ئه‌ڤرۆنيوز:

له‌تيف ته‌بلويى كو پێشمه‌رگه‌كێ دێرينێ خه‌لكێ ده‌ڤه‌را گه‌رميانه‌ ول دووڤ پێزانينان تاكو به‌رى روودانێن 16 ئوكتۆبه‌رێ، ئێك بوو ژ زێره‌ڤانێن تايبه‌ت وكه‌سێن نێزيك ژمه‌حموود سه‌نگاوى ئه‌ندامێ مه‌كته‌با سياسى يا ئێكه‌تى نيشتمانى كوردستان، دبێژيت، من به‌لگه‌يا تمام يا هه‌ى كو ئه‌وا ل سلێمانيێ وچه‌مچه‌مال وده‌ڤه‌رێن دى ل هه‌رێما كوردستانێ ب ناڤێ خوه‌نيشادانان رووداى، قۆناغا دويێ يا پيلانا كۆمارا ئيسلامى يا ئيرانێ دژى كوردستانێ.

ته‌په‌لويى ل به‌رپه‌رێ خوه‌ ل تۆرا فه‌يسبووكێ ڤيديۆيه‌ك به‌لاڤكريه‌ وتێدا چه‌ند پێزانينان سه‌باره‌ت روودان وخوه‌نيشادانێن چه‌ند رۆژێن بۆرى ل ژه‌ندين ده‌ڤه‌رێن هه‌رێما كوردستانێ به‌لاڤ دكه‌ت ودبێژيت” كۆمارا ئيسلامى يا ئيرانى رۆله‌كێ گرنگ هه‌بوو ل ژده‌ستدانا 50% ژئاخا كوردستانێ وبه‌رى 15 رۆژان ژ روودانێن 16 ئوكتۆبه‌رێ، من چه‌ند پێزانين ل دۆر پيلانێن ئيرانێ هه‌بوو ونوكه‌ چه‌ند به‌لگێن گرنگ يێن ل ده‌ف من هه‌ين ودێ به‌لاڤ كه‌م”.

دبێژيت ژى” ئه‌و خوه‌نيشادان وئاژاوه‌گيريا ل چه‌ند ده‌ڤه‌رێن كوردستانێ رووداين، قۆناغا دويێ يا پيلانێن كۆمارا ئيسلامى يا ئيرانێ يه‌ كو ل گه‌ل به‌غدا بجه دئينن ودخوازن بهێنه‌ هێلا 36 يا جاران ونوكه‌ 20 بنگه‌ وباره‌گايێن كۆمارا ئيسلامى يا ئيرانێ يێن ل سلێمانيێ هه‌ين وگه‌له‌ك به‌لگێن ل ده‌ف من هه‌ين ل دۆر ڤێ چه‌ندێ”.

ئاشكرا ژى دكه‌ت كو ل ده‌مێ ريفراندۆمێ، مام جلال تاله‌بانى ژئه‌گه‌رێ فشاره‌كێ هنارته‌ ئيرانێ ودبێژيت” هه‌كه‌ نه‌، جه‌لال تاله‌بانى ئاگه‌ه ژ چو نه‌بوو”.

له‌تيف ته‌په‌لويى ئاماژى ب وێ دكه‌ت كو چه‌ندين سالان خه‌بات دناڤ رێزێن هێزا پێشمه‌رگه‌ دا يا هه‌ى وئيرانێ ڤيايه‌ بێخيته‌ دبن ركێفێ خوه‌ دا دژى گه‌لێ كوردستانێ بكاربينيت، به‌لێ وى ره‌تكر وى كارى بكه‌ت ودبێژيت” له‌شكرێ قودس يێ ئيرانى كو نوونه‌رێ وى ناڤێ وى حاجى حورمه‌تى يه‌ وبه‌رى نوكه‌ كونسۆلێ ئيرانێ بوو ل هه‌ولێرێ ودارويش پۆره‌ كو به‌رپرسێ دژه‌ تيرۆرێ يه‌ ونوكه‌ ل سلێمانيێ نه‌ وب سه‌دان كه‌س رێكخستينه‌ كو ئاژاوه‌گێريێ بكه‌ن دناڤ باژێرێ سلێمانيێ وچه‌مچه‌مال وچه‌ند باژێرێن دى ژى وبۆ ڤێ چه‌ندێ ژى وێنه‌ وبه‌لگێن تمام من يێن هه‌ين وچاڤه‌رێ بن دێ هه‌موويان به‌لاڤكه‌م”.

دياردكه‌ت ژى كو نوكه‌ وى موبايلا خوه‌ يا داخستى وجهێ وى يێ ديار نينه‌ ژ ترسا ئيرانێ ول دووڤ گۆتنا وى، هێزێن ئيرانێ ل دووڤ وى دا دگه‌رهن بۆ ده‌سته‌سه‌ركرنا وى.

ئه‌ڤرۆنيوز:

ئه‌ندامه‌كێ سه‌ركردايه‌تيا پارتى ديموكراتى كوردستان ئاشكراكر، بريارا گوهۆرينا به‌رپرسێ جڤاتا سه‌ركردايه‌تيا كه‌ركووك – گه‌رميان يا پارتى ودانانا كه‌سه‌كى دى ل جهێ وى يا هاتيه‌ دان وئاماژه‌ ب وێ چه‌ندێ ژى كر كو به‌رپه‌رسێ جڤاتا سه‌ركردايه‌تيا سلێمانيێ يا پارتى ژى دێ هێته‌ گوهۆرين.

عارف ته‌يفوور ئه‌ندامێ سه‌ركردايه‌تيا پارتى وبه‌رپرسێ ميحوه‌رێ خازر بۆ وشه‌ راگه‌هاند” بريار ل دانانا كه‌مال كه‌ركووكێ ل جهێ سه‌لاح ده‌لۆ وه‌كو به‌رپرسێ جڤاتا سه‌ركردايه‌تيا كه‌ركووك – گه‌رميان هاتيه‌ دان، هه‌ڤده‌م ل جهێ شه‌هيد وه‌حيد باكوزى به‌رپرسێ لقێ به‌رێ يێ شنگال، دێ قادر قاچاغ ده‌ست ب كاربيت”.

ل دۆر ده‌ست بكاربوونا وى ب خوه‌ وه‌كو به‌رپرسێ جڤاتا سه‌ركردايه‌تيا سلێمانيێ يا پارتى، عارف ته‌يفوور گۆت” به‌حس ل وێ چه‌ندێ ژى دهێته‌ كرن، به‌لێ ئه‌ز يێ ل سه‌نگه‌را ومن پێزانينێن تمام نينن”.

ژێده‌ره‌كى ل سه‌ركردايه‌تيا پارتى بۆ وشه‌ گۆت” بريارا گوهۆرينا به‌رپرسێ جڤاتا سه‌ركردايه‌تيا سلێمانيێ يا پارتى هاتيه‌ دان وعارف ته‌يفوور ل جهێ ئه‌دهه‌م بارزانى دێ وى پۆستى وه‌رگريت وبريار يێن ئێكلابووين وتنێ رۆژا بجهئينانا وان يا ماى بهێته‌ دياركرن”.