ئەڤرۆ نیۆز،زنار تۆڤی:
شڤێدی پێله‌كا سه‌رمایێ ده‌ڤه‌را بەرواری بالا یا سەر ب قەزا ئامێدیێ ڤه گرت و د ئه‌نجامدا رێژه‌یه‌كا باش یا بەفرێ ل ڤێ ده‌ڤه‌رێ باریه و د هه‌مان دەمدا سەقایێ ڤێ دڤەرێ گەلەک ساربوویە و پلێن گەرمێ بەرەف نزمبوونێ ڤه چووینە.
هەروەسا ئەڤ سالە ئێكه‌م جاره به‌فر ل گوندێن ڤێ دەڤەرێ دباریت و ڤێ چه‌ندێ دلخۆشیه‌ك بۆ خه‌لكێ ڤێ ده‌ڤه‌رێ په‌یداكریه،دیسا نوکە ژی بەردەوام بەفر یا دباریت.
ئەڤرۆ نیۆز،زنار تۆڤی:
زارا پاشا مهۆیان ئه‌و خانما سترانبێژا كورده کو ل باژێرێ سانت پیتەرس بێرگ یێ رووسیا مەزن بوویە و هەر ژ زارۆکاتیا خوە حەز ل سەر سترانگوتنێ هەبوویه.
هەروەسا د چه‌ندین پێشبرگێن سترانگوتنێ دا خه‌لاتێن مەزن ده‌ستڤە ئیناینه،هه‌روەسا د وان كۆنسێرت و ئاهەنگێن ئەو پشکداریێ تێدا دکەت،ب هزاران كه‌س سه‌مایێ ل گه‌ل ستران و لاوکێن كوردی دا دكه‌ن، بەلێ بۆ هندێ گو كێبركێ ل گه‌ل سترانبێژێن جیهانیدا بكەت، دبێژیت هه‌ولدایە،کو ب شێوەکێ ئه‌كادیمی سترانا بێژیت،هەروەسا ژبەر شیانێن وێ یێن مەزن بۆ پێشخستنا هونەرێ رووسی و کوردی،ژلایێ ڤلادیمێر پۆتینێ سەرۆکێ رووسیاڤە هاتە خەلاتکرن.
ئەڤرۆ نیۆز،زنار تۆڤی:
موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:کو شڤێدی 23.11.2017 ژ ئەگەرێ روودانەکا ترافیكێ ل سه‌ر جادا جەمبۆری دو کەس بووینە قوربانی..
ناڤهاتی گوت ژی:ل دەمژمێر 7 شەڤا بوری دا روودانەکا هاتنوچوونێ دناڤبەرا دو ترومبێلادا روودایە ل سەر جادەیا جەمبۆری و د ئەنجامدا دو کەس بوونە قوربانی ڤێ روودانێ،کوشوفێرەکێ ژ وان گیانێ خۆ ژ دەستدایە و کەسەکێ دی ژی برینداربوویە و هاتیە رەوانەکرن بۆ نەخوشخانا تەنگاڤیا و نوکە ل ژێر چاڤدێریا چر دایە.
ئه‌ڤرۆنيۆز:
سكرتێرێ رۆژنامه‌ڤانى يێ جێگرێ سه‌رۆك وه‌زيرێن هه‌رێما كوردستانێ راگه‌هاند، ئه‌و ده‌نگوباسێن به‌حس ل سه‌ره‌دانا شانده‌كێ حوكمه‌تا هه‌ريما كوردستانێ بۆ به‌غدا ل هه‌فتيا داهاتى دكه‌ن، چو راستى بۆ نينه.
سه‌مير هه‌ورامى سكرتێرێ رۆژنامه‌ڤانيێ قوباد تاله‌بانى جێگرێ سه‌رۆك وه‌زيرێن هه‌رێما كوردستانێ بۆ( پى يو كه‌ى ميديا) ئاشكراكر كو هه‌تا نوكه حوكمه‌تا عيراقێ چو ژڤان ديار نه‌كرينه كو شاندێ حوكمه‌تا هه‌رێما كوردستانێ سه‌ره‌دانا به‌غدا بكه‌ت بۆ چاره‌سه‌كرنا كێشێن دناڤبه‌را هه‌ردولادا.
دياركر ژى، هه‌ر پێنگاڤه‌كا دڤى بوارى دا ژى ژلايێ حوكمه‌تا عيراقێ هاتبيته هاڤێتن تنێ (ئاخڤتن) بوويه ونه‌چوويه دبوارێ بجهئينانێ دا.
بپێشتر، جاسم به‌ياتى ئه‌ندامێ جڤاتا نوونه‌رين عيراقێ ژفراكسيۆنا ده‌وله‌تا قانوونێ، كو يێ نێزيكه ژ حه‌يده‌ر عه‌بادى، بۆ ده‌زگه‌هێن راگه‌هاندنێ گۆتبوو كو هه‌فتيا داهاتى يا هاتيه دياركرن كو شاندێ هه‌رێما كوردستانێ سه‌ره‌دانا به‌غدا بكه‌ت و ل گه‌ل شاندێ حوكمه‌تا عيراقى كۆمبببيت.
ئه‌ڤرۆ نیۆز، زنار تۆڤى:
سترانبێژێ باكۆرێ كوردستانێ شرین وه‌لات كو خه‌لكێ باژێرێ وانێ یه و نوكه ژى ل هه‌مان باژێر دژیت و د هه‌ڤپه‌یڤینه‌كێ دا بۆ ئه‌ڤرۆ نیۆز دیاركر:ل سالا 1994 من ده‌ست ب كارێ سترانگوتنێ كریه و ژبه‌ر حه‌زا من بۆ هونه‌ر و سترانا كوردى ئه‌ز بوویمه سترانبێژ و من ب خوه پشته‌ڤانى ل خوه كریه و هه‌روه‌سا باندۆرا هونه‌رمه‌ندێ كورد كازۆى ل سه‌ر من هه‌بوویه كو ئه‌ز سترانا بێژم و دیسا من ل گه‌ل هونه‌رمه‌ندێن كورد وه‌كى براده‌رى و ئارمانجى و حه‌سه‌ن شه‌ریفى و دیار دێرسمى و خه‌یر و عه‌باسى و حه‌كیم سه‌فكانى سترانگوتینه،دیسا ل سالا 1999 من ئێكه‌م ئه‌لبۆما خوه به‌لاڤكریه و دیسا من چه‌ندین كلیپ ژى چێكرینه و ئه‌ز نوكه كار ل سه‌ر چێكرنا ئه‌لبۆما خوه یا نوو دكه‌م و دێ ل سالا 2018 به‌لاڤ كه‌م.
ناڤهاتى گوت ژى:نوكه ره‌وشا سترانا كوردى ل هه‌ر چار پارچێن كوردستانێ وه‌كى ئێكه،هه‌روه‌سا هه‌رده‌م ئه‌م وه‌ك سترانبێژێن كورد شیاینه ئێش و ئازارێن كوردان بینینه سه‌ر زمان،ئه‌م شیاینه په‌یاما كوردستانیان بگه‌هینینه جیهانێ،لێ مخابن نوكه سترانبێژێن كورد ل باكۆر نه‌شێن ب دروستى په‌یاما خوه بگه‌هینن،ژبه‌ركو نه‌شێن سترانێن نه‌ته‌وه‌یى وه‌لاتپارێزى بێژن،چونكى سانسۆره‌كا مه‌زن ژلایێ ده‌وله‌تا توركیا ل سه‌ر هونه‌ر و سترانا كوردى هه‌یه.
شرین وه‌لات زێده‌تر دبێژیت:ئه‌و سترانبێژێن گه‌نج یێن نوو هاتینه دناڤا مه‌یدانا هونه‌رى دا سترانا كوردى خرابكریه،چونكى ئه‌و ب تنێ گرنگیێ ب سترانا ئه‌ڤینیێ دده‌ن و هه‌روه‌سا مه‌ه‌رما وان ئه‌وه كو كلیپه‌كێ ل گه‌ل كچه‌كێ چێكه‌ن،هه‌روه‌سا گه‌نجێن نوكه گرنگیێ ب سترانا نه‌ته‌وه‌یى ناده‌ن،له‌ورا ئه‌و ژ سترانا ره‌سه‌نا كوردى دووركه‌فتینه،چونكى هونه‌رێ كوردى ب تنێ سترانا ئه‌ڤینى نینه،هێشتا دیاركر:هه‌بوونا مۆزیك و سترانا پۆپ و راپ د ناڤا هونه‌رێ كوردى دا زه‌نگینیه‌كه بۆ سترانا كوردى،ئه‌ز حه‌ز دكه‌م ئه‌ڤ ستایله ژى دناڤا سترانا كوردى دا هه‌بیت،لێ دڤێت ئه‌و ستران ژى ل سه‌ر بنگه‌هێ سترانا كوردى بهێنه چێكرن.
ناڤهاتى ئه‌و چه‌ند ژى ئاشكرا كر:نوكه ل باكۆر مۆزیكا توركى تێكه‌لى مۆزیكا كوردى بوویه،هه‌روه‌سا گه‌له‌ك سترانبێژێن كورد خزمه‌تا هونه‌ر و سترانا توركى كریه و وان سترانبێژێن كورد سترانێن كوردى كرینه توركى و وان زیانه‌كا مه‌زن گه‌هاندیه سترانا كوردى و وان جۆره قركرنه‌ك ب سه‌ر سترانا كوردى دا ئینایه،هه‌روه‌سا من د درامایه‌كا كوردى دا ب ناڤێ”خۆرشید ئاغا” دا كاركریه،كو ئه‌ڤ درامایه ب شێوێ كۆمێدى بوویه،دیسا من د چه‌ندین شانۆگه‌ریان دا كاركریه و دیسا من ل به‌ره سترانێن دویت ژى بێژم.
ئه‌ڤرۆ نیوز ، هلۆرى:
گه‌نجه‌كێ كومه‌لگه‌ها سیریێ یا سه‌ر ب ناحیا شێلادزێ ل سنوورێ ده‌ڤه‌را ئامێدیێ ب دووباره‌كرنا داهێنانه‌كا بیانى ، 10 كیلویێن ماسیان پێكڤه لسه‌ر رووبارێ شین گرتن.
دڤى واریدا ” ئه‌یوب رێكانى” ئه‌و گه‌نجه بو ئه‌ڤرۆ نیوز گۆت: ( ماوه‌یه‌كێ زۆر هه‌ر جار جار دچمه ماسیان و پرانیا جاران ژى ب تور و شوكان بویه ، به‌لێ ڤێجارێ من ڤیا داهێنانه‌كا دوباره‌كرى كو یا بیانى بوو ، من شیان 10 كیلویێن ماسیان پێكڤه بگرم) زێده‌تر گۆت: ( ئه‌و داهێنان پێكدهێت ژ لێدوانا دوو سندوقێن ته‌ماته‌یان پێكڤه و پاشان دێ هه‌ڤیرى كه‌یه د وان سندوقان دا و كه‌نه‌كێ لسه‌رێ هه‌ردوو سندوقان هێلى و كه‌یه د ئاڤێ دا ، بڤى ره‌نگى دى َماسى دوان كونان دا چیته خوارنا دناڤا سندوقێ دا و هه‌ر ماسیه‌كا كو بچته د سندوقێ دا نكاریت ده‌ربكه‌ڤیت ڤه ، و زور جاران ژى ئه‌و ماسیێن كو دچنه د سندوقێ دا دبیته پالده‌ر كو هنده‌ك ماسیێن دن ژى بولایێ خوه و ناڤا سندوقێ بكێشیت)
ناڤبرى دیاركر ژى كو ئه‌وى لسه‌ر رووبارێ شین ل سنوورێ كومه‌لگه‌ها سیریێ ئه‌ڤ داهێنان ئه‌ڤرۆ رۆژا پێنجشه‌مبى رێكه‌فتى 23 چریا دوویێ 2017 تاقى كریه و گۆت: ( ئه‌و كه‌سانێن كو ئه‌ڤێ رێكێ تاقى دكه‌ن پێدڤى یه سندوقا خوه باش گرێده‌ن و ب شه‌ڤ ب هێله د رووبارى دا و سپێدێ سه‌حا سندوقێ بكه‌ن ئانكو گرنگه پشتى ماوه‌یه‌كێ چه‌ندین ده‌مژمێران ژ نوو سه‌حا سندوقێ بهێته‌كرن)
ئه‌ڤرۆ نيوز:
ل دووڤ راگه‌هاندنه‌كا پوليسيێن پارێزگه‌ها دهۆكێ، بەری دەمەکێ کێم کچەکا 14 سالی ل شوقێن ناورو ستي ل پشت تەناهیێ، سه رێ وێ دکەڤیتە بەر مەسعەدێ ، سەرێ وێ ژ لەشێ وێ ڤەدبیتن و دەمل دەست گیانێ خو ژدەست ددەت.
راگه‌هاندنه‌كا پوليسيێن پارێزگه‌ها دهۆكێ دياركرييه، ئێکسەر پولیسێن قەزا سێمێلێ ل جهێ روودانێ ئامادەبون و لاشێ وێ هاتە ڤەگوهاستن بو نوژدارێ داد لدهوکێ و پەرێن ڤەکولینێ هاتنە ڤەکرن لدیف بریارا دادوەرێ ڤەکولینێ لسەر رێڤەبەرێ سەخبێریا وان شوقا لدیف بەندێ 411ژ یاسایێن سـزای.
ئه‌ڤرۆ نیوز ، هلۆرى:
ئاخفتنكه‌رێ حكومه‌تا هه‌رێما كوردستانێ لسه‌ر دوماهى لێدوانێن سه‌روك وه‌زیرێن عیراقێ لێدوانه‌ك بو مالپه‌را سه‌روكاتیا حكومه‌تا هه‌رێما كوردستانێ دا و تێدا دیاركر كو هه‌تا نها حكومه‌تا عیراقێ یا رژد نینه كو موچه‌یێن هه‌رێما كوردستانێ دابین بكه‌ت و ئاماژه ب وێ یه‌كێ ژى كر كو سه‌فین دزه‌ى په‌یڤدارێ حكومه‌تا هه‌رێمى كوردستانێ د لێدوانه‌كێ دا بو مالپه‌را حكومه‌تا هه‌رێما كوردستانێ دیاركر كو هێزێن پێشمه‌رگه‌ى هێزه‌كا دانپێدان و ده‌ستوورى یه و د شكاندنا داعش و پاراستنا وه‌لاتى دا ل گه‌ل هێزێن عیراقێ د پروسه‌یا رزگاركرنا موسل دا روله‌كێ سه‌ره‌كى دتیه و ئه‌گه‌ر پێشمه‌رگه نه‌بایه دا كه‌ركوك و چه‌ند ده‌ڤه‌رێن دن ژى وه‌كو موسل وێران بیت و ههزار و 802 شه‌هید و 10 هزار و 233 بریندار و 62 به‌رزه‌بوى ژ ده‌ستدایه و گۆت: ( هه‌تا نها حكومه‌تا عیراقێ موچه‌یێن پێشمه‌رگه‌یان نه‌داینه ، ئه‌ڤه د ده‌مه‌كێ دایه كو پێشمه‌رگه ل گوره‌ى ده‌ستوورى پشكه‌كه ژ سیسته‌مێ به‌ره‌ڤانیا عیراقێ و دڤێت موچه و شاسیته‌ێن دارایێن وان ژلایێ حكومه‌تا عیراقێ هاتبانه دابینكرن) زێده‌تر گۆت: ( عه‌بادى هه‌تا نها چه‌ندین جاران به‌حسا موچه و شایسته‌یێن دارایى بو هه‌رێما كوردستانێ كریه ، و د به‌رامبه‌ر دا حكومه‌تا هه‌رێمێ چه‌ندین جاران ژى دوپات ل وێ یه‌كێ كریه كو به‌رهه‌ڤه بو ڤێ مه‌ره‌مێ هه‌موو هه‌ماهه‌نگیه‌كا پێدڤى بكه‌ت ، به‌لێ د راستیدا هه‌تا نها چو پێنگاڤێن كریارى بو ڤێ یه‌كێ ژلایێ حكومه‌تا عیراقێ نه‌هاتینه هاڤێتن ، هه‌تا خوه ئه‌و به‌رهه‌ڤ نینن كو لیستا باویه‌مه‌ترى یا موچه‌خورێن هه‌رێمێ ژى وه‌ربگرن ، نها خه‌لكێ كوردستانێ گه‌هشته وێ باوه‌ریێ كو بابه‌تێ هنارتنا موچه ژلایێ حكومه‌تا عیراقێ یا رژد نینه به‌لكو تنێ ئاخفتنه )
دزه‌یى د درێژاهیا ئاخفتنێن خودا گۆت ژى: ( ناڤئینانا هه‌رێما كوردستانێ ب هه‌ر ناڤه‌كێ دن یێ لێڤه‌كرى ، ب ئاشكراى دبێژین كو ئه‌ڤ یه‌ك نه‌یا ده‌ستوورى یه و ئه‌م ره‌ت دكه‌ین ، گه‌لێ كوردستانێ ژى ب هه‌موو لایه‌ك و پێكهاته‌یێن خوه ، ئێكده‌نگه لسه‌ر پاراستنا قه‌واره‌یێ ده‌ستوورێ هه‌رێما كوردستانێ و ب چوو چێوه‌یان ده‌ستبه‌ردار نابیت )
ئەڤرۆ نیۆز ، زنار تۆڤی:
ب ئەگەرێ کێمبوونا ب لەز یا هژمارا خەلکێ وێ،باژێرڤانیا گوندەکێ سویسری پێشنیارەکا سەرنجراکێش د ئێخنە بەرچاڤ،بۆ هندێ کو خەلک بهێنە گوندێ وان.
گوندێ ئالبینان ئێکە ژ گوندێن هەرە جوان و قەشەنگ یێن سویسرا، بەلێ ب ئەگەرێ کۆچکرنا خەلکێ وی و کێمبونا هژمارا ئاکانجیان هێرشا چۆلکرنێ ل سەرە.
د وی گوندی دا ب تنێ ٢٤٠ کەس دژین،لەورا وان پێشنیارەک ئێخستیە بەردەم باژێرڤانیا گوندێ خۆ داکو کارەکێ سەرنجراکێش بکەن بۆ رزگارکرنا گوندێ خۆ ژ چۆلکرنێ.
باژێرڤانیا وان پلان دانایە کو ل دوماهیا ڤێ هەیڤێ کۆم ببن و پێشنیارا پێدانا گۆژمەکێ پارەی بدەنە وان خێزانێن کو کۆچ دکەنە گوندێ وان و ب ئێکجاری تێدا نیشتەجێ دبن.
ل دووڤ پێشنیارا وان گوژمێ ٧٠ هزار فرانکێن سویسری،کو دبنە زێدەتر ژ ٧١ هزار دۆلارێن ئەمریکی دێ دەنە وان خێزانان کو تەمەنێ وان دبن ٤٥ سالیێ دابیت و دڤێت ب کێمی ١٠ سالان ل وی گوندێ جێگیر ببن.
بەرپرسێن باژێرڤانیا وی گوندی د وێ باوەریێ دانە،کو ئەڤ پێنگاڤە ێ گوندێ وان ژناڤچوونێ پارێزیت و دێ بیتە ئەگەرێ هندێ کو جارەکادی قوتابخانا گوندێ وان بهێتە ڤەکرن.
ئه‌ڤرۆنيۆز:
حه‌يده‌ر عه‌بادى ناڤبژيڤانيا وه‌زيرێ ده‌رڤه‌يێ ئه‌لمانيا بۆ چاره‌كرنا كێشێن به‌غدا وهه‌ريمێ ره‌تكر ورێ نه‌دايێ ژى سه‌ره‌دانا هه‌رێما كوردستانێ بكه‌ت.
گۆڤارا (دێر شپێگل) يا ئه‌لمانى، ئه‌ڤرۆ پێنج شه‌مبى 23/11/2017 به‌لاڤكر، حه‌يده‌ر عه‌بادى، سه‌رۆك وه‌زيرێن عيراقێ، ناڤبژيڤانيا وه‌زيرێ ده‌رڤه‌يێ ئه‌لمانيا بۆ چاره‌سه‌ركرنا كێشێن به‌غدا وهه‌رێمێ ره‌تكر ورێ نه‌دايێ ژى كو سه‌ره‌دانا هه‌رێما كوردستانێ بكه‌ت.
وێ گۆڤارا ئه‌لمانى ئاماژه دا كو عه‌بادى رێ ب (زيگمار گابريێل) وه‌زيرێ ده‌رڤه‌يێ ئه‌لمانيا نه‌دا ب شێوازى (نه‌دبلوماسى) سه‌ره‌دانا به‌غدا وپاشى هه‌رێما كوردستانێ بكه‌ت.
ل دووڤ پێزانينان، عه‌بادى گه‌له‌ك ب توندى سه‌ره‌دانا وه‌زيرێ ئه‌لمانى بۆ هه‌رێما كوردستانێ ره‌تكر، گۆڤارا (دێر شپێگل) ژى ئه‌و هه‌لويستێ عه‌بادى ب (سڤكاتيكرن) ب ئه‌لمانيا هژمارت.
دراپۆرتا گۆڤارا ئه‌لمانى دا ئه‌وژى هاته به‌رچاڤكرن كو وه‌زيرێ ده‌رڤه‌يێ ئه‌لمانيا خواستيه دچارچۆڤێ بزاڤێن ناڤبژيڤانيێ دناڤبه‌را حوكمه‌تا هه‌رێما كوردستانێ وحوكمه‌تا عيراقى دا، سه‌ره‌دانا به‌غدا بكه‌ت وژوێرێ ژى سه‌ره‌دانا هه‌ولێرێ بكه‌ت.
گوڤارا ناڤبرى ئه‌وچه‌ندى ئاشكراكر كو ئه‌نگيلا مێركل شيره‌تكارا ئه‌لمانيا، بزاڤ كريه ب رێيا ته‌له‌فۆنێ عه‌بادى رازى بكه‌ت كو وه‌زيرێ ده‌رڤه‌يێ ئه‌لمانيا سه‌ره‌دانا هه‌ولێرێ بكه‌ت، به‌لێ سه‌رۆك وه‌زيرێن عيراقێ هه‌ر ره‌تكر، پاشى وه‌زيرێ ئه‌لمانى نه‌چاربوو سه‌ره‌دانا خوه ب هه‌لوه‌شينيت.
ل دووڤ راپۆرتا وێ گوڤارێ، مه‌شقكرنا هێزێن پێشمه‌رگه‌ى وپێشكێشكرنا هاريكاريێن له‌شكرى بۆ هه‌رێما كوردستانێ ژلايێ ئه‌لمانيا ڤه، عه‌بادى نێگه‌ران كريه وژبه‌ر وێ چه‌ندێ ژى رێ ب سه‌ره‌دانا وه‌زيرێ ده‌رڤه‌يێ ئه‌لمانى بۆ هه‌رێما كوردستانێ نه‌دا.
ل سالا 2014، ئه‌لمانيا زێده‌تر ژ 10 هزار پێشمه‌رگه مه‌شقدان و100 مليۆن دۆلار ژى وه‌كو هاريكارى بۆ هێزێن پێشمه‌رگه‌ى به‌خشين.
وه‌زيرێ ده‌رڤه‌يێ ئه‌لمانيا ل ناڤه‌راستا هه‌يڤا نيسانا بۆرى سه‌ره‌دانا هه‌ولێرێ كربوو، وى ده‌مى ناڤبرى ريفراندۆما هه‌رێما كوردستانێ ب (پرسه‌كا ناڤخوه‌يى) هژمارتبوو.
نيشاندان