ئه‌ڤرۆ نیوز:
نیكی هالی، بالیۆزا ئه‌مریكا ل نه‌ته‌وه‌یین ئێكگرتى راگه‌هاند: ئه‌مریكا دێ داخوارا كۆمبوونه‌كا نه‌ئاسایی يا جڤاتا ئاساییشێ ل دۆر خوه‌نیشاندان و ره‌وشا نها یا ئیرانێ كه‌ت.
هالی گۆت ژى: چ ده‌ست ل پشت خوه‌نیشاندانێن ئیرانێ نینه و بسروشتى ل ناڤ خه‌لكى ده‌ستپێكرینه، دیرۆكا ئیرانئ یا پره ژ هۆڤاتیی له‌ورا ئه‌و پێشبینییا قوربانیێن پتر ل وی وه‌لاتی دكه‌ن.”
ئەڤرۆ نیوز، لەزگین جوقی
رێڤەبەرێ نڤیسێنگەها رزگاركرنا رەڤاندیێن كوردێن ئێزدی ل دهۆكێ دیاركركو ئەڤرۆ سێشه‌مبى2/1/2018 دو رەڤاندیێن كوردێن ئێزدی ژ وەلاتی سووریێ هاتن رزگاركرن و ب دیتنا كەسوكارێن خوە شادبوون.
حسێن قائێدی، رێڤەبەرێ نڤیسێنگەها رزگاركرنا رەڤاندیێن كوردێن ئێزدی ل دهۆكێ بۆ ئه‌ڤرۆنيوز گۆت”هه‌ردو رەڤاندیێن هاتینە رزگاركرن خەلكێ ته‌ل عزێر و سولاخێ نە ل قەزا شنگالێ، پشتی بزاڤه‌كا مەزن هاتیە كرن، ئەڤرۆ مە شیا هەردو رەڤاندیان ل سووريێ رزگاربكەين”.
گۆت ژى” دێ بەردەوام كاركەین بۆ رزگاركرنا هەموو رەڤاندیان ل هەر جهەكى بن ل جيهانێ”.
ئاماژە دا وی چەندی ژی كو ل تەباخا سالا 2014 ل قەزا شنگالێ 6417 كەس هاتبوونە رەڤاندن وهەتا نها 3244 رەڤاندیێن ئێزدی یێن هاتینە رزگاركرن وهێشتا 3173 رەڤاندیێن دى يێن ددەستی تیرۆرستێن داعشێ دا.
ئه‌ڤرۆ:
حه‌یده‌ر عه‌بادى سه‌رۆك وه‌زیرێن عیراقێ د كۆنگرێ رۆژنامه‌ڤانى یێ حه‌فتیانه دا ئه‌ڤرۆ سه‌باره‌ت هه‌لبژارتنا لیستا مووچێن فه‌رمانبه‌رێن ساخله‌میێ و په‌روه‌ردێ یێن حوكمه‌تا هه‌رێمێ به‌رى وه‌زاره‌تێن دى راگه‌هاند” ئه‌ڤ دو وه‌زاره‌ته د گرنگ و هه‌ستیارن بۆ وه‌لاتیان، به‌لێ ئه‌م ب تنێ ل ڤان هه‌ردو وه‌زاره‌تان ناراوه‌ستین، دێ مووچێ هه‌موو فه‌رمانبه‌رێن هه‌رێمێ مه‌زێخین”.
ده‌رباز محه‌مه‌د وه‌زیرێ كوچ و كوچحبه‌ران د حوكمه‌تا عیراقێ دا كو كورده و سه‌ر ب بزاڤا گوران ڤه‌یه دیاركر كو وى ئه‌ڤرۆ د كومبوونا جڤاتا وه‌زیران دا پرسیار ژ عه‌بادى كر سه‌باره‌ت مووچێ فه‌رمانبه‌رێن هه‌رێمێ، عه‌بادى دیاركر كو عه‌بادى دێ مووچێ فه‌رمانبه‌رێن ساخله‌مى و په‌روه‌ردێ هنێریت و پاشان دێ پێداچوونێ د لیستا مووچێ هه‌موو وه‌زاره‌تان دا هێته كرن .
ئه‌ڤرۆ نيوز:
ل دووڤ میدیایێن ئیرانى، ل خونیشادانێن ئیرانێ هه‌تا نوكه 32 كه‌سان گیانێ خوه ژ ده‌ست داینه كو ب تنێ ل گاهده‌ریجان شه‌ش كه‌سان گیانێ خوه ژ ده‌ست دایه و ل ئه‌سفه‌هانێ ژى سێ كه‌سان.
عه‌لى ئه‌سغه‌ر جێگرێ پارێزگارێ ته‌هران راگه‌هاند، سه‌را خونیشادانان ل ته‌هران 450 كه‌س هاتینه گرتن و به‌رده‌وام ئه‌ڤ ژماره د زێده‌بوونێ دایه.
خونیشادانێن ئیرانێ رۆژا 5 شه‌مبیا بوورى 28/12/2017 ژ ئه‌نجامێ نه‌رازیبوونا ژماره‌كا وه‌لاتیان ل باژارێ مه‌شهه‌د سه‌باره‌ت گرانیا بازارى و بێكاریێ و گه‌نده‌لیێ ده‌ستپێكر و نوكه ئه‌ڤ خونیشادانه پرانیا باژێرێن ئیرانێ ڤه‌گرتیه.
ئه‌ڤرۆنيوز:
ئه‌ڤرۆ سێشه‌مبى 2/1/2018 جڤاتا وه‌زيرێن عيراقێ بريار دا بێهنڤه‌دانه‌كا دى يا فه‌رمى ل عيراقێ بهێته دياركرن.
دكۆمبوونا ئه‌ڤرۆ يا جڤاتا وه‌زيرێن عيراقێ ده‌نگدان هاته كرن ل سه‌ر “زێده‌كرنا ماده‌كا نوو بۆ پرۆژێ قانوونا بێهنڤه‌دانێن فه‌رمى ل عيراقێ، ئه‌وژى دياركرنا رۆژا ئازادكرنا ئاخا عيراقێ ژ تيرۆرستين داعشێ ل رێككه‌فتى 10 كانوونا ئێكێ وه‌كو جه‌ژنه‌كا نيشتمانى وبێهنڤه‌دانه‌كا فه‌رمى ل هه‌موو سالان”
ئه‌ڤرۆ نیۆز ، ره‌مه‌زان هه‌رنى :
سه‌رپه‌رشتا ئێكێ یا خواندنا كوردى ل كه‌ركوكێ دیاركر،پشتى سالا 2014 ێ كوردستان توشى ئاریشا نه‌بۆنا دارایى بۆى كه‌ركوك ژى بێ به‌هر نه‌بۆیه ل ڤێ چه‌ندێ هه‌مو ماموستایێن خواندنا كوردى ل كه‌ركوكێ ده‌وام و رێنمایێ سه‌ر ب حكومه‌تا عیراقێ ڤه‌یه‌و به‌لێ وه‌ك موچه سه‌ر ب حكومه‌تا كوردستانێ ڤه‌یه ئه‌ڤه‌ژى بۆیه ئاریشه بۆماموستایان ژبه‌ركێم كرنا موچه‌یێ وان دره‌نگ دابه‌شكرنێ هژماره‌كا ماموستایان كو سه‌ر ب حكومه‌تا عیراقێ ڤه نه موچه‌یێ خوه به‌ریا سه‌رێ هه‌یڤێ وه‌ردگرن و ل گه‌ل ماموستایێن خواندنا كوردى ده‌وامێ دكه‌ن به‌لێ ماموستایێن خواندنا كوردێ ب چه‌ند هه‌یڤا جاره‌كێ نیڤ موچه‌ى وه‌ردگرن له‌ورا هه‌مو ماموستایێن خواندنا كوردى ب ئێك ده‌نگ داخوازا ڤه‌گوهاستنا راژه‌یا خوه دكه‌ن ل وه‌زاره‌تا په‌روه‌ردا حكومه‌تا هه‌رێمێ بۆ سه‌ر ب وه‌زاره‌تا حكومه‌تا عیراقێ ب مه‌به‌ستا باشتر كرنا بارێ داریى و ئابوریێ ماموستایێن خواندنا كوردى ل كه‌ركوكێ.
په‌روین فاتیح سه‌رپه‌رشتا ئێكێ یا خواندنا كوردى ل كه‌ركوكێ بۆ ئه‌ڤرۆ نیۆز خویاكر، ل خواندنا كوردى ل كه‌ركوكێ ب گشتى 8 هه‌شت هزار ماموستاو فه‌رمانبه‌ر هه‌نه كو موچه‌یێ وان سه‌ر ب حكومه‌تا كوردستانێ ڤه‌یه ده‌وام و رێنمایێ سه‌ر ب حكومه‌تا عیراقێ نه ب رێیا ئێكه‌تیا ماموستایان مه داخواز كریه راژه‌یان هه‌مو ماموستاو فه‌رمانبه‌رێن خواندنا كوردى بهێته ڤه‌گوهاستن بۆ سه‌ر وه‌زاره‌تا په‌روه‌ردا حكومه‌تا عیراقى ب نڤیساره‌كا فه‌رمى دێ داخوازا ڤه‌گوهاستنێ كه‌ین بۆ سه‌ر وه‌زاره‌تا په‌روره‌دێ ل حكومه‌تا عیراقێ.
سه‌رپه‌رشتا خواندنا كوردى ل كه‌ركوكێ گوتژى، ژبلى نه‌بۆنا شایسته‌یێن دارایێ ماموستایێن خواندنا كوردى ل كه‌ركوكێ مه‌ترسى ژى لسه‌ر ژیانا وان هه‌یه به‌رده‌وام دكه‌ڤن به‌ر هه‌ره‌شیێن تیرورێ ئه‌گه‌ر بهێنه ڤه‌گوهاستن چاڤه‌رێ دكه‌ین ئه‌و مه‌ترسیه نه‌مینیت لسه‌ر ژیانا ماموستایان , هه‌مو ماموستا ب ئێكگرتى ئه‌ڤ بریاره دایه دخوازین بهێته بجهكرن ل ده‌مه‌ك نزیك, هه‌روه‌سا هژمارا قوتابیێن خواندنا كوردى ل كه‌ركوكێ 100 هزار بۆن به‌لێ پشتى رودانێن 16 ێ ئوكتوبه‌رێ 3500 قوتابى هاتینه ڤگوهاستن بۆ باژێرو قه‌زایێن دى ل گه‌ل 12 هزار زارویێن باخچه‌یان هه‌ه ل سنورێ خواندنا كوردى ل كه‌ركوكێ.
ئه‌ڤرۆنيوز:
سه‌رۆك وه‌زيرێن عيراقێ، ئه‌ڤرۆ سێشه‌مبى 2/1/2018 پشتى كۆمبوونا هه‌فتيانه يا جڤاتا وه‌زيرێن عيراقێ، د كۆنگره‌كێ رۆژنامه‌ڤانى دا به‌حسێ مووچێن فه‌رمانبه‌رێن هه‌رێما كوردستانێ كر.
حه‌يده‌ر عه‌بادى گۆت” كێشا هژمارا فه‌رمانبه‌رێن هه‌رێما كوردستانێ رێگريێ ل دانا مووچێن وان ناكه‌ت”.
ئه‌ڤرۆ په‌يڤدارێ فه‌رميێ حوكمه‌تا هه‌رێما كوردستانێ،سه‌فين دزه‌يى، راگه‌هاندبوو ” حوكمه‌تا هه‌رێمێ پێشوازيێ ل وان ئاماژه وپێنگاڤان دكه‌ت كو ل هه‌فتيا بۆرى ل به‌غدا ده‌ركه‌فتين ومه جۆره‌ك ژنيازپاكيێ ژێ ديت، وه‌كو سه‌ره‌دانا شانده‌كێ حوكمه‌تا عيراقێ بۆ هه‌رێما كوردستانێ وداخوازكرنا پێكئينانا لژنه‌كا هه‌ڤپشك بۆ دانوستاندنێ ده‌رباه‌رى ده‌رگه‌هێن سنورى وفرۆكخانان وبه‌نداڤێن هه‌رێما كوردستانێ وداخوازكرنا ليستا مووچێن هه‌ردو وه‌زاره‌تێن په‌روه‌ردێ وساخله‌ميێ ژلايێ حوكمه‌تا عيراقى يا فيدرالى ڤه ب مه‌ره‌ما هنارتنا مووچان”.
ئه‌ڤرۆنيوز:
سپێده‌يا سوباهى چارشه‌مبى 3/1/2018 جڤاتا نوونه‌رێن عيراقێ دێ ئێكه‌مين روونشتنا ده‌ستپێكرنا وه‌رزێ نوو كه‌ت وتێدا دێ خواندنا ئێكێ بۆ پرۆژێ قانوونا بودجا گشتى يا عيراقێ بۆ سالا 2018 هێته ئه‌نجامدان.
ل دووڤ خشتێ روونشتنا سوباهى يا جڤاتا نوونه‌رێن عيراقێ، ئێك ژ خالێن روونشتنێ دێ خواندنا ئێكێ بۆ پرۆژه قانوونا بودجا گشتى يا سالا 2018 يا عيراقێ بيت كو ژ 48 مادان پێكدهێت.
ئه‌ڤرۆنيوز:
ئه‌ڤرۆ سێشه‌مبى 2/1/2018 ئاڤاهيێ نوو يێ كه‌نالێ ئه‌سمانيێ ديجله يێ عيراقى ل ده‌ڤه‌را كه‌راده ل به‌غدا سوت وزيانێن مه‌زن ب ستوديۆ وكه‌لوپه‌لێن وى كه‌فتن.
كه‌نالێ ديجله يێ ئه‌سمانى دبه‌ياننامه‌كێ دا، گۆت” ئاڤاهيێ مه يێ نوو كو هێشتا كار تێدا ب ئێكجارى ب دووماهى نه‌هاتيه، سوت”.
زێده‌تر به‌لاڤكريه” زيان يێن گه‌هشتينه پشكێن دى يێن ئاڤاهى، به‌لێ چو زيان نه‌گه‌هشتينه ستوديۆيێن سه‌ره‌كى وكارێ وان يێ به‌رده‌وامه”.
ئاماژه دا ژى”سوزێ دده‌ينه بينه‌ران كو دێ دبه‌رده‌وام بين ل سه‌ر به‌خشێ خوه و راكرنا په‌ردان ل سه‌ر راستيان وئاشكراكرنا گه‌نده‌ليێ وگه‌نده‌لكاران ورۆمالكرنا روودانان ب شێوه‌كێ بێ لايه‌ن”.
كه‌نالێ ناڤبرى دياركر” هێشتا ئه‌گه‌رێ ئاگربه‌ربوونێ يێ ديار نينه، داخوازێ ژ حوكمه‌تێ ولايه‌نێن په‌يوه‌نديدار دكه‌ين، ئه‌گه‌رێ ئاگربه‌ربوونێ ل ئاڤاهيێ كه‌نالێ مه ئاشكرا بكه‌ن”.
ئەڤرۆنيوز، سالار دۆسكی:
ل دووڤ ئامارێن رێڤەبەریا بەرگریا شارستانی ل پارێزگەها دهۆكێ ل سالا بۆری (1453) روودان ل سنورێ پارێزگەها دهۆكێ دروست بووینە.
بێوار عەبدوالعزیز به‌رپرسێ پەیوەندی و راگەهاندنێ ل رێڤەبەریا بەرگریا شاستانی ل دهۆكێ بۆ ئەڤرۆنیۆز ئاشكراكر كو ژ سەرجەمێ ئەڤێ هژمارێ(29) كەس خەندقینە، (32) سوتینە، (72) وەلاتی ژی بریندار كەفتینە.
گۆت ژى” زیانێن مادی ل ئەف سالە (9664540000) نەه ملیار و شێست و شه‌ش و چار ملیۆن و پێنچ سەد و چل هزار دینارێن عیراقی بوون” .
بێوارى دياركر” روودانێن ئاگربەربوونێ ل سالا 2017 كێمتر بووینە ژ سالا 2016، ئەڤە ژی ڤەدگەریت بۆ پتر هاریكاریا خەلكی ل گەل تیمێن ئاگر ڤەمراندنێ” ئاماژه دا” پشتی هاتنا ئاواران روودانێن ئاگر بەربوونێ زێدە بوون، لێ نوكە ئەو ژی هەفكارن و روودان كێم بووینە، ئەم شیاینە (131) خۆلێن هشیاركرنێ بۆ خەلكێ خوە ڤەكەین”.
نيشاندان