ئه‌ڤرۆنيوز:
ئاهه‌نگێن سه‌رێ سالێ يێن شڤێدى ئاگربه‌ربوون وبريندار ل به‌غدا وسلێمانيێ ل دووڤ خوه هێلان.
ل دووڤ هنده‌ك ده‌زگه‌هێن راگه‌هاندنێ يێن عيراقى، چه‌ندين خانى ل به‌غدا ب تايبه‌تى ل ده‌ڤه‌را كه‌رداه تووشى سۆتنێ بوون ژئه‌گه‌رێ ياريێن ئاگرى ئه‌وێن دهاتن هاڤێتن ب هه‌لكه‌فتا هاتنا سه‌رێ سالا زايينى يا نوو 2018، به‌لێ چو زيانين گيانى ژێ په‌يدا نه‌بوون.
ل هه‌مان هه‌لكه‌ت، شڤێدى ل سلێمانيێ دو كه‌س ژئه‌گه‌رێ هاڤيتنا ياريێن ئاگرى برينداربوون.
ئەڤرۆ نیۆز ، زنار تۆڤی:
رۆژنامێن ئینگلیزی ئاشكرا كرینە کو یانا ریال مەدرید یا ئیسپانی بریار دایە کو 120 ملیۆن پاوەنان ئامادە بكەت بۆ گرێدانا گرێبەستێ ل گەل ئیدین هازاردێ ستێرا هەلبژارتیێ بەلجیكا و یانا چێلسی یا ئنگلیزی.
بابێ وی ستێرا تەمەن 26 سالی ل ڤان دوماهیان ئاشكراکربوو کو کورێ وی نەڤێت گرێبەستا خۆ ل گەل یانا چێلسی نوو بکەت چاڤەرێی دەستەوارەیێ یانا ریال مەدرید دکەت.
رۆژناما (سەن) یا ئنگلیزی بەلاڤەکریە:کو زێنەدین زێدانێ راهێنەرێ یانا ریال مەدرید ناڤێ وان یاریزانان داینە بەرپرسێن یانا خۆ،یێن تیما وی پێدڤی پێ هەیی ب تایبەتی ل هێلا هێرشبەریێ دا،ب ئەگەرێ دابەزینا ئاستێ كەریم بەنزیمای و هنگافتنێن ئێك لدووڤ ئێک یێن گاریس بێلی.
هەروەسا ناڤێ وان یاریزانێن کو زێدان داخواز كرین د رێزێ ئێکێدا ئیدین هازارد هاتییە.
ژلایێ خۆڤە فلۆرنتینۆ پێرێزێ سەرۆكێ یانا ریال مەدرید و پشکەکا زۆر ژ بەرپرسێن وێ یانێ جەخت ل سەر هندێ كریە كو تیپا وان پێدڤی ب چەند یاریزانێن نوو هەیە ب تایبەتی ل هێلا هێرشبەریێ دا و پێدڤیە د ماوێ ڤەگوهاستنێن هاڤینا داهاتیدا هەولان بۆ بدەن.
ئه‌ڤرۆنيوز:
پشتى پێنج سالێن به‌رده‌وام يێن كاركرنێ د پرۆژێ ئينسكلۆپيديا پارێزگه‌ها دهۆكێ دا، ل ڤان رۆژان چوويه چاپێ.
موسه‌ده‌ق تۆڤى، سه‌رنڤيسه‌ر و سه‌رپه‌رشتێ ئينسكلۆپيديا پارێزگه‌ها دهۆكێ بۆ ئه‌ڤرۆنيوز گۆت” ئينسكلۆپيديا پارێزگه‌ها دهۆكێ ژ 9 به‌رگان پێكهاتييه و دبيته 5000 به‌رپه‌ر، پشتى پێنج سالێن كاركرنێ ژ قۆناغا ديزاينێ ژى ده‌رباز بوو و د ڤان رۆژاندا چوويه چاپێ”.
تۆڤى زێده‌تر گۆت”110- 120 ڤه‌كۆله‌ر و نڤيسكار و ره‌وشه‌نبير وديزاينه‌ران پشكدارى تێدا كريه، هه‌موو مژارێن جيۆلۆجى، جۆگرافى، مێژوويى، ئه‌ده‌بى، فولكلورى، هۆنه‌رى، په‌روه‌رده وفێركرنێ و ديرۆك و جوگرافى و پێكهاتێن كارگێرى و پێكهاتا نه‌ته‌وى وئايينى و عه‌شيره‌تى يا گوند و باژێرێن پارێزگه‌ها دهۆكێ و چه‌ندين مژارێن دى يێن په‌يوه‌ندى ب پارێزگه‌هێ ڤه هه‌ى ب خوه‌ڤه‌دگريت”.
ئەڤرۆ نیۆز ، سەباح زۆهێر:
به‌هزاد زێبارى سه‌روكێ فراكسیونا ئێكگرتوو ل په‌رله‌مانێ هه‌رێما كوردستانێ دده‌ته دیاركرن كو ل دیف وان زانیارى و داتایێت ده‌ست وان كه‌فتى كو ل تومارا ده‌نگده‌راندا هژماره‌كا خه‌یالیا ده‌نگێن سه‌خته تێدانه كو دبیته 30 كورسیێت په‌رله‌مانى له‌ما دڤێت دیفچوون ل سه‌ر بهێته‌كرن و بۆ ده‌نگدانێت داهاتى زانیاریێت راسته‌قینه بده‌ینه كومسیونێ و ئه‌ڤ پروسه ب جوانى ب رێڤه‌بچیت.
به‌هزاد زێبارى سه‌روكێ فراكسیونا ئێكگرتوو ل په‌رله‌مانێ كوردستانێ دده‌ته‌دیاركرن كو ل گۆر وان داتا و زانیاریێت ده‌ستێ مه‌دا تومارا ده‌نگده‌ران 61هزار ده‌نگێن سه‌خته تێدانه كو دبیته 30كورسێن په‌رله‌مانى.گۆت ل دیف زانیاریێن وه‌زاره‌تا پلاندانانێ ل سالا2012 ژمارا ئاكنجیێت هه‌رێما كوردستانێ 5300000كه‌س بوون ل دیف وێ سه‌رژمێریا كو حكومه‌تا هه‌رێما كوردستانێ ئه‌نجامداى،هه‌روه‌سا 4500000كه‌س بوون ل دیف پسولا خوراكى(وه‌زاره‌تا بازرگانى)جیاوازى ل ناڤبه‌را هه‌ردوو سه‌رژمێریا 800000كه‌س بوو،ئه‌گه‌ر ئه‌نجامێ هه‌ردوو سه‌رژمێریان وه‌رگرین ئاكنجیێن هه‌رێمێ ل سالا2012ێ 4900000كه‌س بوون، كو تێكرا زێده‌كرنا مروڤى ل هه‌رێمێ 2،7%سالانه واته ل دیف هه‌ردوو پیڤه‌رێن مه ئاماژه‌پێكرى نوكه نها سه‌رجه‌مىچ ئاكنجیێت هه‌رێمێ 5732000 ب خوڤه‌دگریت.
زێبارى هێشتا گۆت ئه‌گه‌ر سه‌رژمێریا سالا 2012بكه‌ینه بنه‌ما ل سالا 2013ئاكنجیێت هه‌رێمێ 5448000كه‌س بوونه ژمارا ئه‌وێن مافێ ده‌نگدانێ هه‌بوویه 2471000كه‌س بوونه،واته رێژا ده‌نگده‌ران ل ژمارا ئاكنجیان 45% بۆ سالێن دى،ب هه‌مان شێوه ل ناڤبه‌را 49،45%واته تێكرا رێژا ده‌نگده‌را بۆ ژمارا ئاكنجیان 47%بخوڤه‌دگریت،ئه‌ڤه‌ژى دگه‌ل رێژا زێده‌بوونا مروڤا ل هه‌رێمێ ئێك دگرن، كو ناڤبه‌را 2،5 2،8%كو تێكرا 2،7دكه‌ت ،ژبه‌رهندێ 47% ژمارا دانیشتوانێت هه‌رێمێ ل 2580000ده‌نگده‌رن،كو ئه‌ڤه‌ژى ب جیاوازیا 670هزارده‌نگده‌را ل دگه‌ل یا نها ل تومارا ده‌نگدانێ دا هه‌ى كو 3250000.
په‌رله‌مانتار به‌هزادى ئاماژه دا وێ چه‌ندێ ژى كوئه‌گه‌ر ب هویرى به‌رێ خوه بده‌ینێ زێده‌بوونا نا ئاسی یا رویدایى كو ژمارا ده‌نگده‌ران ل سالا 1992بوچ 2005كو سالانه 75هزار كه‌س زێده‌بووینه،دڤێت زێده‌بوونا ده‌نگده‌ران ل ڤى ده‌مى دا سالانه ل 55هزارا زێده‌ترنه‌بایا، و ل سالا (2013بۆ 2017) 979هزار ده‌نگده‌ر زێده‌بووینه سالانه 194750كه‌س زێده‌بووینه، كو تنێ ناڤبه‌را حه‌فت مه‌هێن هه‌لبژارتنا سالا (2013 و 2014) 202هزار ده‌نگده‌ر زێده‌بووینه،ئه‌ڤه‌ژى ژماره‌كا زوره ،دڤێت ژمارا زێدبوونا ده‌نگده‌ران سالانه 85هزار كه‌س زێده‌ترنه‌بانه،چونكى ب ڤێ هاوكێشێ ژمارا زێده‌بوونا ده‌نگه‌ده‌ران زێده‌بكه‌ین، ژمارا زێده‌بوونا ده‌نگده‌ران،ل سال 2017 یه‌كسانه ب زێده‌بوونا ئاكنجیێت پێش 18سال واته 1999ــ ژمارا مریێن سالا 2017. واته زێده‌بوونا 2017یه‌كسانه ب 82هزار ــ 22هزار یه‌كسانه ب 60هزار،و ئه‌گه‌ر تێكرا زێده‌بوونا ده‌نگده‌ران ل دوماهیا 2017دبیته 4190000كه‌سا تێنه‌په‌ریت،ب جیاوازیا 760هزار ده‌نگده‌رب به‌راورد ل تومارا نوكه‌دا كو 3200000ده‌نگده‌رن.
ل داویێ ناڤبرى گۆت كو ل دیف خشتا ده‌نگده‌ران وه‌كى مه ئاماژه پێكرى و ل دیف شروڤه‌یا زانستى و داتا و زانیاریێت فه‌رمیێت هه‌رێمێ،كو ب كێمى 615هزار ده‌رنگده‌رێن سه‌خته ل تومارا ده‌نگده‌ران دا هه‌یه كو دبیته 30كورسێت په‌رله‌مانى،ژبه‌رهندێ پێدڤیه كومسیونا بالا هه‌رێمێ ل ژێر سه‌رپه‌رشتێ په‌رله‌مانى پروسا پاكرنا تومارا ده‌نگده‌ران بكه‌ت و حكومه‌تا هه‌رێمێ داتا و زانیاریێت راسته‌قینه بده‌ته كومسیونێ و هه‌مى ئاسانكاریا بكه‌ت،بۆ هندێ ئه‌م خوه ل ناڤڤ هه‌رێمێ دا ب جوانى ڤێ پروسێ ئه‌نجام بده‌ین،داكو حكومه‌تا ناڤه‌ندى ژى موزایدێن سیاسى ل سه‌ر سه‌رێ مه نه‌كه‌ت.
ئه‌ڤرۆ نیوز ، نه‌وزاد هلۆرى:
شه‌ڤا دى پشتى 18 خوله‌كان ل سالا 2018 دێ دا ئێكه‌م زارۆ ل پارێزگه‌ها دهۆك ژ دایك بوو و ناڤێ وێ كره هه‌ناس.
هانى رێكانى بابێ ئه‌وى زاروكى بو ئه‌ڤرۆ نیوز گۆت: ( شه‌ڤا بورى ل نه‌خوشخانا ژ دایكبوونێ ل سه‌نته‌رێ باژێرێ دهوكێ ، خودایێ مه‌زن پشتى 18 خوله‌كان زارۆيه‌ك ب رزقێ من كر و ئه‌ڤ یه‌ك ژى دبیته ئێكه‌م زارۆ ل سنوورێ پارێزگه‌ها دهۆك كو په‌یدابوویه د سالا 2018 دێ دا ، و ئه‌ڤێ یه‌كێ ژى ئه‌ز زور دخوشكرم )
زێده‌تر گۆت: ( من ناڤێ كچا خوه كره هه‌ناس وه‌كو ئاماژه‌یه‌ك بو هه‌ناسه‌دانا ئێكێ د سالا نوودا و هه‌ناسه‌دان بو ژیانێ و مالا من ل كومه‌لگه‌ها سیریێ یا سه‌ر ب ناحیا شێلادزێ یه ل سنوورێ قه‌زا ئامێدیێ )
ئەڤرۆ نیۆز،زنار تۆڤی:
موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:ئەڤرۆ د رووانەکا ترافیکێ دا ل سنۆرێ قەزا ئاکرێ ترۆمبێلەک وەرگەریا.
ناڤهاتی دیارکر ژی: ئەڤرۆ دوشەمبی رێکەفتی ۲۰۱۸/۱/۱ ل دەمژمێر ۱۰:۰۰ سپێدێ ل دریانا ناحیا دینارتە یا سەر ب قەزا ئاکرێ ڤە روودانەکا ترافیکێ ژ جورێ وەرگەریان هاتیە روودان و د ئەنجامدا گیان ب سەلامەت بوو، لێ زیانێن ماددی ب خودانێ ترۆمبێلێ کەفتینە.
ئه‌ڤرۆ نيوز:
ل دووڤ پێشبينيێن كه‌شناسيا هه‌رێمێ، ئه‌ڤرۆ و سوبه دێ ئه‌سمان عه‌ور بيت، ل گه‌ل ئه‌گه‌رێ باران بارينێ ل ده‌ڤه‌رێن جودا جودا يێن پارێزگه‌هێن كوردستانێ.
سه‌باره‌ت سه‌قايێ دهۆكێ هاتيه دياركرن كو ئه‌سمان دێ ئه‌ور بيت ل گه‌ل ئه‌گه‌رێ باران بارينێ ل پرانيا ده‌مان،
سه‌باره‌ت سه‌قايێ سوبه، پێشبينى كريه كو ئه‌سمان ب تمامى عه‌ور بيت و ئه‌گه‌رێ بارانێ ل هه‌مى ده‌مێن روژێ و ل ده‌ڤه‌رێن چيايى ژى دێ به‌فر باريت.
ئه‌ڤرۆ نیوز ، نه‌وزاد هلۆرى:
پشتى كو سه‌رۆك وه‌زیرێن عیراقێ داوى هاتنا شه‌رێ داعش ل عیراقێ راگه‌هاندى ده‌ست ب چه‌ند خه‌ملاندنه‌كێن شه‌رێ داعش ل سێ سالێن بورى یێن هێزێن عیراقى و پێشمه‌رگه‌ى ل گه‌ل داعش هاته‌كرن.
شه‌رێ داعش هزار و 276 رۆژان ڤه‌كێشا.
هه‌رچه‌نده زیانێن شه‌رێ داعش عیراقێ ناهێنه خه‌ملاندن د چه‌ند روژه‌كان دا ژبه‌ركو وێرانكاریێن زور هاتینه‌كرن ، به‌لێ دوڤ هنده‌ك زانیاریان ل 9/7/2014 هه‌تا 10/10/2017 روژا ده‌ركرنا داعش ل عیراقێ 40% ژ ئاخا عیراقێ كه‌فته ده‌ست داعش ژ وانا پارێزگه‌ها موسل و ئه‌نبار و چه‌ند ده‌ڤه‌ره‌كێن دن كو ئه‌و جهێ داعشێ ده‌ست ب سه‌ردا گرتى دناڤبه‌را 40% بو 80% هاتیه وێرانكرن.
لدووڤ داتایێن كو دناڤا راپورتێن چه‌ند كه‌نال و رێكخراوان به‌لاڤكرین دناڤبه‌را 80 بو 100 هزار ئێكه‌یێن ئاكنجیبوونێ ل سنوورێ پارێزگه‌هێن كه‌ركوك و موس و ئه‌نبار و تكریت و بێجى و دیالا و ده‌روبه‌رێن به‌غدا و ده‌ڤه‌رێن دن هاتینه خراپكرن ، كو ژوانان 32 هزار به‌س دكه‌ڤنه لایێ راستێ موسل كو ب زورترین ئاكنجیبوونا داعش دهاته نیاسین و خوه تێدا ئاسێ كربوو ، ئه‌ڤه زێده‌بارى كو فروكخانه و وێستگه‌ها شه‌مه‌نده‌فرێ و قوتابخانه و نه‌خوشخانه و جادده و كولان و جهێن گشتى یێن پرانیا موسل هاتینه وێرانكرن.
سه‌روك وه‌زیرێن عیراقێ ژى دیاركر كو زیانێن شه‌رێ داعش زێده‌تر 100 ملیار دینار نكو ژ ئه‌نجامێ شه‌ر و بوردومانێن سه‌ر داعش هاتینه كرن.
تێچویێن سه‌ربازى ل شه‌رێ داعش عیراقێ
لدوڤ داتایێن هه‌ڤپه‌یمانیا فراكسوونا مه‌واتن یا عیراقى تێچویێن سه‌ربازى یێن ژ ناڤبرنا داعش عیراقێ گه‌هشتینه 300 ملیار دولار ، كو ژ وان 100 میار دولار بو كرینا چه‌كى و پێدڤیێن سه‌ربازیێن عیراقى هاتینه مه‌زاختن.
زیانێن مرۆڤایه‌تى:
ل گوره‌ى داتایێن وه‌زاره‌تا كوچ و كوچبه‌رێن عیراقێ هژمارا ئاوارێن شه‌رێ داعش عیراقێ زێده‌تره ژ پێنج ملیون كه‌سان ، و ژ وانان تنێ 426 هزار كه‌س ڤه‌گه‌ریاینه سه‌ر مال و حالێن خوه ، دیسان ژ ئه‌گه‌را شه‌رێ داعش 35 هزار و 900 كه‌سێن سڤێل هاتینه كوشتن و 41 هزار كه‌س ژى برینداربوینه.
دیسا نسێ هزار و 100 كوردێن ئێزدى هاتینه كوشتن و شه‌ش هزار و 800 كه‌س ژى هاتینه ره‌ڤاندن ، و ژ وانان سێ هزار و 140 ئێزدى و پتر هاتینه رزگاركرن و 400 هزار كوردێن ئێزدى ئاواره و په‌نابه‌رێ هه‌رێما كوردستان و جیهانێ بوینه.
ل گوره‌ى داتایێن نه فه‌رمى زیانێن سوپا و هێزێن عیراقى د شه‌رێ داعشێ دا زێده‌ترى نه‌ه هزار سه‌ربازێن عیراقى هاتینه كوشتن ب تایبه‌تى دناڤ رێزێن پولیسێن فیدرالى ، و دیسان شه‌ش هزار كوشتى و 17 هزار بریندار ژى دناڤ رێزێن حه‌شد شه‌عبى هه‌نه.
بارا هژمارا شه‌هید و بریندارێن پێشمه‌رگه‌ى ژى ، وه‌زاره‌تا پێشمه‌رگه‌ى یا حوكمه‌تا هه‌رێما كوردستانێ پێشتر راگه‌هاند كو هزار و 745 پێشمه‌رگه شه‌هیدبوینه و زێده‌تر ژ 10 هزار پێشمه‌رگه ژى برینداربو.ینه.
گورێن ب كوم
كومسیوونا بلند یا مافێ مرۆڤى ل عیراقێ هه‌تا نها ژ ئه‌نجامێ شه‌رێ داعش 74 گورێن ب كوم هاتینه دیتن ، ول گه‌ل 39 گورێن ب كوم یێن كوردێن ئێزدى ، و هه‌تا نها روفاتێن ئه‌وان گوران وه‌كو خوه ماینه.
هه‌ر چه‌ند ل كوردستانێ چوو خه‌ملاندنێن هویر لسه‌ر زیانێن ماددى و مرۆڤایه‌تى نه‌هاتینه‌كرن ، به‌لێ ل كوردستانێ ژى ب تایبه‌تى ده‌ڤه‌رێن ڤه‌قه‌تیایێن سه‌ر ب كارگێریا هه‌رێما كوردستانێ زیانێ، زور هاتینه كرن ب تایبه‌تى شنگال و مه‌خمور و كه‌ركوك و ده‌شتا نه‌ینه‌وا و چه‌ند ده‌ڤه‌رێن دن ، و گوره‌ى زانیاریێن ده‌سته‌یا گشتى یا ده‌ڤه‌رێن ده‌رڤه‌یێ كارگێریا هه‌رێما كوردستانێ هنده‌ك ژ وان ده‌ڤه‌را 60% وێرانبوینه و پرانیا خه‌لكێ وان ده‌ڤه‌ران ژى مال و حالێن خوه بجه هێلاینه كو دوو ملیون كه‌سان پتر بخوڤه دگریت.
ئەڤرۆ نیۆز ، زنار تۆڤی:
تورکیا دێ دەست ب گرتنا ئاڤێن عێراقێ کەت، لایەنێن پەیوەندیدار ژی دبێژن،ب گرتنا ئاڤێن عێراقێ دێ کاریگەریێ ل سەر ھەرێما کوردستانێ دروست کەت.
عەباس غەزالی، ئەندامێ پەرلەمانێ کوردستانێ د لیژنا چاندندنێ و ئاڤدێریێ دا دبێژیت:تورکیا ل سەر رووبارێن دیجلە و فوراتی دەست ب دروستکرنا چەند بەنداڤان کریە، بەنداڤا حەسەن کەیف،ل باژێرێ باتمانێ ل باکۆرێ کوردستانێ د قۆناغا دوماهیێ دایە،ئەڤێ ژی کاریگەری ل سەر ئاڤا عێراقێ ھەیە، چونکی هەکە ئەو بەنداڤە تەمام بن دێ ئاستێ ژێدەرێن ئاڤا عێراقێ، ب تایبەتی یا دیجلە و فورات کێم کەت.
هەروەسا گوتیە:گرتنا ئاڤان دێ کاریگەریەکا زێدەتر ل سەر پارێزگەها سلێمانیێ هەبیت، چونکی ھەردوو بەنداڤێن ئاڤێ ل سلێمانیێ نە و ئاڤا ڤەخوارنا خەلکێ وێ پارێزگەهێ ل سەر ھەردو بەنداڤانە، کو ئەڤە ژی دێ مەترسیێ ل سەر ژێدەرێن ئاڤا وێ پارێزگەهێ دروست کەت.
دکتۆر کەیوان عەلی، شارەزا د پرسێن ئابووری و ژێدەرێن ئاڤێدا بۆ باس گوتیە:گرتنا ئاڤێ ژلایێ تورکیاڤە دێ کاریگەریێ ل سەر کوردستانێ دروست کەت،ب تایبەتی ل پارێزگەها سلێمانیێ، چونکی ژ ئیران و تورکیا 12 ملیار مەترێن سێجا یێن ئاڤێ دهێنە ھەرێما کوردستانێ،ئەڤ ئاڤێن دهێنە ھەرێما کوردستانێ،مەزنترین بەنداڤ ژێ هاتینە دروست کرن، ئەو ژی بەنداڤێن دوکان و دەربەندیخانن، بەلێ ب ئەگەرێ وان ھەلمەتێن ئیران و تورکیا ئاڤ گەلەک کێم بوویە.
ئه‌ڤرۆ نیوز ، نه‌وزاد هلۆرى:
ئاكنجیێن ناحیا پیران ل ده‌ڤه‌را بارزان چو ده‌مێن سالێ خوێ ناكرن و ژبۆ ده‌ستكه‌فتنا خوێ ئه‌و پشت به‌ستن ب خوێیا سرۆشتى یا بیره‌كا خوێ دكه‌ن ل ده‌ڤه‌رێ.
یاسین پیرانى وەلاتیه‌كێ ناحیا پیرانه دیاركر كو زێده‌ترى 300 سالایه چو وه‌لاتیان ل ناحیا پیران خوێ نه‌كریه و بۆ ئه‌ڤرۆ نیوز گوت : ( هه‌ر ژ ده‌ستپێكا دروستبوون و ئاڤه‌دانكرنا ناحیا پیران ، كو ل وى ده‌مى پیران گونده‌كێ بچووك بوو ، بیره‌كا سرۆشتى یا خوێ ل گوندى هاته دیتن و ل وى ده‌مى خه‌لكى نه‌دزانى خوێ چ تشته ؟، به‌لێ ب ده‌ربازبوونا ده‌مى ئه‌و بیره هاته كولان و جهه‌كێ تایبه‌ت بۆ هاتیه چێكرن ژ وێ رۆژێ هه‌تا نها ئاكنجیێن ناحیا پیران بۆ ده‌ستكه‌فتنا خوێ پشت به‌ستنێ ب خوێیا ئه‌وێ بیرێ دكه‌ن و خوێیه‌كا ساخه‌م و باشه بۆ ساخه‌میا مرۆڤى )
زێده‌تر گۆت : ( سالانه هه‌ر كه‌سێ خوێ بڤێت ناڤى خوه د ده‌فته‌ره‌كێ دا تومار دكه‌ت و پاشان ب سرایێ هه‌موو رۆژێن سالێ لسه‌ر وه‌لاتیان دهێنه دابه‌شكرن ، به‌لێ ژ به‌رنه‌بوونا چو سه‌خبێریان د نهادا بتنێ رۆژانێن كو باران نه‌بارن خوێ دهێته هه‌لكێشان ژبه‌رڤێ دخوازین كو جهێن شوله‌ژێ هنده‌ك ئامیرێن تایبه‌ت و كاره‌بێ و سه‌خبێریان بۆ پتر به‌رفره‌هكرنا بیرێ بكه‌ت داكو پتر خوێ بهێته به‌رهه‌مئینان ).
ناڤبرى د درێژاهیا ئاخفتنێن خودا دیاركر كو سالانه هه‌ر خێزانه‌كێ نێزیكێ 200 كیلویێن خوێ ده‌ست دكه‌ڤیت و گۆت ژى : ( دنها دا ژبلى خه‌لكێ سه‌نته‌رێ ناحیا پیران چو كه‌سه‌كێ ماف نینه خوێ ژ ڤێ بیرێ بینیت ده‌رێ و چوو كه‌سان ژى ماف نینه بفروشیت و ئه‌ڤ خوێیه ژلایێ نوشداران هاتیه تاقیكرن و گه‌له‌ك ژى باشتره ژ خوێیا كارگه‌هان و تایبه‌تى بو غودێ گه‌له‌ك یا باشه و چو مه‌ترسى لسه‌ر ساخله‌میا مرۆڤان نینه).
نيشاندان