ئەڤرۆ نیۆز،تۆڤی:

سۆزا سەرۆكێ حوکمەتێ، بڕیارا وان دەربارەی ڤەكێشانا وان ژ حوکمەتێ گوهۆری و ئەڤە گوتنا ئەندامەکێ سەركردایەتیا ئێكگرتوویا ئیسلامیا كوردستانێ بوو،کو هەشت دەمژمێران دانوستاندن كریە بۆ مان یان ژی ڤەكێشانا وان د حوکمەتێ دا و پاشی بریار دا د حوکمەتێدا بمینن، هەروەسا سەرۆكێ فەرمانگەها هەماهەنگی و دووڤچوونێ ل جڤاتا وەزیران دبێژیت،دێ چاكسازی د لیستا مووچەخۆراندا هێنەکرن‌ و ب ڤی ئەگەری دێ 100 ملیار دینار بۆ حكومەتێ زڤرن.

حاجی كاروان، ئەندامێ سەركردایەتیا ئێكگرتوو بەحسێ وێ نیەتا سەرۆكێ حوکمەتێ دکەت بۆ پاكسازیێ د لیستا مووچەخۆراندا و دبێژیت بەلێنا سەرۆكێ حوکمەتێ بۆ ئەنجامدانا چاكسازیێ د مەسەلا مووچەیدا، كاریگەری هەبوو ل سەر هندێ کو ئێكگرتوو خۆ ژ حوکمەتێ ڤەنەکێشیت.

حاجی كاروان دبێژیت ژی:ئێكگرتوو پڕۆژێ خۆ پێشكێشی حوکمەتێ كریە، کو دێ هەرێما كوردستانێ هەیڤانە 650 ملیۆن دۆلار داهات هەبیت. لەورا دناڤا حوکمەتێدا مرۆڤ وی شەری بكەت باشترە، ژ هندێ و مرۆڤ ژ دەرڤەی حوکمەتی بكەت.

نوری ئوسمان، سەرۆكێ فەرمانگەها هەماهەنگی و دووڤچوونێ ل جڤاتا وەزیران هندەك ئامارێن قەبە ل لیستا مووچەخۆراندا ئاشكرا دکەت،کو هەکە چاكسازی تێدا بهێنەکرن‌،دێ پارەکێ زۆر بۆ حوکمەتێ هێتە ڤەگەراندن.
نوری ئوسمانی گوت ژی: 68 هزار كەسان ل هەرێما كوردستانێ دو مووچە و سێ مووچە و چار مووچە هەنە، ئەڤە دێ هێنە سەرپشك کرن و دێ ئێك مووچەی هەلبژێرن، ناچێبیت وارس مووچێ زیندانیێن سیاسی، یان خانەنشینی وەربگریت و وی ژی مووچە هەبیت.

هەروەسا ئێك ژ وان مەلەفێن حوکمەتێ دڤێت دەستی بۆ ببەت. خانەنشینا پەرلەمانتارانە كو پشتی چار سالێن پەرلەمانتاریێ ب 80% مووچێن وان خانەنشین دبن و نێزیكی شەش ملیۆن دیناران وەردگرن، ل دووڤ پرۆژێ حوکمەتێ بیت، ئەو سەردەمە ب سەرڤەچوویە‌.

دیسا ژێدەرەکێ دیارکریە،کو:خانەنشینیا پەرلەمانتاران دێ هێته چارەسەر کرن، هەر پەرلەمانتارەکێ تەمەنێ وی ژ 50 سالان زێدەتر نەبیت‌ و 15 سالان خزمەت نەبیت،ناهێتە خانەنشین کرن.