ئه‌ڤرۆنيوز:

سه‌رۆكاتيا داواكاريا گشتى ئاشكرا دكه‌ت، د سالا 2017 دا وان 2200 سكالا دژى سه‌رپێچيێ ل سه‌ر مولكێ گشتى لڤاندينه‌ و25 سكالا ژى ل سه‌ر فه‌رمانبه‌رێن بن ديوار وزێده‌تر ژ 50 هزار سكالا ل دادگه‌هێن هه‌رێما كوردستانێ يێن هاتينه‌ تۆماركرن.

ئه‌ڤرۆ ئێكشه‌مبى 7/1/2018 دلشاد فايز په‌يڤدارێ سه‌رۆكاتيا داواكاريا گشتى دكونگره‌كێ رۆژنامه‌ڤانيدا ل هه‌ولێرێ ل دۆر كار وچالاكيێن سالا 2017 گۆت” 2200 سكالا دژى سه‌رپێچيێن ل سه‌ر مولكێن گشتى هاتينه‌ تۆماركرن”.

گۆت ژى” 1491 سكالا ژوان ل فه‌رمانگه‌ها هه‌ولێرێ يا داواكاريا گشتى بوون و470 سكالا ل فه‌رمانگه‌ها سلێمانيێ و22 سكالا ل فه‌رمانگه‌ها دهۆكێ و46 سكالا ل فه‌رمانگه‌ها هه‌له‌بجه‌ و132 ل فه‌رمانگه‌ها گه‌رميان”.

هه‌رڤبه‌ركرن ب سالا 2016 كو تنێ 971 سكالا هاتبوونه‌ تۆماركررن، ل سالا 2017 هژمارا سكالا دژى سه‌رپێچيێ ل سه‌ر مۆلكێ كشتى گه‌له‌ك يێن زێده‌بووين.

دلشادى دياركر” 25 سكالا ل سه‌ر كه‌يسێن بن ديواران هاتينه‌ لڤاندن وب ملياران دينار هاتينه‌ ڤه‌گه‌راندن بۆ گه‌نجينێ”.

ئاشكراكر ژى” پرۆژه‌ قانوونه‌ك ژلايێ داواكارێ گشتى ل گه‌ل جڤاتا وه‌زيران يێ هاتيه‌ به‌رهه‌ڤكرن ل دۆر خانه‌نشينيا پلێن بلند وهاتيه‌ هنارتن بۆ په‌رله‌مانێ كوردستانێ بۆ په‌سه‌ندكرنێ”.

ئه‌ڤرۆنيوز:

ئه‌ڤرۆ ئێكشه‌مبى 7/1/2018 هه‌ردو مه‌كته‌بێن سياسى يێن پارتى وئێكه‌تيێ كۆمبوون، مه‌لا به‌ختيار سه‌رۆكێ شاندێ ئێكه‌تيێ دكۆنگره‌كێ رۆژنامه‌ڤانى دا پشتى كۆمبوونێ ل گه‌ل نێچيرڤان بارزانى راگه‌هاند، هه‌ردو حزب يێ هزر درێككه‌فتنه‌كا نوو دا دكه‌ن.

مه‌لا به‌ختيار دياركر” پارتى وئێكه‌تى سه‌ره‌راى ره‌خنه‌ وتێبينيان ل سه‌ر هه‌ڤدو، به‌لێ ئه‌ركێ هه‌ڤپشك يێ هه‌ى وپرۆسه‌كا مه‌زن ژى كو ئه‌ركێ وان دو حزبايه‌، مايه‌ بهێته‌ بجهئينان”.

ناڤبرى ئاماژه‌ ب رێككه‌فتنا ستراتيژى يا ئێكه‌تيێ ل گه‌ل پارتى كر كو ل سالا 2005 دناڤبه‌را  مه‌سعود بارزانى سه‌رۆكێ پارتى ديموكراتى كوردستان وجه‌لال تاله‌بانى سكرتێرێ گشتيێ يێ وه‌غه‌ركرى يێ ئێكه‌تيێ هاتيه‌ ئيمزاكرن وراگه‌هاند” وێ رێككه‌فتنێ ده‌ستكه‌فتێن مه‌زن بۆ گه‌لێ كوردستانێ هه‌بوون ونوكه‌ ژى هه‌ردو حزب هزر درێككه‌فتنه‌كا نوو دا دكه‌ن”.

ل دۆر په‌يوه‌نديێن هه‌ولێرێ و به‌غدا، گۆت”نێزيكه‌ ده‌رگه‌هێن دانوستاندنێ بهێنه‌ ڤه‌كرن وهه‌رێما كوردستانێ يا پێگيره‌ ب چاره‌سه‌ركرنا كێشان ل گه‌ل عيراقێ دچارچۆڤێ دشتوورێ به‌رده‌وام يێ عيراقێ دا”.

 ئه‌ڤرۆنيوز:

نێچيرڤان بارزانى ئه‌ڤرۆ ئێكشه‌مبى 7/1/2018 پشتى كۆمبوونا پارتى وئێكه‌تيێ راگه‌هاند، په‌يوه‌نديا پارتى وئێكه‌تيێ، په‌يوه‌نديه‌كا ديرۆكى يه‌، نابێژين كێشه‌ نينن، به‌لێ هه‌ر چ تشتێ ل كوردستانێ بهێته‌ كرن، دڤێت دناڤبه‌را پارتى وئێكه‌تيێ وپارتى وئێكه‌تيێ ولايه‌نێن دى يا با شبيت. دوپاتكر ژى كو پێدڤيه‌ ب ئێكگرتى ژڤێ قۆناغێ ده‌ربازبين.

نێچيرڤان بارزانى، سه‌رۆك وه‌زيرێن هه‌رێما كوردستانێ وجێگرێ سه‌رۆكێ پارتى، ل دۆر سه‌ره‌دانا ڤێ دووماهيێ يا سێ حزبێن كوردستانى بۆ به‌غدا، گۆت”ئه‌م ئاگه‌هدارى سه‌ره‌دانا ڤان سێ لايه‌نان نه‌بووين وپێدڤى بوو هه‌موو لايه‌نێن دى ژى دگه‌لدابان بۆ وێ چه‌ندێ ده‌نێ مه‌ ب هيزتربا”.

سه‌باره‌ت پشكداريێ دهه‌لبژارتنێن په‌رله‌مانێ عيراقێ دا، نێچيرڤان بارزانى گۆت”مه‌ پێ باشه‌ هه‌موو هێزێن كوردستانى پێكڤه‌ پشكداريێ دهه‌لبژارتنێن عيراقێ دا بكه‌ن”.

نێچيرڤان بارزانى ل دۆر كۆمبوونا شاندێ پارتى ل گه‌ل ئێكه‌تيێ ل سلێمانيێ گۆت” كۆمبوونا مه‌ گه‌له‌ك يا گرنگ بوو، ب گۆره‌ى قۆناغا ئه‌ڤرۆ ل كوردستانێ هه‌ى وئه‌و دانوستاندنێن كو هيڤيدارين ل گه‌ل به‌غدا بهێنه‌ ده‌ستپێكرن، بيروبۆچوون هاتن ئالۆگۆركرن، ئه‌م گه‌هشتين وێ رێككه‌فتنێ كو ئه‌ڤ كۆمبوونه‌ دناڤبه‌را مه‌ دا  ل داهاتى دا دبه‌رده‌وام بن وپشت راستى ڤه‌ ئه‌م هه‌ردو لا درژدين كو ئه‌وا مه‌ هه‌موو لايه‌كى به‌ر ب سه‌ركه‌فتنێ دبه‌ت ئه‌وه‌ كو ئه‌م دناڤخوه‌دا وه‌كو هه‌موو هێزێن كوردستانى دئێكگرتى بين ب هه‌موو پێكهاتێن دى ژى وبشێين پێكڤه‌ ڤێ قۆناغا سه‌خت كو ئه‌ڤرۆ هه‌رێما كوردستانێ تووش بوويێ، ده‌رباز بكه‌ين”.

سه‌رۆك وه‌زيرێن هه‌رێما كوردستانێ ل دۆر پرسا دانوستاندنان ل گه‌ل به‌غدا، گۆت”هه‌لويستێ مه‌ يێ ئاشكرايه‌، ئه‌م ل سه‌ر بنه‌مايێ دستوورێ عيراقێ دبه‌رهه‌ڤين دانوستاندنێ ل گه‌ل به‌غدا بكه‌ين بۆ وێ چه‌ندێ ئه‌و كێشێن ژسالا 2005 ووێڤه‌ هه‌ين هه‌موويان ل سه‌ر بنه‌مايێ دستوورێ عيراقێ چاره‌سه‌ريان بۆ ببينين. ئه‌م هيڤيدارين به‌غدا ژى ئه‌و حه‌ز هه‌بيت، هه‌رده‌مێ ئه‌و دبه‌رهه‌ڤ بن، ئه‌م ژى دبه‌رهه‌ڤين.