ئەڤرۆ نیۆز،زنار تۆڤی:
ژنەکا ئەمریکی خەلکا ویلایەتا تێکساسە و ناسناڤێ خودانا درێژترین نینۆک ب دەستڤەئینا د جیهانێدا.
ناڤێ وێ ئایانا ویلیامز و ئەڤە ماوێ 23 سالانە نینۆکێن خۆ درێژ دکەت و ڤێ چەندێ وەکریە کو بچیتە ناڤ کتێبا گینس.
ئایانا دبێژیت وێ دڤێت یا بەردەوامبیت ل سەر درێژکرنا نینۆکێن خۆ.
هەروەسا ب درێژاهیا ئەڤی ماوەی ئایانایێ ب سابوونا دژی بەکتریایێ و ب فرچێ ددانا رۆژانە نینۆکێن خۆ پاڤژ دکەت.
ئه‌ڤرۆ نیوز، هه‌رهین محه‌مه‌د:
سترانبێژ سه‌میر سه‌دیق بۆ ئه‌ڤرۆ نیۆز دیاركر كو نوكه ئه‌و مژولى كلیپه‌كێ یه ب ناڤێ (ریفراندوم) كو ژ په‌یڤ و ئاوازێن هه‌لبه‌ست ڤان شه‌مزین خه‌لیل و هاتیه توماركرن ل ستودیویا ده‌نگ و ره‌نگ و ل سه‌نته‌رێ ره‌وشه‌نبرى و جڤاكى ل زانكویا دهۆك هاتیه وێنه‌كرو ل ژڤانه ل ده‌مه‌كێ نێزیك بهێته به‌لاڤكرن.
سه‌میرى گۆتژى: ناڤه‌رۆكا ڤێ سترانێ ل سه‌ر كوردێن ده‌وله‌ت خاز ده‌وله‌تێ ئاڤا دكه‌ن
ئه‌ڤرۆ نیۆز،ره‌مه‌زان هه‌رنى:
سترانبێژا روژئاڤایێ کوردستانێ بهار حه‌سكو كو خه‌لكا قامشلویه دیاردکەت:کو ژبه‌ر ڤیانا وێ بۆ كوردستانێ نها كار ل سه‌ر پروژه‌یەكێ سترانگۆتنێ دكه‌ت کو ل قوناغێن دوماهیێ دایه و ل ده‌مه‌ك نێزیك دێ پێشكێشى كوردستانێ كەت.
بهار حه‌سكو بۆ ئه‌ڤرۆ نیۆز دیارکر:پرانیا سترانێن من هه‌تا نوكه توماركرین ب كرمانجى بووینه بتنێ سترانه‌ك ل سه‌ر كوردستانێ من ب بیست و پێنچ زمانا به‌رهه‌ڤكریه و ل ده‌مه‌ك نێزیك دێ به‌لاڤ كه‌م كو ب زمانێن (هندى ،یونانى ،فره‌نسى ،ئینگلیزى ، عبرى ،یابانى ،چینی ، سومالى،رووسى ،ئیتالى ،ئه‌لمانى، مه‌كدونى ، ئیسپانى ،ئەندنوسى ،سویدى ،عه‌ره‌بى.
هەروەسا پتریا سترانا من توماركرین ل سه‌ر كوردستانێ بووینه،ژبه‌ركو مه خه‌ون ب ده‌وله‌تبوونێ ڤه دیتیە و نها بتنێ چه‌ند پێنگاڤه‌ك مانه ئه‌م خه‌ونا خوه بكه‌ین راست.
هه‌روه‌سا گۆت ژی:من گه‌له‌ك ڤیایه سترانه‌كا دوقولى دروست بكه‌م ئه‌ز ب كوردى بێژم و هونه‌رمه‌نده‌ك بیانى هه‌بیت ب زمانێ خوه بێژیت.
ئه‌ڤرۆ نیوز ، هلورى:
ئه‌ڤرۆ د رێورسمه‌كێ دا شوره‌شا ئیلونێ ل قه‌زا زاخو هاته ساخكرن وه‌كو پشته‌ڤانیه‌ك بو ریفراندۆما سه‌ربخوه‌ى یا كوردستانێ.
دڤى واریدا “كوڤان حسێن ” ئێك ژ رێكخه‌رێن رێورسمێن ساخكرنا شوره‌شا ئیلونێ بۆ ئه‌ڤرۆ نیوز گۆت: ( ب هه‌لكه‌فتا ده‌ربازبوونا 56 سالان لسه‌ر شوره‌شا ئیلونێ و وه‌كو پشته‌ڤانیه‌ك بو پروسه‌یا ریفراندۆما سه‌ربخوه‌ى یا كوردستانێ ئه‌ڤرۆ ژلایێ لقێ هه‌شتێ پارتى و ده‌زگه‌هێ ئیلونێ بیره‌وه‌ریا شوره‌شا ئیلونێ ساخكر)
زێده‌تر گۆت: ( د بیرئانینا شوره‌شا ئیلونێ دا كومه‌كا گوتار و چالاكیان هاتنه ئه‌نجامدان و چه‌ندین درۆشم ژى هاتنه بلندكرن وه‌ك رێزگرتن بو خه‌باتا پێشمه‌رگێن شوره‌شا ئیلونێ و ریفراندۆما سه‌ربخوه‌ى یا كوردستانێ)
ئه‌ڤرۆ نیوز ، نه‌وزاد هلۆرى:
ئێڤاره دره‌نگى یا ئه‌ڤرۆ لسه‌ر رێیا گشتى دناڤبه‌را ناحیا كه‌له‌ك و قه‌زا به‌رده‌ره‌ش د روودانه‌كا هاتن و چونێ چوار كه‌سان گیانێ خوه ژ ده‌ست دا.
دڤى واریدا ئازاد ته‌ها به‌رپرسێ راگه‌هاندنا رێڤه‌به‌ریا گشتى یا هاتن و چونا دهۆكێ بۆ ئه‌ڤرۆ نیوز گۆت: ( ئێڤاریا ئه‌ڤرۆ روودانه‌كا هاتن و چونێ دناڤبه‌را دوو ترومبێلێن تایبه‌ت و دوو ترومبێلێن بارهه‌لگر لسه‌ر رێیا گشتى دناڤبه‌را قه‌زا به‌رده‌ره‌ش و ناحیا كه‌له‌ك درۆست بوو و د ئه‌نجام دا چوار كه‌سان گیانێ خوه ژ ده‌ست دا)
زێده‌تر گۆت: ( تیمێن مه گه‌هشتینه جهێ روودانێ و ڤه‌كولینێ لسه‌ر روودانێ دكه‌ن كا ژ ئه‌گه‌را چ دروست بوویه)
فوتو و زانیارى ، نه‌وزاد هلۆرى:
ئێڤاریا ئه‌ڤرۆ ل نیڤا بازارێ شێلادزێ و لسه‌ر جاددا گشتى په‌رده له‌سه‌ر مونومێنتا شه‌هید كازم حسێن بێزه‌لى هاته راكرن ، كو برایێ دوو شه‌هید و پێنج پێشمه‌رگه‌یانه.
دڤى واریدا بێوار بێزه‌لى كه‌س و كارێ شه‌هیدێ ناڤبرى بو ئه‌ڤرۆ نیوز گۆت: ( ئێڤاریا ئه‌ڤرۆ ب به‌رهه‌ڤبوونا هژماره‌كا به‌رپرس و دام و ده‌زگه‌هێن حكومى و حزبى و پێشمه‌رگه و كه‌س و كارێن شه‌هیدى ، په‌رده له‌سه‌ر مونومێنتا شه‌هید كازم حسێن بێزه‌لى ل شێلادزێ هاته لادان كو ژلایێ هنده‌ك خێرخوازان هاتبویه چێكرن)
زێده‌تر گۆت: ( ئه‌م وه‌كو كه‌س و كارێن شه‌هیدى دخوازن كو لایه‌نێن شوله‌ژێ كار بكه‌ن بو ڤه‌گه‌راندنا ته‌رمێ شه‌هیدى كو ژلایێ داعش ڤه ل موسل هاتیه شه‌هیدكرن ، و هه‌موو لایه‌نێن سیاسى و گه‌لێ كوردستانێ پێكڤه پشكداریێ د ریفراندوما سه‌ربخوه‌ى یا كوردستانێ بكه‌ن و ب به‌لێ ده‌نگ بو سه‌ربخوه‌ىێ بده‌ن)
دهێته زانین كو شه‌هید كازم برایێ هه‌ردوو شه‌هید هابى بێزه‌لى و وه‌لید بێزه‌لى یه كو دشه‌رێ داعشێ دا شه‌هید بوینه و پێنج برایێن دن ژى هه‌نه كو ئه‌و ژى ل سه‌نگه‌ران به‌ره‌ڤانیێ ل كوردستانێ دكه‌ن و شه‌هید كازم ل موسل ژلایێ داعش ڤه ب ره‌نگه‌ك درندان هاتبویه سه‌رژێكرن.
ئه‌ڤرۆ نيوز، نيوار محه‌مه‌د سه‌ليم:
ب گۆره‌ى رێنمايێن كارى يێن گۆمركا خابۆر يا توركى هاتنوچوونا ترۆمبێلان هاتينه بۆ رێڤينگان هاته سنورداركرن و ئه‌ڤ سنورداركرنه دێ بۆ ماوه‌كێ نه‌ديار بيت.
ب گۆره‌ى راگه‌هاندنه‌كا گۆمركا ناڤبرى كو دانه‌ك ب ده‌ست ئه‌ڤرۆ نيوز كه‌فتيه ترومبێلێن جورێ ترافیك (قرانجی) ێن توركی دێ ژده‌مژمێر (8:00) سپێدێ هه‌تا (8:00) شه‌ڤێ رێ بۆ هێته دان بۆ هاتنوچوونێ و ڤه‌گوهاستنا رێڤینگان د ناڤبه‌را هه‌رێما كوردستانێ و توركیا دا.
هه‌ر د وێ راگه‌هاندنێ دا ئاماژه ب وێ چه‌ندێ ژى كريه كو ترومبێلێن عيراقی (قرانجی) ئه‌وێن رۆژانه هاتنوچوونێ دكه‌ن وه‌كو ترۆمبێلێن د ل سه‌رى دياركرى دێ ژ ده‌مژمێر (8:00) سپێدێ هه‌تا (8:00) شه‌ڤێ رێ بۆ هێته دان بۆ هاتنوچوونێ و ڤه‌گوهاستنا رێڤینگا د ناڤبه‌را هه‌رێما كوردستانێ و توركیا دا.
د لايه‌كێ دى يێ ڤێ راگه‌هاندنێ دا به‌حس ل ترۆمبێلێن تايبه‌ت كريه كو چ يێن توركى و عيراقى بن يان ژى يێن بيانى، ده‌هێ هاتنوچوونا وان دێ 24 ده‌مژمێران يێ ڤه‌كرى بيت، “ترۆمبێلێن پاس ژى يێن تايبه‌ت ب گه‌شيتاران دێ 24 ده‌مژمێران هاتنوچوونێ كه‌ن”.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌رێ گشتيێ ئۆفيسا دهۆك يا كۆمسيۆنا سه‌ربه‌خۆيا راپرسى و هه‌لبژارتنان ل هه‌رێما كوردستان راگه‌هاند كو ب هه‌بوونا ئێك ژ چار به‌لگه‌نامێن فه‌رمى يێن عيراقێ وه‌لاتى دشێن پشكداريێ د راپرسيێ دا بكه‌ن.
عه‌لى به‌ندى، رێڤه‌به‌رێ گشتيێ ئۆفيسا دهۆك يا كۆمسيۆنا سه‌ربه‌خۆيا راپرسى و هه‌لبژارتنان ل هه‌رێما كوردستان، بۆ ئه‌ڤرۆ نيوز گۆت: “ژ بوو پشكداريكرن د راپرسيا دێ ل 25ى ئيلۆنێ هێته ئه‌نجام دان وه‌لاتى دشێن ب ئێك ژ چار به‌لگه‌نامێن فه‌رمى (ناسناما بارێ كه‌ساتى، ناسناما عيراقى، پاسپۆرت يان ژى ده‌ستووريا هاژۆتنێ) ل گه‌ل خوه ببه‌ت”.
زێده‌تر گۆت: “پلێتا ئاهێن خوارنێ ب تنێ بۆ پشتراستبوونێ يه ل سه‌ر ناڤان و ب چو ره‌نگه‌كى پێدڤى ب كارتا بايومه‌ترى ناكه‌ت”.
ل دۆر ده‌مێ راگه‌هاندنا ناڤێن كارمه‌ندان بۆ سه‌ر سندوقان ژى خۆيا كر كو نوكه يێ كار ل سه‌ر دكه‌ن و بڕياره د ڤێ حه‌فتيێ دا ئه‌و ناڤ بهێنه راگه‌هاندن و پاشان ژى پشكدارى خوله‌كا تايبه‌ت بن بۆ چاوانيا ب رێڤه‌چوونا پرۆسا راپرسيێ.
ل پارێزگه‌ها دهۆكێ 697 هزار كه‌سان مافێ پشكداريێ دا راپرسيێ دا هه‌يه و ل سه‌ر 256 بنگه‌هـ و هزار و 667 ويستگه‌هان هاتينه به‌لاڤكرن.
عه‌لى به‌ندى ئاماژه ب وێ چه‌ندێ ژى كر كو به‌رهه‌ڤيێن خوه كرينه و ده‌رباره‌ى ناڤان ژى گۆت: “بۆ ناڤان پشت به‌ستن ل سه‌ر پلێتێن ئاهێن خوارنێ و كۆمسيۆنا بلندا سه‌ربه‌خۆيا هه‌لبژارتنان ل عيراقێ هاتيه كرن و هه‌تا نوكه نێزيكى 50 هزار كه‌سان ته‌ماشه‌ى ناڤێن خوه كريه”.
نيشاندان