NO IORG
نووترين نووچه
Twitter

ئه‌ڤرۆ نیوز ، هلورى:
هێزێن هه‌سه‌دێ كونترولكرنا ته‌ڤایا ره‌قایێ راگه‌هاند.
پشتى نێزیكێ شه‌ش هه‌یڤان ل شه‌رێ كونترۆكرنا پارێزگه‌ها ره‌قایێ ، ئه‌ڤرۆ هێزێن هه‌سه‌دێ كونترولكرنا ته‌ڤایا ره‌قایێ ژ ده‌ست داعش راگه‌هاند.
ئاماژه‌ ب وێ یه‌كى ژى كر كو كارێ وان داوى هات ، به‌لێ ئه‌و دێ ده‌ست ب ده‌سته‌سه‌ركرن و لێگه‌ریانا شانه‌یێن نڤستیێن داعشێ كه‌ن.
ل گوره‌ى داتایێن كو هه‌سه‌دێ به‌لاڤكرى د ئه‌نجامێ كونترولكرنا ره‌قایێ دا سێ هزار و 250 كه‌س هاتینه‌ كوشتن كو ژ وان هزار و 130 كه‌س سڤێل بوون.

ئه‌ڤرۆ نیوز:
وه‌سا بریاره‌ كو ئه‌ڤرۆ مه‌سعود بارزانى سه‌رۆكێ هه‌رێما كوردستانێ په‌یامه‌كێ به‌لاڤ بكه‌ت و دهێته‌ چاڤه‌رێكرن كو به‌حس لسه‌ر بارودوخێ پارێزگه‌ها كه‌ركوك و ده‌ڤه‌رێن رزگاركریێن ده‌رڤه‌یێ كارگێریا هه‌رێما كوردستانێ و په‌له‌مارێن حه‌شد شه‌عبى و سوپایێ عیراقێ بو وان ده‌ڤه‌ران و داوى گورانكاریان بكه‌ت.

زانیاریێن زێده‌تر ژ ئه‌ڤرۆ نیوز

ئه‌ڤرۆ نیوز ، نه‌وزاد هلۆرى:
پشتى كو ئه‌ڤرۆ هێزێن پێشمه‌رگه‌ى ل مێحوه‌رێ گوێر – مه‌خمور بێى شه‌ر و ته‌قه‌ ڤه‌كێشایى ، فه‌رمانده‌یه‌كێ پولیسێن فیدرالیێن عیراقێ راگه‌هاند كو دێ مه‌خمور ب هه‌ڤپشكى ل گه‌ل پێشمه‌رگه‌ى هێته‌ ب رێڤه‌برن.

فه‌ریق جه‌وده‌ت شه‌وكه‌ت فه‌رمانده‌یێ پولیسێن فیدرالیێن عیراقێ بو ئه‌ڤرۆ نیوز گۆت: ( مێحوه‌رێ مه‌خمور هێزێن عیراقى دێ ب هه‌ڤپشكى ل گه‌ل هێزێن پێشمه‌رگه‌ى هێنه‌ ب رێڤه‌برن و هێزێن عیراقى دێ ب دوراتیا 50كم ل باشوورێ قه‌زا دوبز ل مه‌خمور مینن و زێده‌تر پێشڤه‌چوونێ ناكه‌ن)

ل گوره‌ى زانیاریێن ئه‌ڤرۆ نیوز پشكه‌ك ژ مێحوه‌رێ گوێر – مه‌خمور دێ ژلایێ هێزێن ئه‌مریكى و پشكه‌ك ژى ژلایێ هه‌ردوو هێزێن عیراقى و هه‌رێمێ هێنه‌ ب رێڤه‌برن.

ئه‌ڤرۆ نیوز ، هلورى:
پشتى كو سپێده‌هیا ئه‌ڤرۆ رێكه‌فتن بو راده‌ستكرنا شنگالێ دناڤبه‌را حه‌شدا شیعى و هێزێن ئێزدى درۆستبووى ، و به‌رپرسێ مێحوه‌رێ بادینان ژى ئه‌ڤ نوچه‌ پشتراستكر و دیاركر كو بارزانى ب وان راگه‌هاندنه‌ ماده‌م ئه‌وان شه‌ر نه‌ڤێت ب كه‌یفا خوه‌ نه‌.

بابه‌كر زێبارى به‌رپرسێ مێحوه‌رێ بادینان بو ئه‌ڤرۆ نیوز گۆت: ( سپێده‌یا ئه‌ڤرۆ هێزێن ئێزدى و حه‌شدا نیشتمانى و شیعى كو ژ ئێزدیان پێكدهاتن رێكه‌فتن كریه‌ كو چوو شه‌ر و ئالوزى دناڤا شنگالێ درۆست نه‌بیت ، و سه‌روك بارزانى ژى راگه‌هاند كو ماده‌م ئه‌و دخوازن شه‌ر درۆست نه‌بیت ، ئه‌و ب كه‌یفا خوه‌نه‌)
زێده‌تر گۆت: ( نها هێزێن پێشمه‌رگه‌ى ل خوارێ یا ره‌بیعه‌ و سه‌رى یا سنوون و به‌رامبه‌ر كه‌سێ د جێگیرن و چوو بریار ژى هه‌تا نها نینن بو ڤه‌كێشانا هێزێن پێشمه‌رگه‌ى نینن ل سنوورێ شنگال و ره‌بیعه‌ و سوون و كه‌سكێ و هه‌موو مێحوه‌رێن دن و پێشمه‌رگه‌ بو هه‌ر حاله‌ته‌كێ به‌ره‌ڤانیێ به‌رهه‌ڤه‌)
ل بارا ره‌وشا ئه‌من و ئاسایشا ده‌ڤه‌رێن شنگال و ده‌ردورا وێ ژى گۆت: ( ره‌وش ئارامه‌ و چوو شه‌ر و روو ب روو بوون دناڤبه‌را هێزێن پێشمه‌رگه‌ى و هێزێن دن نینه‌)

ئه‌ڤرۆ نیوز، له‌زگین جوقى
رێڤه‌به‌رێ نڤیسینگه‌ها رزگاركرنا ره‌ڤاندیێن ئێزدى دیاركركو ژنه‌ك دگه‌ل سێ زارۆكێن خوه‌ وكه‌سه‌كێ دێ ژ وه‌لاتى سوریا ده‌ستێن تیرۆرستێن داعشى هاتنه‌ رزگاركرن.

حوسێن قائێدى، رێڤه‌به‌رێ نڤیسینگه‌ها رزگاركرنا ره‌ڤاندیێن ئێزدى بۆ ئه‌ڤرۆ نیوز دیاركركو ژنه‌كا دگه‌ل سیى زارۆكێن خوه‌ خه‌لكى دووگرى ل قه‌زا شنگال دكاره‌ساتا شنگالێ دا سالا 2014ێ هاتبوونه‌ ره‌ڤاندن ژلایێ تیرۆرستێن داعش ڤه‌ ل شه‌ڤا بۆرێدا هه‌ڤكاریا نڤیسینگه‌ها سه‌رۆكێ حكومه‌تا هه‌رێما كوردستانێ هاتنه‌ رزگاركرن”.

خۆیا ژى كر:” دگه‌ل وێ خێزانا ئێزدى كه‌سه‌كێ دێ ژى یێ ئێزدى هاته‌ رزگاركرن دماوى چه‌ند ده‌مژمێرێن بۆریدا شه‌ش كه‌سێن ئێزدى رزگاربوون”.

ئه‌ڤرۆ نیوز:
فه‌رمانده‌یا مێحوه‌رێ رۆژئاڤایێ دیجله‌ د راگه‌هاندنه‌كێ دا دیاركر كو سپێده‌یا ئه‌ڤرۆ هێزێن پاراستنا ئێزدیخانێ ب نهێنى ل گه‌ل گرۆپه‌كێ حه‌شدا شیعى رێكه‌فتن كریه‌ كو بێى خوون رشتن ئه‌و جهێن كو د ده‌ستێ وان دایه‌ راده‌ستى حه‌شد بكه‌ن بێى كو شه‌ره‌ك بهێته‌كرن.

ئه‌ڤا ل خوارێ ده‌قا وێ یه‌
پاراستنا قه‌زا شنگال و ده‌ڤه‌رێ ل ستویێ پێشمه‌رگێن ئێزدیخانێ یه‌ كو هژمارا وان هه‌شت هزار پێشمه‌رگێن ئێزدى یه‌ و فه‌رمانده‌یا شنگالێ پێكدئینن.
سپێده‌یا ئه‌ڤرۆ ، ئه‌و هێزێن پێشمه‌رگه‌یێ ئێزدى گروپه‌كێ ئێزدیێن ناڤا حه‌شد شه‌عبى دناڤ خوه‌ دا رێكه‌فتن كریه‌ كو شه‌رى نه‌كه‌ن و خون نه‌هێته‌ رشتن و ئێزدیێن ناڤا حه‌شد شه‌عبى چونه‌ ناڤا باژێرێ شنگالێ.

ئه‌ڤرۆ نيوز:

سپێده‌هيا ئه‌ڤرۆ حه‌شدا شه‌عبى به‌رده‌وامى دا وان پێشڤه‌چوونێن خوه‌ بۆ داگيركرنا ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ و ئه‌ڤرۆ ژى و بێ ى شه‌ر چوو ناڤ شنگال.

فه‌رمانده‌كێ پێشمه‌رگه‌ى راگه‌هاند كو هێزێن پاراستنا ئێزديخانێ بێ ى شه‌ر شنگال راده‌ستى چه‌كدارێن حه‌شدا شيعى كرن كو ژ لايێ فه‌رماندێ فه‌رماندا شنگال، قاسم شه‌شۆ، ڤه‌ دهێنه‌ پشته‌ڤانيكرن.

ئه‌ڤى فه‌رماندێ پێشمه‌رگه‌ى يێ كو كو پاراستن ل سه‌ر گۆتنا ناڤێ خوه‌ كرى ئاشكه‌را ژى كر كو ژماره‌كا زۆر يا چه‌كدارێن حه‌شه‌د شه‌عبى ده‌ست ژ حه‌شدێ به‌ردابوو و چووبوونه‌ ناڤ رێزێن ڤێ هێزێ و دياره‌ وه‌كو رێكه‌فتنه‌كێ بوويه‌ و نوكه‌ ژى ئه‌وان هه‌موويان شنگال راده‌ستى ڤێ هێزا چه‌كدارى كر.

ئه‌ڤى فه‌رماندێ پێشمه‌رگه‌ى خويا ژى كر كو هێشتا ئه‌و ده‌ڤه‌رێن ل بن كونترۆلا پێشمه‌رگه‌ى ل سنورێ شنگال د ئارامن و چو كێشه‌ ل سه‌ر وێ ده‌ڤه‌رێ نينن.

ئه‌ڤرۆ نیوز ، هلورى:
ده‌مه‌ك به‌ریا نها چه‌كدارێن داعش مفا ژ ئالوزیێن دناڤبه‌را هێزێن پێشمه‌رگه‌ى و هێزێن عیراقى دیت لسه‌ر بارودوخێ كه‌ركوكێ و هێرش بو سه‌ر دوو گوندێن سنوورێ قه‌زا دوبس كر و هه‌ردوو كونترولكرن.

ل گوره‌ى نوچه‌یه‌كێ كو ژ مالپه‌رێ شه‌فه‌ق نیوز به‌لاڤبوویه‌ چه‌كدارێن داعشێ هێرش بو سه‌ر دوو گوندێن سنوورێ قه‌زا دوبس ل پارێزگه‌ها كه‌ركوك كریه‌ و كونترولكرینه‌ كو ئه‌و ژى هه‌ردوو گوندێن ملح و ته‌ویلحه‌ بوون.

ل گوره‌ى زانیاریێن ئه‌ڤرۆ نیوز هێشا داعش ژلایێ چه‌ند شانه‌یێن نڤستیێن داعشێ هاتیه‌ ئه‌نجامدان كو ل ده‌ردورێن قه‌زا دوبس بوون.

ئه‌ڤه‌ د ده‌مه‌كێ دایه‌ كو سپێده‌هیا ئه‌ڤرۆ هێزێن عیراقێ ب هه‌ڤكاریا سوپایێ پاسدارێن ئیران و ئێكه‌یا 70ێ یا ئێكه‌تیا نیشتمانیا كوردستانێ كونترولا كه‌ركوكێ كریه‌.

ئەڤرو نیوز:

پشتی کو چەند دەزگەهێن چەواشەکاریێن راگەهاندنێ بەلاڤكری کو هێزێن حەشد شەعبی ل دەرگەهێ سنوریێ حاجی ئومەران هاتینە ناڤا هەرێمێ ، بەلێ ئەڤ نوچە ب تمام نەراستە و دەرگەهێ سنوریێ حاجی ئومەران ئارام و ڤەکری یە.

297

ئه‌ڤرۆ نیۆز”عه‌زیز ره‌سوڵ:
سپێده‌یا زویا ئه‌ڤرۆ هێزێن میلشیاتێن حه‌شد شه‌عبى و سوپایێ عیراقێ ب هه‌ڤكاریا سوپایێ پاسدارێن ئیرانێ لڤاندن به‌ر ب ئاراسته‌یێ كه‌ركوكێ ده‌ستپێكرن و هنده‌ك هێزێن پێشمه‌رگه‌ى یێن سه‌ر ب ئێكه‌یا 70ێ یا ئێكه‌تیا نیشتمانیا كوردستانێ بێى شه‌ر و ته‌قه‌ سه‌نگه‌رێن خوه‌ راده‌ستى هێزێن ناڤبرى كرن و ده‌ڤه‌ر چول كر ، ئه‌ڤ یه‌ك ژى بویه‌ سه‌ده‌م كو كه‌ركوك و ده‌ردورێن وێ بكه‌ڤیت ده‌ست هێزێن عیراقێ ، چاڤدێره‌كێ سیاسى دوپات ل هه‌بوونا رێكه‌فتنه‌كا پێش وه‌خته‌ دناڤبه‌را عیراق و ئێكه‌تى دكه‌ت.

فایه‌ق گولپى چاڤدێرێ سیاسى ل پارێزگه‌ها سلێمانیێ بو ئه‌ڤرۆ نیوز گۆت: ( بارودوخێ كه‌ركوكێ و ده‌ردورێن وێ وه‌سا خویا دكه‌ت كو پێشتر رێكه‌فتنه‌ك دناڤبه‌را ئێكه‌تى و عیراقێ بو چولكرن و راده‌ستكرنا كه‌ركوكێ هه‌بوویه‌ ، و جهێ داخێ یه‌ كو پشكه‌كا ئێكه‌تى سه‌نگه‌رێن خوه‌ چولكرین بو هێزێن عیراقى كو ئه‌ڤ یه‌ك ژى ب بریارا سه‌ركرده‌یێن ئێكه‌تى بوویه‌ و وه‌سا خویا دكه‌ تكو رێكه‌فتنه‌ك هه‌بوویه‌)

زێده‌تر گۆت: ( كه‌ركوك ب چوو ره‌نگان ناكه‌ڤیته‌ ژێر كونترولا حه‌شد شه‌عبى ژبه‌ركو گه‌لێ كوردستانێ له‌شكركێشا عیراقێ ب چوو ره‌نگان قبول ناكه‌ت و ئه‌ڤرۆ یان سوبه‌هى جاره‌ك دن دێ ژ ده‌ستێ وان هێته‌ وه‌رگرتن ، بتنێ یا گرنگ ئه‌وه‌ كو ئه‌و پارت و لایه‌نێن كو هێزێن چه‌كدار هه‌ىى پێدڤى یه‌ ب زوترین ده‌م بزڤرین به‌ره‌یێن شه‌رى و جاره‌ك دن سه‌ركه‌فتنا كوردستانێ لسه‌ر دوژمن رابگه‌هینن و هێزێن گه‌ریلایان و حزبێن پارچێن دن ژى پێدڤى یه‌ هه‌ڤكاریا وان بكه‌ن)

website security
WP Facebook Auto Publish Powered By : XYZScripts.com