن هه‌ردولا.

فه‌لاح مسته‌فا، به‌رپرسێ په‌يوه‌نديێن ده‌رڤه‌ يێن هه‌رێما كوردستانێ دكۆمبوونه‌كێ دا ل گه‌ل سیامەك بورهانی جێگرێ كونسۆلێ گشتيێ ئيرانێ ل هه‌رێمێ زێده‌تر گۆت” هه‌كه‌ ئه‌ميندارێ گشتيێ ده‌ستنيشانكرنا به‌رژه‌وه‌نديێن ئيرانێ هه‌ر به‌لگه‌ك هه‌بيت ل سه‌ر ده‌ستێوه‌ردانا هه‌رێمێ دخوه‌پيشادانێن ئيرانێ، بلا به‌رچاڤ بكه‌ت”.

مالپه‌رێ فه‌رميێ حوكمه‌تا هه‌رێمێ دياركر كو فه‌لاح مسته‌فاى ب فه‌رمى دلگرانى ونه‌رازيبوونا حوكمه‌تا هه‌رێما كوردستانێ گه‌هانده‌ كۆمارا ئيسلامى يا ئيرانێ سه‌باره‌ت داخۆيانيا موحسين ره‌زائى ئه‌ميندارێ گشتيێ ده‌ستنيشانكرنا به‌رژه‌وه‌نديێن ئيرانێ، كو ل هه‌ولێرێ پلان بۆ خوه‌پيشادانێن ئيرانێ هاتيه‌ دانان و برێڤه‌برن”.

فه‌لاح مسته‌فاى گۆت ژى” ئه‌و داخۆيانيه‌ به‌رۆڤاژى بنه‌ما وقانوونێن نێڤده‌وله‌تى نه‌ بۆ په‌يوه‌نديێن دو لايه‌نه‌، چونكى ئاخڤتنين وى چه‌ند تۆمه‌تێن بێ بنه‌مانه‌ وجارا ئێكێ ژى نينه‌ ئه‌ڤ تۆمه‌ته‌ ژلايێ مه‌زنه‌ به‌رپرسێن ئيرانێ دهێنه‌ به‌لاڤكرن”.

به‌رپرسێ په‌يوه‌نديێن ده‌رڤه‌ يێن هه‌رێما كوردستانێ دياركر كو ڤێ داخويانيێ ب هه‌لويسته‌كێ نه‌گونجاى دبينين ودژى په‌يوه‌نديێن هه‌رێما كوردستانێ وئيرانێ يه‌ وحوكمه‌تا هه‌رێمێ دخوازيت په‌يوه‌نديێن دۆستانه‌ ل گه‌ل هه‌موو وه‌لاتێن ده‌ڤه‌رێ وجڤاكێ نێڤده‌وله‌تى هه‌بن.