ئه‌ڤرۆ نیۆز،زنار تۆڤى:

ئه‌كته‌ر و زارڤه‌كه‌رێ خۆدان شیان عه‌بدولا بۆتانى د دیداره‌كێدا بۆ ئه‌ڤرۆ نیۆز دیاركر:كو هه‌ر ژ زارۆكینا خوه‌ وى حه‌ز ل سه‌ر كارێ ئه‌كته‌ریێ هه‌بوو،دیسا ده‌مێ ئه‌و ل قوتابخانێ وى كارێن شانۆیى ئه‌نجام ددان و ل سالا 1976 ب ره‌نگه‌كێ فه‌رمى وى ده‌ست ب كارێن شانۆیێ كریه‌ و چه‌ندین كارێن شانۆیى ل وى ده‌مى ئه‌نجامداینه‌،هه‌روه‌سا وى ئێكه‌م جار پشكدارى د شانۆگه‌ریا “ئۆستا عه‌بدو” دا كریه‌،كو ئه‌و شانۆگه‌رى ب زمانێ عه‌ره‌بى بوو،هه‌روه‌سا ل سالێن هه‌شتیان ل سه‌دێ بورى وى ل گه‌ل كۆمه‌كا ئه‌كته‌رێن باژێرێ زاخۆ پشكدارى د چه‌ندین كارێن هونه‌رى دا كریه‌ و گوت ژى:پشتى سه‌رهلدانا سالا 1991 ئه‌و جاره‌كادى ڤه‌گه‌ریایه‌ ناڤا كارێن هونه‌رى دا و پشكدارى د چه‌ندین كارێن زارڤه‌كرنێ و درامایێن كوردى دا كریه‌،كو ئێكه‌م كارێ وى پشكدارى تێدا كرى پشتى سه‌رهلدانێ كارى درامى یێ ب ناڤێ “فێلبازیێن ژنان” بوویه‌.

عه‌بدولا هێشتا دبێژیت:بۆ من ده‌لیڤه‌ په‌یدا نه‌بوو كو ئه‌ز پشكداریێ د فلمێن سینه‌مایى دا بكه‌م و من حه‌ز دكر پشكداریێ تێدا بكه‌م،دیسا ئه‌ڤه‌ ماوێ 10 سالانه‌ ئه‌ز ژ كارێن هونه‌رى و درامایێ دووركه‌فتیم،لێ هه‌كه‌ كاره‌كێ باش و ب دلێ من هه‌بیت،ئه‌ز دێ پشكداریێ تێدا كه‌م،چونكى دراما و هونه‌رێ كوردى دناڤا خوینا من دایه‌ و چو جاران نه‌شێم بهێلم،هه‌روه‌سا دیاركر ژى:نوكه‌ ره‌وشا درامایێ و شانۆیێ و سینه‌ما كوردى ل زاخۆ د ئاسته‌كێ باشدا نینه‌،دیسا حوكمه‌تا هه‌رێما كوردستانێ ژى وه‌كو پێدڤى خزمه‌تا ڤى هونه‌رى ل زاخۆ نه‌كریه‌،له‌ورا دڤێت باشتر گرنگى ب كارێن درامایێ و شانۆیێ ل زاخۆ بهێنه‌دان و پێدڤیه‌ دڤى وارى دا پێنگاڤێن باش بهێنه‌ هاڤێتن،هه‌روه‌سا هیڤیا وى ئه‌وه‌ كو هنده‌ك گرۆپێن شانۆیێ و دراما كوردى ل زاخۆ بهێنه‌ ڤه‌كرن،ژ پێخه‌مه‌ت بشێن ده‌نگ و ره‌نگێ هونه‌رێ زاخۆ بگه‌هیننه‌ هه‌موو پارچێن دى یێن كوردستانێ.

عه‌بدولا بۆتانى ل سالا 1950 ل باژێرێ زاخۆ ژ دایك بوویه‌،ده‌رچوویێ په‌یمانگه‌ها ماموستایانه‌ ل باژێرێ مووسل و ل سالا 1974 بوویه‌ ماموستا ل باژێرێ زاخۆ و نوكه‌ ژى هاتیه‌ خانه‌نشینكرن.