ئه‌ڤرۆ نيۆز:
ئه‌ڤرۆ نيچيرڤان بارزانى سه‌رۆك وه‌زيرێن هه‌رێما كوردستانێ وشاندێ دگه‌لدا پشتى ب دووماهى هاتنا كۆمبوونا وان ل گه‌ل سه‌رۆكێ فره‌نسا، سه‌ره‌دانا كوسره‌ت ره‌سول جێگرێ ئێكێ يێ سكرتێرێ گشتيێ ئێكه‌تى نيشتمانى كوردستان ل به‌رلين پايته‌ختێ ئه‌لمانيا كر.
به‌رى چه‌ند هه‌فتيان، كوسره‌ت ره‌سول ژئه‌گه‌رێ تێكچوونا ساخله‌ميا وى وب مه‌ره‌ما چاره‌سه‌ريێ هاتيه هنارتن بۆ به‌رلين وهه‌تا نوكه يێ دبن چاڤدێريا نوشداران دا.
ئەڤرۆ نیۆز، مەحمود نهێلی
فرۆکێن لەشکەرێ تورکی ب دژواری چەندین گوندێن سەر ب قەزا ئامێدیێ ڤه توپبارانکرن، به‌لێ زیانێن وێ نەهاتینە زانین.
رەڤەند موسا ئاکنجیێ گوندێ گوهەرزێ بۆ ئەڤرۆ دیار کر، ل دەمژێر نەهێ ڤێ شەڤێ توپبارانا فرۆكێن توركى دەسپێکر و بۆ ده‌مێ نیڤ دەمژمێرێ يا بەردەوام بوو.
ره‌ڤه‌ندى گۆت ژى؛ گەلیێ گێزی و دەردورێن گوندێ رەزیکێ ب دژواری هاتنه توپبارانكرن.
هەروەسا ژێدەرەکی بۆ خوياكر هەر د ئەڤ شەڤەدا فرۆکێن تورکی چەندین گوندێن دەڤەرا رێکان ل پشتا چیایێ کورەژاری توپبارانكرينه ، به‌لێ تا نوکە زیانێن وێ نەهاتینە زانین.
ئه‌ڤرۆ نيۆز:
به‌رپرسه‌كێ سه‌نديكا نوشدارێن ددانان راگه‌هاند، ژئه‌گه‌رێ پێگيرى نه‌كرنێ ب قانوونێن سه‌نديكا نوشدارێن ددانان، دده‌مێ هه‌فتيه‌كێ دا، ب ده‌هان كلينيكێن ددانسازى ويێن نوشدارێن ددانان هاتنه داخستن.
شاخه‌وان قادر، نه‌قيبێ سه‌نديكا نوشدارێن ددانان/لقێ هه‌ولێر راگه‌هاند، ل هه‌فتيا بۆرى هه‌وه‌كا وچاڤدێريكرنا كلينيك وسه‌نته‌رێن ددانسازى مه ئه‌نجامدا، چونكى ژ چه‌ندين ژێده‌ران بۆ مه دهاته راگه‌هاندن كو كلينيكين نه‌قانوونى وبێ مۆله‌ت وبێ كوالێتى يێن هاتينه دامه‌زراندن.
شاخه‌وانى زێده‌تر بۆ دوارۆژ گۆت، ئه‌و هه‌وه بۆ پشكنين وچاڤدێريكرنا كلينيكێن نوشدارێن ددانان بوو دناڤ سه‌نته‌رێ باژێرێ هه‌ولێرێ دا وپۆليسێن باژێرڤانيێ ژى دگه‌ل مه‌دا بون.
ئاشكراكر ژى، بۆمه دياربوو كو ب ده‌هان كلينيكێن نه‌قانوونى يێن نوشدارێن ددانان يێن هه‌ين وژئه‌گه‌رێ نه‌پێگيرى كرنا وان ب مه‌رجان يان نه‌بوونا مۆله‌تێ وپاقژيێ وكوالێتيا كارى، هاتن داخستن.
رۆهنگر ژى، ئه‌و پێنگاڤه ب گۆره‌ى مادا (4) بوو ژ قانوونا سه‌نديكا نوشدارێن ددانان كو ل سالا 2004 ژلايێ په‌رله‌مانێ كوردستانێ هاتيه ده‌ركرن. كو ئه‌وێن سه‌رپێچيێ بكه‌ن دێ هێنه سزادان وكلينيكێن وان هێنه داخستن وهه‌كه بۆ جارا دويێ هه‌مان سه‌رپێچى دووباره كر، دێ سزا توندتر لێ هێت.
ئه‌ڤرۆ نیۆز ، نه‌وزاد هلۆرى:
ده‌مه‌كێ كێم به‌رى نها دو بیڤه‌له‌رزا باژێرێ قه‌لادزێ هه‌ژاند، به‌لێ چو زیان نه‌بوون.
كاروان نام، وه‌لاتیه‌كێ سه‌نته‌رێ قه‌زا قه‌لادزێ یا سه‌ر ب پارێزگه‌ها سلێمانیێ ڤه بۆ ئه‌ڤرۆ نیوز گۆت، ئه‌ڤ شه‌ڤه دو جاران بیڤه‌له‌رزێ سه‌نته‌رێ قه‌زا قه‌لادزێ و ده‌وروبه‌ران هه‌ژاند و بیڤه‌له‌رزا ئێكێ ل ده‌مژمێر 8:30 خوله‌ك بو، بیڤه‌له‌رزا دویێ ل ده‌مژمێر 9:00 بوو ، و خه‌لكه‌كێ زور هه‌ست ب هه‌ردو بیڤه‌له‌رزان كر و ژ مالێن خوه هاتنه‌ده‌رێ.
زێده‌تر گۆت، چو زیانێن گیانى و مادى نه‌بوون ، به‌لێ ترس ل ده‌ف خه‌لكى په‌یدابوویه .
دهێته زانین د ده‌ما چه‌ند رۆژێن بورى دا چه‌ندین جاران بیڤه‌له‌رزان سنوورێ پارێزگه‌ها سلێمانیێ هه‌ژاندیه و ب هێزترین بیڤه‌له‌رزێ ژى ل قه‌زا ده‌ربه‌ندیخان ل رۆژا 12/11/2017 دابوو ، كو ببوو ئه‌گه‌رێ گیان ژ ده‌ستدانا هه‌شت كه‌سان و برینداربوونا 200 كه‌سان.
ئەڤرۆنیۆز، سالار دۆسكی:
مولود مراد وەزیرێ ڤەگوهاستنێ ل حوكمەتا هەرێما كوردستانێ بۆ ئەڤرۆ نیۆز گۆت: پرۆژێ دروستكرنا فرۆكخانا دهۆك هێشتا زندی مایە و ئەڤە ژ بەر قەیرانا دارایی و ئابووری ل سەر حوكمەتا هەرێما كوردستانێ ئەڤ پرۆژێ گرنگ هاتیە راوستاندن، دئەڤا كاودانان دا هزر ل تەمامكرنا ڤی پرۆژەی نینە.
مەولودی ئەو ژی گۆت: پرۆژێ فرۆكخانا دهۆك ژ پرۆژێن زندی یە ل جەم حوكمەتا كوردستانێ و هەر دەما كاودانێن دارایی باشتر لێ هاتن ل كوردستانێ ب پشست راستی بێژم پرۆژێ فروكخانا دهۆك ژ پرۆژێن گرنگێن حوكمەتێ یە و دێ دەست ب ڤی پرۆژەی هێتەكرن.
ئه‌ڤرۆ نيۆز:
ئێڤاريا دره‌نگ يا ئه‌ڤرۆ شه‌مبيێ 2/12/2017 وه‌لاتيه‌كى ل هه‌ولێرێ برايێ خوه ب گۆله‌يان كوشت.
هوگر عه‌زيز په‌يڤدارێ پۆليسێن هه‌ولێرێ دداخۆيانيه‌كا رۆژنامه‌ڤانى دا بۆ ده‌زگه‌هێن راگه‌هاندنێ گۆت، ئه‌ڤرۆ ل ده‌مژمێر 6 ئێڤارى ل تاخێ كورانى جادا مه‌خموورێ دو برا ب شه‌ر چوون ئێك ژوان ب گوله‌يان يێ دى كوشت.
هوگرى دياركر ئه‌و كه‌سێ هاتيه كوشتن ل سه‌ر ده‌ستێ برايێ خوه ژيێ وى 35 سال بوون وئه‌وێ كوشتن ژى كرى خوه راده‌ستى پۆليسان كريه.
ئه‌ڤرۆ نيۆز:
دچارچۆڤێ گه‌را 14 يا خۆلا ئيسپانى يا ته‌پا پێى دا، ئه‌ڤرۆ يانا به‌رشه‌لونا ل سه‌ر ياريگه‌ها خوه وه‌كهه‌ڤ بوو ل گه‌ل يانا سلتا فيغو ب ئه‌نجامێ 2-2.
يانا سيلتا فيغو ل خۆله‌كا 20 ب گۆله‌كێ پێشكه‌فت ب رێيا ياريكه‌رێ خوه ياگۆ ئيسياس وهه‌ر زوو يانا به‌رشه‌لونا گۆلا وه‌كهه‌ڤڤيا ب رێيا ميسى پشتى دو خۆله‌كا تۆماكر وب گێمێ ئێكێ ب ئه‌نجامێ 1-1 ب دووماهى هات.
ل گێمێ دويێ ول خۆله‌كا 62 لويس سوارێز شيا گۆلا دويێ بۆ به‌رشه‌لونا تۆماربكه‌ت، به‌لێ ل خۆله‌كا 70 ياريكه‌رێ سيلتا فيغو ماكسيميليانۆ گومێز شيا گۆلا دويێ ووه‌كهه‌ڤيێ بۆ يانا خوه تۆمار بكه‌ت ويارى ب وه‌كهه‌ڤيێ ب ئه‌نجامێ 2-2 ب دووماهى هات.
ب ڤى ئه‌نجامى يانا به‌رشه‌لونا جهێ خوه ل رێزا ئێكێ د رێزبه‌ندا خۆلا ئيسپانى دا ب 36 خالان پاراست وسيلتا فيغو ژى خالا 18 ب ده‌ستڤه‌ئينا ول رێزا هه‌شتێ دهێت.
يانا به‌رشه‌لونا 14 يارى وه‌رزێ ئه‌ڤ ساله يا خۆلا ئيسپانى دا ئه‌نجامداينه، د 11 ياريان ب سه‌ركه‌فتيه ود سێ ياريان دا وه‌كهه‌ڤ بوويه ودچو ياريان دا نه‌هاتيه دوراندن.
هه‌ر ئه‌ڤرۆ د خۆلا ئيسپانى دا ئه‌تله‌تيكۆ مه‌دريد ل سه‌ر ياريگه‌ها خوه ب سه‌ركه‌فت ب ئه‌نجامێ 2-1 ل سه‌ر يانا ريال سوسيداد وخالێن خوه گه‌هاندنه 30 خالان ول رێزا سيێ دهێت پشتى به‌رشه‌لونا وڤالنسيا، هه‌ر ئه‌ڤرۆ دێ دو ياريێن دى ژ خۆلا ئيسپانى هێنه ئه‌نجامدان دناڤبه‌را سيڤيليا وديپورتيڤۆ لاكورونيا وريال مه‌دريد ژى دێ بيته مێهڤانا ئه‌تله‌تيك بيلباو.
ئه‌ڤرۆ نيۆز:
نڤيسه‌ره‌كێ كورد يێ خه‌لكێ دهۆكێ ناڤێ كوردستانێ دناڤ نه‌خشێ جيهانێ دا ل باژێره‌كى ل نه‌مسا دبينيت.
به‌ده‌ل ره‌ڤۆ بۆ ئه‌ڤرۆ نيۆز گۆت، ئه‌ڤرۆ شه‌مبيێ 2/12/2017 من قه‌ستا په‌رتۆكخانه‌كێ ل باژێرێ گراتس ل نه‌مسا كر ومن داخواز ژێ كر نووترين نه‌خشێ جيهانێ يێ هاتيه چاپكرن بده‌نه من.
به‌ده‌ل ره‌ڤۆى زێده‌تر گۆت، ده‌مێ من سه‌حكريه وى نه‌خشێ جيهانێ كو ناڤێ وه‌لاتان ب زمانێ ئه‌لمانى تێدا هاتبوو نڤيسين، من ديت ناڤێ كوردستانێ ژى يێ دنه‌خشه‌ى دا هه‌ى، كو ناڤێ كوردستان ب دروستى يێ ل جهێ هه‌ريما كوردستانێ ل سه‌ر نه‌خشه‌ى هاتيه نڤيسين.
گۆت ژى، ئه‌ڤه 26 ساله ئه‌ز يێ ل نه‌مسا دژيم، به‌لێ ئه‌ڤه جارا ئێكێ يه نه‌خشێ جيهانێ لێ دبينم كو ناڤێ كوردستان يێ تێدا هه‌ى، من ژى ژ كه‌يفان دا بۆ گه‌له‌ك براده‌ر وهه‌ڤالان وبۆ ئه‌ڤرۆنيۆز ژى ڤرێكر.
ئه‌ڤرۆ نيۆز:
حوكمه‌تا عيراقى به‌رسڤا سه‌رۆكێ فره‌نسى دده‌ت ل دۆر داخوازيا وى ب هه‌لوه‌شاندنا گرۆپێن حه‌شدا شه‌عبى وراگه‌هاند ئه‌ڤ پرسه يا گرێداى كاروبارێن ناڤخوه‌يه ل عيراقێ وپرسه‌كا تايبه‌ته ب عيراقێ ب خوه‌ڤه.
ئێمانوێل ماكرۆن سه‌رۆكێ فره‌نسا، ئه‌ڤرۆ شه‌مبيێ دچارچۆڤێ كۆنگره‌كێ رۆژنامه‌ڤانيدا ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ گۆت، پێدڤيه هه‌موو ميليشيا ل عيراقێ بهێنه هه‌لوه‌شاندن، ب حه‌شدا شه‌عبى ژى ڤه.
سه‌عه‌د حه‌ديسى په‌يڤدارێ نڤيسينگه‌ها راگه‌هاندنێ يا سه‌رۆك وه‌زيرێن عيراقێ دبه‌رسڤا ڤێ داخوازيا ماكرۆنى دا گۆت، ئه‌ڤه پرسه‌كا گريدايى كاروبارێن ناڤخوه‌يا عيراقێ يه وئه‌ڤ پرسه گرێداى عيراقێ ب تنێ يه وپێدڤيه وه‌لاتێن جيهانێ گرنگيا رێزگرتنا سه‌روه‌ريا عيراقێ تێبگه‌هن.
سه‌عه‌د حه‌ديسى زێده‌تر گۆت، كاروبارێن ناڤخوه‌يا عيراقێ گرێداى عيراقێ ب خوه‌يه وده‌زگه‌هێن دستوورى ئه‌وێن به‌رپرس ب كاروبارێن ناڤخوه‌يى ڤه.
په‌يڤدارێ نڤيسينگه‌ها راگه‌هاندنێ يا سه‌رۆك وه‌زيرێن عيراقێ دبه‌رسڤا سه‌رۆكێ فره‌نسى دا زێده‌تر بۆ ئاژانسا المعلومه گۆت، ده‌سته‌يا حه‌شدا شه‌عبى ژلايێ په‌رله‌مانێ عيراقێ ڤه يا هاتيه په‌سه‌ندكرن وپه‌رله‌مان نوونه‌رێ گه‌لێ عيراقێ يه وحه‌شدا شه‌عبى يا بوويه پشكه‌ك ژ سيسته‌مێ ئه‌منى ل عيراقێ. دياركر ژى، پێدڤيه رێز ل ده‌ستهه‌لاتێن سه‌روه‌رى ئه‌وێن ب حوكمه‌تا فيدرالى هاتينه دان بهێته گرتن د بابه‌تێن پرسێن تايبه‌ت ب عيراقێ وكاروبارێن ناڤخوه‌يى ڤه.
گۆت ژى، عيراق چاڤه‌رێ وێ چه‌ندێ يه كو وه‌لاتێن جيهانێ دگرنگيا رێزگرتنێ ل سه‌روه‌ريا عيراقێ وسه‌ربخوه‌يا بريارا عيراقێ بگه‌هن.
ئه‌ڤرۆنيۆز:
سه‌رۆك بارزانى ل گه‌ل مه‌كته‌ب وده‌سته وده‌زگه‌هێن ناڤه‌ندى يێن پارتى ديموكراتى كوردستان كۆمبوو وراگه‌هاند، ئه‌و ره‌وشا ب شيوه‌كێ نه‌قانوونى ونه‌ئاسايى دروست بووى، يا ده‌مكى يه ودێ ده‌رباز بيت، هه‌ڤده‌م گۆت، باشترين چاره بۆ ره‌وشا سياسى يا نوكه ئه‌نجامدانا هه‌لبژارتنايه.
ل دووڤ به‌ياننامه‌كێ، ئه‌ڤرۆ رۆژا شه‌مبى 2/12/2017 ل باژێرێ هه‌ولێرێ، سه‌رۆك مه‌سعود بارزانى ل گه‌ل ئه‌ندامێن مه‌كته‌ب وده‌سته وده‌زگه‌هێن ناڤه‌ندى يێن پارتى ديموكراتى كوردستان كۆمبوو وتێدا سه‌رۆك بارزانى گۆتاره‌ك پێشكێشى به‌رهه‌ڤبوويان كر ل دۆر دووماهى پێشهاتێن سياسى وقۆناغا پشتى ريفراندۆمێ وپرۆسا سياسى ل عيراقێ وكوردستانێ ودووپاتى ل سه‌ر وێ چه‌ندێ كر كو ده‌رگه‌هێ هه‌رێما كوردستانێ بۆ دانوستاندنێ ل گه‌ل عيراقێ يێ ڤه‌كريه وئه‌م دانوستاندنێ ب باشترين چاره‌سه‌ر دزانين، به‌لێ دهه‌مان ده‌مدا سه‌پاندنا ئه‌مرێ واقع ب رێيا نه‌چاريێ وچه‌كێ وخيانه‌تێ جهێ قه‌بولكرنێ نينه.
بارزانى راگه‌هاند ژى، بلا كه‌س شه‌رێ ئيرادێ ل گه‌ل خه‌لكێ كوردستانێ نه‌كه‌ت، ئيرادا گه‌لێ كوردستانێ ناشكێت وئالايێ سپى بۆ زۆرداريێ وسته‌مێ وخيانه‌تێ راناكه‌ت وخوه ب ده‌ستڤه ناده‌ت.
سه‌رۆك بارزانى ته‌ئكيد ل وێ چه‌ندێ كر كو ئه‌و ره‌وشا ب شێوه‌كێ نه‌قانوونى ونه‌ئاسايى دروست بووى، يا ده‌مكى يه ودێ ده‌رباز بيت.
ل دۆر پرۆسا سياسى ل هه‌رێما كوردستانێ، گۆت، باشترين چاره‌سه‌رى بۆ ره‌وشا سياسى يا نوكه ئه‌نجامدانا هه‌لبژارتنايه.
نيشاندان