ئه‌ڤرۆنيوز:

چه‌كدارێن تيرۆرستێن داعشێ ل باژێرێ حه‌ويجه‌ ل باشوورێ رۆژئاڤايێ كه‌ركووكێ دياردبن وده‌ست ب كريارێن تيرۆرستى دكه‌ن وژێده‌ره‌ك ژى به‌حسێ داگيركرنا حه‌ويجه‌ ژلايێ داعشێ دكه‌ت.

رۆژناما (المدى) يا عيراقى ل هژمارا خوه‌ (4098)  به‌لاڤكريه‌  كو ژێده‌ره‌كێ هوشدارى دايه‌ جاره‌كادى چه‌كدارێن داعشێ حه‌ويجه‌ داگيربكه‌ن.

وێ رۆژنامێ دياركريه‌ كو چه‌ندين چه‌كدارێن داعش يێن هاتينه‌ دناڤ حه‌ويجه‌ دا پشتى ريهين خوه‌ تراشين وده‌ست ژ جلكێن ئه‌فغانى به‌رداين، ديسا چه‌ندين ئه‌ندامێن داعشێ يێن زڤرين بۆ دناڤ فه‌رمانگه‌هێن حكومى دا وهنده‌ك ژوان يێن زڤرين بۆ جهێن هه‌ستيار كو مفا ژ نه‌بوونا داتايێن رۆهن ل دۆر چه‌كدارێن داعشێ وهه‌ڤكارێن وان ديتين.

چه‌ندين به‌رپرس ژى ل كه‌ركووكێ گازندێ ژحوكمه‌تا به‌غدا دكه‌ن كو هێزێن پێشمه‌رگه‌ى ژباژێرێ دوورخستين بێ هه‌ڤكاريه‌كا پێشوه‌خت كو پێشمه‌رگه‌ى پێزانينێن باش ل سه‌ر ناڤێن چه‌كدارێن داعشێ وهه‌ڤكارێن وان ل حه‌ويجه‌ هه‌بوون.

ل دووڤ ده‌نگوباسه‌كێ (سكاى نيوز) چه‌كدارێن داعشێ يێن زڤرينه‌ حه‌ويجه‌ وباژێركێن رياز وره‌شاد وعه‌باسى كو ب رۆژ ل  تۆنێلان دمينن وب شه‌ڤ ژى ده‌ردكه‌ڤن و كريارێن تيرۆرستى ئه‌نجام دده‌ن.

پشتى حه‌يده‌ر عه‌بادى سه‌رۆك وه‌زيرێن عيراقێ ب دووماهى هاتنا داعشێ ل عيراقێ راگه‌هاندى، چه‌ندين كريارێن تيرۆرستى ل حه‌ويجه‌ ومووسل وئه‌نبار وبه‌غدا ئه‌نجام داينه‌.

ئه‌ڤرۆنيوز:

پشتى ده‌ركرنا قانوونا مانا بيانيان ل عيراقێ كو ب قانوونا هژمار 76  يا سالا 2017 يا ناڤداره‌، هه‌موو ئه‌و ماف وئيمتيازاتێن ب په‌نابه‌رێن فلستينى هاتينه‌ دان دێ ژێ هێنه‌ وه‌رگرتن.

ل دووڤ وێ قانوونا نوو يا عيراقى، كو جڤاتا نوونه‌ران ل ڤێ مه‌هێ ده‌نگ ل سه‌ر داى وپه‌سه‌ندكرى وسه‌رۆكاتيا كۆمارێ ژى ئيمزا ل سه‌ر كرى، هژماره‌كا قانوون وبريارێن سه‌رده‌مێ رژێما به‌عس دێ هێنه‌ هه‌لوه‌شاندن، كو ئێك ژوان برياران بريارا هژمار 202 يا سالا 2001 كو ژلايێ رژێما به‌عس ڤه‌ هاتبوو ده‌ركرن.

بريارا هژمار 202 يا سالا 2001، هه‌موو ئه‌و مافێن كو هه‌ر عيراقيه‌كى ل وه‌لاتێ خوه‌ هه‌ين، دهێنه‌ دان بۆ فلستينيان ژبلى پێدانا ره‌گه‌زناما عيراقى، ديارترين ئه‌و مافێن هاتينه‌ دان بۆ فلستينيان ل سه‌رده‌مێ سه‌دام حسێنى دا پێكهاتبوون ژ مافێن ئاكنجيبوونێ ومولكداريا مال وخانوبه‌ران وگه‌شتا وه‌لاتان ودامه‌زراندن وكاركرن ل فه‌رمانگه‌هێن ده‌وله‌تێ وهه‌روه‌سا مافێ خواندنێ وساخله‌ميێ بێ به‌رامبه‌ر وكاركرن وخانه‌نشينى ومافێ قه‌ركرنێ ژده‌وله‌تێ ومامه‌لێن به‌نكى وگه‌له‌ك مافێن دى.

ل دووڤ قانوونا مانا بيانيان يا هژمار 76 يا سالا 2017، هه‌موو ئه‌و ماف وئيمتيازات ژفلستينيان دێ هينه‌ وه‌رگرتن كو ل سالا 1948 وپاشى بريارا 202 پێ هاتبوونه‌ به‌خشين.

ل دووڤ هنده‌ك ژێده‌رين فلستينى ل به‌غدا ، پشتى 2003 هژماره‌كا مه‌زن ژفلستينيان ژعيراقێ ده‌ركه‌فتينه‌، ونوكه‌ 750 خێزانێن فلستينى ل عيراقێ يێن هه‌ين كو هژمارا وان دگه‌هيته‌ 4500 كه‌سان كو رێ ب گه‌شتكرنا وان ناهێته‌ دان، ديسا رێ پێ ناهێته‌ دان جهێ په‌نابه‌ريا خوه‌ ب گوهۆرن يان ژى بزڤرن بۆ وه‌لاتێ خوه‌.

ئه‌ڤرۆنيوز:

وه‌لاتێ ئيماراتێ داخوازكر هژماره‌كا گرۆپێن حه‌شدا شه‌عبى ل عيراقێ وه‌كو داعشێ وبه‌ره‌يێ نوسره‌ بهێنه‌ ژناڤبرن.

عه‌بدوللا كورێ زايدى، وه‌زيرێ ده‌رڤه‌يێ ئيماراتێ دكۆنگره‌كێ رۆژنامه‌ڤانيدا گۆت” ئه‌م دره‌وشه‌كا باشترداينه‌ ژبه‌رى نوكه‌، روسيا وئه‌مريكا رۆله‌كێ باش هه‌بوو، ئه‌م پشته‌ڤانيا ڤان بزاڤان دكه‌ين، به‌لێ ئه‌ڤێ چه‌ندێ پێدڤى ب پشته‌ڤانيا هه‌موو لايه‌كى يا هه‌ى”.

دياركر ژى” نابيت سستى وخوه‌ڤه‌دزين ژچو لايه‌نه‌كى هه‌بيت وبێژن ئه‌ڤه‌ تيرۆرا باشه‌ وتيرۆرا خرابه‌” گۆت ژى” بۆ ژناڤبرنا تيرۆرێ دڤێت ل دووڤ وان هه‌موو هۆكاران بگه‌رين كو دبن ئه‌گه‌رێ دروستبوونا تيرۆرێ”.

ئاشكراكر ژى” نابيت جوداهيێ دناڤبه‌را داعشێ وبه‌ره‌يێ نوسره‌ (لقێ قاعيده‌ ل سووريێ) ل گه‌ل وان گرۆپێن ژلايێ ئيرانێ وسووريێ دهێنه‌ پشته‌ڤانيكرن، بهێته‌ كرن”.

وه‌زيرێ ده‌رڤه‌يێ ئيماراتێ گۆت ژى” هه‌كه‌ مه‌ بڤێت داعشێ وبه‌ره‌يێ نوسره‌ ژناڤ ببه‌ين، نابيت كه‌تيبێن ئه‌بوفه‌زل ئه‌لعه‌باس وگرۆپێ به‌در وحزبوللا وحه‌شدا شه‌عبى ببينين ب كه‌يفا خوه‌ خرابكاريان به‌رامبه‌ر وه‌لاتيێن سونه‌ يێن عيراقى بكه‌ن”.