ئه‌ڤرۆ نیوز ، نه‌وزاد هلۆرى:
ئێڤاریا ئه‌ڤرۆ ل یاریگه‌ها سلێمانیێ ئێك ژ مه‌زنترین كه‌رنه‌ڤالێن جه‌ماوه‌رى ژ بوو پشته‌ڤانیا سه‌ربخوه‌ى یا كوردستانێ ب رێڤه‌چوو و تێدا پارێزگارێ سلێمانیێ گوتاره‌ك پێشكێشكر و دیاركر كو خه‌لكێ سلێمانیێ ب درێژاهیا دیرۆكێ ل گه‌ل سه‌ربخوه‌ى یا كوردستانێ بوویه‌.

عومەر قەڵادزەیی بناڤێ پارێزگه‌ها سلێمانیێ دیاركر كو خه‌لكێ پارێزگه‌ها سلێمانیێ هه‌رده‌م پێشه‌نگبوویه‌ بو داخوازیكرنا سه‌ربخوه‌ى یا كوردستانێ و گۆت: (ئه‌ڤه‌ ژ روژا سلێمانیێ هه‌یى هه‌تا نها خه‌لكێ وێ ل گه‌ل سه‌ربخوه‌یێ بوویه‌ و دڤێت هه‌ر سه‌ربخوه‌ بیت ، به‌لێ دوژمنان هه‌رده‌م رێگرى كریه‌ ، ئه‌م وه‌كو خه‌لكێ پارێزگه‌ها سلێمانیێ خوه‌ ژ هه‌ژى سه‌ربخوه‌ى یا كوردستانێ دبینین ، و ب خوونا شه‌هیدان دێ خه‌تیرا سه‌ربخوه‌یێ هه‌لكه‌ین)
زێده‌تر گۆت: ( ناهێلین چوو رێگرى به‌رامبه‌ر ئارمانجێن كوردستانێ هه‌بن ب تایبه‌تى ئارمانا ریفراندۆم بو سه‌ربخوه‌ى یا كوردستانێ)

ئه‌ڤرۆ نیوز ، نه‌وزاد هلۆرى:
ئێڤاریا ئه‌ڤرۆ ب پشكداریا سه‌رۆكێ هه‌رێما كوردستانێ كه‌رنه‌ڤالا سه‌ربخوه‌ى یا كوردستانێ ب به‌رهه‌ڤبوونا هژماره‌كا زور یا جه‌ماوه‌رێ سلێمانیێ ب رێڤه‌ چوو ، و تێدا بارزانى گوتاره‌ك پێشكێشكر و دیاركر كو ریفراندۆم بویه‌ ئه‌جیندایا جڤاكێ نیڤده‌وله‌تى كو ئه‌ڤ یه‌ك ژى به‌رهه‌مێ خوونا شه‌هیدایه‌ و ئێك رێزیا گه‌لێ كوردستانێ پاراست ژبه‌ركو ریفراندۆم بریارا گه‌لێ كوردستانێ بوویه‌.
مه‌سعود بارزانى سه‌رۆكێ هه‌رێما كوردستانێ د كه‌رنه‌ڤالا سه‌ربخوه‌ى یا كوردستانێ ل سلێمانیێ دیاركر كو بریارا ریفراندۆمێ بریارا گه‌لێ كوردستانێ و سه‌ركرداتیا سیاسیا كوردستانێ یه‌ و گۆت: ( باژێرێ سلێمانیێ هه‌رده‌م باژێرێ هه‌لمه‌ت و قورانیدانێ یه‌ و پایته‌ختێ ره‌وشه‌نبیریێ یه‌ ، دلخوشم و شانازیى دكه‌م كو ئه‌ڤرۆ ل سلیمانیى مه‌ ،خه‌لكێ سلێمانیێ چه‌وا به‌رى نها به‌رسینگێ دوژمنان گرت و پێشه‌نگ بوون ، و ئه‌ڤرۆ ژى سلێمانى دێ پێشه‌نگ بیت و پشتراستم دێ بێژیت به‌لێ بو سه‌ربخوه‌ى یا كوردستانێ)
زێده‌تر گۆت: (ریفراندۆم بویه‌ ئه‌جیندایا جڤاكێ نیڤده‌وله‌تى كو ئه‌ڤ یه‌ك ژى به‌رهه‌مێ خوونا شه‌هیدان و قوربانیدانا گه‌لێ كوردستانێ یه‌ ، و ئه‌ڤێ یه‌كێ ژى ئێكرێزیا گه‌لێ كوردستانێ پاراست و بویه‌ ئه‌گه‌ر كو په‌رله‌مان كارا بیت ، ریفراندۆم بریارا گه‌لێ كوردستانێ یه‌ و ئه‌ڤ بریاره‌ ژى د ده‌مه‌كێ دا هاتیه‌ كو به‌غدا شه‌راكه‌ت نه‌هێلا و ده‌ستوور پێیشیلكر و ته‌وافق نه‌هێلا ، و پێشتر ژى چه‌ندین جاران مه‌ گوتبویه‌ عیراقێ شه‌راكه‌ت نه‌مایه‌ و وه‌رن دا ببینه‌ دوو جیرانێن باش ، ل وى ده‌مى ئه‌و د نه‌رم بوون و وه‌كو كارته‌كا فشارێ دیت)
مه‌سعود بارزانى دیاركر ژى كو ئه‌و زور دلخوش بوو كو ئه‌ڤرۆ مام جه‌لال ل ڤێره‌ به‌رهه‌ڤبایه‌ و ئه‌وان هه‌ردووان پێكڤه‌ بارێ ریفراندۆمێ هه‌لگرتبایه‌ و دا ل وى ده‌مى ب ساناهى تر بیت و گۆت ژى: (ریفراندۆم ئامرازه‌كه‌ بو سه‌ربخوه‌ى یا كوردستانێ ، درۆستبوونا ده‌وله‌تا كوردستانێ ژى بوو هه‌مووانه‌ بێى جوداهیا ئاینى و نه‌ته‌وه‌یى ، و هه‌رده‌م بیروباوه‌رێن من یێن كوردینێ ب هێز بوویه‌ و خه‌لكێ سلێمانیێ ئه‌ڤرۆ بیروباوه‌ریێن من زێده‌تر كرن و كومبوونا هه‌وه‌ ژى په‌یامه‌كا ب هێز بوو نافخوه‌ و ده‌رڤه‌یه‌ كو سه‌ربخوه‌ى یا كوردستانێ دێ به‌هرا هه‌وه‌ بیت ، و ئه‌ز كومبوونا هه‌وه‌ ب ته‌مامكرنا ریفراندمێ دبینم و هه‌وه‌ ریفراندۆم كر)
ل بارا پاشئێخستنا ریفراندۆمێ ژى بارزانى گۆت: ( ئه‌گه‌ر به‌دیله‌كێ باشتر بگه‌یته‌ ده‌ست ئه‌نجومه‌نا بلند یا ریفراندۆمێ و گه‌لێ كوردستانێ قبول كر ل وى ده‌مى دێ هێته‌ پاشئێخستن ، به‌لێ هه‌تا نها چو به‌دیل نه‌هاتینه‌ دان )