ئه‌ڤرۆنيوز:

رۆژناما (وول ستريت جورنال) يا ئه‌مريكى به‌لاڤك، ده‌ستهه‌لاتدارێن سعوديێ داخوازا شه‌ش مليار دۆلاران ژ زه‌نگينترين وه‌لاتيێ سعوديێ دكه‌ن ل به‌رامبه‌ر ئازادكرنا وى.

شازاده‌ (وه‌ليد كورێ ته‌لال كورێ عه‌بدولعه‌زيز ئال سعود) كورێ برايێ شاهێ سعوديێ ( سه‌لمان كورێ عه‌بدولعه‌زيز ئال سعود) كو دهێته‌ هژمارتن زه‌نگينترين وه‌لاتيێ سعودى دده‌مێ بۆرى دا تووشى ده‌سته‌سه‌ركرنێ بوو دوێ هه‌وا ده‌سته‌سه‌ركرنا شازاده‌ ومه‌زنه‌ بازرگان وسه‌رمايه‌دارێن سعودى كو ئه‌و هه‌وه‌  ژلايێ جهنشينێ سعوديێ (محه‌مه‌د كورێ سه‌لمان) كو دبيته‌ پسمامێ وه‌ليد بن ته‌لالى، هاتيه‌ ئه‌نجامدان.

رۆژناما ئه‌مريكه‌ رۆهنكر، ده‌ستهه‌لاتا سعوديێ هنده‌ك هووربينى ل دۆر سكالايێن ل سه‌ر تۆمه‌تبارێن ده‌سته‌سه‌ركرى به‌لاڤكربوون، پاشى هژماره‌كا كێم ژوان ئازادكربوون پشتى رازيبوونا وان ل سه‌ر دانا پاران ل به‌رامبه‌ر ئازادكرنا خوه‌.

وه‌كو ل سه‌ر زارێ ژيده‌رين ئاگه‌هدار هاتيه‌ به‌لاڤكرن، وه‌ليد كورێ ته‌لالى هه‌ڤپشكێ مه‌زنه‌ پرۆژێن بازرگانى وئابوورى يێن رۆژئاڤايه‌ وه‌كو كۆمپانيا تويته‌رى، داخواز ژێ دهيته‌ كرن شه‌ش مليار دۆلاران ل به‌رامبه‌ر ئازادكرنا خوه‌ بده‌ت.

ل دووڤ ئامارێن (فۆريس) سه‌روه‌ت وسامانێ وه‌ليد كورێ ته‌لالى دگه‌هيته‌ 18 مليار و700 مليۆن دۆلاران ئه‌ڤه‌ ژى وى دكه‌ته‌ زه‌نگينترين كه‌س ل ده‌ڤه‌را رۆ    هه‌لاتا ناڤه‌راست.

وان ژێده‌ران دياركريه‌ كو نوكه‌ شازاده‌ وه‌ليد كورێ ته‌لالى يێ ددانوستاندنان دا ل گه‌ل حوكمه‌تا سعوديێ بۆ پێدانا پشكه‌كێ ژكۆمپانيه‌كا خوه‌ يا زه‌به‌لاح ل شوينا پێدانا شه‌ش مليار دۆلاران.

ئه‌ڤرۆنيوز:

جڤاتا وه‌زيرێن هه‌رێما كوردستانێ پرۆژه‌ قانوونه‌ك بۆ چاكسازيێ دليستا مووچه‌خۆران دا وچاكسازى وپێداچوون ب مووچێن نه‌قانوونى وخانه‌نشينان په‌سندكريه‌ ودێ هێته‌ هنارتن بۆ په‌رله‌مانێ كوردستانێ كو برياره‌ پشتى بێهنڤه‌دانا سه‌رێ سالى بكه‌ڤيته‌ دبوارێ دانوستاندنێ دا ل په‌رله‌مانى.

ل دووڤ وى پرۆژه‌ قانوونێ، خانه‌نشينيا په‌رله‌مانتار ووه‌زيران وهنده‌ك ژ پلێن بلند دێ هێته‌ سنورداركرن، ئه‌وژى هه‌ر كه‌سه‌كێ ب پله‌كا بلند بهێته‌ خانه‌نشينكرن پێدڤيه‌ خزمه‌تا 15 سالان هه‌بيت وژيێ وى ژ 53 ساليێ زێده‌تر نه‌بيت.

ل دووڤ پێزانينێن ئه‌ڤرۆنيوز، خانه‌نشينيا كه‌له‌ك ژكه‌سێن ب پلێن بلند هاتينه‌ خانه‌شنينكرن دێ هێته‌ هه‌لوه‌شاندن.

ئه‌ڤرۆنيوز:
ل پێناڤى پاراستنا مافێ فه‌رمانبه‌رێن گرێبه‌ست، حوكمه‌تا هه‌رێمێ برياره‌كێ ده‌ردكه‌ت ورێ ناده‌ت گريبه‌ستێن وان بهێنه‌ ب دووماهى ئينان.
ل دووڤ نڤيساره‌كا سه‌رۆكاتيا جڤاتا وه‌زيران كو ل 28/11/2017 ده‌رچووى، تێدا هاتيه‌ دياركرن بۆ پاراستنا مافێن فه‌رمانبه‌رێن گرێبه‌ست برياره‌ك هاتيه‌ ده‌ركرن.
ب گۆره‌ى وێ بريارێ، چو كه‌سه‌ك ل جهێ فه‌رمانبه‌رێ گرێبه‌ست ناهێته‌ دانان وتێدا هاتيه‌” بۆ به‌رژه‌وه‌نديا گشتى وپاراسنا مافێن وان فه‌رمانبه‌رين ب گرێبه‌ست ل سه‌ر ميلاكێ هه‌موو فه‌رمانگه‌هين حوكمه‌تێ هاتينه‌ دامه‌زراندن، رێ ناهێته‌ دان گرێبه‌ستێن وان ب دووماهى بهێن، ب مه‌ره‌ما دامه‌زراندنا كه‌سێن دى ل جهێن وان”.
فه‌رمانبه‌رێن گرێبه‌ست وه‌كو فه‌رمانبه‌رين به‌رده‌وام ل تۆمارا بايۆمه‌ترى يا مووچه‌ى يێن هاتينه‌ تۆماركرن ومافێن وان ژلايێ حوكمه‌تێ ڤه‌ دپاراستى نه‌.
جڤاتا وه‌زيران رۆهن دكه‌ت” بێ داخوازا فه‌رمانبه‌رێ گرێبه‌ست، يان بێ هۆكاره‌كێ قانوونى وكارگێرى، نابيت كه‌س ل جهێ فه‌رمانبه‌رێن گرێبه‌ست بهێته‌ دانان، ئه‌وژى ل پێناڤى پاراستنا مافێن فه‌رمانبه‌رێن گرێبه‌ست”.
حوكمه‌ت داخوازێ ژ هه‌موو فه‌رمانگه‌ه وداموده‌زگه‌هان دكه‌ت وێ بريارێ وه‌كو خوه‌ ب جهبينن، ئه‌و برياره‌ ژى ژفه‌رمانبه‌ر ومامۆستايان وهه‌موو وان كه‌سان دگريت يێن گرێبه‌ست بۆ هاتينه‌ ئه‌نجامدان.
هۆشه‌نگ شێخ محه‌مه‌د سه‌رۆكێ فه‌رمانگه‌ها كارگێرێ ودارايى ل سه‌رۆكاتيا جڤاتا وه‌زيران بۆ باس گۆت” ئه‌و برياره‌ بۆ پاراستنا ماف وخزمه‌تا فه‌رمانبه‌رێن گرێبه‌سته‌” . ديار كر ژى” هژماره‌كا مه‌زن يا فه‌رمانبه‌رێن گرێبه‌ست چه‌ندين ساله‌ خزمه‌تێ دكه‌ن، له‌وما نابيت گرێبه‌ستێن وان بهێنه‌ ب دووماهى ئينان وخه‌لكه‌كێ دى ل جهێن وان بهێنه‌ دانان ومه‌ ئه‌و نڤيسار بۆ هه‌موو وه‌زاره‌ت وفه‌رمانگه‌هان يا هنارتى ب مه‌ره‌ما بجهئينانا وێ وپاراستنا مافێ فه‌رمانبه‌رێن گرێبه‌ست”.
ل دووڤ ئاماره‌كا وه‌زاره‌تا دارايى ل هه‌رێما كوردستانێ، زێده‌تر ژ 22 هزار كارمه‌ندێن گرێبه‌ست يێن هه‌ين كو پتريا وان يێن ل هه‌ردو وه‌زاره‌تێن باژێرڤانيێ وساخله‌ميێ.

ئه‌ڤرۆنيوز:

وه‌زاره‌تا شه‌هيد وئه‌نفالكريان ل هه‌رێما كوردستانێ رادگه‌هنيت، هه‌تا نوكه‌ چو بريار نه‌هاتينه‌ دان ل دۆر پاشكه‌فتكرنا مووچێ كه‌سوكارێن شه‌هيدان .

فوئاد عوسمان، په‌يڤدارێ وه‌زاره‌تا كاروبارێن شه‌هيد وئه‌نفالكريان ئه‌ڤرۆ سێشه‌مبى 26/12/2017 گۆت” پشتى حوكمه‌تا هه‌رێما برياره‌كا دى ل دۆر پاشكه‌فتكرنا مووچێ وه‌زاره‌تا پێشمه‌رگه‌ وهێزێن ئه‌منى ده‌ركرى، وه‌زاره‌تا شه‌هيد وئه‌نفالكريان دوڤچوونا مووچێ كه‌سوكارێن شه‌هيدان كر وهه‌تا نوكه‌ چو بريار ده‌رنه‌كه‌فتينه‌ كو مووچێ كه‌سوكارێن شه‌هيدان بهێنه‌ پاشكه‌فتكرن”.

ل دۆر وان كه‌سێن دئێك ده‌مدا مووچێ فه‌رمانبه‌ريا خوه‌ ومووچێ وارسێن شه‌هيدى وه‌ردرگن، ئايا دێ ئێك ژوان مووچان هێته‌ برين، په‌يڤدارێ وه‌زاره‌تا شه‌هيد وئه‌نفالكريان بۆ دوارۆژ گۆت” ئه‌و بابه‌ته‌ پێدڤى ب قانوونه‌كێ يه‌ كو دڤيت ل په‌رله‌مانى ده‌ربچيت وئه‌و كه‌سێ شه‌هيد بووى وه‌كو به‌خشين مووچه‌ ب كه‌سوكارێن وى دهێته‌ دان وچو كێشه‌كا قانوونى تێدا نينه‌، له‌وما ه‌ر برياره‌ك بۆ برينا مووچێ شه‌هيدى بهێته‌ دان، هه‌ڤدژى قانوونێ يه‌ وبێ وه‌فايى يه‌ به‌رامبه‌ر خوينا شه‌هيدان”.

سه‌باره‌ت وان كه‌سێن ب شێوه‌كێ نه‌شايسته‌ مووچێ شه‌هيدبوونێ بۆ هاتيه‌ دروستكرن، گۆت” ل ده‌مێ بۆرى وه‌زاره‌تا شه‌هيد وئه‌نفالكريان نڤيساره‌ك ئاراسته‌ى داموده‌زگه‌هێن په‌يوه‌نديدار كربوو كو هه‌ر كه‌سه‌كێ ل وه‌زاره‌تا ناڤبرى ب نه‌شايسته‌ مووچێ شه‌هيد بۆ هاتيه‌ دروستكرن، ب به‌لگه‌ ناڤێ وى بينن، به‌لێ هه‌تا نوكه‌ چو كه‌سه‌ك نه‌هاتيه‌ بسه‌لمينيت فلان كه‌س شه‌هيد نينه‌ ومووچێ شه‌هيدبوونێ بۆ هاتيه‌ دروستكرن، ئه‌وا دهێته‌ گوتن تنێ ئاخڤتنێن بێ به‌لگه‌نه‌‌”.