ئه‌ڤرۆنيوز:

سه‌رۆك مه‌سعود بارزانى په‌يامه‌كێ ب هه‌لكه‌فتا سالا نوو به‌لاڤ دكه‌ت.

دپه‌ياما خوه‌ دا، كو دبه‌رپه‌رێ خوه‌ ل سه‌ر تۆرا جڤاكى يا تويته‌رى به‌لاڤكرى، سه‌رۆك بارزانى سالا نوو ل گه‌لێ كوردستانێ پيرۆز دكه‌ت. هه‌روه‌سا هيڤى خواست ل سالا 2018 ئاشتى وپێشكه‌فتن هه‌موو جيهانێ ڤه‌گريت.

ئه‌ڤرۆنيوز:

د ئينفۆگرافيه‌كا سايتێ سپۆتنيك يێ روسى، خه‌ملاندن بۆ هيزێن چه‌كدارێن كوردى ل هه‌ر چار پارچێن كوردستانێ هاتيه‌ كرن، ل دووڤ وێ ئينفۆگرافيێ كوردان 471 چه‌كدار يێن هه‌ين.

نه‌خشێ سه‌ره‌كيێ ئاژانسا سپۆتنيك يا روسى ب ناڤێ ” نه‌خشێ دابه‌شبوونا كوردان وهێزێن وان يێن چه‌كدارى”هاتيه‌ دانان وه‌سا پێناسا كوردان دكه‌ت كو مه‌زنترين نه‌ته‌وا بێ ده‌وله‌ته‌، پاشى به‌حسێ هژمارا چه‌كدارێن كورد دكه‌ت كو ب ڤى شێوه‌ى ل خوارێ ئاماژه‌ بۆ هاتيه‌ كرن، ل دووڤ وێ ئاژانسێ كوردان نێزيكى نيڤ مليۆن چه‌كدار ل رۆژهه‌لاتا ناڤين يێن هه‌ين، هژمارا كوردان ژى ب 32 مليۆن كه‌سان دخه‌ملينيت.

ئه‌وا دئينفۆگرافيكا ئاژانسا سپۆتنيك گرنگ بيت، ئه‌و هژمارا هێزێن كوردى يه‌ كو گه‌له‌ك جاران چاڤدێران دووپاتى كريه‌ كورد ب هۆكارێ هێزێن خوه‌ دشێن هه‌ڤكێشێن رۆژهه‌لاتا ناڤين ب گوهۆرن، ل دووماهى شه‌ر كو شه‌رێ داعشێ بوو، دياربوو كورد ل سووريێ ول عيراقێ ئه‌و هێزا تيرۆرستى شكاند كو مه‌زنترين هێزا تيرۆرستى بوو دديرۆكێ دا.

ئه‌ڤه‌ ژى خه‌ملاندنا هێزين چه‌كدار يێن كوردى يه‌ ل دووڤ ئاژانسا سپۆتنیك:

پێشمه‌رگێ‌ هه‌رێما كوردستانێ: 200000- 250000

 پارتيا كرێكارێن كوردستانێ:   5000-10000

پێشمه‌رگه‌ ل‌ رۆژهه‌ڵاتێ كوردستانێ:    10000 – 15000

په‌ژاك:  1000-2000

یه‌كینه‌يێن پاراستنا گه‌ل 75000

یه‌كینه‌يێن پاراستنا ژنان:  10000

هێزێن سووريا ديموكرات (هه‌سه‌ده‌)  :  90000

ئه‌ڤرۆنيوز:

ل دووڤ بريارا هژمار 126 يا سالا 2017، جڤاتا وه‌زيرێن هه‌رێما كوردستانێ، كو ل رۆژا 29/12/2017 ل رۆژناما (وه‌قائيع كوردستان) هاتيه‌ به‌لاڤكرن، حوكمه‌تا هه‌رێما كوردستانێ ب فه‌رمى هه‌موو باج ورسوماتێن ل سه‌ر كه‌لوپه‌لان دياركر.

ئه‌و باج ورسومات ژلايێ وه‌زاره‌تا دارايى وئابوورى بۆ وه‌زاره‌تا باژێرڤانان دياركرن ب هه‌ماهه‌نگى ول دووڤ رێككه‌فتنێ دناڤبه‌را هه‌ردو وه‌زاره‌تان دا وجڤاتا وه‌زيران ژى رازيبوون ل سه‌ر كر.

ل ده‌ستپێكا ڤێ سالێ ، ل دووڤ وێ بريارىێ باج ورسومات دێ هێنه‌ وه‌رگرتن وبۆ پێشڤه‌چوونا كاروبارێن باژێرڤانيان ول بن رۆناهيا قانوون ورێنمايێن دارايى، راسته‌وخوه‌ ژلايێ وه‌زيرێ باژێرڤانيان دێ هێنه‌ خه‌رج كرن وبۆ كه‌رتێ گشتى دێ هێنه‌ بكارئينان.

جڤاتا وه‌زيران، هوشدارى دا ل وێ چه‌ندێ هه‌كه‌ ل ده‌مێ سه‌رپێچيكرنێ يان نه‌دانا كرێ ورسوماتان، باژێرڤانى ول دووڤ قانوونا داهاتيێ باژێرڤانيان دێ ره‌فتارێ ل گه‌ل سه‌پێچكاران كه‌ت.

ئه‌ڤرۆنيوز:

ل دۆر رێكلامكرنێ بۆده‌رمانان دده‌زگه‌هێ راگه‌هاندنێ دا، وه‌زاره‌تا ساخله‌ميێ ل هه‌رێما كوردستانێ رێنمايێن تايبه‌ت ده‌ركرينه‌، په‌يڤدارێ وه‌زاره‌تێ ژى هوشداريێ دده‌ته‌ هه‌ر كه‌ناله‌كێ راگه‌هاندنێ كو ريكلامێ بۆ ده‌رمانان بكه‌ت.

ئه‌ڤرۆ ئێكشه‌مبى 31/12/2017 ، په‌يڤدارێ وه‌زاره‌تا ساخله‌ميێ ل هه‌رێمێ خالس قادر راگه‌هاند” ل دووڤ قانوونا ساخله‌ميا گشتى، وه‌زاره‌تا ساخله‌ميێ رێنمايێن تايبه‌ت بۆ ريكلامكرنێ بۆ ده‌رمانان ده‌ركرينه‌”.

خالسى زيده‌تر گۆت”رێكلامكرن بۆ ده‌رمان ونه‌خوه‌شخانان وهه‌ر بابه‌ته‌كێ نوشدارى دكه‌نالێن راگه‌هاندنێ دا قه‌ده‌غه‌يه‌، تنێ ل په‌رۆگرامێن تايبه‌ت ب ساخله‌ميێ ڤه‌ يان گۆڤاره‌كا تايبه‌ت ب ساخله‌ميێ ڤه‌ درێ پێداينه‌”.

په‌يڤدارێ وه‌زاره‌تا ساخله‌ميێ بۆ نه‌وا ئاشكراكر”دده‌مێ بۆرى دا سكالا ل زێده‌تر ژ 18 كه‌نالان هاتينه‌ تۆماركرن كو سه‌پێچيا وان رێنمايان كربوو”.

ل دۆر په‌يوه‌نديێ وهه‌ماهه‌نگيێ دناڤبه‌را وه‌زاره‌تا ساخله‌ميێ ووه‌زاره‌تا ره‌وشه‌نبيرى سه‌باره‌ت قه‌ده‌غه‌كرنا ريكلاما ده‌رمانان، خالس قادر گۆت” مه‌ كۆمبوون ل گه‌ل وه‌زاره‌تا ره‌وشه‌نبيرى كريه‌ وئاگه‌هداركريه‌، چونكى وێ مافێ سزادانا كه‌نالان يا هه‌ى، به‌لێ مخابن هه‌تا نوكه‌ ل هنده‌ك كه‌نالان ريكلام بۆ ده‌رمانان يا به‌رده‌وامه‌”.