ئه‌ڤرۆ نيوز:

جێگرێ فەرماندێ گشتیێ لەشکرێ پاسدارێن ئیرانێ حسێن سەلامی، د گۆتارەکێ دا نەراستەوراست بەرسڤا محەمەد عەلی جەعفەری فەرماندێ گشتیێ ھەمان لەشکرێ ئیرانی ددەت، سەبارەت کونترۆلکرنا کەرکووکێ و خیانەتا 16 ئۆکتۆبەرێ دبێژیت، راستە ئەم شیان عیراقێ ب ئێک پارچە بھێلین و ژناڤکێ خەونا دەولەتا کوردستانێ ببڕین، بەلێ نابیت ئەم ژبیر بکەین، دوستەکێ دێرینێ ئیرانێ و باوەرپێکریێ خوە ل باکوورێ عیراقێ سەر بڕی کو ئەو ژی ئێکەتی نیشتیمانی کوردستان و بنەمالا تالەبانی بوو ، ئەڤە ژی زیانەکا مەزنە.

حسێن سەلامی دوێ گۆتارا بۆ ئەو گۆتار بتنێ بۆ دەمێ 2 دەمژمێران ل سەر مالپەرێ فەرمیێ لەشکرێ پاسداران بلاڤکر و پاشی ھاتیە ژێبرن، دبێژیت، ل روودانێ 16 ئۆکتۆبەرێ ئیرانی کەفتە د ناڤبەرا دو ھەلبژارتنان دا، کو دڤێت ئێک ژوانا ھەلبژێریت، ئەو ژی پاراستنا ئێکپارچەیا ئاخا عیراقێ و ژناڤبرنا خەونا دەولەتا کوردی یا ئیسرائیلا دووێ، یان پاراستنا بنەمالا تالەبانی دوستێن باوەرپێکریێن کومارا ئیسلامی یا ئیرانێ و جزبا ئێکەتیێ یە، دبێژیت راستە مە خەونا دەولەتا کوردی و پیلانا ئەمریکا و ئیسرائیلێ ل عیراقێ ژ ناڤبر، بەلێ دۆستەکێ مەزن ژی مە سەر بڕی.

فەرماندێ ناڤبری ھەروەسا دبێژیت: دڤێت ئیران ب ھەر شێوەکی بیت بزاڤان بکەت دۆستێ دێرینێ خوە کو یێ ئامادەی ژ بۆ ئیرانێ بمریت ب پارێزیت، رێ نەدەت ئێکەتی و بنەمالا تالەبانی ب دووماھی بھێت، راستە زیانەکا مەزن بۆ پاراستنا ئاخا عیراقێ و ژناڤبرنا پیلانا ئەمریکی و ئیسرائیلێ ب بنەمالا تالبەانی و ئێکەتیا ب سۆزداردایە، بەلێ نابیت، رێ بدەین، دۆستێن مە دڤێ رەوشێ دا بمینن، دڤێت ھاریکاریا وانا بکەن ب ھەر رێیەکا ھەبیت کو رابنە سەرخوە، و گڤاشتنا خەلکێ باکوورێ عیراقێ ل سەر وانا کێم بکەن.

پاشتی ئەنجامدانا خیانەتا 16 ئۆکتۆبەرێ و رادەستکرنا کەرکووکێ بۆ میلیشیاتێن حەشدا شەعبی و لەشکرێ عیراقێ و پاسدارێن ئیرانێ و حزبوللا یا لوبنانی، ئانکو ل رێککەفتی 18 ئۆکتۆبەرێ ھەر ئێک ژ جێگرێ سکرتێرێ گشتیێ ئێکەتی کوسرەت رەسول، و مەلا بەختیا بەرپرسێ دەستا کارگێریا مەکتەبا سیاسی، دانپێدان ب وێ چەندێ کرن، کو خیانەت دناڤا ئێکەتیێ دا ھاتیە کرن، گونەھا وێ خستنە ستوویێ گرۆپەکێ ناڤا ئێکەتیێ کو ب کالڤامێن دناڤ ئێکەتیێ دا ھاتنە ناڤکرن، بەلێ پشتی ھەر وێ رۆژێ، کومەلا ئیسلامی و بزاڤا گۆڕان و دکتور بەرھەم سالح بزاڤکرن، دێمەنێ ب گریا پێشمەرگەی ژ خەیاتەنێ ل کەرکووکێ بۆ بابەتێ ریفراندۆمێ و بگوھوڕن و بڤی رەنگی بناڤێ شکەستنا حوکمەتێ دانن، پلانا حوکمەتا رزگاری نیشتیمانی بینە رۆژەڤێ.

ئه‌ڤرۆنيوز:

سه‌رۆك وه‌زيرێن ئيسرائيلێ، بنيامين ناتانياهۆ، ره‌تكر وانا ژ سه‌رۆكێ توركى ره‌جه‌ب ته‌يب ئه‌ردۆگان وه‌رگريت و ب توپبارانكرنا گوندێن كوردان تۆمه‌تباركر.

ناتانياهۆى دكۆنگره‌كێ رۆژنامه‌ڤانى يێ هه‌ڤپشك ل گه‌ل سه‌رۆكێ فه‌ره‌نسى ماكرۆن ل پاريس گۆت” ئه‌ردۆگانى ره‌خنه‌ ل ئيسرائيلێ گرت وئه‌ز فێر نه‌بوويمه‌ وانا ل دۆر ره‌وشتى وه‌رگرم ژ سه‌رۆكه‌كێ گوندێن كوردان  ل وه‌لاتێ خوه‌ توركيا توپباران دكه‌ت ورۆژنامه‌ڤانا ده‌سته‌سه‌ردكه‌ت وهاريكاريا ئيرانێ دكه‌ت بۆ ده‌ربازكرنا سزايێن نێڤده‌وله‌تى وهاريكاريا تيرۆرستان دكه‌ت، ژوان ژى ل غه‌زه‌”.

ئه‌ڤ داخۆيانيێن ناتانياهۆ به‌رسڤ بوون ل سه‌ر ره‌خنێن ئه‌ردۆگانى ل سه‌ر سياسه‌تا ئيسرائيلى وره‌تكرنا وى بۆ بريارا سه‌رۆكێ ئه‌مريكى ترامپ ل دۆر دانپێدان ب قودسێ وه‌كو پايته‌ختێ ئيسرائيلێ.

سه‌رۆكێ توركى راگه‌هاندبوو” ئيسرائيل سياسه‌تێن سته‌مكارانه‌ وپرۆگرامكرى دژى هه‌موو فلستينيان ب زارۆك وژن وپێره‌مێر ڤه‌ ب مه‌ره‌ما ده‌ربه‌ده‌ركرنا وان” گۆتبوو ژى” قودس هێلا سوره‌ ل ده‌ف موسلمانان وتوركيا قه‌بوول ناكه‌ت پلان دژى قودسێ بهێنه‌ دارێشتن”.