ئه‌ڤرۆ نیۆز،ره‌مه‌زان هه‌رنى:

به‌رپرسێ گروپێ پێشمه‌رگه‌ یێ خوبه‌خش ل ئاكرێ خویاكر: وه‌كو گروپێ پێشمه‌رگه‌ هزر دوێ چه‌ندێ دا كریە كو چه‌ندین تیمێن خوبه‌خش و ب ترومبێلێن خۆڤه‌ به‌رهه‌ڤ بكه‌ین كو ل رۆژا ده‌نگدانێ وەلاتیان ڤه‌گوهێزن بۆ سه‌ر سندوقێن ده‌نگدانێ.
عه‌دنان عه‌بدولوه‌هاب به‌رپرسێ گروپێ پێشمه‌رگه‌ یێ خوبه‌خش ل ئاكرێ بۆ ئه‌ڤرۆنیۆز دیار كر:مه‌ 14 تیم به‌رهه‌ڤكرینه‌ كو هه‌ر تیمه‌ك ل 10 كه‌سان پێك دهێت و ئه‌ڤ تیمه‌ هاتینه‌ دابه‌شكرن ل سه‌ر گه‌ره‌كا و دیسان ل قه‌زا به‌رده‌ره‌ش مه‌ تیمه‌ك به‌رهه‌ڤكرى یه‌ و ل سنورێ هه‌ر ناحیه‌ك ژى مه‌ تیمه‌ك به‌رهه‌ڤکریه‌ و هه‌تا ل سنورى قه‌زا ئاكرێ ژى ئه‌م ده‌رباز بووینه‌ و ل قه‌سروك و دومیز ژى مه‌ تیم به‌رهه‌ڤكرینه‌ بۆ ڤێ پرسێ و هه‌ر ل خوله‌كا ئێكێ یا ده‌نگدانێ دێ د به‌رده‌وام بین تاكو چركه‌یا دوماهییا ده‌نگدانێ دێ وان وەلاتیان ڤه‌گوهێزێن سه‌ر سندوقێن ده‌نگدانێ.
عه‌دنان خویاژى كر:مه‌ باوه‌ره‌ دێ كارێن تا ئاسته‌كێ باش وێ رۆژى خزمه‌تا وەلاتیێن خۆ كه‌ین و ئه‌م منه‌تێ ل كه‌س ژى ناكه‌ین چونكه‌ ب ئه‌ركێ خۆ دزانین و هیڤیا مه‌ ئه‌وه‌ ئه‌م هه‌مى بكارین ب هه‌ڤرا خزمه‌ته‌كا باش بكه‌ین بۆ سه‌ركه‌فتنا پرسا ریفراندومێ بۆ سه‌ربخویا كوردستانێ.
به‌رپرسێ گروپێ پێشمه‌رگه‌ ئاشكراکر ژی:بۆ پتر سه‌ركه‌فتنا پرسا ریفراندۆمێ كو پرسه‌كا نه‌ته‌وى و نیشتیمانى و دیموكراسى یه‌ و ب ده‌ستڤه‌ ئینانا رێژه‌یه‌كا بلند یا ده‌نگان و هاریكاریكرنا وەلاتیان بۆ ڤه‌گوهاستنا وان بۆ سه‌ر سندوقێن ده‌نگدانێ گروپێ پێشمه‌رگه‌ یێ خوبه‌خش ل ئاكرێ 14 تیم به‌رهه‌ڤكرینه‌ كو وەلاتیێن نه‌خوش و كێم ئه‌ندام ڤه‌گوهێزینه‌ سه‌ر سندوقێن ده‌نگدانێ.

ئەڤرۆ نیۆز،زنار تۆڤی:

پەیڤدارێ فەرمی یێ هۆزێن عەرەبی ل پارێزگەها نەینەوا رادگەهینیت:کو نێزیکی 300 هزار عەرەبان دێ بەشداریێ د ریفراندۆما سەربەخۆیا کوردستانێ دا کەن.

موزاحم ئەلحوێت پەیڤدارێ فەرمی یێ هۆزێن عەرەبی ل پارێزگەها نەینەوا بۆ (شەرقولئەوسەت) گۆتیە:عەرەبێن دەشتا نەینەوا خۆ ب وەلاتیێن کوردستانێ دزانن ”پشتی رزگارکرنا دەڤەرێن وان ژ لایێ هێزێن پێشمەرگێ کوردستانێ ڤە،وان داخواز ژ مەسعود بارزانی سەرۆکێ هەرێما کوردستانێ و نەتەوێن ئێکگرتی کریە کو دەڤەرێن وان بێخنە سەر هەرێما کوردستانێ“.

هەروەسا موزاحم ئەلحوێت دیارکریە کو نێزیکی 250-300 هزار عەرەبێن دەڤەرێن کوردستانی ل وێ پارێزگەهێ دێ بەشداریێ د پرۆسا ریفراندۆمێ دا کەن و دێ داخوازا سەربەخۆیا کوردستانێ کەن.

بڕیارە سوبەهی دووشەمبێ 25/9/2017، پرۆسا ریفراندۆما سەربەخۆیا کوردستانێ ل هەرێما کوردستانێ و دەڤەرێن کوردستانی یێن دەرڤەی ئیدارا هەرێما کوردستانێ برێڤە بچن.

ل کۆمبوونا رۆژ چارشەمبی 4/6/2017 مەسعود بارزانی سەرۆکێ ھەرێما کوردستانێ ل گەل نوونەر و سەرکردێن حزب و لایەنێن سیاسی یێن کوردستانێ، بریار دا،کو ل رۆژ ٢٥ ئیلۆنێ 2017 ریفراندۆما سەربەخۆیا کوردستانێ ل ھەرێما کوردستانێ و کەرکووکێ و دەڤەرێن کوردستانی یێن دەرڤەی ئیدارا ھەرێما کوردستانێ بهێتە ئەنجامدان.

ئەڤرۆ نیۆز،زنار تۆڤی:

كوردستانیێن ده‌رڤەی وەلاتی ل‌ رۆژا شه‌مبیێ 23/ 9/ 2017 ده‌ست ب ‌ده‌نگدانێ بۆ ریفراندۆما سه‌ربه‌خۆیا كوردستانێ كریە،سه‌رپه‌رشتیارێن ڤێ پرۆسێ رادگەهینن،رێژا پشکداریا ئه‌لەكترۆنى،زۆر یا بلندە.

هندرین محه‌مه‌د سه‌رۆكێ كۆمسیۆنا بلند یا سه‌ربه‌خۆیا هه‌لبژاردن و راپرسیێ ل‌ كوردستانێ راگه‌هاندیە:ده‌نگده‌ران فشارەکا زۆر ئێخستیە‌ سه‌ر مالپه‌رێ مە یێ ئه‌لیكترۆنی،یێ کو تایبه‌ته‌ بۆ ده‌نگدانا كوردستانیێن ژ دەرڤە،ئه‌و ژی ب ئەگەرێ دروستبوونا گرفتا ئه‌لەكترۆنى.

ئاماژه‌ ب هندێ ژی دایە کو‌ چه‌ند سكالایه‌ك ژ لایێ ده‌نگده‌ران ڤە گەهشتینە کۆمسیۆنێ‌‌ ل دەمێ هه‌ولدان بۆ به‌شداریكرنێ دڤێ‌ پرۆسێ دا‌،کو تووشى گرفتا ئه‌لەكترۆنى هاتینە،ئەم ژی مژۆلی چاره‌سه‌ركرنا وان کێشاینە.

هەروەسا‌ ده‌نگدانا ئه‌لەكترۆنى بۆ كوردستانیێن ژ دەرڤە،دێ بۆ ماوێ سێ رۆژان كو‌ ژ رۆژا 23 هەتاکو 25 ئیلۆنێ ل ‌سه‌ر مالپه‌رێ ( www.e-voting.krd ) یا به‌رده‌وام بیت.