ئەڤرۆ نيوز:
وەزارەتێن خواندنا بلند و ڤەکۆلینێن زانستی و پەروەردێ یێن حوکمەتا ھەرێما کوردستانێ بھێنڤەدانا سەرێ سالا زایینی راگەھاند.
وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ ب ھەلکەفتا سالا نوو یا زایینی بھێنڤەدانا سەرێ سالێ راگەھاند کو ژ رۆژا 21/12/2017ێ دەست پێ دکەت ھەتا رۆژا 2/1/2018ێ، ئانکو 11 رۆژ دێ بنە بھێنڤەدانا فەرمی.
ھەروەسا وەزارەتا پەروەردا حوکمەتا ھەرێما کوردستانێ ژی بھێنڤەدانا سەرێ سالێ راگەھاند کو ژ رۆژا 31/12/2017ێ دەستپێدکەت ھەتا رۆژا 2/1/2017ێ.
ھەژی گۆتنێ یە کو ل دووڤ خشتێ بھێنڤەدانێن حوکمەتا ھەرێما کوردستانێ کو پەرلەمانێ کوردستانێ پەسەندکریە ھەموو سالان ب ھەلکەفتا سەرێ سالا نوو رۆژا ئێکێ یا وێ سالێ بۆ ھەموو فەرمانبەرێن ھەرێما کوردستانێ دبیتە بھێنڤەدانا فەرمی.

ئەڤرۆ نيوز:
نوونەرا کوردێن ئێزدی ل پەرلەمانێ عیراقێ دیار کر کو ھژمارەکا زۆر یا زارۆیێن ئێزدی یێن د ناڤ داعش دا، ھەتا نوکە چارەنڤیسێ وان یێ دیار نینە و دبێژیت: بەغدا ل ھەمبەر کەیسا وان زارۆیێن ئێزدی یا خەمسارە.

ڤیان دەخیل، پەرلەمانتارا کورد و نوونەرا کوردێن ئێزدی ل پەرلەمانێ عیراقێ دیار کر کو ل دووڤ پێزانینێن وان ھزار و 60 زارۆیێن ئێزدی د دەستێن داعشێ دا مابوون، دیسا پتریا وان زارۆیان داعش ل سەربازگەھێن خوە مەشق و راھێنان پێ کرینە و بۆ مالپەرێ فەرمیێ پارتی دیموکراتی کوردستان گۆت: “ھژمارەکا وان زارۆیان خوە پەقاندیە، ھژمارەک رەڤینە بۆ دەولەتێن دیتر، ھژمارەک ژی ل سووریانە، دیسا ھندەک ژ وان زارۆیان ھاتینە دەستەسەرکرن و ل نک حوکمەتا عیراقێ نە کو نێزیکی ھزار و 10 زارۆکانە ل گەل چەند چەکدارێن داعش، ئەم پێشبینی دکەین ئەو زارۆیە ئێزدی بن، لەو ئەم گەلەک بزاڤان دکەین ببینین و پشکنینێن ھوور بۆ بھێنە کرن”.

ڤیان خانێ خویا ژی کر، بزاڤ دھێنە کرن بۆ ئینانا وان زارۆیان و ھەموو ژی کوڕن، دیار نینە کچ چ لێ ھاتینە و گۆت: “ھژمارەکا زارۆیان ژی ل نک خێزانێن مووسل و تەلەعفەر ماینە و ھەتا نوکە رادەست نەکرینە و ناڤ و ئاینێ وان ژی یێ گوھۆڕی”.

گۆتژی: “ئەز پێشبینی دکەم پتریا وان زارۆیێن ئێزدی ل مووسل و تەلەعفەر و رەققە بن”.

ڤیان دەخیلێ خویا ژی کر، پشکەکا زارۆیێن ئێزدی ل تورکیا ھاتینە فرۆتن و ھندەک ژ وان ل پارێزگەھا حەلەبا سووری نە و گۆت: “مخابن ھەتا نوکە بەغدا د ڤی واری دا یا خەمسارە”.

ئەڤرۆ نيوز:
ئەندامەکا لژنا پەروەردێ و خواندنا بلند ل پەرلەمانێ کوردستانێ راگەھاند، ل دەستپێکا ڤێ حەفتیێ پشکا دویێ یا ناڤێن قوتابیێن ھاتینە وەرگرتن ل دەواما ئێڤاری یا زانکۆ و پەیمانگەھێن حکومی و پارالێل دێ ھێنە بەلاڤکرن و دبێژیت: ئەو قوتابی ژی دێ ھێنە وەرگرتن یێن نزمترین نمرە ھەین.
شوکریە ئیسماعیل، ئەنداما لژنا پەروەردە و خواندنا بلند ل پەرلەمانێ کوردستانێ ئاماژە ب وێ چەندێ ژی کر کو ل دەستپێکا ڤێ حەفتیێ، ناڤێن قوتابیێن وەرگرتی یێن پشکا دویێ ل دەوما ئێڤاری ل زانکۆ و پەیمانگەھێن حکومی و پارالێل دێ دەرکەڤن.

شوکریا خانێ بۆ دوارۆژ گۆتژی: “ل دووڤ بڕیارا وەزارەتا خواندنا بلند، دێ دەمەکێ زێدەتر ب زانکۆ و پەیمانگەھێن ئەھلی ھێتە دان بۆ وەرگرتنا وان قوتابیێن دخوازن ل زانکۆ و پەیمانگەھێن ئەھلی بخوینن”.

ل دۆر پێشکێشکرنا داخوازیێن قوتابیان وێ ئەنداما لژنا پەروەردە و خواندنا بلند ل پەرلەمانێ کوردستانێ گۆت: “ئەو قوتابیێن ل زانکۆیێن ئەھلی ب تێکرایێ 55% کو ل چو زانکۆ و پەیمانگەھێن حکومی نەھاتینە وەرگرتن، دێ ھێنە وەرگرتن، دیسا ئەو قوتابیێن تێکرایێ وان 50% ژی دشێن پێشکێشی ھندەک پەیمانگەھێن ئەھلی بکەن و دێ ھێنە وەرگرتن”.

سەبارەت وەرگرتنا وان قوتابیێن کو تێکرایێ وان ل سەر 95% دایە دبێژیت: وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ سۆز یا دای ل وان جھان بھێنە وەرگرتن کو وان حەزا خواندنێ لێ ھەی.

وێ ئەنداما لژنا پەروەردێ و خواندنا بلند ئاماژە ب وێ چەندێ ژی کر، ئەڤ سالە ھژمارەکا مەزن یا قوتابیان یێن بووینە قوربانیێن سیستەمێ پارالێل، چونکی رێژا 25% ژ قوتابیان ب وی سیستەمی یێن ھاتینە وەرگرتن، ڤێ چەندێ ژی وەکریە کو مافێ قوتابیێن دی ب سۆژیت.

ئەڤرۆ نيوز:
جێگرا فراکسیۆنا پارتی ل پەرلەمانێ کوردستانێ ئامینا زکری بۆ روژناما ئەڤرۆ گۆت: دروستکرنا حوکمەتەکا دی دەم یێ گونجای نینە،چونکی مە تنێ ھەشت ھەیڤێن ھەین کو ڤی دەمیدا دڤێت حوکمەت پلان و بەرنامێ خوە ھەبیت و بکەڤیتە کاری،حکومەتەکا نوی یان یا حکومەتەکا دەمکی ھەتا دھێتەسەر سیستەمێ رێڤەبرنێ دێ دەمەکێ زور چیت.

ھێشتا گۆت کو ژ ئالیێ ئابوری ڤە ھەرێم یا گەھشتی یە کوپیتکێ ئەگەر سەرڤێ چەندێ حوکمەتەکێ پێک بینین ئەڤە دێ گڤاشتنەکا دیا ئابوری دروست کەت،ئەڤ حوکمەتا نوکە ژی ھەی ھەریا دەمکی یە بۆ ماوەکێ دەست نیشانکری دێ کارێ خوە کەتن،لەوما حوکمەتا رزگاریا نیشتیمانی پێک ئینانا وێ ل گور بارودوخ و دەمی دمینیت،چونکی پێک ئینانا وێ یا جیاوازە واتە پێک ئینانا وێ یا گونجای نینە بۆ ھەرێمێ،و ھەمی ئالیێن سیاسی نوکە بەشدارن ژ ڤێ حکومەتێ،لەوما دێ ھەمان شێوە بیت چو گورانکاری نابن دڤێ حوکمەتێ دا،لێ مومکینە گوھۆڕین دھندەک وەزارەتاندا بھێتەکرن و پلانەکا باشتر ل دیڤ بارودوخی بھێتەدانان،ئەڤە دێ یا ب ساناھی بیت،ژبەر ھندێ دروست بوونا حوکمەتا رزگاریا نیشتیمانی چارەسەری نینە بۆ ڤی دەمی.

ئاماژە دا وێ چەندێ ژی کو ل جھێ ئەم ب دروشما کاربکەین باشترە ھەمی ئالیێن سیاسی بەرپرساتیا مێژویا ڤێ قوناغێ ب ستویێ خوڤە ھەلبگرن،پێدڤیە ھەمی لایەنێن سیاسی پێکڤە پشتەڤانیا ڤێ حوکمەتێ بکەن بۆ ئەو پروژێ ھاتیەدانان و ب پلانا چاکسازیێ ڤی پروژەی سەربێخن وێ بەرسیارەتیێ ب ھەلگرن و مللەتی ژ ڤێ قوناغێ رزگاربکەن قەیرانێ چارە بکەن،چونکی ب دروشما قەیران ناھێتە چارەکرن.

ئەڤ پەرلەمانتارە خویادکەت ژی کو خۆ ئەگەر حوکمەتەکا نیشتیمانی ژی پێک بھێت نەشێن بارودوخێ ئەڤرویێ ھەرێما کوردستانێ بگوھرن،چونکی ئەڤرۆ قەوارێ سیاسیێ ھەرێمێ یێ دمەترسیێ دا دڤێت ئەم قەوارێ خوە و مافێن خوە یێن دەستوری بپارێزین و ھەرێمێ بەرەف قوناغەکا باشتر ببیەن ل چارچوڤێ دیالوگێ دا.

زێدەتر ژی دبێژیت کو ئەڤە بتنێ پروژێ گورانێ یە،ئەڤە ژی تنێ دەم بوراندن و دەرباس بوونا ڤێ قوناغێ یە، و ئەڤە خوە ڤەدزینە دڤی کاودانی دا کو د ھەرێمێ دا ھەی، کو تنێ موزایدکا سیاسی یە،و نابیت چ لایەنێن سیاسی خوە ژ ڤێ حوکمەتێ ڤەدەرببینن،چونکی ھەمی لایەن پشکدارن دڤێ حوکمەتێ دا،ئایا ما لایەنەک ھەیە کو پشکدار نەبیت د ڤێ حکومەتێ دا ھەتا پێدڤی حوکمەتەکا نوی بین.

ل دور وێ چەندێ ب دیتنا تە پێشبینی دھێتەکرن کو لایەنێن سیاسی ل سەر پێشنیازا گوڕانێ رازی بن ناڤبری گۆت نەخێر ھیچ مبررکێ مەنتقی نینە کو نە پارتی و نەچ لایەنێن دیێن سیاسی گەل ھندێ بن حوکمەتەکا رزگاریا نیشتمانی بھێتە پێک ئینان.