ئه‌ڤرۆنيۆز:
رێڤه‌به‌ريا گشتى يا گه‌شناسيێ وبيڤه‌له‌رزان راگه‌هاند، ئه‌ڤرۆ 28/11/2017 بيڤه‌له‌رزه‌ك ل پارێزگه‌ها هه‌له‌بجه دا وچو زيان ل دووڤ خوه نه‌هێلان.
رێڤه‌به‌ريا ناڤبرى به‌لاڤكر كو ئه‌ڤرۆ ل ده‌مژمێر 4:22 ئێڤارى ب دووريا 17 كيلۆمه‌تران ژ پارێزگه‌ها هه‌له‌بجه وب كووراتيا 10 كيلۆمه‌تران، بيڤه‌له‌رزه‌ك روودا ووه‌لاتيان هه‌ست پێ كر.
رۆهنكر ژى، هێزا بيڤه‌له‌رزێ 4 پله بوو ل دووڤ بيڤه‌ره‌ێ ريخته‌ر يێ جيهانى، دياركر ژى كو چو زيان ژئه‌نجامێ وێ بيڤه‌له‌رزێ نه‌بوون.
ئه‌ڤرۆ نیۆز، زنار تۆڤى، ناجی به‌ده‌ل:
كوردستان ئه‌حمه‌د خودانا چه‌ندین مریشكێن خومالی بۆ ئه‌ڤرۆ نیۆز دیاركر ئه‌ڤه ماوێ پترى 15 سالانه مریشكان بخودان دكه‌م،به‌رى نوكه من نێزیكى 70 مریشك هه‌بوون و رۆژانه دو تا سێ ته‌به‌قێن هێكا دفروتن،لێ هه‌ر سال د ناڤبه‌را هه‌یڤا ده‌ه هه‌تاكو هه‌یڤا یازده ئێك دهێته مریشكان و پرانیا مریشكێن مه دمرن و ژه‌بر ئێشا مریشكان ئه‌ڤه چه‌ندین ساله مریشكێن مه زێده نابن و پتر 50 مریشك مرینه و هه‌روه‌سا ژبه‌ر ئێشێ گۆشتێ وان مریشكان ژى ناخوین و زێده‌تر گوت: ئه‌ڤ ئێشه ژبه‌ر گۆهۆرینێن سه‌قاى و گیا شینكى په‌یدا نابن، هه‌روه‌سا به‌رى چه‌نده‌كێ چه‌ندین مریشكێن مه مربوون و نۆشداره‌كێ ڤێتێرنه‌رى ئینا پێش مریشكان و زكێ مریشكه‌كێ شه‌قكر و وى گوت زه‌ركێ ئه‌ڤ مریشكه كوشتینه،هه‌روه‌سا پێى و سه‌ر و چاڤێن مریشكان ژى زه‌ر دبن و ل دووڤ دا دمرن،له‌ورا هه‌كه دڤان سالان دا مریشكێن مه ئێش نه‌هاتبایێ و نه‌مربان نوكه پترى 1000 مریشكان مه هه‌بان،هه‌ر چه‌نده ئه‌ڤ چه‌ندین ساله ئه‌ز زارۆیێن خوه ب داهاتێ وان مریشكان بخودان دكه‌م،هه‌روه‌سا ئه‌ڤ ساله ل چه‌ندین جهان مریشكێن خه‌لكێ مرینه.
ناڤهاتیێ زێده‌تر دیاركر:ئه‌و كه‌سێن مریشكان وان ڤه‌ده‌ر و مریشكێن خه‌لكێ نه‌چنه دناڤ مریشكێن وان دا،زوو ب زوو ئێش مریشكێن وان ناگرن و مریشكێن وان نامرن،چونكى ئه‌و مریشكێن خوه نا به‌رده‌ن و هه‌ر یێن دناڤا كولى دا،هه‌روه‌سا ئه‌م گه‌له‌ك جاران مریشكێن كارگه‌هێ دكه‌ینه دناڤا مریشكێن خوه یێن كوردى دا دبیت ئه‌ڤ ئێشه ژ وان بهێت و مریشكێن مه دمرن،دیسا هنده‌ك مریشكێن ژبه‌ر ڤێ ئێشێ دین دبن و هنده‌كان ژى چاڤێن وان كوره دبن،گه‌له‌ك سالان ژ ترسا ئێشا مریشكان مه هه‌موو مریشكێن خوه سه‌ر ژێ كرینه و مه گوتیه هه‌كه هه‌ر ئێش دێ هێتێ دێ سه‌ر ژێ كه‌ین و مه ئه‌ڤ چه‌نده ژ نه‌چارى كریه،لێ ئه‌م نه‌شێین چیچه‌لۆكان سه‌ر ژێ كه‌ین و ئه‌و هه‌موو ب ڤێ ئێشێ دمرن،هه‌روه‌سا هه‌ر ده‌مێ ئێش هاته مریشكان زوو پێ دمرن و خوه ل به‌ر ئێشێ ناگرن.
كوردستانێ دیاركر ژى:ئه‌م دخوازین حوكمه‌ت هاریكاریا مه بكه‌ت و ده‌رمان و پێدڤیێن تایبه‌ت ب ئێشا مریشكان ڤه بده‌ته مه،ژ پێخه‌مه‌ت ئه‌م ب شێین ب دروستى مریشكێن خوه بخودان بكه‌ین و ژ ئێشێن كوژه‌ك ب پارێزین،هه‌ر چه‌نده ئه‌م كولكێن وان ژى د گوهۆرین هه‌ر چو مفا تێ نینه و ئێش دگریت و دمرن.
مسته‌فا ئه‌حمه‌د خودان پرۆژه‌كێ بچووك یێ بخودانكرنا مریشكانه دبێژیت:ئه‌ڤه ماوێ چه‌ندین سالانه مریشكا بخودان دكه‌م و ئه‌ڤ ساله به‌رهه‌مێ مریشكێن مه هه‌موو مرینه و پتریا وان مامرك و چیچه‌لۆك مرینه و مریشكێن مه‌زن وه‌كى وان نه مرینه و ئه‌ڤ چه‌نده ڤه‌دگه‌ریت بۆ هه‌بوونا گه‌رمه‌كا زۆر د ئه‌ڤ ساله‌دا هه‌ر چه‌نده ئه‌ز هه‌ر سێ هه‌یڤان جاره‌كێ ده‌رمانێ كوتاندنێ یێ ل دژى ئێشێن مریشكان دده‌مه مریشكێن خوه،لێ هه‌ر دمرن و ئێشا ژ هه‌موویان دژوارتر بۆ مریشكان پلپلك دكه‌ڤنه مریشكان و خوینا وان هه‌موویێ دمێژیت و ژ گیانى خلاس دكه‌ت،هه‌روه‌سا ئه‌ڤه چه‌ندین ساله مریشكان بخودان دكه‌م،هندى پار و ئه‌ڤ ساله مریشكێن مه نه مرینه و گوت ژى:هه‌تاكو نوكه چو نۆشدارێن ڤێتێرنه‌رى یێن تایبه‌تمه‌ند مه نه‌ئیناینه كو ب دروستى ئێشا ڤان مریشكان دیار بكه‌ن، لێ هه‌كه هه‌ر سال مریشكێن مه نه‌مرن، ئه‌م دێ شێین خوه پێ خودان كه‌ین و دێ داهاته‌كێ باش بۆ مه ژێ هێت،چونكى خه‌لكێ مه حه‌زه‌كا زۆر ل سه‌ر هێكێن كوردى و دیكلێن كوردى بۆ خوارنێ یا هه‌ى،لێ ئه‌ڤ ئێشه دناڤ مریشكێن بیلادى دا په‌یدا دبیت و ب رێیا وان دهێته مریشكێن مه یێن كوردى و هه‌تاكو نوكه چو چاره ژى بۆ ڤێ ئێشێ نه‌هاتینه دیتن،لێ ژ نوكه وێڤه مه بریاردایه كو ئه‌م ئێدى مریشكێن بیلادى بخودان نه‌كه‌ین و وان مریشكان ناكه‌ینه دناڤا مریشكێن خوه یێن كوردى دا بۆ خودانكرنێ،چونكى وان مریشكان زیان گه‌هاندیه مریشكێن مه،هه‌روه‌شا مریشكا كوردى خوارنا وێ كێمتره و په‌ر خوه ل به‌ر ئێش و نه‌خۆشیان دگریت،دیسا هه‌كه مرۆڤ عه‌له‌فى و گه‌نمى نه‌ده‌ته مریشكێن بیلادى هێكان ژى ناكه‌ن.
چرا عیماده‌دین مسته‌فا بسپورێ ڤێتێرنه‌ری بۆ ئه‌ڤرۆ نیۆز دیاركر ده‌مێ گۆهارتنا وه‌رزێن سالێ ئه‌گه‌ره‌كێ هه‌رێ بهێزه بۆ سه‌رهلدانا نه‌خوشیێن بالندان و ل گه‌ل جورێن خوارنا بالندا كو گه‌رماتی و سه‌رماتیا وێ خوارنێ ئه‌گه‌رن بۆ نه‌خوشیان دڤی وه‌رزێ سالێ و نه‌خوشیێن ڤه‌گر ژی ب ئه‌گه‌رێ هه‌ر و بای هاتنا ڤایرۆسێ نه‌خوشی و ڤه‌گۆهاستنا وان و داكه‌تنا په‌لێن گه‌رماتیێ كو مریشكان پێدڤی ب پله‌یێن گه‌رماتیێ یه ل ده‌مێ هاتنا سه‌رمایێ بو قه‌ره‌بوكرنا وێ دبیته ئه‌گه‌رێن توشبوویێن زێده‌تر بڤان نه‌خوشیان.
ده‌ربارێ نه‌خوشیان چه‌وانیا پاراستن و دورخستنا وان ژ نه‌خوشیان بسپورێ ڤێتێرنه‌ری گۆت: دووڤچوونا ئه‌گه‌رێ نه‌خووشیا مریشكێن خومالی یێن كوردی وه‌ك رێژه و ژمارێن راست و دروست ل به‌رده‌ست نین و به‌ربه‌لاڤن ل هه‌موو ده‌ڤه‌رێن كوردستانێ و دشیان دا نینه بهێته زانین چه‌ندن و كۆنترۆلكرنا هه‌ر نه‌خوشیه‌كا وان بهێته كرن كو ئه‌و مریشكێن كوردی دبێژنێ، ل ده‌مێ مرن و نه‌خوشبوونا وان خودانێن وان دووڤ ناگه‌رن بزانن ئه‌گه‌ر چ نه و بوچ دمرن له‌ورا دووباره بوونا نه‌خوشیان ل ئه‌ڤی ده‌مێ دا هه‌ر سال سه‌رهلدده‌ت, ل وه‌رزێ زڤستانێ و هاتنا سه‌رمایێ نه‌خوشی په‌یدا و زۆر دبن ب ئه‌گه‌رێ لاوازیا گیانێ بالنده‌ی و كارتێكرن لێ دكه‌ت و رووب روویی نه‌خوشیێ و توش دبیتێ.
ئه‌ڤرۆنيۆز:
ئه‌ڤرۆ سيشه‌مبى 28/11/2017، سه‌رۆك مه‌سعود بارزانى پێشوازى ل سه‌رۆك وسكرتێر ونوونه‌رين پارتێن مه‌سيحى يێن كوردستانێ كر.
دديداره‌كێ دا، ره‌وشا سياسى يا هه‌رێما كوردستانێ وعيراقێ هاته به‌حسكرن، سه‌رۆك بارزانى سوپاسيا هه‌لويستێ نيشتمانى يێن پارتێن مه‌سيحى يێن هه‌رێما كوردستانێ كر دپشته‌ڤانيكرنا پرۆسا ريفراندۆمێ وبه‌حسێ وان ئه‌گه‌ران كر كو گه‌لێ كوردستانێ هانداى بريارا ئه‌نجامدانا ريفراندۆمێ بده‌ن وروودانێن پشتى ريفراندۆمێ ژى سه‌لماند كو بريارا گه‌لێ كوردستانێ چه‌ند يا دروست وره‌وا بوو.
د وێ كۆمبوونێ دا، به‌حس ل پرۆسا سياسى ل كوردستانێ هاته كرن ودووپاتى ل سه‌ر ئه‌نجامدانا هه‌لبژارتنێن هه‌رێما كوردستانێ به‌رى هه‌لبژارتنێن عيراقێ هاته كرن وه‌كو چاره‌سه‌ريه‌كا گونجاى بۆ پرۆسا سياسى يا هه‌رێما كوردستانێ.
د پشكه‌كا دى يا كۆمبوونێ دا، دووپاتى ل سه‌ر ماف وپشكداريا هه‌موو پێكهاتێن ئايينى ونه‌ته‌وى يێن كوردستانێ دپرۆسا سياسى دا وگره‌نتيا مافێن وان ددستوورێ پاشه‌رۆژێ يێ هه‌رێما كوردستانێ دا هاته كرن، كو به‌رى ئه‌نجامدانا ريفراندۆمێ دبه‌لگه‌نامه‌كێ دا يا په‌سه‌ندكرى بوو.
هه‌ر دهه‌مان كۆمبوونێ دا، دانوستاندن ل ره‌وشا ده‌ڤه‌رێن ده‌شتا نه‌ينه‌وا وگه‌فێن ل به‌رده‌م پێكڤه‌ژيانێ وپاشه‌رۆژا وان ده‌ڤه‌ران هاته كرن.
ئه‌ڤرۆ نیۆز،زنار تۆڤى:
خانما سترانبێژ مهاباد ئیبراهیم د دیداره‌كێدا بۆ ئه‌ڤرۆ نیۆز دیاركر:وێ ل سالا 1981 ده‌ست ب كارێ سترانگوتنێ كریه و دڤى ماوى دا ئه‌و شیایه خزمه‌ته‌كا مه‌زن پێشكێشى هونه‌رێ كوردى بكه‌ت و هندى ئه‌و د ژیانێ دا مابیت ژى ئه‌و دێ هه‌ر خزمه‌تا ڤى هونه‌رێ ره‌سه‌ن كه‌ت و نوكه ژى كار ل سه‌ر چه‌ندین به‌رهه‌مان دكه‌ت.
هەروەسا گوت ژى:بۆ ماوێ 40 سالان من ژیانا خوه ل ده‌رڤه‌ى وه‌لاتى بوراندیه و ئه‌ز ل وه‌لاتێ ئه‌مریكا ژیایمه،لێ پشتى ڤه‌قه‌تیانه‌كا درێژ ژ كوردستانێ جاره‌كادى ئه‌ز زڤریمه ڤه و ئه‌ڤه نێزیكى سێ سالایه ئه‌ز ل كوردستانێ مه و نوكه ژى ئه‌ز ل باژێرێ ل دهۆكێ دژیم،هه‌روه‌سا هه‌تاكو نوكه من 8 كلیپ چێكرینه و دیسا من 6 ئه‌لبۆم ژى تۆماركرینه،هه‌روه‌سا من پشكدارى د سێ درامایێن كۆمێَدى ژى دا كریه و نوكه ژى ئه‌ز یا كار د درامایه‌كا نوو دا دكه‌م،له‌ورا هه‌رده‌م عه‌شقا من وه‌لاتێ من بوویه.
مهابادێ ئەو ژی دیاركر:نوكه ئه‌و كار ل سه‌ر كلیپكرنا سێ سترانان دكه‌ت كو سترانه‌ك ژ وان ب ناڤێ”دونیا ده‌ورانه” كو ژ په‌یڤێن هه‌لبه‌ستڤان خه‌له‌ف زێبارینه و ژ ئاوازێن وێ ب خوه‌نه و فه‌یسه‌ل عیسا ئه‌رتۆشى ب كارێ وێنه‌گرتن و ده‌رهێنا ڤێ كلیپێ رابوویه،دیسا كلیپا دویێ ب ناڤێ” بۆم مشه‌خت و ده‌ربه‌ده‌ر” كو ژ په‌یڤێن هه‌لبه‌ستڤان شه‌عبان هه‌دێنه‌یى و ئاوازا هونه‌رمه‌ند یوسف ره‌مه‌زان یه،كو هه‌لبه‌ستڤان شه‌عبان هه‌دێنه‌یى ل سه‌ر كیستێ خوه ئه‌ڤ سترانا وێ تۆماركریه و دێ بۆ كلیپ ژى كه‌ت و دیاركر ژى:كلیپا وێ یا سییێ ب ناڤێ”ده‌مێ هژیان و بارۆڤان” كو ژ په‌یڤێن هه‌لبه‌ستڤان ئه‌دیب چه‌لكى یه و ئاوازا ڤێ سترانێ یا مهابادێ ب خوه‌یه و كو كه‌نالێ كوردستان 24 كلیپكرنا ڤێ سترانێ ب ستوویێ خوه‌ڤه گرتیه و ل ڤان نێزیكان دێ ڤێ سترانێ بۆ كلیپ كه‌ت.
ناڤهاتیێ گوت ژى:بۆ سالا نوو من به‌رهه‌ڤى بۆ چه‌ندین كارێن دى یێن هونه‌رى كرینه و هه‌رده‌م من ڤیایه ب رێیا ده‌نگ و هونه‌رێ خوه خزمه‌تا ستران و په‌یڤا كوردى بكه‌م.
ئه‌ڤرۆنيۆز:
زه‌لامه‌كى ل باژێرێ ساتنا ل ويلايه‌تا ماديا براديش ل هندستانێ، پشتى هه‌ست ب ژه‌هراويێ دكه‌ت بله‌ز دچيته نه‌خوه‌شخانێ، به‌لێ ده‌مێ نوشداران پشكنين بۆ ئه‌نجامداين، دبينن 100 بزمار و263 پارێن ئاسنى وهنده‌ك گويزانێن ريهتراشينێ وچه‌ند پارچه شووشه‌ك يێن داعويراين.
رۆژناما (سه‌ن) يا بريتانى به‌لاڤكر كو ئه‌و زه‌لامه يێ ب ناڤێ (مه‌كسود خان) ژيێ وى 35 سالن، پشتى پشكنين بۆ هاتيه كرن وئه‌و تشت هه‌موو دزكێ وى دا هاتينه ديتن، نوشداران ئێكسه‌ر بريار دا نه‌شته‌رگه‌ريێ بۆ بكه‌ن بۆ ده‌رخستنا وان تشتان كو سه‌نگێ وان دگه‌هشته 7كيلۆيان وشيان ژمرنێ رزگار بكه‌ن.
نوشدار (بريانكا شارما) كو سه‌رپه‌رشتيا نه‌شته‌رگه‌ريێ كرى، راگه‌هاند، مه باوه‌رى يا هه‌ى كو مه‌كسودى گرفته‌كا ده‌روونى يا هه‌ى وبزمار وئه‌و هه‌موو تشتێن كانزايى داعويرابوون وئه‌ڤ كرياره ژهه‌ڤال وخێزانا خوه ڤه‌شارتبوو.
ئەڤرۆ، محەمەد عەلی:
دیدارەکێ دا ستێرا تەپاپێ یا پارێزگەھێ و یانا دھۆک نێچیرڤان شوکری بۆ رۆژناما ئەڤرۆ دیارکر کو دێ شانازیێ پێ بەت دەمێ کاروانێ خوە یێ تەپاپێ ل یانا دایک ب دووماھی تینی و سۆزدا ھندی شیان ھەبن بەردەوامیێ دگەل دھۆکێ بدەتە یاریێ.
زێدەتر ناڤھاتی دیارکر کو گەلەک وێ ھزرێ دکەن ئاستێ نێچیرڤانی نەمایە و شیان نینن بەردەوامیێ بدەتە یاریا، بەرسڤا وی دناڤ یاریگەھێ دا دیار دبیت و شیایە ھەتا نوکە ببیتە جھێ رازیبوونا ھەر راھێنەرەکی چو دگەل پیرس، زێرەڤانی و زاخۆ و ھەتا نوکە ژی دگەل یانا دھۆکێ و گۆت: ئەگەر من ئاست و شیان نە بان دو یانێن بەغدا و یانا زاخۆ بەری دەستپێکرنا خولا عیراقێ بزاڤ نە دکرن کو یاریێ بۆ وان بکەم و ب ھەڤبەستەکا سێجارکی یا نوکە ئەز وەردگرم، لێ چونکو ئەڤە خەونا منە ب شانازیڤە ئەز دگەل یانا باژێرێ خوەبم و بەردەوامیێ بدەمە کاروانێ خوە یێ تەپاپێ و دووماھیا وەرزشا من ل یانا دایک بیت و دیسا ھەبوونا کاپتن بژاری د یانێ دا ئەگەرەکێ دی یە.
ژلایەکێ دووڤە نێچیرڤانی دیارکر کو ئەو رۆژانە راھێنانێن بزەحمەت دکەت کو کێم یاریزانێن لاوان بشێن ئەنجامبدەن بۆ وێ چەندێ ئەو ئاست و لەش سڤکیا خوە پارێزیت و ھەردەمێ بزانیت شیان نینن دێ دەست ژ تەپاپێ بەردەت و گۆت: ھەرچەندە ژیێ من یێ مەزن کارتێکر ل سەر لەش سڤکیا من ھەبوویە سەرەرایی گوھۆرینا جھێ من دناڤ یاریگەھێ د، لێ ئەز ھەست ب ھێزێ و شیانێ دکەم.
ل دووماھیێ نێچیرڤان شوکری گۆت: ھەردەمێ من یاری ب دووماھی ئینا ئەز بەرھەڤم ئەگەر یانێ داخازی ژ من کر بشێوەکێ دی خزمەتا تیمێ بکەم، چونکو شانازیە بۆ من ئەز ناڤێ خوە د دیرۆکا یانێ دا بنڤێسم.
ئه‌ڤرۆنيۆز:
دادگه‌هه‌كا عيراقى فه‌رمانا ده‌سته‌سه‌ركرنا ريڤه‌به‌رێ پۆليسێن قه‌زا وناحيێن كه‌ركووكێ و12 ئه‌فسه‌رێن دى يێن پارێزگه‌ها كه‌ركووكێ ده‌ركر.
دادگه‌ها ڤه‌كۆلينێن ده‌ڤه‌را ره‌سافه ل به‌غدا ب نڤيسارا هژمار (21115) ل رۆژا 19/11/2017 فه‌رمانا ده‌سته‌سه‌ركرنا عه‌ميد سه‌رحه‌د قادر ريڤه‌به‌رێ پۆليسێن قه‌زا وناحيێن كه‌ركووكێ و12 ئه‌فسه‌رين دى يێن پله بلند يێن پۆليسێن كه‌ركووكێ ده‌ركر كوئه‌و نڤيساره ئاراسته‌ى رێڤه‌به‌ريا پۆليسێن پارێزگه‌ها كه‌ركووكێ كريه ب مه‌ره‌ما ده‌سته‌سه‌ركرنا وان.
ئەڤرۆ نیۆز،زنار تۆڤی:
بیڤەلەرز ب لەرزینا ژ نیشکەکێڤه یا دەریایی، بن زەڤیێ یان سەر زەڤیێ دهێتە گوتن،کو ل چینا دناڤ زەڤیێ دا روو ددەت.
رێنمایێن خۆپاراستنێ ژ بیڤەلەرزێ ئەڤەنە:
دەمێ تۆ هەست ب روودانا بیڤەلەرزێ دکەی،باشترە دوور بکەڤی ژ دۆلابێ و کتێبخانێ یان هەر کەلوپەلەکێ مەزن،چونکی د دەمێ بیڤەلەرزێدا ئەو ئەگەر هەیە کو کەلوپەلێن گران ب سەر تەدا بکەڤن و ساخلەمیا تە بکەڤیتە د مەترسیێ دا،هەروەسا دەست نیشانکرنا گونجایترین جه بۆ خۆپاراستنێ،ئەوە هەکە تۆ د مال دابی،باشترە ب لەز بچیە ژ دەرڤە،یان ژی هەکە تە دەلیڤا هندێ نەبیت بچیە ژ دەرڤە،ل ژێر مێزەکێ روونەخار یان ژی دناڤبەرا چارچۆڤەکێ دەرگەهێ ژوورەکێدا راوەستە.
دیسا ل دووڤ زانیاریان لێنانگەه ئێکە ژ مەترسیدارترین جهان،کو پێدڤیە د دەمێ بیڤەلەرزێدا ژێ دوور بکەڤی،یان ژی هەکە تۆ ژ دەرڤەبی؛خۆ دوور بکە ژ ستوونێن کارەبا سەر جادێ و ئاڤاهیان،هەروەسا ژ کێبلێن کارەبێ،خۆ ژ داروباری ژی دوور بکە،دیسا هەکە تۆ دناڤا ترۆمبێلێ دا بی و تە هەست ب بیڤەلەرزێ کر،ل جهێ خۆ راوەستە و بمینە دناڤا ترۆمبێلێ دا،هەروەسا هەکە تۆ ل فەرمانگەهێ بی یان ژی ل قوتابخانێ بی،ل دەمێ روودانا بیڤەلەرزێ باشترە بچیە ژێر مێزێ یان ژی بچیە د ژوورڤە و دوور بکەڤی ژ شووشەی و پەنجەرا و گلۆپان،یان ژی هەول بدە کو ب کەرەستەکێ قاییم سەرێ خۆ بپارێزی.
دەمێ بیڤەلەرز ب دوماهی هات،دڤێت ئامادەبی بۆ روودانا بیڤەلەرزەکا دیتر،چونکی هەمی گاڤا چەند دەمژمێران پشتی بیڤەلەرزا سەرەکی دێ بیڤەلەرزەکا دیتر روو دەت،ل حالەتێ هوسا دا ب هیچ شێوەیەکێ گلۆپێ یان ئامیرەکێ کارەبایی هەلنەکەن و باشترە روو بکەنە جهێن ڤەکری،هەروەسا ئەو کەسێن ب سەختی زیان گەهشتیێ نەجۆلینن،هەتاکو تیمێن هەوارهاتنێ ل تانا وان دهێن،دیسا ب هیچ شێوەیەکێ خۆ نێزیکی وان جهێن رووخیای نەکەن،یان ژی هەکە هەوە هەست ب بێهنا غازێ کر،ب هیچ شێوەیەکێ ماکینا ئاگری و جگارێ هەلنەکەن.
ئه‌ڤرۆنيۆز:
ژێده‌رێن راگه‌هاندنا ئيرانى به‌لاڤكر كو قاسم سلێمانى فه‌رماندێ له‌شكرێ قودس يێ ئيرانى، دشه‌رٍه‌كى دا ل سووريێ برينداربوويه.
په‌يامنێرێ كه‌نالێ (العالم) يێ ئيرانى ل باژێرێ ئه‌لبوكه‌مال يێ سوورى گۆت، سلێمانى پشكدارى دشه‌رِێ ئه‌لبوكه‌مال ب تنێ دا نه‌كريه، به‌لكو گه‌له‌ك جاران ل به‌ره‌يێن شه‌رِى ل سووريێ يێ به‌رهه‌ڤ بوو تايبه‌تى ل شه‌رِێ ئه‌لبوكه‌مال وجاره‌كێ برينداربوو.
دياركر ژى، قاسم سلێمانى سه‌رپه‌رشتيا شه‌رِێ ڤێ دووماهيێ يێ ئه‌لبوكه‌مال دكر، ژبه‌ركو شه‌رِه‌كێ گه‌له‌ك گرنگ بوو ومانا وى بۆ ده‌مه‌كێ درێژ ل ئه‌لبوكه‌مال وسه‌رپه‌رشتيكرنا شه‌رِى ل وێرێ وه‌كو ته‌حه‌ديه‌كێ بوو بۆ ئه‌مريكا كو به‌رى هێزێن سوريا ديموكراتى كو ئه‌مريكا پشته‌ڤانيا وان دكه‌ت، بگه‌هيته وى باژێرى كو له‌شكرێ سوورى وهه‌ڤپه‌يمانێن وى شيان وێ ئارمانجێ بده‌ستڤه‌بينن.
ئه‌ڤرۆنيۆز:
شيره‌تكارێ ئابووريێ سه‌رۆك وه‌زيرێن عيراقێ هژمارا مووچه‌خۆرێن عيراقێ ژ فه‌رمانبه‌ر وخانه‌نشينان ومفادارێن تۆرا پاراستنا جڤاكى وگۆژمێ هه‌يڤانه يێ بۆ دهێته مه‌زاختن ژلايێ حوكمه‌تا عيراقێ ڤه ئاشكراكرن.
د. موزهر محه‌مه‌د سالح شيره‌كارێ ئابووريێ سه‌رۆك وه‌زيرێن عيراقێ بۆ ده‌زگه‌هێن راگه‌هاندنێ يێن عيراقى دياركر كو ل عيراقێ هه‌شت مليۆن كه‌س مووچه‌ى وه‌ردگرن كو دبنه ئێك ل سه‌ر سێ ژ ئاكنجيێن عيراقێ، ئه‌وژى چار مليۆن فه‌رمانبه‌ر وچار مليۆن و300 هزار خانه‌نشين ودو مليۆن مفادارێن تۆرا پاراستنا جڤاكى يێن هه‌ين وبۆ وێ هژمارا مووچه‌خۆران ژى حوكمه‌تێ هه‌يڤانه پێدڤى ب 42 مليار ديناران يا هه‌ى.
شيره‌تكارێ ئابووريێ سه‌رۆك وه‌زيران عيراقێ دياركر، مه به‌رنامه وپلان يێن هه‌ين كو تاكو چه‌ند سالين دى، كه‌رتێ تايبه‌ت پێشبێخين ودلنيايێ تێدا بده‌ين كو ژيانا وان كه‌سێن ل كه‌رتێ تايبه‌ت كاربكه‌ن دێ يا گره‌نتى بيت تاكو خه‌لك به‌ر ب كه‌رتێ تايبه‌ت ڤه بچن نه‌كو كه‌رتێ حكومى.
نيشاندان