ئه‌ڤرۆنيوز:
ژئه‌گه‌رێ نه‌خوه‌شيا دلى، په‌يامنێره‌كى د 55 ساليێ دا وه‌غه‌ركر.
په‌يامنێرێ كه‌نالێ (الجزيره) ل چينێ ” عزه‌ت شه‌حرۆر” دژيێ 55 ساليێ دا ژئه‌گه‌رێ نه‌خوه‌شيا دلى ل په‌كين پايته‌ختێ چينێ وه‌غه‌ركر.
ل دووڤ وى كه‌نالى، شه‌حرۆر راگه‌هاندكار ودبلۆماتكاره‌كێ فلستينى بوو، ده‌رچوويي زانكۆيا چينى بۆ زانستێن نوشدارى بوو، ده‌مێ 30 سالان بوو ل چينێ دژيا.
ئه‌ڤرۆنيوز:
مالپه‌ره‌كێ بريتانى به‌حسێ بريارا ترامپى ل دۆر دانپێدانێ ب قودسێ وه‌كو پايته‌ختێ ئيسرائيلێ دكه‌ت وئاماژێ دده‌ت كو ئه‌و بريار هاتيه دان ل دووڤ پێشبينيه‌كا ته‌وراتێ كو گرۆپێ ئه‌نجيليان ل ئه‌مريكا پشت به‌ستنێ ل سه‌ر دكه‌ن، كو ئه‌و چه‌نده بوويه پالده‌ره‌ك بۆ ترامپى وێ بريارێ بده‌ت.
ئه‌نجيلى، بزاڤه‌كا ئايينى يه يا كريستيانى يه، هنده‌ك گرۆپێن پرۆتستانتێن پارێزگار يا دامه‌زراندى و پشت به‌ستنێ ب شرۆڤه‌كرنا حه‌رفى يا ئه‌نجيلى دكه‌ت وكارى بۆ بده‌ستڤه‌ئينانا پێشبينيێن ته‌وراتێ دكه‌ت، ژوان پێشبينيان ژى زڤرينا دويێ يا عيسايێ مه‌سيح.
مالپه‌رێ بريتانى “ميدل إيست ئاى” ئاماژێ دده‌ت كو سه‌رۆكێ ئه‌مريكى، دونالد ترامپ شيره‌تێن هه‌ڤپه‌يمانێن خوه وهوشداريێن هه‌ڤرك ودوژمنان ژى ره‌ت كرن و ل رۆژا چارشه‌مبى 6/12/2017 پلانا ڤه‌گۆهاستنا باليۆزخانا ئه‌مريكى بۆ قودسێ راگه‌هاند.
ل دووڤ هنده‌ك شرۆڤه‌كاران، مافێ ئايينى يا ئه‌مريكى هێزه‌كا پالده‌ر بوو بۆ وێ پێنگاڤا واشنتۆن هێلايه ب تنێ ل جيهانێ ، وه‌كو جوۆنى مۆر ئاماژه پێ داى كو ئه‌وژى په‌يڤدارێ ده‌نگێن باوه‌ريێ يه، كو گرۆپه‌كا سياسى يا ئه‌نجيلى يا مه‌زنه، ناڤبرى بۆ رويته‌رز گۆتبوو” من گۆمان نينه كو ئه‌نجيليان رۆله‌كێ گرنگ دڤێ بريارا ترامپى دا هه‌بوو”.
مالپه‌رێ ناڤبرى دياردكه‌ت كو چه‌ندين گرۆپێن كريستانى به‌ياننامه وهوشدارى داينه ژبۆ كاركرنێ بۆ دانپێدانێ ب قودسێ وه‌كو پايته‌حتێ ئيسرائيلێ.
به‌لاڤكر ژى” به‌رێخودانا چالاكڤانێن سياسى يێن ئه‌نجيلى يێن ئه‌مريكى بۆ كێشا ئيسرائيلێ وفلستينێ ب رێيا توراتێ يه، ئێك ژباوه‌ريێن وان ژى ئه‌وه كو قودس دهه‌موو سه‌رده‌مان دا، يا گه‌لێ جوهى بوويه”.
ئاماژى ژێ دده‌ت كو لايه‌نێ لاهوتى يێ به‌رفره‌هتر بۆ پشته‌ڤانيا ئه‌نجيلى بۆ ئيسرائيلێ، دزڤريت بۆ وێ هزرێ كو دامه‌زراندنا ئيسرائيلێ وپاراستنا وێ وه‌كو ده‌وله‌ته‌كا جوهى، دێ له‌زێ دهاتنا دويێ يا عيسايێ مه‌سيح دا كه‌ت.
مالپه‌رێ ناڤبرى به‌حسێ شيره‌ته‌كا ئاييندارێ ئه‌نجيلى “روبێرت جيفريس” بۆ سه‌رۆكێ ئه‌مريكى ترامپى دكه‌ت، كو ب رێيا كه‌نالێ (CNNيێ ئه‌مريكى گۆتى” قودس بابه‌تێ حه‌زژێكرنێ ونێزيكبوونێ بوو بۆ جوهى وكريستيانان دديرۆكێ دا وجهێ پێشبينيان بوو، به‌لێ يا گرنگتر ژوێ چه‌ندێ ئه‌وه كو خودێ قودس وجهێن دى يێن پيرۆز يێن داينه گه‌لێ جوهى”.
مالپه‌رێ “ميدل إيست ئاى” يێ بريتانى به‌لاڤكريه ژى كو راستره‌وێن كريستيان يێن توندره‌و پشته‌ڤانيه‌كا ب هێز يا ترامپى د هه‌لبژارتنێن سه‌رۆكاتيا ئه‌مريكا دا ئه‌وێن ل چريا دويێ 2016 هاتينه ئه‌نجامدان دكر و ل دووڤ راپرسيان80% ژ ده‌نگده‌رێن ئه‌نجيلى يێن پيست سپى پشته‌ڤانێن وى بوون.
ئه‌ڤرۆنيوز:
سه‌ركردێن هژماركا حزبێن كوردستانى ب نهێنى ودوورى ده‌زگه‌هێن راگه‌هاندنێ، ل گه‌ل حوكمه‌تا عيراقێ كۆمبووينه ودخوازن پشته‌ڤانيا به‌غدا مسوگه‌ر بكه‌ن بۆ نه‌هێلانا حوكمه‌تا هه‌رێما كوردستانێ وپێكئينانا حوكمه‌ته‌كێ ژلايێ خوه‌ڤه ب پشته‌ڤانيا به‌غدا، ئه‌ڤه ژى پشتى خوه‌نيشادانێن ده‌ڤه‌رێن گه‌رميان وسلێمانيێ وراپه‌رين ل 18 ڤێ هه‌يڤێ وڤه‌كێشانا چه‌ند حزبان ژ حوكمه‌تێ.
به‌رپرسه‌كێ سياسى يێ بلند بۆ (العربي الجديد) راگه‌هاند” سه‌ركردێن پشكه‌ك ژ حزبێن ئوپوزسيۆنا كوردستانى، ب نهێنى كۆمبوون ل گه‌ل به‌رپرسێن حوكمه‌تا به‌غدا كرينه ب ئارمانجا بده‌ستڤه‌ئينانا پشته‌ڤانيا به‌غدا بۆ خوه‌نيشادانان وبكارئينانا خوه‌نيشادانان بۆ ژناڤبرنا حوكمه‌تا هه‌رێما كوردستانێ وپێكئينانا حوكمه‌ته‌كا سه‌ر ب به‌غدا ژلايێ وان حزبێن ئوپوزسيۆنێ”.
زێده‌تر گۆت” ئه‌و لايه‌ن دخوازن ناكۆكيێن دناڤبه‌را به‌غداوهه‌ولێرێ ب ده‌ليڤه ببينن وبه‌رژه‌وه‌نديێن خوه بده‌ستڤه‌بينن، جاده وخه‌لكێ كوردستانێ ژى بكه‌نه ئامرازه‌ك وبكاربينن، تاكو ب خوه حوكمه‌ته‌كا سه‌ر ب به‌غداڤه ل هه‌رێما كوردستانێ دروست بكه‌ن”.
وى ژێده‌رێ سياسى گۆت” وان لايه‌نان داخواز ژ به‌غدا كريه ده‌رگه‌هێ دانوستاندنێ ل گه‌ل حوكمه‌تا هه‌رێمێ ڤه‌نه‌كه‌ت وسزايێن ل سه‌ر كوردستانێ گرانتر بكه‌ت بۆ وێ چه‌ندێ جادێ وخه‌لكى زێده‌تر بلڤينن ودوماهيێ ب حوكمه‌تا هه‌رێمێ بينن ب توندوتيژى وب زۆرى حوكمه‌تا عيراقێ ژى دڤێت حوكمه‌تا هه‌رێمێ بێخيته دبن كونترۆلا خوه‌ڤه، لڤاندنا جادێ ژى دبه‌رژه‌وه‌نديا به‌غدا دايه بۆ زالبوونێ ب سه‌ر حوكمه‌تا هه‌رێمێ دا”.
(العربي الجديد) به‌لاڤكريه، بۆچوونێن حزبێن كوردى يێن ئوپوزسيۆن و هه‌ڤپه‌يمانيا نيشتمانى يا شيعه‌يه ژهه‌ڤدو دنيزيكن وسه‌ركرده وپه‌رله‌مانتارێن هه‌ڤپيه‌مانيا نيشتمانى يا شيعى ژى داخواز دكه‌ن ب چو شێوه‌كى دانوستاندن ل گه‌ل هه‌ولێرێ نه‌هێنه كرن، هه‌ڤده‌م حوكمه‌تا به‌غدا ژى ل دۆر پرسا دانوستاندنان ل گه‌ل هه‌ولێرێ دبێژيت، دێ ل گه‌ل وان لايه‌نان دانوستاندنێ كه‌ت كو نوونه‌راتيا گه‌لێ كورد دكه‌ن، نه‌كو وان حزبێن ده‌ستهه‌لاتا هه‌رێمێ دده‌ستدا، ڤێ چه‌ندێ ژى ئالۆزى كوورتر كرينه.
ئه‌ڤرۆنيوز:
گولا سيێ يا به‌رشه‌لونا ل سه‌ر ريال مه‌دريد د ياريا كلاسيكۆى دار، كو ژلايێ ئه‌ليكس فيدارلى ڤه هاتبوو تۆماركرن يا بوويه جهێ گه‌نگه‌شێ دناڤبه‌را چاڤدێرێن وه‌رزشى دا.
وێنێن ته‌له‌ڤزيۆنى ئاشكراكر كو پێلاڤ ل پيێ راستێ يێ ميسى نه‌بوو ده‌مێ گۆلا سيێ چێكرى ل خۆله‌كێن دووماهيێ يێن ياريێ.
ديسا وێنێن دوباره‌كرى گۆمان ل سه‌ر گولا سيێ چێكرن كا ئايا ميسى ته‌په ژده‌رڤه‌ى ياريگه‌هێ ئينا يان نه.
ئه‌ڤرۆنيوز:
مه‌كته‌با سياسى يا پارتى ديموكراتى كوردستان ئه‌ڤرۆ ئێكشه‌مبى 24/12/2017، په‌يامه‌كا پيرۆزباهيێ ب هه‌لكه‌فتا هاتنا جه‌ژنا ژدايكبوونا عيسايێ مه‌سيح راگه‌هاند وتێدا هاتيه” گه‌رمترين پيرۆزباهيان ئاراسته‌ى هه‌موو خووشك وبرايێن مه‌سيحى ل كوردستانێ وعيراقێ وجيهانێ دكه‌ين، هيڤيدارين هاتنا ڤێ هه‌لكه‌فتا پيرۆز جهێ خێر وخوه‌شيێ وبه‌خته‌وه‌ريێ بۆ هه‌موو لايه‌كى بيت”.
مه‌كته‌با سياسى يا پارتى دبێژيت” جهێ شانازيێ يه كو هه‌رێما كوردستانێ ژمێژ وه‌ره لاندكا وى كه‌لتوورێ زه‌نگينێ هه‌مه‌جۆريا ئايينى وئيتنى وبۆيه بنه‌مايه‌كێ ب هێزێ ئێكگرتن وپه‌ره‌سه‌دانا وێ فه‌رهه‌نگ وشارستانيه‌يێ، له‌وما دڤێت ژنوكه وپێڤه ب هه‌مان گيانێ ته‌بايى وبرايه‌تيێ وى كه‌لتوورێ ب هێزتر بكه‌ين وپێنگاڤێن زێده‌تر ب هاڤێژين به‌ر ب باشتركرنا بارێ ژيارا وه‌لاتيان وخورتكرنا بنه‌مايێن سه‌قامگيريێ وئاراميێ دبن سيبه‌را حوكمه‌تا هه‌رێما كوردستانێ دا”.
زێده‌تر دبێژيت” دده‌مه‌كى دا، كريستيان ب ئازادى وئارامى جه‌ژن وهه‌لكه‌فتێن ئايينى وكه‌لتوورى يێن خوه دگێرن، ئه‌ڤرۆ زێده‌بارى كێشێن ناڤخوه‌يى، هه‌رێما كوردستانێ يا بوويه په‌ناگه‌هه‌كا ئارام بۆ هزاران خووشك وبرايێن دى يێن كريستيان ولێقه‌وميێن دى، كو ژ ده‌ڤه‌ر وباژێرێن عيراقێ هاتين و ب وه‌لاتێ خوه دزانن”.
دهه‌ر وێ پيرۆزباهيا مه‌كته‌با سياسى يا پارتى دا هاتيه” مه وه‌كو پارتى ديموكراتى كوردستان هه‌موو شيانێن خوه خستينه كار بۆ چاره‌كرنا كێشه وگرفتان وباشكرنا ژيان وژيارا كوردستانيان ب هه‌موو پێكهاتێن ئايينى وئه‌تنى ژوان ژى خووشك وبرايێن كلدان سريان ئاشوورى وپه‌يداكرنا خوه‌شگوزه‌رانيێ وئاسوده‌يێ بۆ وان، هه‌ڤده‌م دێ دبه‌رده‌وامبين ل سه‌ر بزاڤێن دابينكرنا هه‌موو مافێن وان يێ ره‌وا”.
مه‌كته‌با سياسى يا پارتى دبێژيت ژى” هيڤى خوازين جه‌ژنا ئه‌ڤ ساله يا خووشك وبرايێن كريستيان ببيته هێڤێن وهانده‌ره‌كێ دى بۆ ب هيزكرنا گيانێ برايينيێ وپێكڤه‌ژيانێ ولێبۆرينێ وته‌بايێ دناڤبه‌را وه‌لاتيان وجڤاكێ مه‌دا وكێمكرنا ده‌رده‌سه‌رى وئێش وئازاران، هه‌روه‌سا دخوازين هه‌موو لايه‌ك ب به‌رپرسيارانه بزاڤێ بكه‌ن بۆ يه‌كخستنا رێز وئيكده‌نگيا نيشتمانى بۆ ده‌ربازبوونێ ژ ڤێ قۆناغا هه‌ستيار وبه‌رهنگاريا پيلان وبزاڤێن چه‌په‌ل يێن پێلانگيريێ وژناڤبرنا ڤێ ئه‌زموونا مه”.
ئەڤرۆ نیوز ، نەوزاد ھلۆری:
حوکمەتا عیراقێ د نووترین چاپکرنا بلێتێن ئاھێن خوارنێ دا بۆ سالا ٢٠١٨ ، زمانێ کوردی لسەر راکر ، و رێڤەبەریا دابەشکرنا ئاھێن خوارنێ ل سلێمانیێ ژی دیارکر کو حکومەتا ھەرێما کوردستانێ ڤێ یەکێ ب نە دەستوری دبینیت ،و ری َناھێتەدان لسەر باژێرێن ھەرێما کوردستانێ بھێتە بەلاڤکرن.
یاسین محەمەد د لێدوانەکێ دا گۆت: ( ھەموو بیتاقێن ئاھێن خوارنێ بو سالا نوو گەھشتینە پارێزگەھا سلێمانیێ و ب سەر بریکارێن دابەشکرنا ئاھێن خوارنێ ھاتینە دابەشکرن ، بەلێ ژ ئەگەرا راکرنا زمانێ کوردی ، حکومەتێ رەزامەندی لسە نەدایە کو لسەر وەلاتیان بھێنە دابەشکرن )
زێدەترۆ گۆت: ( سالێن بوری ، ھەموو زانیاری ب زمانێ کوردی و عەرەبی بوون ، بەلێ ئەڤ سالە زمانێ کوردی ھاتیە راکرن ، ئەم چاڤەرێ بیارا رێڤەبەریا گشتی یا بازرگانیا ھەرێما کوردستانێ دکەین ، بو رەزامەندی یان ژی ب داخوازکرن ل بەغدا داکو ب ھەمان شێوەیێ سالێن بوری چاپ بکەت )
ئەڤرۆنیۆز، سالار دۆسكێ:
سەرۆكێ فراكسیۆنا ئێكگرتوو ئیسلامی كوردستان ل پەرلەمانێ كوردستانێ دیاركر كو دووماهی مۆلەت بۆ حوكمەتێ 15/1/2018 و هەكە چ بەرسڤێن ئەرێنی ژحوكمەتا هەرێمێ نه‌بن، وی دەمی ئێكگرتوو دێ بریارە خوە هەبیت.
بەهزاد زێباری زێدەتر بۆ ئەڤرۆ نیۆز ئاشكراكر كو خواستێن ئێكگرتوو (2) تەوەران ب خوە ڤەدگرن ئه‌وژى گرێداینە ب خوه‌نیشاندانێن سلێمانیێ و سۆتنا بارەگایێن حزبی وحكومى كو دو كەس شەهید بووینە و پێدڤیە لژنەكا پەرلەمانی بهێتە پێكئینان بۆ دووڤچوونا روودانان، خواستێن خونیشاندەران بگەهنە حوكمەتێ و زیان ڤێكەفتی بهێنە قەرەبووكرن، دیسا كەسێن پشت خوه‌نیشادانان بهێنە دیاركرن وكاودانێن دەڤەرێ ئارام بنە ڤە.
زێباری بەحسێ تەوەرێ دويێ ژی كر وگۆت” دڤێت ئێكرێزیا نشتیمانی د (22) رۆژان دا بهێتە دروستكرن و لیستا دەنگدەران بهێتە پاقژكرن و چاكسازى دلیستا مووچان دا بهێته كرن”.
هەڤدەم جەمال كۆچەر ئەندامێ فراكسيۆنا ئێكگرتوو ئیسلامی كوردستان ل جڤاتا نوونه‌رين عیراقێ بۆ ئەڤرۆ نیۆز گۆت” مە چو رێيێن دی نەبووینە وەكو حزب و دڤێت خزمەتا خەلكی دابین، نوونەرێن مە د پەرلەمانی و حوكمەتێ دا دڤێت دخزمەتا خەلكی دابن، هەكە حوكمەت خزمەتا خەلكی نەكەت، وی دەمی ئەم ژی نەچاردبین نە مینين دناڤ حوكمەتەكێ دا كو خزمەتا وەلاتیان ل دەسپێكا كارێن وێ نەبیت، هەرێم كەتیە دكاودانەكی دا هەكە بریارێن وێرەكانە نەهێنەدان، دێ كاودان خرابتر لێ هێن، ئێكرتوو پشكەكە ژ حوكمەتێ ودڤێت فشارا خوە بكەت، كاودانان ئاسایی بكەت هه‌كه نە دڤێت خوە ڤەكێشیت ژ حوكمەتێ.
ئەڤرۆ نیوز ، نەوزاد ھلۆری:
وەسا بریارە ل چەند کەنیسەیەکێن پارێزگەھا دھۆک و قەزایێن سەر ب وێڤە رێورسمێن جەژنا سەرێ سالێ ” کریسمس ” ب رێڤە بچن.
مەتران رەبان ئەلقوش مەترانێ دھۆک و زاخۆ بو ئەڤرۆ نیوز گۆت: ( ب ھەلکەفتا سەرێ سالێ جەژنا کریستیانان و دایکبوونا حەزرەتێ مەسیح کو ناسیارە ب کریسمس ل چەند کەنیسەیەکێن باژێرێ دھۆک و زاخۆ و ئامێدی رێورسم ب رێڤە بچن)
زێدەتر گۆت: ( رێورسم ئەڤ شەڤە ل دەمژمێر ھەشت دێ ب رێڤە چن و ھندەک ژی دێ سوبەھی ھێنەکرن ، و بڤێ ھەلکەفتێ داخوازا ژیانەک خوش بو ھەموو کریستیان و گەلێ کوردستانێ دکەین و ئومێدەوارین کو ئەڤ یەک ببیتە سەدەما باشتربوونا پەیوەندیێن جڤاکی ل کوردستانێ)
ئه‌ڤرۆ نيوز:
ب هه‌لكه‌فتا جه‌ژنا بوونا حه‌زره‌تا عیسایێ مه‌سیح و هاتنا سه‌رێ سالا زاینی یا نوی( 2018 ) ێ بناڤێ كارگێریا پارێزگه‌ها دهوكێ گه‌رمترین وجوانترین پیروزباهیا ل برایێن مه‌سیحی یێن هه‌رێما كوردستانێ ب گشتی ومه‌سیحیێن پارێزگه‌ها دهوكێ ب تایبه‌تی دكه‌ین ، هه‌روه‌سا سالا نوی ل پێشمه‌رگێن قه‌هره‌مان ول مالباتێن سه‌ربلندێن شه‌هیدان و خه‌لكێ پارێزگه‌هێ ب هه‌موو ئول و نه‌ته‌وه‌ڤه پیروز دكه‌ین …هیڤی دارین ئه‌ف جه‌ژن وهه‌لكه‌فته بخێر و خوشی بهێنه گێران و ببنه جه‌ژنێن برایه‌تی وپێكڤه ژیانێ بوو هه‌موو خه‌لكێ پارێزگه‌هێ و كوردستانێ و ئاواره ڤه‌گه‌رنه سه‌ر جه و وارێن خو .. دوباره ئه‌ڤ هه‌لكه‌فته پیروزبیت وهه‌ر دخێر وخوشیا دابن.
فه‌رهاد ئه‌مین ئه‌تروشی
پارێزگه‌رێ دهوكێ
24/ 12 /2018
ئەڤرۆ نیوز ، نەوزاد ھلۆری:
بریارە ئەڤرۆ شاندەکێ حکومەتا عیراقێ سەرەدانا ھەرێما کودستانێ بکەن و ل گەل بەرپرسێن حکومەتا ھەرێما کوردستانێ کوم ببن و بەحس ل ڤەگەراندنا ئاوارەیان بکەن، هه‌روه‌سا ده‌ست ب دانوستاندنێن راكرنا ئابلوقێن سه‌ر هه‌رێمێ بكه‌ن.
بریارە ئەڤرۆ مەھدی عەلاق ئەمیندارێ گشتیێ جڤاتا وەزیران و عەقیل مەحمود خەزعەلی بریکارێ وەزارەتا نافخوە یا عیراقێ سەرەدانا ھەرێما کودستانێ بکەن و دێ ل گەل بەرپرسێن ھەرێمێ دانوستاندنان لسەر پرسا ڤەگەراندنا ئاوارەیان و پرسا پشکداریکرنا وان د پرۆسەیا ھەلبژاردنێن داھاتیێن عیراقێ دا بکەن.
ژلایەکێ دى ڤه وەسا بریارە شاندەکا دن یا عیراقێ کو پێکھاتینە ژ ھەر ئێک ژ عرفان حەیالی وەزیرێ بەرەڤانیا عیراقێ و قاسم محەمەد ئەلئەعرەجی وەزیرێ نافخوە سەرەدانا ھەرێما کوردستانێ بکەن و رێکەفتنەکێ لسەر پێکئینانا ئیدارەکا ھەڤپشک بو دەریێن سنووری و فروکخانێن ھەولێر و سلێمانی بکەن ، و وەزیرێ نافخوە و پێشمەرگەی ب وەکالەت کەریم سنجاری دێ پێشوازیا وان کەت.
ل گورەی زانیاریان دڤێت ھەردوولا ھەتا دوماھیا ئەڤێ ھەیڤێ بگەھنە رێکەفتنەکێ کو ل داویا ئەڤێ ھەیڤێ گەشتێن ئەسمانی بو دەرڤە دەست پێ بکەن.
نيشاندان