ئەڤرۆ نیوز ، ھلۆری:
ئێڤارە درەنگی یا ئەڤرۆ کچەکا عەرەب ب مەرەما گەشتوگۆزار سەرەدانا ئاڤا گەلیێ شێرانە ل سنووری َناحیا دێرەلوک کر ، بەلێ د ئاڤێ دا خەندقی و تیمێن نقومڤانێن شێلادزێ ژی شیان تەرمێ وێ دەربینن.
دڤی واریدا رۆژھاد حاجی ژ تیما نقومڤانێن شێلادزێ بۆ ئەڤرۆ نیوز گۆت: ( ئەڤرۆ ئێڤاری ب درەنگڤە ئەم ھاتینە ئاگەھدارکرن لسەر خەندقینا کچەکا عەرەب ب ناڤێ نەجات حسێن کو ژیی َوێ ١٢ سال بوون کو ب مەرەما گەشتوگۆزارێ قەستا ھاڤینگەھا گەلیێ شێرانە کربوو)
زێدەتر گۆت: ( مە تەرمێ وێ ژ ئاڤی َدەرئینا و پشتی ڤەکولین لسەر ئەگەرا خەندقینا وێ ھاتیەکرن ، بو کەس و کارێن وێ ھاتە رادەستکرن)
ئەڤرۆ نیوز ، نەوزاد ھلۆری:
نھا کریارەکا مەزن یا تیرورستی کو دناڤبەرا ٣٠-٤٠ ترومبێلێن TNT کری و چەکدارێن خوکوژ بوون ب شێوەیەکێ بلەز بەر ب سەنگەرێن پێشمەرگەی ڤە دھاتن ل قەزا تەلەعفەر ، بەلێ فروکەیێن ھەڤپەیمانان نەھێلا بگەھنە سەنگەرێن پێشمەرگەی و ھەموو ھاتنە ژ ناڤبرن.
دڤی واریدا نەقیب بێدار زێباری فەرماندەیێ ھێزا پێشمەرگێ ژینگەھێ ل مێحوەرێ سنوورێ قەزا تەلەعفەرتایبەت بۆ ئەڤرۆ نیوز گۆت: ( نھا ھژمارەکا چەکدارێن داعش کو ھەموو خوکوژ بوون و ب ٣٠ – ٤٠ ترومبێلێن TNT کری ڤە بەر ب سەنگەرێن پێشمەرگەی ل سنوورێ قەزا تەلەعفەر ڤە بلەز دھاتن ، و ب زوترین دەم فروکێن ھەڤپەیمانان ھاتنە ئاگەھدارکرن و نھا فروکێن ھەڤپەیمانان ب دژواری بوردومان دکەت و ھەموو ەو ترومبێل و خوکوژ ھاتنە ژناڤبرن و کریار و پلانا وان ھاتنە ژ ناڤبرن )
زێدەتر گۆت: ( مەرەما وان ئەو بو بگەھنە سەنگەرێن پێشمەرگەی و خوە ب پێشمەرگەیان ڤە ب تەقینن و رێکێ ڤە بکەن کو چەکدارێن دن یێن داعش بگەھنە سوریا و خوە ل وان دەڤەرا ب تایبەتی ناحیا عیازی ڤەشێرن بەلێ سوپاس بو خودێ ب ھەڤکاریا ھێزێن پێشمەرگەی و فروکێن ھەڤپەیمانان ئەو کریار ھاتە ژناڤبرن)
ل گورەی ئاخفتنێن زێباری نھا رەوشا دەڤەرێ ئارامە و چوو زیان نەگەھشتینە پێشمەرگەی.
ئەڤرۆ نیوز ، ھلۆری:
ئەڤرۆ ئێڤاری دوو گەنجێن کورد کو خەلکی َدەڤەرا بالەکایەتی یا سەر ب ھەرێما کوردستانێ نە ژلایێ پێشمەرگێن کومەلا شورەشگێرێن زەحکەتکێشێن کوردستانا ئیرانێ ھاتنە کوشتن و ئەگەر ژی بو ئاریشەیەا برینا داران دزڤریت.
دڤی واریدا فەرزەنگ ئەحمەد رێڤەبەرێ ناحیا حاجی ئومەران بو ئەڤرۆ نیوز گۆت: ( ژبەر سەدەما برینا چەند دارەکان ژلایێ پێشمەرگێن کومەلا شورەشگێرێن زەحمەتکێشێن کوردستانا ئیرانێ ل سنوورێ گوندێ گوندەژورێ شەرەدەف دناڤبەرا ئەوان پێشمەرگە و وەلاتیێن گوندێ ناڤبری درۆست بوو ، د ئەنجام دا دوو ژ وان وەلاتیێن دەڤەرا بالەکایەتی ژلایێ ئەوان پێشمەرگەیان ھاتنە کوشتن و دوو کەسێن دن ژی بریندارکرن)
زێدەتر گۆت: ( ئەوان پێشمەرگەیان ب گولەیێن کلانشینکوفێ تەقە ل وان کریە و دوو کوشتینە و دوو ژی بریندارکرینە کو ھەر چوار ژی برابوون )
ئەڤرۆ نیوز:
زانایان د لێکۆلینەکا نوو دا ئاشکرا کر، ھەکەر تۆ مۆبایلێ یان ئایپادێ بکەیە دەستێ زارۆکێ خوە دا ھەروەکی تە گرامەکا کۆکایینێ دایێ کو مادەکێ ھۆشبەرە، مۆبایل زارۆکی تۆشی ئالۆدەبوونێ (ئیدمانێ) دکەت و دخوازیت ھەردەم د دەستان دا بیت.
پسپۆر و نۆشدارا نەخوەشیێن ئالۆدەبوونێ یا ئنگلیز، ماندی سالیگاری د کۆنفرانسەکێ پەروەردەیێ دا ل لەندەن لێکۆلینین خوە دیار کرن و گۆت: بۆ زارۆکان بکارئینانا مۆبایلێ وەکی مادێن ھۆشبەر و مەیێ یە، هه‌روه‌سا بکارئینانا تۆرێن جڤاکی مینا ئینستگرامی و سناپچاتی ژ ئالیێ سنێلەیان ڤە ژی ھەروەکی مادێن ھۆشبەر و ڤەخوارنێن کحۆلی تشتەکێ ب زیان و ئالۆدەکەرە.
ماندییێ گۆت د ١٠ سالێن بۆری دا پرانییا نەخوەشێن سەرەدانا وێ کری بۆ چارەسەرییا ئالۆدەبوونێ د ژیێ ١٦ بۆ ٢٠ سالیێ دا بوون و ژ دایکوبابان خواست ب ھشیاری ڤە ل پەیوەندییا زارۆک و سنێلان د گەل مۆبایلێ دا بنێرن.
ئەڤرۆ نیۆز،زنار تۆڤی:
ل دووڤ چەند زانیاریان بوهایێ مۆبایلا ئایفۆن ٨ کو بریارە ل هەیڤا ئیلۆنا داهاتی بکەڤیتە ناڤ بازاری دێ ب ٩٩٩ دۆلاران بیت.
مالپەرێ سکای نیۆز بەلاڤکریە کو بوهایێ مۆبایلا ئایفۆن 8 یا ٦٤ گیگا بایت دێ ب ٩٩٩ دولاران بیت و ئەو مۆبایلێن کو ژ ٦٤ گیگا بایتان پتر ژی بیت، دێ ١٠٠ دۆلار چنە سەر بوهایێ وان.
بریارە ل ١٢ ئیلۆنێ کۆمپانیا ئەپل تایبەتمەندیێن مۆبایلا نوو ئاشکرا بکەت و ل ٢٢ ئیلۆنێ بێخیتە بازاری.
ئایفۆن ٨ ب سیستەمێ شەحنکرنا بێسیم کار دکەت و بتنێ ب رێیا وایفاڤە دهێتە شەحنکرن.
ئەڤە ژى د دەمەکێدایە کو بریارە هەڤدەم ل گەل ئایفۆن ٨ دا،کۆمپایا ئەپل هەر ئێک ژ مۆدیلێن ئایفۆن ئێس ٧ و ٧ پلەس ئێن بێخیتە ناڤا بازاری.
ئەڤرۆ نیوز ، نەوزاد هلۆری:
پشتی نیڤرویا ئەڤرۆ وەلاتیەکێ دەڤەرا بارزان د رووبارێ زێی مەزن دا خەندقی.
دڤی واریدا عیماد ریکانی بەرپرسێ بەرەڤانیا باژێری ل سۆران بو ئەڤرۆ نیوز گۆت: (ئەڤرۆ پشتی نیڤرو وەلاتیەکێ دەڤەرا بارزان کو ئاکنجیێ گوندێ هەمدالایە بناڤێ ئەمجەد بابەکر هەمدلی کو دژیێ 60 سالیێ دایە د رووبارێ زێی مەزن خەندقی)
زێدەتر گۆت: (تیمێن نقومڤانێن دەڤەرێ مژولێ دەرئینانا تەرمێ ئەوی کەسی نە ، ئەگەرا خەندقینێ ژی دزڤریت بو نەمەلەڤی و نە شارەزایا وی کەسی)
ئەڤرۆ نیوز ، نەوزاد ھلۆری:
ئەڤرۆ ھێزێن عیراقی چونە ناڤا سەنتەرێ قەزا تەلەعفەر و تاخەکێ ئەوێ قەزایێ ژی کونترولکر.
دڤی واریدا رائید شاکر جەودەت ژ ھێزێن پولیسێن فیدرالیێن عیراقێ بۆ ئەڤرۆ نیوز گۆت: ( د چارچوڤێ دەستپێکرنا ئوپەراسیوونا کونترولکرنا قەزا تەلەعفەر کو چوار رۆژە دەست پێ کری ، ئەڤرۆ ھێزێن سوپایێ عیراقێ و حەشد شەعبی چونە دناڤا قەزا تەلەعفەر و شیان تاخێ سەعەد ل باشوورێ تەلەعفەر ب تەمامی کونترۆل بکەن)
زێدەتر گۆت: (نھا ھێزێن سوپایێ عیراقێ و حەشد شەعبی بەر ب تاخێ قادسیە دچن)
ئەڤرۆ نیوز ، نەوزاد ھلۆری:
دنووترین خزمەت دا پەرتوکخانا ژیندا ل شێلادزێ بریاردا وەکو دەستپێشخەری و خزمەت بو خواندەڤانانێن ھەموو سنوورێ قەزا ئامێدیێ پەرتووکان بێ بەرامبەر بگەھینیت ، رێڤەبەرێ پەرتووکخانا ناڤبری دیارکر کو ئەوان ل بەرە ل ئایندە زێدەتر بو تەخا گەنجان و پەیداکرنا دەلیڤێن کاری کار بکەن.
دڤی واریدا ” سەفەر رێکانی “رێڤەبەرێ پەرتووکخانا ژیندا ل شێلادزێ بۆ ئەڤرۆ نیوز گۆت: ( پەرتووکخانا ژیندا سەر ب گروپێ ژیندا یێ گەنجایە و کو ئەو ژی گروپەک سەربخوەیە ل شێلادزێ و ب مەرەما پتر خزمەتکرنا خەلکێ دەڤەرێ ھاتیە ڤەکرن ، و پەرتووکخانا ژیندا ب ھەڤکاریا رێڤەبەرا گشتی یا پەرتووکخانا بەدرخانیان ل دھوکێ ھاتیەڤەکرن و ھەموو جورێن پەرتووکان بخوڤە دگریت کو زێدەتری ٨٠٠ ناڤ و نیشانان تێدا ھەنە)
زێدەتر گۆت: ( مە خزمەتا گەھاندنا پەرتووکان بو ھەموو قەزا ئامێدیێ ھەیە بێ بەرامبەر کو ئەڤ یەک ژی پێنگاڤەک نوویە ل پارێزگەھا دھۆوکێ ، مە ھەماھەنگیەکا باش ل گەل پەرتووکخانەیێن دن مینا پەرتوکخانا نورسین ، جزیری ، فەنار ، نالبەند و چەند پەرتوکخانەکێن دن ژی ھەیە و ل گورەی ئەوان شیانێن مە ھەیی ئەم ب ماددی و مەعنەوەی ھەڤکاریا نڤیسەران ژی دکەین بو چاپکرنا پەرتووکان)
رێڤەبەرێ پەرتوکخانا ناڤبری دیارکر ژی کو و ژبلی پەرتووکان ئەوان بەرنامە ھەیە سمنیار و کار و چالاکیێن دن ژی ئەنجام بدەن ب تایبەتی بو تەخا گەنجان و گۆت ژی: (ل ئایندە دی َمە کارێن باشتر بو پەرتووکخانەیان ھەیە و دخوازین کو کەسانێن پەیوەندیدار زێدەتر ھەڤکاربن داکو بکارین زێدەتر خزمەتا خەلکی بکەین)
ئەڤرۆ نیۆز،زنار تۆڤی:
بریارە سوبەهی ل 26 تەباخا 2017 فیستیڤالا سەرخوەبوونا کوردستانێ ب پشكداریا چه‌ندین هونه‌رمه‌ندێن ناڤدارێن كورد یێن هه‌ر چار پارچێن كوردستانێ ل باژێرێ كۆلن ل وه‌لاتێ ئه‌لمانیا بهێته سازكرن و دهێته زانین بۆ ده‌ما چه‌ندین رۆژانه به‌رهه‌ڤى بۆ وێ فیستیڤالێ ژ لایێ رەڤەندا کورد ڤە ل وی وەلاتی دهێنەکرن و هەروەسا هژمارەکا زۆر یا رەڤەندا کوردی ژی ل وی وەلاتی دێ پشکدارێ د وێ فیستیڤالێ دا کەت.
دڤی واری دا ئارمانج عەگید نێروەیی بەرپرسێ راگەهاندنا کۆمەلەیا دۆستایەتیا کورد ئەلمان ل ئەلمانیا و ئەندامێ دەستەیا برێڤەبرنا فیستیڤالا سەربەخوویا کوردستانێ ل کۆلن بۆ ئەڤرۆ نیۆز دبێژیت:فیستیڤالا سەربەخوویا کوردستانێ دێ ل رۆژا شەمبی 26.8.2017 و ل دەمژمێر 2 پشتی نیڤرۆ ل مەیدانا هویمارکت ل باژێرێ کۆلن ل وەلاتێ ئەلمانیا برێڤە چیت و دێ پتری 15 هزار کوردێن هەموو دەڤەرێن ئەلمانیا پشکداریێ تێداکەن.
هەروەسا گۆت ژی:دڤێ فیستیڤالێ دا دێ هونەرمەندێن کورد دەشنێ مۆراد و رۆژین و حاجی زاخویی و شەریف ئۆمەری و سەمیر زاخۆیی و جانیار کۆبانی و زۆبێر سالح و ئەڤینا وەلات،دێ ب سترانێن خوە یێن نەتەوەیی ژبۆ سەرخوەبوونا کوردستانێ سترانا بێژن،دیسا مە وەک کۆمیتا فیستیڤالێ ژی ترۆمبێل بۆ رەڤەندا کورد ل هەموو ئەلمانیا گرتینە،ژ پێخەمەت پشکداریێ د فیستیڤالا سەربەخوویا کوردستانێ دا بکەن.
ئارمانجی ئەو ژی گۆت:ئەڤ کۆمیتە یا بێ لایەنە و کەسایەتیێن کورد یێن رەوشەنبیر و چالاکڤان و رۆژنامەڤان دێ تێدا پشکداربن و ئارمانجا مە هەموویان سەربەخوویا کوردستانێ یە.
نيشاندان