ئه‌ڤرۆ نيوز:

بەری دروستبۆنا کریزا دارایێ ل کوردستانێ حکومەتێ وەک ھاریکاریی بۆ دروستکرنا خان و بەران پارە وەک پێشینە ددا وەلاتیان. ل بەرامبەر دا سالانە ئەو پارە دزڤری خەزینەیا حکومەتێ، بەلێ نوکە ژ بەر نەبوونا پارەیان خەلک داخوازیا ھاریکاریێ دکەن و حکومەت ژی رازی نابیت بەرامبەر گیروکرنا پارەیێن خوە مۆچەیێ کەفیلی رادگریت.

وەلاتیەک ب ناڤێ یاسین حەکیم بۆ روژناما ئەڤرۆ دیار کر، بەری دروستبۆنا شەرێ داعش بۆ دروستکرنا خانی من 20 ملیۆن دینار ل حکومەتێ وەرگرتن بۆ دروستکرنا خانی، پێدڤی بوو سالانە ملیونەک و 700 ھزاران بدەمەڤ حکومەتی، ل وی دەمی رەوشا دارایی یا باش بوو، دشیام ب زڤرینم، بەلێ نوکە رەوشا من یا دارایی وەک بەری نوکە نینە و سالانە ملیۆنەک و 700 ھزار بۆ من گەلەکن و گۆت: ھەکە ل دەمی َخوە نەزڤرینم دێ سزا کەڤیتە سەرێ من.

ھەیڤ فواد رێڤەبەرا بانکا خانۆبەران ل قەزا ئاکرێ بۆ ئەڤرۆ خویا کر، ل گۆرەی پلانا وەزارەتا دارایی یا حکومەتا ھەرێما کوردستانێ ئەو کەسێن پێشینەیا خانۆبەران وەرگرتی دڤێت سالانە ب کۆژمەیەکێ دیاری کری وی پارەی بۆ حکومەتی ب زڤرینن، ھەر کەسێ پێگیریێ ب رێنمایێن وەزارەتێ نەکەت دێ ھێتە سزادان و مۆچەیێ کەفیلی دێ ھێتە برین، بەرامبەر نەدانا پارەی ھەتا نوکە ئەڤە چار بۆ پێنچ سالایە ھندەک کەسا پارە وەرگرتی و بەرامبەر بۆ حکومەتێ نەزڤراندیە.

زێدەتر ئاشکرا کر، مۆچەیێ کەفیلی ھاتیە برین، ھەتا نوکە 284 کەسا پارێ وەرگرتی ژ حکوومەتی و سالانە نەزڤراندیەڤە و بانکێ مۆچی کەفیلان بڕیە و ھاتینە سزادان ب کۆژمەیەکێ دیاری کری بەرامبەر وان رۆژێن ب سەر دەمێ پارەدانێ ڤە دچن. ل گۆری پێزانێن وەزارەتا دارایێ ھەر کەسێ سێ ھەیڤ ب سەر دەمێ وی دەربازبن و پارەی نەزڤرنیت بانکێ مۆچەیێ وی بھێتە راگرتن، بریارا راگرتنا مۆچێ فەرمانبەرا ل ھەیڤا شەش یا ئەڤ سالە دەست پێکریە و بەردەوامە.

پارێزەر سەگڤان بەھجەت ل دور ھەمان بابەت بۆ ئەڤرۆ دیار کر، ژ بەر نەبوونا ئاستێ رەوشەنبیریا قانوونی دناڤ جڤاکی دا، گەلەک ئاریشە دروست دبن. بۆ نموونە کەسەک دبیتە کەفیل بۆ مامەلەیەکێ بیێ کو زانیاری ل سەر بابەتی ھەبن و گۆت: ل گۆری قانوونا شارستانیا عیراقێ ژمارە 40 یا سالا 1951 ماددێ 1040 کەفیل پتر وەک پشت راستیەک ھەمبەر وێ مامەلەیێ دھێتە کرن کو ژ لایێ حکوومەتی ڤە دھێتە دروست کرن وەک پێشینەیا خانوبەران و پێشینەیا ھەڤژینیێ ل ڤی دەمی بۆ ڤەگەراندنا وی پارەیێ حکوومەت ددەت.

ئه‌ڤرۆ نيوز:

خەلکێ پارێزگەھا دھۆکێ ژ نەبەلاڤکرنا کەرستێن ئاھێن خوارنێ ددلگرانن و رێڤەبەرێ گشتی یێ کۆمپانیێن ئاھێن خوارنێ ل دھۆکێ بۆ ئەڤرۆ دیار دکەت، نێزیکی چار ھزار تەنێن کەرستێن خوارنێ بۆ مە ھاتینە رەوانەکرن و ل دەمەکێ نێزیک دێ ل سەر خەلکی بەلاڤ کەین، لێ ئەڤ سالە ھەموویێ برنج ب تنێ دێ دو ھەیڤان ل سەر خەلکی ھێتە بەلاڤکرن.

رێڤەبەرێ گشتیێ کۆمپانیێن ئاھێن خوارنێ ل دھۆکێ ل دور ھەبوون و نەبوونا کەرستێن خوارنێ ل دھۆکێ بۆ ئەڤرۆ دیار کر، ب مخابنی ڤە بەلاڤکرنا ئاھێن خوارنێ ل سەرانسەری عیراقێ گەھشتیە ئاستەکێ لاواز و وەکو پاشکەوتا مۆچان لێ ھاتیە و ئاھێن خوارنێ ژ ھەموو لایەکێ ڤە لاوازیەکا مەزن تێدا دیارە و جھێ دلخوشیێ یە ل بازارێن کوردستانێ و دھۆکێ زێدەباری کێمیا ئاھێن خوارنێ ل ناڤ بازاری، بھایێ کەلوپەلێن خوارنێ گران نەبووینە.

زێدەتر دبێژیت: ئەڤ لاوازیا د بەلاڤکرنا ئاھێن خوارنێ دا ھەی ھەموو ڤەدگەریت بۆ وەزارتا بازرگانیا عیراقێ و حکوومەتا عیراقێ، نە ب تنێ د بوارێ دابەشکرنا ئاھێن خوارنێ دا یا لاوازە بەلکو لاوازیا وێ د چەندین بوارێن دی دا یا بەرچاڤە و بەلاڤنەکرنا دەرمانان بۆ ھەرێمێ پشکەکا دی یا گازندەیانە ل سەر حکومەتا ناڤەندی و ئەوا ل عیراقێ دھێتە ئەنجام دان ھەرگیز ل چو وەلاتێن دی ل سەر خەلکی ناھێتە روودان.

ئەحمەد تاھر عەبدولقاھر رێڤەبەرێ گشتی یێ کۆمپانیێن ئاھێن خوارنێ ل دھۆکێ گۆت ژی: عیراق وەک پێدڤی نەشیایە بۆ خەلکێ خوە کەرستێن ئاھێن خوارنێ دابین بکەت و ھەر ژ سالا 1997 ھەتا کو سالا (2010) ژ لایێ وەزارەتا بازرگانیا عیراقێ ڤە (12) جۆرێن کەرستێن ئاھێن خوارنێ بۆ خەلکێ ھەرێما کوردستانێ دھاتە رەوانەکرن، لێ ھەر ژ ھەیڤا (10) ژ سالا (2010) ئەو ھەموو کەرستە ھاتنە کێم کرن بۆ چار کەرستێن ئاھێن خوارنێ ب تنێ و ئەڤ چەندە ژی جھێ دلگرانیا خەلکێ ھەرێما کوردستانێ یە.

زێدەتر دبێژیت: زێدەباری کێم کرنا وان ھەموو کەرستان و کێم کرن بۆ ب تنێ (4) کەرستان، لێ ئەو (4)کەرستێن ماین ژی وەک پێدڤی ناھێنە رەوانەکرن بۆ ھەرێما کوردستانێ و گوت: ئەو ھەر (4) کەرستێن نھا بۆ ھەرێمێ دھێنە رەوانەکرن ل ھەموو ھەیڤان وەک پێـدڤی ناھێتە رەوانەکرن بۆ خەلکێ کوردستانێ و د ئەڤ سالە یا 2017 ێ دا ب تنێ ئارێ (7) ھەیڤان ھاتیە رەوانەکرن بۆ کوردستانێ و برنج د ئەڤ سالە ھەموویێ دا ب تنێ بەھرا ھەیڤەکێ بۆ کوردستانێ ھاتیە رەوانەکرن و شەکر ب تنێ یێ (5) ھەیڤا و زەیت ب تنێ یا (6) ھەیڤان.

ھەمان رێڤەبەری ئەو چەندە پشت راستکر: ل سەرانسەری دھوکێ ملیونەک و (205) ھزار کەس ئاھێن خوارنێ وەرگرن و ژبلی کو (470) ھزار ئاوارە ھەر ل سنورێ پارێزگەھا دھۆکێ بەردەوام دگەل خەلکێ دھۆکێ بێ کێماسی ئاھێن خوارنێ وەردگرن و ئەڤ رێژا کەرستا ئاھێن خوارنێ بۆ کوردستانێ دھێتە رەوانەکرن رێژەیەکا گەلەک نزمە و مە پێدڤی ب پتر ئاھێن خوارنێ یە، چونکو نھا پتریا خێزانێن دھۆکێ کەرستێن خوارنێ ل بازاری بۆ خوە دکرن و پەیدا دکەن.

رێڤەبەرێ گشتی یێ کۆمپانیێن ئاھێن خوارنێ ل دھۆکێ ئاماژە ب وێ چەندێ ژی دا: کوالێتیا ڤان کەرستێن خوارنێ ئەوێن بۆ مە دھێنە رەوانەکرن تا ئاستەکێ باشە و ئەم نەشێین بێژین کوالێتیا وان یا باش نینە، چونکو لیژنەیەک ژ رێڤەبەریا گشتی یا ساخلەمیا پارێزگەھا دھۆکێَ تەماشەی وان کەرستان دکەت و ڤەکۆلینێ ل سەر دکەت و بریار یا د دەستێ وان دا ئەگەر وان دیارکر ب کێر خوارنێ دھێت ل وی دەمی ئەم ئامادەکاریان دکەین وان کەرستان ل سەر خەلکێ خوە دابەش بکەین.

ناڤبری نەڤەشارت ژی: ل سالا (2013، 2014) ھندەک ھەیڤان کەرستێن خوارنێ نەھاتبوونە بەلاڤکرن و پاشان ئەو ھەیڤێن نەھاتیە بەلاڤکرن بۆ خەلکی ھاتنە قەرەبووکرن، لێ وەکو بۆ مە دیار د ئەڤ سالە دا ئەو ھەیڤێن ئەرزاق بۆ نەھاتیە دابینکرن ئەو ھەموو ھەیڤە دێ ب ھەروە چن و بۆ خەلکی ناھێنە قەرەبووکرن.

گۆت ژی: د ماوێن رۆژێن بھێت دا دێ شەکر و برنج و ئار ل سەر خەلکێ مە ھێتە بەلاڤکرن کو برنج ب تنێ ئەڤە دو ھەیڤە دھێتە بەلاڤکرن و ھەر ژ 19/12/2017 ھەتا ئەڤرۆ نێزیکی (4) ھزار تەنێن کەرستێن خوارنێ بۆ مە ھاتینە رەوانەکرن و ل زووترین دەم دێ ل سەر خەلکێ خوە بەلاڤ کەین.