ئه‌ڤرۆنيۆز:
خانما ئه‌كته‌ر ونمايشكارا رۆسى “داريا” ل گه‌ل كچا خوه يا زارۆك ب ناڤێ”سوفيا”ژبه‌ر جوانيا وان، بووينه خودان هزاره‌ها هه‌واداران ل سه‌ر تۆرين جڤاكى.
وێنێن ڤێ دايكێ وكچا خوه ب شێوه‌كێ مه‌زن دتۆرێن جڤاكى دا يێن به‌لاڤبووين وهه‌وادارێن مه‌زن دتۆرێن جڤاكى وئه‌نيستگرامى دا يێن هه‌ين، ئه‌ڤه ژى بوويه ئه‌گه‌ر كو پتريا براندێن جيهانى داخوازێ چێ بكه‌ن رێكلامێ بۆ كه‌ره‌ستێن وان بكه‌ن.
ئه‌ڤرۆنيوز:
وه‌زيرێ هه‌والگيريا ئيسرائيلى، يسرائيل كاتس، راگه‌هاند، ئيدارا ئه‌مريكى به‌رى نوكه هه‌ڤكارى ل گه‌ل سه‌رۆكێن هنده‌ك وه‌لاتێن عه‌ره‌بى كربوو ل دۆر بريارا ترامپى ب دانپێدانى ب قودسێ وه‌كو پايته‌ختێ ئيسرائيلێ وڤه‌گۆهاستنا باليۆزخانا ئه‌مريكى بۆ وى باژيرى.
كاتس دديداره‌كێ دا ل گه‌ل كه‌نالێ 10 يێ ئيسرائيلى گۆت رژديا ترامپى ل سه‌ر هه‌ڤكاريا پێشوه‌خت ل گه‌ل سه‌رۆكێن عه‌ره‌ب بۆ گره‌نتيكرنا كێمكرنا كارڤه‌دانا فلستينى بوو ل سه‌ر وێ بريارێ.
ل دۆر هه‌لويستێ سعوديێ ژ بريارا ترامپى، وه‌زيرێ هه‌والگيريا ئيسرائيلى گۆت، سعوديه به‌رژه‌وه‌نديێن ئه‌منى يێن هه‌ڤپشك ل گه‌ه‌ل ئيسرائيلێ ل به‌رچاڤ وه‌ردگريت ب تايبه‌تى د رووب رووبوونا ئيرانێ دا.
ل دووڤ وى كه‌نالێ ئيسرائيلى، به‌رپرسه‌كێ ئه‌مريكى يێ مه‌زن دياركريه كو واشنتۆن يا خوه‌شحاله ب وى ربسواكرنا نه‌رم ئه‌وا ژوه‌لاتێن عه‌ره‌بى ده‌ركه‌فتى ل سه‌ر بريارا ترامپى وئه‌و هه‌لويستێ نه‌رم يێ وه‌لاتێن عه‌ره‌بى دێ هاريكاريا ئه‌مريكا كه‌ت ددۆرپێچكرنا كارڤه‌دانا فلستينى ل سه‌ر وێ بريارێ.
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ، برياره‌كا نوو ل دۆر شێوازێ وه‌رگرتنا سولفا عه‌قارى ژ وه‌لاتيان ده‌ركر وئاماژێ دده‌ت بۆ گيرۆكرنا هه‌ر هه‌يڤه‌كێ زێده‌تر ژ ئێك مليۆن و400 هزار دينار دێ هێنه وه‌رگرتن.
وه‌زاره‌تا دارايى وئابوورى ل هه‌رێمێ ب نڤيسارا خوه يا هژمار 15062 كو ل رۆژا 5/12/2017 هاتيه ده‌ركرن وتێدا به‌حسێ وه‌رگرتنا سولفێن عه‌قارى ژوه‌لاتيان دكه‌ت.
ل دووڤ وێ بريارا وه‌زاره‌تا دارايى، وه‌رگرتنا سزاى دێ ل سه‌ر ره‌سيدێ پشكێ بيت وبۆ گيرۆبوونا قه‌رى دهه‌يڤه‌كێ دا، دێ گۆژمێ ئێك مليۆن و416 هزار دينار ژوه‌لاتيان هێته وه‌رگرتن.
سولفا عه‌قارى ل دووماهيا سالا 2008 تاكو 2012 گۆژمێ 25 مليۆن دينار بۆ وه‌لاتيێن ئاكنجى ل ده‌رڤه‌ى باژێران و20 مليۆن دينار بۆ سه‌نته‌رێن باژێران دهاته مه‌زاختن وب زێده‌تر ژ 60 هزار وه‌لاتيێن هه‌ريما كوردستانێ هاتيه دان.
پشتى قه‌يرانا دارايى ل هه‌رێما كوردستانێ ل 2014، حوكمه‌تا هه‌رێمێ بريار دابوو كو وه‌رگرتنا قه‌رين سولفا عه‌قارى ژفه‌رمانبه‌ران بهێته راگرتن، به‌لێ وه‌رگرتنا قه‌رى ژ وه‌لاتيان يا به‌رده‌وامه.
ئه‌ڤرۆ نیوز، نه‌وزاد هلۆرى:
ئه‌ڤرۆ ئێڤارى ل سه‌نته‌رێ قه‌زا سوران، كه‌سه‌كێ برایێ هه‌ڤژینا خوه كوشت، رێڤه‌به‌ریا پۆلیسێن سوران ژى ئه‌گه‌ر زڤراندن بۆ كێشه‌كا جڤاكى كو به‌رى دو هه‌یڤان هاتیه روودان.
رائيد (هه‌وار ئه‌رگوشى) په‌يڤدارێ پۆلیسێن قه‌زا سوران بۆ ئه‌ڤرۆ نیوز گۆت” ئه‌ڤرۆ ئێڤارى ل ناڤا سه‌نته‌رێ قه‌زا سوران كه‌سه‌كێ برایێ هه‌ڤژینا خوه كوشت كو ژیێ وى 34 سال بوون”.
زێده‌تر گۆت” ئه‌گه‌رێ روودانێ دزڤریت بۆ كێشه‌یه‌كا جڤاكى دناڤبه‌را كوژه‌ك و بكوژى دا كو به‌رى دو هه‌یڤان دناڤبه‌را وان دا هاتیه روودان ، پۆلیسان ته‌رمێ وى كه‌سێ هاتیه كوشتن هنارتيه نوژداریا داد ل سوران وبكوژ ژى هاتیه ده‌سته‌سه‌ر‌كرن و ڤه‌كۆلین ل سه‌ر روودانێ يا ده‌ستپێكرى”.
ئه‌ڤرۆنيوز:
ئێكه‌تيا ته‌پا پێى يا نێڤده‌وله‌تى “فيفا” ده‌مێ هه‌يڤه‌كێ مۆله‌ت دا كارگێريا يانا زاخۆ بۆ مه‌زاختنا شايسته‌يێن دراڤى يێن ياريكه‌رێ ليبى سالم مه‌سلاتى.
ل دووڤ مالپه‌رێ “كوره” بريكارێ ياريكه‌ران “عه‌بدولحه‌فيز عه‌قۆرى” راگه‌هانديه كو فيفايێ هه‌تا رۆژا 7 كانوونا دويێ 2018 مۆله‌ت دايه يانا زاخۆ بۆ مه‌زاختنا گۆژمێ 12 هزار و500 دۆلاران بۆ وى ياريكه‌رێ ليبى ئه‌وێ نوكه ياريێ بۆ يانا ئه‌لنه‌سر يا ليبى دكه‌ت.
وى مالپه‌رى دياركريه ژى، هه‌كه يانا زاخۆ پێگيريێ ب بريارا فيفايێ نه‌كه‌ت، دێ تووشى سزادانێ بيت ئه‌وژى ژێبرنا 3 خالان ژ خالێن وێ دخۆلا عيراقێ دا وپاشى 6 خالان، هه‌كه يانا زاخۆ پێگيريێ ب بريارێ نه‌كه‌ت دێ هێته خوار بۆ خۆلا پله دو يا عيراقى.
ياريكه‌رێ ليبى ل سالا 2015 بۆ يانا زاخۆ يارى كريه وبه‌رێ وێ ل گه‌ل يانێن ره‌مسا ومه‌نشيه به‌نى حه‌سه‌ن ل ئوردنێ ونوكه ياريكه‌رێ يانا ئه‌لنه‌سر يا ليبى وهه‌لبژارتيێ ليبيا يه.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ، دنڤيساره‌كا فه‌رمى دا، داخواز ژ هه‌موو رێڤه‌به‌ريێن گشتى يێن په‌روه‌رده‌يان ل پارێزگه‌هێن هه‌رێما كوردستانێ دكه‌ت كو نابيت چو نڤيسارێن فه‌رمى وناڤه‌رۆكێن كۆمبوونان دتۆرێن جڤاكى دا بهێنه به‌لاڤكرن.
وه‌زاره‌تا په‌روه‌ردێ ب نڤيسارا خوه يا هژمار 397 ل 29/11/2017 كو هاتيه گشتاندن بۆ هه‌موو رێڤه‌به‌ريێن گشتى يێن په‌روه‌ردێ ل (هه‌ولێر، سلێمانيێ، دهۆك، گه‌رميان وهه‌له‌بجه)، تێدا ئاگه‌هداريا هه‌موو فه‌رمانبه‌ر ومامۆستايان وسه‌رپه‌رشتيارێن سه‌ر ب وه‌زاره‌تا په‌روه‌ردێ ڤه دكه‌ت، نابيت ئێدى نڤيسارێن وناڤه‌رۆكێن كۆمبوونان دتۆرێن جڤاكى دا ” ب تايبه‌تى فه‌يسبووكى” بهێنه به‌لاڤكرن.
هه‌ر دوێ نڤيسارێ دا هاتيه كو تنێ رێڤه‌به‌ريا راگه‌هاندنا وه‌زاره‌تا په‌روه‌ردێ ورێڤه‌به‌ريێن گشتى يێن په‌روه‌رده‌يان ورێڤه‌به‌ريێن په‌روه‌ردێن قه‌زايان دشێن ب شێوه‌كێ فه‌رمى نڤيسار وده‌نگوباسێن په‌روه‌ردێ به‌لاڤ بكه‌ن وهه‌ر كه‌سه‌ك ئاره‌زومه‌ندانه دشێت شه‌ير بكه‌ت، به‌رۆڤاژى ڤێ چه‌ندێ دێ به‌رپرسيار بن.
ئه‌و بريارا وه‌زاره‌تا په‌روه‌ردێ ل هه‌رێما كوردستانێ دده‌مه‌كى دا دهێت كو پێشتر چه‌ند نڤيسارێن وه‌زاره‌تا په‌روه‌ردێ د تۆرێن جڤاكى دا هاتبوونه به‌لاڤكرن، وه‌كو نه‌مانا بێهنڤه‌دانا رۆژێن شه‌مبى پشتى ئه‌زموونێن وه‌رزێ ئێكێ يێ قوتابيان كو ئه‌و چه‌نده ببوو ئه‌گه‌رێ نه‌رازيبوونا مامۆستا وقوتابيان.
ئه‌ڤرۆنيوز:
حەیدەر عەبادی، سەرۆک وەزیرێن عيراقێ پێشنیاره‌كا فوئاد مەعسووم سەرۆک کۆمارا عيراقێ ره‌ت دكه‌ت وشيره‌تكاره‌كێ سه‌رۆك كۆمارى دبێژيت” عه‌بادى يێ دانوستاندنان نينه”.
پشتى فوئاد مه‌عسووم، سه‌رۆك كۆمارا عيراقێسه‌ره‌دانا هه‌رێما كوردستانێ كرى، پێشنيازا ده‌ستپێشخه‌ريا دانوستاندنێ دناڤبه‌را هه‌ولێرێ وبه‌غدا ب حه‌يده‌ر عه‌بادى گه‌هاند، به‌لێ سه‌رۆك وه‌زيرێن عيراقێ ئه‌و چه‌نده ره‌تكر.
عه‌دبوللا عه‌لياوه‌يى، شيره‌تكارێ سه‌رۆك كۆمارا عيراقێ راگه‌هاند”سه‌رۆك وه‌زيرێن عيراقێ يێ تووشى غرۆره‌كا مه‌زن بووى وگوهداريێ چو كه‌سه‌كى ناكه‌ت وهه‌تا نوكه گۆتارێن وى ب جۆره‌كى نه كو روونشتن دگه‌لدا يا بێ مفايه”.
عه‌لياوه‌يى زێده‌تر بۆ باسنيۆز گۆت”سه‌رۆك كۆمارى ئه‌و ده‌ستهه‌لات نينن كو فشاران بێخيته سه‌ر عه‌بادى، به‌لێ وه‌لات دشێن وى كارى بكه‌ن، له‌وما تاكو چاره ئه‌وه فشار ل عه‌بادى بهێنه كرن”.
ئەڤرۆ نیوز ، نەوزاد ھلۆری:
چەندین سالە وەلاتیێن حەفت گوندێن شێلادزێ کو ب گوندێن زێباریان دھێنە نیاسین ، ژبەر ژکارکەفتنا رێیا سەرەکی یا گوندێن خوە نەچارن کو پەنایێ بو داڤەرست و چوپە و کەلەکان ببەن ، ئەڤە زێدەباری کو ماموستایێن وان گوندان ژی ھەر ب ھەمان شێوە ئەو ژی کەلەکێ بکاردئینن و بویە سەدەم کو زور جاران وانە ژ وان بچن و دەوام نەھێتەکرن.
عەسکەر تەمەر کو ئێکە ژ ماموستایێن قوتابخانا ئامادەیا بەرەیێ نزار ل شێلادزێ دیارکر کو ئەو وەکو ماموستایێن قوتابخانەکا حەفت گوندان رۆژانە ب کەلەکێ ھاتن و چونێ دکەن و بو ئەڤرۆ نیوز گۆت: ( رێیا سەرەکی یا گەھشتنا قوتابخانا مە دویرە و ژ کارکەفتی و نەیا چێکریە و رێیەکا ئاخێ یە ، بو ب ساناھیکرنا رێیا ھاتن و چوونێ مە پەنا بو کەلەکێ بریە ، سەرەرای کو مەترسی بو سەر ژیانا مە درۆستکریە ، بەلێ ئەڤ یەک ب ساناھیترین رێکە کو بگەھینە دەوامێ ، و دخوازین کو حکومەت رێیا سەرەکی یا گوندێن زێباریان و قوتابخانێ درۆست بکەت ژ بەرکو کەلەک رێیەکا دەمکی یە و ھەردەما رووبار بوش بیت کەلەک ژی نامینیت ).
قوتابیێن وان گوندان ژبەر کارکەفتنا رێیا سەرەکی یا گوندێن خوە و بکارئینانا کەلەک و داڤەرست و چوپەیان ژلایێ ماموستایێن خوە ددەن دیارکرن کو ئەڤ یەک بویە سەدەم زور جاران ماموستایێن وان نەگەھنە دەوامێ و وانە ژ وان بچن.
عیماد تارق ئێکە ژ قوتابیێن وان گوندان بو ئەڤرۆ نیوز گۆت: ( زور جاران ژ ئەگەرا کەلەکێ بویە سەدەم کو ماموستا گیرو ببن و ھندەک جاران ژی دەوام ھەر نەھێتەکرن و وانە ژ مە بچن).
قوتابیەکێ دن بناڤێ عەبدوللا تاھر دیارکر کو زێدەباری کەلەکێ مەترسی بو سەر ژیانا ماموستایێن وان درۆستکریە د ھەمان دەم دا بو سەر ژیانا وان ژی وەکو قوتابی درۆستکریە و گۆت: ( ھەموو روژان سپێدێ ئەم ماموستایێن خوە ب کەلەکێ دەرباز دکەین ، و دیسان ئەڤ یەک بویە سەدەم کو وانەیێن مە بچن و ئەگەر ژی دزڤریت کو رێیا گوندێن زێباریان و قوتابخانێ رێیەکا نە تەمامکریە).
وارشین بەرواری رێڤەبەرێ ناحیا شێلادزێ دیارکر کو چەندین سالە ڤەدیتن بو رێیا سەرەکی یا گوندێن زێباریان ھاتیە دیتن و بۆ ئەڤرۆ نیوز گۆت: ( ژبەر قەیرانا دارایی ھەتا نھا حکومەت نەشیایە کو جاددا سەرەکی یا وان گوندان تەمام بکەت و سووز ژی دا ئەگەر قەیرانا دارایی چارەسەر ببیت رێیا وان گوندان ژی دێ ھێتە چێکرن )
ئەڤرۆ نیۆز ، زنار تۆڤی:
سترانبێژێ کورد رۆژ کەریم دێ نووترین کلیپا خۆ بەلاڤ کەت،کو ناڤێ سترانا وی (بمبووری)یە.
ئەڤ سترانە ژ پەیڤێن ھێمن شێخ عومەرە و ژ ئاوازا رۆژ کەریمی ب خوەیە،هەروەسا بژار دیلانی کارێ دابەشکرنا مۆزیکێ بۆ کریە،ئەڤ سترانە ژ دەرهێنانا زانکۆ ئیسماعیلە و کارێ کلیپکرنا ڤێ سترانێ ل ھەرێما کوردستانێ هاتیە چێکرن.
هەروەسا ڤی سترانبێژی ل هەیڤا بوری کلیپەکا دی ب ناڤێ (بچرپێنە) بەلاڤەکریە، ھەروەسا ل هەیڤا تەموزا ئەڤ سالەدا، ئەلبوومەکا نوو ب ناڤێ (بچرپێنە) بەلاڤە کریە.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ د راگه‌هاندنه‌كا فه‌رمى دا ئاشكراكر، كو پێشبينى دهێته كرن ل رۆژێن داهاتى پڵين گه‌رمێ بۆ بن سفرێ بهێنه خوار.
ئه‌ڤرۆ پێنج شه‌مبى 7/12/2017، رێڤه‌به‌ريا گشتى يا كه‌شناسيێ وبيڤه‌له‌رزا راگه‌هاند، ل هه‌ردو رۆژێن ئه‌ينى وشه‌مبى 8 و9/12/2017، پلێن گه‌رمێ ل پتريا ده‌ڤه‌رێن هه‌رێما كوردستانێ، ب تايبه‌تى ل ده‌مێن سپێدى ول ده‌ڤه‌رێن چيايى بۆ بن سفرێ دێ هێنه خوار.
نيشاندان