ئه‌ڤرۆنيۆز:
ئه‌ڤرۆ به‌رى نيڤرۆ 18 چريا دويێ 2017 ل گونده‌كێ ب سه‌ر ده‌ڤه‌را پشده‌ر ل پارێزگه‌ها سلێمانيێ، وه‌لاتيه‌ك ژپشتا گوهدرێژه‌كى كه‌فت وگيانێ خوه ژده‌ستدا.
په‌يڤدارێ پۆليسێن راپه‌رين، شوره‌ش ئيسماعيل، بۆ دوارۆژ گۆت، ئه‌ڤرۆ شه‌مبيێ ل گوندێ شيوه‌ره‌زى ل قه‌زا پشده‌ر وه‌لاتيه‌كێ 70 سالى ژسه‌ر پشتا گوهدرێژه‌كى دكه‌ڤيته خوار ودئه‌نجامدا سه‌رێ وى ب گرانى برينداردبيت.
دياركر ژى، پشتى گه‌هاندنا وى بۆ نه‌خوه‌شخانه، ژئه‌گه‌رێ سه‌ختيا برينا وى، وى وه‌لاتى گيانێ خوه ژده‌ستدا.
ئه‌ڤرۆنيۆز:
سه‌رۆكێ به‌رێ يێ لژنا بجهئينانا مادا 140 ل عيراقێ راگه‌هاند، باشترين چاره بۆ قۆناغا نوكه ب تايبه‌تى ل كه‌ركووكێ وده‌ڤه‌رێن ناكۆكى ل سه‌ر، بجهئينانا مادا 140 ژدستوورێ عيراقێ يه.
رائد فه‌همى، سه‌رۆكێ به‌رێ يێ لژنا بجهئينانا مادا 140 ل عيراقێ بۆ تۆرا رووداو گۆت، مادا 140 هاتبوو دانان ژبۆ ب دووماهى ئينانا وێ ده‌رده‌سه‌ريا ب گه‌لێ كوردى هاتى ب درێژيا چه‌ندين سه‌دان ب رێيا بجهئينانا سياسه‌تێن سته‌مكارى ژلايێ حوكمه‌تێن عيراقى يێن ناڤه‌ندى.
رائد فه‌همى كو نوكه سكرتێرێ گشتيێ حزبا شيوعى يا عيراقى يه زێده‌تر گۆت، مادا 140 ب ته‌وافوق هاتبوو دانان وئه‌ز بجهئينانا وێ هاتبووم راسپاردن دسێ قۆناغێن وێ دا ل 2006، به‌لێ مه ل سالا 2007 ده‌ست ب كارێ پراكتيكى كر ومخابن ب درێژيا چار سالان مه نه‌شيا چو ژوێ مادێ بجهبينن، ژبلى پشكه‌كێ ژ قوناغا ئێكێ.
دياركر، هه‌كه قۆناغێن دى هاتبانه بجهئينان، دبيت ئه‌م نه‌گه‌هشتباينه ئه‌و چه‌ندا ئه‌ڤرۆ ئه‌م گه‌هشتينێ، به‌لێ بۆ بجهئينانا وێ مادێ پێدڤيه قۆناغا ئێكێ بهێته بجهئينان ئه‌وژى راكرنا كارتێكرنا سياسه‌تێن گوهۆرينا ديموگرافى.
خوياكر ژى، حوكمه‌تا عيراقى يا نه‌چاره ژروويێ قانوونى ڤه وێ مادا دستوورى بجهبينيت، به‌لێ گه‌له‌ك تێبينى ل سه‌ر وێ مادێ ژلايێ گه‌له‌ك هێزان دناڤ جڤاتا نوونه‌ران دا هه‌بوو، به‌لێ هندى ئه‌و ماده هه‌بيت، حهوكمه‌ت يا نه‌چاره بجهبينيت.
ب ديتنا رائد فه‌همى، ل دووڤ ره‌وشا نوكه، باشترين چاره بجهئينانا مادا 140 يا دستوورى يه بۆ چاره‌كرنا ره‌وشا كه‌ركووكێ وده‌ڤه‌رێن ناكۆكى ل سه‌ر وئه‌وێ نه‌رازيبوون ژى ل سه‌ر هه‌بيت، بلا چاره‌كا باشتر ژوێ ببينيت.
گۆت ژى، هه‌لويستێ فه‌رمى يێ حوكمه‌تێ وعه‌بادى، پێگيرى پێكرنه ب دستوورى ومادێن وى ودابه‌شكرنا ده‌ستهه‌لاتان دناڤبه‌را حوكمه‌تا فيدرالى وحوكمه‌تا هه‌رێمێ، ئانكو ئه‌و نابێژن كو مادا 140 كار پێ ناهێته كرن.
گوت ژى، ئه‌ركێ سه‌ره‌كى يێ نوكه په‌يداكرنا سه‌قايه‌كێ گونجايه بۆ ده‌ستپێكرنا دانوستاندنان دناڤبه‌را به‌غدا وهه‌ولێرێ بۆ به‌حسكرن و چاره‌كرنا هه‌موو كێشان.
ئەڤرۆ نیوز، هلوری:
ئه‌ڤرۆ ب بەرهه‌ڤبوونا پارێزگه‌رێ دهۆكێ و نێزیكی 80 مامۆستایێن زانكۆیێ و هزرمه‌ند و ره‌وشه‌نبیران ، كوربه‌ندێ كوردستان ل دۆر ” كوردستان پشتی روودانێن 16 ئوكتوبه‌رێ د دیتنه‌كا شرۆڤه‌یی دا” هاته ئه‌نجامدان.
ل ده‌ستپێكێ پارێزگه‌رێ دهۆكێ په‌یڤه‌ك پێشكێشكر و تێدا ئاماژه دا ئارمانجا ئه‌نجامدانا كوربه‌ندی كو ئەوژی هه‌لسه‌نگاندنه‌ك بهێته‌كرن به‌ری و پشتی روودانێن 16 ئوكتوبه‌رێ یێن كو ب سه‌ر كوردستانێ دا هاتین و ئه‌رێ چ بهێته كرن كو روودانێن ژ ڤی ره‌نگی دوباره نه‌بنه ڤه.
هه‌روه‌سا دوپات كر كو دڤێت مه وه‌كو كوردستانی هنده‌ك بنه‌مایێن هه‌پشك هه‌بن و هه‌موو ل سه‌ر وان بنه‌مایان ئێك ده‌نگ و ئێك هه‌لویست بن و سیاسه‌تا هه‌رێما كوردستانێ ل سه‌ر ئاستێ كوردستان و عیراقێ و هه‌رێمی ونێڤده‌وله‌تی بهێته خورتكرن، ژ لایێ سیاسی و ئابووری و یاسایی ڤه.
ئه‌ترووشی دوپاتكر كو دڤێت مه راگه‌هاندنه‌كا ب هێز ب زمانێ عه‌ره‌بی هه‌با و په‌یاما كوردستانێ گه‌هاندبا جیهانا عه‌ره‌بی ،و هیڤی خواست كو ده‌رئه‌نجامێن ڤی كوربه‌ندی ب ره‌نگه‌كێ رێك و پێك بهێنه دارێتن و بۆ لایه‌نێن په‌یوه‌ندیدار بهێنه بلندكرن بۆ وێ چه‌ندێ مفا ژێ بهێته دیتن.
ل دووڤ دا به‌رهه‌ڤبوویێن كوربه‌ندی ل سه‌ر سێ گرۆپان هاتنه به‌لاڤكرن و گرۆپێ A ل سه‌ر ئاستێ كوردستانی و یێ B ل سه‌ر ئاستێ عیراقێ و گرۆپێ C ژی ل سه‌ر ئاستێ نێڤده‌وله‌تی گه‌نگه‌شه‌كرن و پاشى دانوستاندن ل سه‌ر ته‌وه‌رێن هه‌موو گرۆپان هاته‌كرن.
ل دووماهیێ ئه‌ندامێن كوربه‌ندی ب هه‌ڤڕا روونشتن و هه‌ر گرۆپه‌كی جودا جودا پێشنیاز و بۆچوونێن خوه به‌رچاڤكرن بۆ وێ ئێكێ ژ ئەڤرۆ وێڤە سه‌ركرداتیا كوردستانێ كار ل سه‌ر بكه‌ت و سیاسه‌تا خوە بۆ سه‌ره‌ده‌ریكرنێ ل گه‌ل حوكمه‌تا عیراقێ ل سه‌ر ئاستێ هه‌رێمی و نێڤده‌وله‌تی ئاڤا بكه‌ت.
ئه‌ڤرۆنيۆز:
وه‌لاتيه‌كێ كورد ل هه‌ولێرێ كو هه‌ڤشێوێ حه‌يدر عه‌بادى سه‌رۆك وه‌زيرێن عيراقێ يه، كه‌يفخوه‌شيا دياردكه‌ت خوه وه‌لاتى گه‌له‌ك وێنان ل گه‌ل دگرن ودبێژيت خه‌لك وجيرانێن من دبيژنه من مام عه‌بادى.
شێخ نورى وه‌لاتيه‌كێ خه‌لكێ هه‌ولێرێ يه ژدايكبوويێ سالا 1964 يه، ژبه‌ركو هه‌ڤشێوێ حه‌يده‌ر عه‌بادى يه، يێ بوويه جهێ سه‌رنجا خه‌لكى ل بازارى ول تاخى وهه‌تا گه‌هشتيه تۆرێن جڤاكى ژى، ئه‌و بۆ كه‌نالێ رووداو ل دۆر وێ نێزيكبوونا رۆخسارێ وى ل گه‌ل سه‌رۆك وه‌زيرێن عيراقێ دبێژيت، بۆ من تشته‌كێ نۆرماله وچو كێشه من نينن، ده‌مێ عه‌بادى ل سالا 2014 بوويه سه‌رۆك وه‌زيرێن عيراقێ، من سه‌رنجا خه‌لكى راكێشا ودوست وهه‌ڤالێن من وگه‌له‌ك خه‌لك دبێژنه من تو گه‌له‌ك وه‌كو عه‌بادى.
شێخ نورى په‌يامه‌كێ بۆ عه‌بادى دهنێريت ودبێژيت، په‌ياما من بۆ عه‌بادى بلا شه‌ر نه‌بيت وكێشه ب ئاشتى بهێنه چاره‌كرن وهيڤيدارم حه‌يده‌ر عه‌بادى ژى وه‌كو من هزر بكه‌ت ونه‌هێليت خه‌لك تووشى نه‌ره‌حه‌تيێ ببيت.
ئه‌ڤرۆنيۆز:
د جیهانێ دا ب هزاران ئەپلیکەیشن یێن هەین بۆ هەموو جورێن سیستەمان وەکو ئەندروید و ئای و ئێس و ویندۆ و ماك و لینوکس و گەلەکێن دی دەرکەڤتینە بۆ خۆپاراستن ژ هاککرنێ و ڤایرۆسا.
ل دووڤ مالپه‌رێ ئاى كوردێش سكيۆرێتى، پرۆگرامەك یێ خۆپاراستنێ ژ هاککرنێ و ڤایرۆسێ دبیتە ئەگەر هندێ ئامیرێ مرۆڤی ب خوه هاك دکەت ، ئەوژی پرۆگرامێ cCleaner كو دڤان رۆژان دا نێزیکی 2.27 ملیون کۆمپیوتەر و ئامیرە هاتینە هاککرن.
مالپه‌رێ ناڤبرى ئاماژێ دده‌ت، هه‌كه هەوە ئه‌و پرۆگرامه‌هەبیت، يان لاده‌ن، یان ژی ئەن ئێنستال بکەن و ئامیرێ خوه بتایبەت کۆمپیوتەرى پێناسه( تعريف) بکەن دا بهێتە پاراستن ژ گەڤێن هاککرنێ و هاتنا ڤایرۆسان.
ئه‌ڤرۆنيۆز:
به‌رپرسه‌كێ پارتى ئاشكراكر، گرۆپه‌كا ئێكه‌تيا نيشتمانى كوردستان( ب ناڤێ هاريكاريان) ميليشيێن حه‌شدا شه‌عبى دبه‌ته دناڤ باژێرێ ده‌ربه‌نديخان وقايمقامێ كه‌لار ژى بێ ئاگه‌هيا خوه ژده‌ربازبوونا وێ هێزێ رادگه‌هينيت.
شێخ جه‌عفه‌ر شێخ مسته‌فا به‌رپرسێ لقێ خانه‌قين يێ پارتى ديموكراتى كوردستان بۆ باسنيۆز گۆت( ل رۆژا 16 ڤێ مه‌هێ وب ناڤێ هاريكاريان، ئێكه‌تێ 20 ترومبێلێن حه‌شدا شه‌عبى ژخانه‌قينێ بۆ كه‌لار وژوێرێ بۆ ده‌ربه‌نديخان برن).
گۆت ژى( ئه‌و هێزا حه‌شدا شه‌عبى چو ده‌ڤه‌را به‌مۆ وپاشى زڤرين). دياركر كو هه‌ر جهه‌كێ ئێكه‌تى لێ هه‌بيت، حه‌شدا شه‌عبى بێ شه‌رم هاتنوچوونێ تێدا دكه‌ت.
شه‌هاب حاجى قايمقامێ كه‌لار ژلايێ خوه‌ڤه دياركر كو ئاگه‌ه ژهاتنا هێزه‌كا حه‌شدا شه‌عبى نه‌بوو هه‌تاكو هاتينه سنۆرێ باژێرێ كه‌لار ول ده‌مێ هاتنا وێ، ژلايێ ئاسايشێ هاتمه ئاگه‌هداركرن، دووپات ژى كر كو وى پشكدارى دچو كۆمبوونان دا نه‌كريه بۆ ده‌ربازبوونا هێزا حه‌شدا شه‌عبى د كه‌لارێ را.
ئاشكراكر ژى ئه‌وهێزا حه‌شدا شه‌عبى، ژبلى هنده‌ك هاريكاريان، هژماره‌كا چه‌كداران دگه‌لدا بوو، ديسا به‌رپرسێ مه‌لبه‌ندێ خانه‌قين يێ ئێكه‌تيێ دگه‌ل بوو.
ئه‌ڤرۆنيۆز:
په‌يڤدارێ حوكمه‌تا هه‌رێما كوردستانێ، سه‌فين دزه‌يى، راگه‌هاند ل رۆژا ژدايكبوونا پێغه‌مبه‌رى دێ بيته بێهنڤه‌دانا فه‌رمى ل هه‌رێما كوردستانێ.
سه‌فين دزه‌يى دداخۆيانيه‌كا رۆژنامه‌ڤانى دا گۆت، رۆژا 30 ڤێ مه‌هێ ب هه‌لكه‌فتا رۆژا ژدايكبوونا پێغه‌مبه‌ر محه‌مه‌د (س.خ) بێهنڤه‌دانا فه‌رمى يه ل هه‌رێمێ.
دياركر ژى، رۆژا ئێكه‌شه‌مبى 19/11/2017 ده‌واما فه‌رمى يه ل هه‌موو داموده‌زگه‌هێن حوكمه‌تێ ونابيته بێهنڤه‌دانا فه‌رمى ب هه‌لكه‌فتا وه‌غه‌ركرنا پێغه‌مبه‌رى (س.خ).
ئه‌ڤرۆنيۆز:
ياريكه‌رێ به‌رشه‌لونا وهه‌لبژارتيێ ئه‌رجه‌نتينێ ليونێل ميسى ئاسته‌كێ پێشچاڤ دڤى وه‌رزى دا ل گه‌ل به‌رشه‌لونا پێشكێش دكه‌ت وسه‌ركێشيا وێ كريه كو ل رێزا ئێكێ دا بيت دخۆلا ئيسپانى دا.
ميسى هه‌تا نوكه شيايه 12 گۆلان د11 ياريێن ئێكێ دا ژ خۆلێ تۆماربكه‌ت ، ديسا رۆله‌كێ هه‌ره مه‌زن هه‌بوو دسه‌ركه‌فتنا هه‌لبژارتيێ ئه‌رجه‌نتينێ دياريا خوه يا چاره‌نڤيسى دا ل گه‌ل ئه‌كوادۆر دڤاڤارتنێن مونديالا رۆسيا دا ده‌مێ سێ جاران تۆرا ئه‌كوادۆرێ هه‌ژاندى وهاتريك تۆماركرى وب وێ سه‌ركه‌فتنا ب ئه‌نجامێ 3-1 ئه‌رجه‌نتين گه‌هانده مونديالا 2018.
به‌لێ ل دووڤ سايتێ جول يێ ئيسپانى، ميسى دخوازيت ده‌مه‌كێ بێهنا خوه ڤه‌كه‌ت ب مه‌ره‌ما خوه به‌رهه‌ڤكرنه‌كا تمام بۆ مونديالا رۆسيا 2018.
سايتێ ناڤبرى دياركر كو ميسى بزاڤێ دكه‌ت راهينه‌رێ به‌رشه‌لونا فالفيردى رازى بكه‌ت كو پشكداريێ دچه‌ند ياريان دا ل خۆلا ئيسپانيا وخۆلا قاره‌مانێن ئورۆپا دا نه‌كه‌ت ودبيت فالفيردى بێهنڤه‌دانێ بده‌ته ميسى دهه‌ردو ياريێن به‌رشه‌لونا ل گه‌ل ليجانيس وڤالنسيا.
ئه‌ڤرۆنيۆز:
هژماره‌كا نڤيسه‌ر وچالاكڤانێن پشكدار دوێ گرۆپا سياسى ئه‌وا شاسوار عه‌بدولواحد، خودانێ كۆمپانيا (ناليا) ل به‌ره دروست بكه‌ت، بريارا خوه‌ڤه‌كێشانا دا.
ژێده‌ره‌كێ دناڤ وێ گرۆپا شاسووارى دا، ل دووڤ باسنيۆز، ئاشكراكر كو هه‌ر ئێك ژ فه‌رهاد سه‌نگاوى يێ په‌رله‌مانتار وهه‌ردو نڤيسه‌ر عه‌زيز ره‌ئووف وفاروق ره‌فيق، زێده‌بارى چار ئه‌ندامێن دى خوه ژ وێ گرۆپا سياسى ڤه‌كێشا ئه‌وا شاسوار عه‌بدولواحد بانگه‌شێ بۆ دكه‌ت.
ئه‌ڤرۆنيۆز:
دحاله‌ته‌كا سه‌ير دا، كچه‌كێ چو جاران هزرا وێ چه‌ندێ نه‌دكر پشتى دو ده‌مژمێران ژ شه‌هيانا وێ دێ هێته به‌ردان.
ئه‌ڤ روودانه ل وه‌لاتێ سعوديێ هاتيه روودان، كو پشتى دو ده‌مژمێران ژ شه‌هيانا وێ وژبه‌ر بكارئينانا وێ بۆ (سناب شاتى) هه‌ڤژينێ وێ ئه‌و به‌ردا، ژبه‌ركو مه‌رجه‌ك دانابوو به‌ر ئه‌وژى ئێدى هه‌ڤژينا وى تۆرێن جڤاكى ل سه‌ر ئه‌نترنێتێ بكارنه‌ئينيت پشتى شه‌هيانا وان.
وێ بيكا هاتيه به‌ردان، چه‌ند وێنه‌ك ژ ئاهه‌نگا شه‌هيانا خوه بۆ هه‌ڤالێن خوه يێن كچ ب رێيا (سناب شاتى) هنارتبوون وده‌مێ هه‌ڤژينێ وێ ئه‌ڤ چه‌نده زانى پشتى دو ده‌مژمێران ژ ب دووماهى هاتنا شه‌هيانێ به‌ردا.
برايێ زاڤاى بۆ رۆژناما (عوكاز) يا سعودى دياركر كو برايێ وى مه‌رجه‌ك دانابوو به‌ر هه‌ڤژينا خوه ئه‌وژى دووركه‌فتنا وێ بۆ ژبكارئينانا تۆرێن جڤاكى ل سه‌ر ئه‌نترنێتێ، يان به‌لاڤكرنا وێنين خوه وئه‌ڤ مه‌رجه ژى دگرێبه‌ستا هه‌ڤژينيێ دا هاتبوو تۆماركرن وبيك ژى يا رازى بوو ب وى مه‌رجى، به‌لێ وێ پێگيرى ب مه‌رجى نه‌كر وئه‌و چه‌نده روودا كو هاتيه به‌ردان.
نيشاندان