ئەڤرۆ، محەمەد عەلی
بەری دەستپێکرنا یاریا دووماھیا قارەمانیا پارێزگەھێ یا تەپا پێ، ئەوا ل سێ شەمبیا بۆری دناڤبەرا ھەردو یانێن زاخۆ و ئاکرێ ل یاریگەھا یانا دھۆک ھاتیە کرن، دادڤانێ باژێرێ سێمێلێ محەمەد حەسەن ھاتبوو دەستنیشانکرن بۆ دادڤانێ چارێ یێ ڤێ یاریێ و ژ نشکەکێ ڤە یاریگەھـ بجھـ ھێلا وەکو نەرازیبوون ل سەر ڤێ بریارێ و دیارکر کو ئەڤە نە چارا ئێکێ یە غەدرە ل وی و دادڤانێن سێمێلێ دھێتە کرن.
محەمەد حەسەن بۆ رۆژناما ئەڤرۆ گۆت: ھەرچەندە من نەدڤیا ئەڤ بابەتە بگەھیتە ڤی رادێ، لێ ئەڤە نەجار ئێکێ یە غەدرە لمن و ھەموو دادڤانێن سێمێلێ دھێتە کرن، چەند سالە قارەمانیێن پارێزگەھێ و ھەرێمێ ل سەر ھەموو ئاستان مافێ مە بوویە گەلەک یاریا برێڤەببەن، لێ نەدادپەروەریا ئێکەتیێ بێی بەھرکرینە، دیاریا دوماھیا قارەمانیا پارێزگەھێ ھاتمە ئاگەھدارکرن وەکو دادڤانەکێ یاریێ بێی دەستنیشانکرنا جھێ من ھەتا بەری یاریێ ب نیڤ دەمژمێرێ ئەڤەژی ل چو جھان پەیدانەبوویە، بۆ زانین کادرێ مە یێ دادڤانیا یاریێ ھەموو ھاریکارێن دادڤانێ ئێکێنە، لێ جھێ سرنجراکێشێ ھاریکارێ دادڤانی بوو یێ ئێکێ و ئەز وەکو دادڤانێ ئێکێ بوومە یێ چارێ، لەوار وەکو نەرازیبوون ل سەر ڤێ پێنگاڤێ ئێکسەر من یاریگەھـ بجھـ ھێلا.
ھەروسا گۆت: ھیڤی دکەین جھێن پەیوەندیدار خوە ل ڤان سەرپێچیا و غەدرا بێدەنگ نە کەن چونکو ئەو یێن دژاتیێ لسەر حەز و ڤیانا دادڤانێن سێمێلێ دکەن.
ژلایێ خوەڤە عەبدوللا عابد نوونەرێ دادڤانێن پارێزگەھا دھۆکێ گۆت: لدەستپێکێ ئەو رەفتارا دادڤان محەمەد حەسەنی ل رۆژا یاریێ کری جھێ سرنجراکێشێ بوو، ژبەرکو بێی پسیار و دووڤچوونێ بکەن یاریگەھـ بجھـ ھێلای، ھەکە ھزر بکەت مافێ وی ھاتیە بەرزەکرن کو دادڤانێ ئێکێ یە، دیاسایا دادڤانیێ دا دیارکەت ئەو دادڤانێ شارا نێدەولەتی یا دادڤانێ ئێکێ وەربگریت بتنێ وی مافێ ھەیی بەردەوام دادڤانێ ناڤ یاریگەھێ بیت.
ھەروەسا ناڤھاتی گۆت: سەرەرایی ناڤھاتی ھاتبوو ھەلبژارتن ئێک ژ باشترین دادڤان بۆ یاریا دووماھیێ، لێ رامانا وێ ئەو نینە دێ ئێکسەر ھێتە دەستنیشانکرن وەکو دادڤانێ ئێکێ، ژبەرکو لدووڤ کاودان و بەرژەوەندیا یاریێ و سەرکەفتنا وێ دادڤان دێ ھێنەدانان، لێ ئەو رەفتارا کری جان نەبوو، تایبەت ل سەر تۆرێن کۆمەلایەتی ژی دژاتیێ پەیدا دکەت لەورا ئێکەتی دێ کۆمبوونەکێ گرێدەین و بریارەکێ ل سەر ڤێ رەفتارێ ھەبیت.
ل دووماھیێ ناڤھاتی گۆت: ئەم پشتەڤانێن ھەموو دادڤانێن پارێزگەھێ نە و بێی فەرق و جوداھی و ھێچ جارەکێ غەدرە ل چو دادڤانان نەکرییە، بەلکو ھەکە ئاستێ وان ببیتە رێگر کو یانەک یان تیمەک یان ھەتا ئێکەتیا تەپاپێ نە چاربیت دادڤانەکێ دی ل جھی وی بدانیت و گۆت: مە گەلەک پشتەڤانیا دادڤانێن پارێزگەھێ کریە و تایبەت یێن سێمێلێ ژبەر ئێک ئەگەر ئەوژی دادڤان دکێمن و ئەم پێدڤی نە و ھەر کەسەکێ شیان و حەز ھەبیت مە پشتەڤانیا لێکری بۆ ھندێ رێژا وان زێدەبیت.

ئەڤرۆ، قەیس وەیس:
بریارە ئەڤرۆ ئێڤاری ل ھولا ناڤەندا لاوان ل باژێرێ دھۆکێ قارەمانیا دھۆک یا نێڤدەولەتی یا شەترەنجێ بھێتە ئەنجام دان ئەوا باوەر پێکری ژلایێ ئێکەتیا شەترەنجا جیھانی ڤە.
ل دور ڤێ قارەمانیێ سەروکێ ئێکەتیا شەترەنجا پارێزگەھا دھۆکی دداخویانیەکا تایبەت دا بو روژناما ئەڤرۆ گوت: ماوێ چار سالانە ل دووڤ ئێک شیاینە ڤێ قارەمانیێ ئەنجامبدەین و مفایەکێ باش ل یاریزانێن مە دکەت و خالێن وان بلند دکەت د لیستا یاریزانێن ئێکەتیا جیھانی دا.
دیسان کەمال جەلال بەردەوامی دا ئاخفتنا خو و گوت پتر ژ ٣٠ یاریزانان پشکدارن ژ باژێرین ھەولێر و مویسل و روژئاڤایا کوردستانێ و بو ماوێ شەش روژان د نەە گەران دا دێ ھەڤرکیێ کەن ب شێوازی سیستەمێ سویسری کو ژ ٧٥ خولەک د ٣٠ چرکەیان دا ڤێت لڤین ھەبیت.

ئەڤرۆ، ھەژار مەعروف:
چاڤەرێ دھاتەکرن دوھی ل بارەگایێ ئێکەتیا تەپا پێ یا عیراقێ پشککێشانا خولا پلا ئێک یا عیراقێ ھاتبا ئەنجامدان، لێ ژبەر ئەگەرەکێ سەیر ھاتە پاشخستن بوو کومبوونەکا دی، پشتی سەرۆکێ یانەکا عیراقی گەڤ ل ئێکەتیا تەپا پێ یا عیراقێ کرین.
چەند ژێدەران ل وێ کومبوونێ دیارکرینە سەرۆکێ یانا مەحمودیە گەڤێن سوتنا خوە ل ئێکەتیا تەپا پێ یا عیراقێ کرینە، ھەکە ئەو تیما وی پاشڤە بزڤرینە خولا پلا دویێ دێ خوە ل بەر بارەگایێ ئێکەتیا تەپا پێ سوژیت و وان ژێدەران ژی دیارکریە کومبوون پشککێشانا خولێ ھاتە پاشخستن بو دەمەکێ دی.
ھەژی گوتنێ یە یانا مەحمودیە ل وەرزێ بوری ژ خولا پلا ئێک پاشڤە زڤریبوو پلا دویێ.