ئه‌ڤرۆ نيوز:
ل گۆندێ گورزه‌يان يێ سه‌ر ب ناحيا ديگه‌له، سۆپه‌كا دارا په‌قى و ژ ئه‌گه‌رێ وێ حه‌فت كه‌س ب رێژێن جودا سۆتن.
روودان سپێيده‌هيا ئه‌ڤرۆ ل ده‌مژمێر 3:30 ده‌قيقه روودايه و ب گۆره‌ى پێزانينان ژ ئه‌گه‌رێ فشارا گه‌رمێ بوويه.
ژ ئه‌گه‌رێ ڤێ روودانێ حه‌فت كه‌س كو هه‌موو ئه‌ندامێن ئێك خێزانن ب رێژێن جودا هاتينه سۆتن و پێنج بۆ نه‌خۆشخانێن هه‌ولێر هاتينه ره‌وانه‌كرن.
ژێده‌ر: K24
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا شه‌مبى رێكه‌فتى 16ى كانوونا ئێكێ 2017 دهێته پێشبينيكرن ئه‌سمان دێ ساهى بيت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن بلندێن سايبيرىا ئه‌سمان دێ ساهى بيت ل گه‌ل هنده‌ك ئه‌ورێن كێم ل ده‌ڤه‌رێن جودا.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 5 پله بيت و بلندترين پله ژى دێ 15 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى دێ گه‌له‌ك زێده‌كه‌ت و ل هنده‌ك جاران دێ گه‌هيته 5 بۆ 15 كم بيت د ده‌مژمێره‌كێ دا و ماوێ ديتنێ ژى دێ 8 بۆ 10كم بيت.
ئەڤرۆ نیۆز ، زنار تۆڤی:
ئەڤرۆ ئەینیێ 15.12.2017 ل سەر جادا گشتی یا دچیتە ناحیا کانی ماسێ تی ئێن تییەک پەقیە و زیانێن مەزن گەهاندینە جادێ.
ئەڤرۆ ئەینیێ و ل دەمژمێر 8:20 سپێدێ ل بن گوندێ ئەلکیشکێ و ل سەر جادا گشتی یا دچیتە ناحیا کانی ماسێ تی ئێن تییەک ب هێزێن سۆپایێ تورکیڤە پەقیە و هەروەسا وێ پەقینی زیان گەهاندینە ترۆمبێلەکا سەربازی و جادە ژی خرابکریه و دیسا سەربازەک ژی د وی روودانێ دا برینداربوویە.
ئەڤرۆ نیوز، نەوزاد ھلۆری:
دەما چەند رۆژایە سێ یان چار پارچێن رۆناھیان لە ئەسمانێ ده‌ڤه‌رێ دهێنه ديتن، وەلاتی تووشی حێبەتیێ کرینە و ھەموو شەڤان د ناڤبەرا دەمژمێر 6:00 بۆ 11:00 شەڤێ و ھندەک جاران ھەتا سپێدێ دمینیتە ل ئەسمانی و ھەر کەسەک ژی ب رەنگەکێ شرۆڤەکرنان بۆ دکەت، ھندەک ددەن دیارکرن کو روناھیا بیرێن په‌ترۆلێ یە و ھندەک دبێژین رۆناھیا لێزەری یە، بەلێ شارەزایەکێ زانست و تەکنۆلۆژیایێ ددەته دیارکرن کو ئەو رۆناھیە جورە زانستەکێ له‌شكرى یە و ل وان جھان دەردکەڤیت يێن کو شەر لێ دھێنەکرن.
عەبدوللا نەشوان وەلاتیەکێ سنوورێ قەزا ئامێدیێ یە دیارکر کو ئەوەی ب چاڤێ خوە ل چەند رۆژێن بوری چەندین جاران ئەو رۆناھی دیتیە و بۆ ئەڤرۆ نیوز گۆت: “ئەو پارچە رۆناھیێن ل ئەسمانى دەردکەڤن سێ رۆناھی نە و ھندەک جاران ژی چارن و ھەموو ژی ل نێزیکی ئێکن و گەلەک ژی ب روون و ئاشکرایی دھێنە دیتن، بەلێ ل جھێ خوە ناچن”.
زێدەتر گۆت: “ل دووڤ ئاخفتنێن خەلکی ئەو رۆناھی رۆناھیەکا لایتێ یە ب شێوەیێ لێزەری یان ژی رۆناھیا بیرێن پەترۆلێ یە ل شێخان، بەلێ ھەتا نھا ئەڤ یەک نەھاتیە پشتراستکرن ژ بەر کو ژ بلی دەڤەرا ئامێدیێ ل چەند دەڤەرێن دن ژی دھێتە دیتن کو گەلەک ژ بیرێن پەترولێ د دوورن، یا دویێ ژی رۆناھی ئێكسه‌ر ل ئەردی بەر ب ئەسمانان ناچیت، بەلکو ل ئەسمانان ب تنێ ب شێوەیەکی قەتکری دھێتە دیتن نەک تیڤەرێزەکا درێژ”.
رەمەزان حەمزە مامۆستایێ زانکۆیا دھۆک و بیسپۆر د وارێ زانست و تەکنۆلۆژیایێ دا دیارکر کو ئەو رۆناھیا ل سنوورێ پارێزگەھا دھۆک دھێتە دیتن ب چو ره‌نگان رۆناھیا بیرێن په‌ترۆلێ و لایتێن لێزەری نینە و بۆ ئەڤرۆ نیوز گۆت: “ل گەلەک جھێن جیھانێ ب تایبەتی ئەوان دەڤەرێن کو شەر لێ دھێنەکرن ئەڤ جورە رۆناھیە دھێتە دیتن و دیارە ل ئاسمانێ ئەوان دەڤەرێن سنوورێ پارێزگەھا دھۆک ب تایبەتی ئاسمانێ ئامێدیێ و ئاکرێ و لایێ دەڤەرا بارزان ژی چەدارێن پەکەکێ لێ ھەنە و ئەو رۆناھی ژی جورەکێ زانستێ له‌شكرى یە ژ لایێ سۆپایێ تورکیا دھێتە بکارئینان بۆ دووڤچوون و وەرگرتنا زانیاری ل سەر پەکەکێ، بەلێ ھەتا نھا ناھێتە زانین کا ناڤێ ئەوی جورە زانستی چی یە و ب چ مەرەم ل وان جھان ھاتیە دانان و دیسان ئەو رۆناھی ل ئەسمانێ ئێک ژ وان دەڤەران ب دیارکری نینە، بەلکو ژ بەر کو یا بلندە ھەموو ئەو دەڤەر دبینن”.
زێدەتر گۆت: “ئەوێ رۆناھیێ چو مەترسی ل سەر ژیانا وەلاتیان نینە و زێدەتر ل دەڤەرێن چیایی دھێتە دیتن، بەلێ ئەگەر لە ئەسمانێ سەنتەرێ دھۆک ھاتبایە دیتن رەنگە ھاتبا زانین کا چ جورە رۆناھیە و مەرەم ژی ژ وێ رۆناھیێ چی یە”.
ئەڤرۆ نیۆز ، زنار تۆڤی:
بریارە ل ڤان نێزیکان تیمەکێ دی یێ نەتەوێن ئێکگرتی سەرەدانا خورماتوو بکەت، هێشتا رەوشا خورماتوو ئاسایی نەبوویە،خەلکێ ئاوارە ژی کو کوردێن وی باژێری نە ترسا ڤەگەریانێ هەیە،ئەو پێشێلکاریێن دناڤا خورماتوو دا ژلایێ حەشدا شەعبی ڤە هاتینە ئەنجامدان بەرامبەر کوردان، هێشتا ب دروستی دیار نینە چەندن،هەروەسا گەهشتن بۆ وێ قەزایێ بۆ رێکخراوان و بۆ ئەندامێن پەرلەمانی ژی یا ب ساناهی نینە.
هەر ژ روودانێن 16 ئۆکتۆبەرێ تا نوکە دناڤا خورماتوو دا سێ هزار خانی هاتینە داگیرکرن، هەروەسا دو هزار مال ژی هاتینە تالانکرن، 400 خانیێن دی ژی هاتینە سووتن،کو هەموو ژی یێن کوردانن.
هەروەسا 50 خانی هاتینە تەقاندن، 500 دووکان ژی هاتینە تالانکرن و سووتن، ئەڤەژ بلی سووتاندنا ب دەهان ترۆمبێل و بارەگایێن حیزبێن کوردستانی.
یۆنامی د راگەهاندنەکێدا بەلاڤەکریە، کو ل رۆژا 7-12-2017 وان سەرەدانا خورماتوو کریە ب مەرەما ڤەکۆلینێ ل وان راپۆرتێن کو بەحسێ روخاندنا مولکێ خەلکێ وێ باژێری دکەن.
یۆنامی بریاردایه کو تیمەکێ دیتر بۆ خورماتوو ڤرێکەت د چەند رۆژێن داهاتیدا، ب مەرەما ڤەکۆلینی.
ئه‌ڤرۆ نيوز:
به‌رپرسێ نڤيسينگه‌ها كاروبارێن ره‌ڤانديان ل دهۆكێ راگه‌هاند كو چار ژنێن دى يێن ره‌ڤاندى هاتنه رزگاركرن.
حسێن كورۆ قائيدى، به‌پرسێ نڤيسينگه‌ها كاروبارێن ره‌ڤانديان بێ كو ئاماژه ب كه‌ته ژى و ناڤێن وان ئاشكه‌را كر كو چار ژنێن دى يێن ئێزدى كو خه‌لكێ تل به‌نات و كۆچۆ و گرزرك و سنۆنێ نه هاتنه رزگاركرن.
حسێن كورۆ قائيدى سۆپاسيا وان هه‌موو لايه‌نان ژى كريه يێن كو د هاريكار بووينه ژ بوو رزگاركرنا ڤان كه‌سان و ڤه‌گه‌ريانا وان بۆ ناڤ خێزانێن وان.
ئەڤرۆ نیوز، ئێقبال عومەر:
ئەندامەکێ لژنا قانوونی یا پەرلەمانێ کوردستانێ دیارکر کو رەنگە بەری سەرێ سالێ پەرلەمانێ کوردستانێ کارێن پرۆژێ قانوونا لێبورینا گشتی بۆ زیندانێن ناڤا چاکسازیێن ھەرێما کوردستانێ ب دووماهى بینیت و بکەڤیتە د وارێ بجھکرنێ دا.
د ڤی واری دا ڤەمان فەیسەل ئەندامێ لژنا قانوونی یا پەرلەمانێ کورستانێ دیارکر کو ل رۆژا ئێکشەمبی 17 کانوونا دویێ ئەو دێ پرۆژە قانوونا لێبورینا گشتی ئێخنە د بەرنامەیێ کاری یێ پەرلەمانێ کوردستانێ دا و بۆ ئەڤرۆ نیوز گۆت: “پشتی کو بۆ دەمەکێ زۆر پرۆژێ قانوونا لێبورینا گشتی بۆ زیندانێن ناڤا چاکسازیێن ھەرێما کوردستانێ بۆ ھەرسێ لژنێن مافێ مرۆڤی و ناڤخۆيی و قانوونی ل پەرلەمانێ کوردستانێ ھاتیە بلندکرن و ل سەر راوەستایی وەسا بڕیارە کو ئێکشەمبیا بھێت پەرلەمانێ کوردستانێ ب ره‌نگه‌كێ باشتر ل سەر روونيته خوارێ و بڕیارا دووماهيێ ل سەر بدەت”.
زێدەتر گۆت: “ئەڤ پرۆژێ قانوونێ ب ره‌نگه‌كێ گشتی ھەموو زیندانیان ب خوه ڤە دگریت، بەلێ ل گەل ڤێ یەکێ ژی د 14 بڕگان دا ھندەک تاوانبار ژێ ھاتینە ڤەدەرکرن و پرۆژە قانوون بۆ لێبوریننا وان ناگریت ھەر بوو نموونە تاوانبارێن گەندەلیێ و تیرۆر و شەرەف و کوشتنا مرۆڤێن نێزیک و موحەرەماتان و سێکس و وان کەسانێن کو کاروبارێن حوکمەت و رێکخراوێن خێرخوازی کار دکەن ڤەناگریت، ئەڤێن کو ئەمن و ئاسایشا وەلاتی تێک ددەن”.
ئەوی ئەندامێ پەرلەمانێ کوردستانێ دووپات ژی کر کو رەنگە بەری سەرێ سالێ پرۆژێ قانوونێ بکەڤیتە د وارێ بجھکرنێ دا و گۆت: “مەرەم ژ دەرکرنا لێبورینا گشتی بۆ وێ یەکێ یە کو زێدەتر مرۆڤایەتی و پێکڤەژیان بھێتە پاراستن و كاودانێن جڤاکی و دارایی ل بەر چاڤ بھێتە ھتیە وەرگرتن”.
ئه‌ڤرۆنيوز:
وه‌زاره‌تا بازرگانيا عيراقى، ئه‌ڤرۆ پێنج شه‌مبى دبه‌ياننامه‌كێ دا، مه‌زاختنا هه‌موو پارێن جوتيارێن عيراقێ بۆ سالێن 2014 و2015 و2016 راگه‌هاند.
دوێ به‌ياننامێ دا هاتيه” هه‌موو لقێن وه‌زاره‌تا چاندنێ ل پارێزگه‌هان يێن هاتيه ئاگه‌هداركرن كو چه‌كێ پاره‌ى رێكبێخن”.
دياركريه ژى” پشكا جوتيارێن پارێزگه‌هێن هه‌رێما كوردستانێ يا دوان پارێن هاتينه مه‌زاختن دا هه‌ى”.
به‌لێ مه‌سعوود حه‌يده‌ر ئه‌ندامێ لژنا دارايى ل جڤاتا نوونه‌رێن عيراقێ، ل دۆر وى بابه‌تى، گۆت” ژ وان 829 مليار دينارێن بۆ جوتيارێن هه‌موو پارێزگه‌هێن عيراقێ هاتينه مه‌زاختن، تنێ 70 مليار دينارێن سالا 2016 يێن جوتيارێن هه‌رێمێ بوون”.
وى په‌رله‌مانتارێ كورد دبه‌رپه‌رێ خوه ل سه‌ر تۆرا فه‌يسبووكى زێده‌تر گۆت” گرنگى پتر ب ده‌ڤه‌رێن دى يێن عيراقى هاتيه دان” خوياكر ژى”سه‌رجه‌مێ پارێ جوتيارێن هه‌رێما كوردستانێ بۆ وان سێ سالان 689 مليار دينارن ويێن ئه‌ڤ ساله ژى 47 مليار دينارن، كو سه‌رجه‌مێ گشتى يێ پارێن جوتيارێن هه‌رێمێ دبيته 736 مليار دينار وپشتى مه‌زاختنا پارێن 2016 ژلايێ به‌غداڤه كو دبنه 70 مليار دينار، نوكه 666مليار دينارێن جوتيارێن هه‌رێمێ يێن ل به‌غدا”.
ئه‌ڤرۆنيوز:
وه‌زاره‌تا ناڤخوه‌يا عيراقێ، ئه‌ڤرۆ پێنج شه‌مبى 14/12/2017، راگه‌هاند، وه‌رگرتنا داخوازيێن بدستڤه‌ئينانا پاسه‌پۆرتان ل هه‌موو پارێزگه‌هێن عيراقێ دێ هێنه راگرتن.
عه‌ميد “سه‌عد مه‌عه‌ن” په‌يڤدارێ وه‌زاره‌تا ناڤخوه‌يا عيراقێ دبه‌ياننامه‌كێ دا گۆت، وه‌رگرتنا داخوازيێن بدستڤه‌ئينانا پاسه‌پۆرتان ژ25/12/2017 هه‌تا 31/12/2017 دێ هێنه راگرتن”.
گۆت ژى” ئه‌و راگرتنا مامۆلێن پاسه‌پۆرتان، دێ هه‌موو پارێزگه‌هێن عيراقێ ڤه‌گريت، ژبه‌ر كارێن كارگێرى يێن سالانه وه‌كو هه‌موو فه‌رمانگه وداموده‌زگه‌هێن دى يێن ده‌وله‌تێ”.
ئه‌ڤرۆنيوز:
په‌يڤدارێ هه‌ڤپه‌يمانيا نێڤده‌وله‌تى يا دژى داعشێ راگه‌هاند، پشتى ده‌ركرنا وان ژباژێران، هێشتا نيزيكى 3 هزار چه‌كدارێن داعشێ يێن ل گوندان ل عيراقێ وسووريێ ماين.
ئه‌ڤرۆ پێنج شه‌مبى 14/12/2017، كولۆنيل “رايان ديلۆن” په‌يڤدارێ هه‌ڤپه‌يمانيا نێڤده‌وله‌تى يا دژى داعشێ دبه‌رپه‌رێ خوه ل سه‌ر تويته‌رى به‌لاڤكر” ل دووڤ پێشبينيێن من نوكه 3 هزار چه‌كدارێن داعشێ وه‌كو مه‌ترسى يێن ماين، به‌لێ دێ به‌رده‌وامبين ل پشته‌ڤانيكرنا هێزێن هه‌ڤكارێن مه بۆ شكاندنا داعشێ”.
نيشاندان