ئه‌ڤرۆنيۆز:
ئبيڤه‌له‌رزه‌كێ ب هێزا 5،4 پله ل دووڤ بيڤه‌رێ ريخته‌ر يێ جيهانى، ل باژيرێ بوهانج ل باشوورێ رۆژهه‌لاتا كوريا باشوور دا.
ئاژانسا ده‌نگوباسێن يونهاب يا كورى به‌لاڤكر كو 57 كه‌س ژئه‌نجامێ وێ بيڤه‌له‌رزێ برينداربوون وهزار و563 كه‌س ژى ده‌ربه‌ده‌ر بوون و سێ خانى ب تمامى ژناڤچوون زێده‌بارى كارگه‌هه‌كێ و38 ترۆمبێل ژى ژناڤچوون و زيان ب هزار 98 خانيان كه‌فتن.
دياركر ژى كو بيڤه‌له‌رزێ زيان ب هنده‌ك جاده وتۆرێن ئاڤێ وبه‌نده‌ر ورێيێن شه‌مه‌نده‌فه‌ران گه‌هاندينه.
ئه‌ڤرۆنيۆز:
كۆميسارا بلند يا سياسه‌تا ده‌رڤه وئاسايشێ ب سه‌ر ئێكه‌تيا ئورۆپى ڤه، فيدرێكا مۆگێرينى، ناه‌ك بۆ سه‌رۆك وه‌زيرێن هه‌رێما كوردستانێ نێچيرڤان بارزانى هنارت.
مۆگێرينى دناما خوه‌دا، زێده‌بارى سۆپاسى وپێزانين بۆ هه‌ڤپشكى و سه‌ركردايه‌تيا مه‌سعود بارزانى، خوه‌شحاليا ئێكه‌تيا ئورۆپى بۆ به‌رهه‌ڤى وبزاڤێن هه‌رێما كوردستانێ ژبۆ چاره‌سه‌ريا كێشان ل گه‌ل به‌غدا ب رێيا دانوستاندنێ نيشاندا ودياركر( ئه‌م ژ نێزيك وب نيگه‌رانى سه‌حدكه‌ينه پێشهاتێن مه‌يدانى، ده‌مێ چه‌ند هه‌فتيێن بۆرى ژى، ئێك ژكارێن سه‌ره‌كى يێن مه ئه‌وبوو رێگرى ل توندوتيژيێ بهێته گرتن ژهه‌ر لايه‌كى بيت، هه‌روه‌سا مه پشته‌ڤانيا وان بزاڤان كريه كو بۆ چاره‌سه‌ركرنا كێشان دهێنه كرن، وه‌كو پێرابوونێن ئه‌منى ل ده‌ڤه‌رێن ناكۆكى ل سه‌ر، ئێكه‌تيا ئورۆپى يا به‌رده‌وامه ژى دچاڤدێريكرنا ره‌وشێ ودێ هاريكاريێن مرۆڤى پێشكێش كه‌ت).
دوێ نامێ دا كو ئه‌ڤرۆ پێنجشه‌مبى 16/11/2017 ب رێيا كلاريس پاستۆرى نوونه‌را ئێكه‌تيا ئورۆپى ل هه‌رێما كوردستانێ گه‌هشتيه نێچيرڤان بارزانى، مۆگيرينى پشته‌ڤانيا ئێكه‌تيا ئورۆپى بۆ دانوستاندنێ دناڤبه‌را به‌غدا وهه‌ولێرێ دا دووپات دكه‌ت ودبێژيت( هه‌كه لايه‌ن داخوازێ ژێ بكه‌ن، ئێكه‌تيا ئورۆپى ل گه‌ل هه‌ڤكارێن خوه يێن نێڤده‌وله‌تى، يا به‌رهه‌ڤه هاندان وئاسانكاريان بۆ وێ دانوستاندنێ بكه كو بزانيت دێ يا ب مفادار بيت وئه‌نجامێن باش بۆ هه‌بن).
خوياكر ژى كو( نه تنێ ئێكگرتن وسه‌قامگيريا عيراقێ، به‌لكو ئێكگرتن وسه‌قامگيريا هه‌رێما كوردستانێ وده‌زگه‌هێن حومى ژى بۆ ئێكه‌تيا ئورۆپى يا گرنگه).
هه‌ر دوێ نامێ دا مۆگيرينى هه‌ڤخه‌ميا ئێكه‌تيا ئورۆپى ل گه‌ل هه‌رێما كوردستانێ ده‌ربرى بۆ قوربانيێن بيڤه‌له‌رزا رۆژا 12 ڤێ مه‌هێ كو چه‌ند ده‌ڤه‌رێن هه‌رێمێ ڤه‌گرتين.
ئه‌ڤرۆ نیوز، نه‌وزاد هلۆرى:
وه‌زاره‌تا سامانێن سروشتى ل هه‌رێما كوردستانێ ل دۆر داخۆيانيێن دو په‌رله‌مانتارێن بزاڤا گۆڕان و كۆمه‌لا ئیسلامى رۆهنكرنه‌ك به‌لاڤكر و ئاخڤتنێن وان ب بێ بنه‌ما و نه‌راست هژمارتن.
ئه‌ڤرۆ رۆژا پێنج شه‌مبى 16 چریا دوویێ 2017 وه‌زاره‌تا سامانێن سروشتى راگه‌هاندنه‌ك به‌لاڤكر و تێدا دبێژیت( به‌رێزان عه‌لى حه‌مه سالح وسوران عومه‌ر دچه‌ند سايتێن راگه‌هاندنێ داخۆيانى داينه ل دۆر گازا خام كو بۆ پالاوگان هاتينه دابينكرن، هه‌موو ئه‌و داخۆيانىێن وان داين ب بوختان دزانین و ره‌ت دكه‌ین و مخابن دڤێ ىه‌وشا نازك رابووينه ب ئاراسته‌كرنا وان تۆمه‌تان كومه‌ره‌ما وان تنێ جه‌واشه‌كاريه).
وه‌زاره‌تا سامانێن سروشتى درۆهنكرنا خوه‌دا دبێژيت(هه‌موو به‌رهه‌مێن په‌ترۆلا كو دهێته به‌رهه‌مئینان هه‌ر ژبۆ ناڤخوه‌یا هه‌رێما كوردستانێ یه و وه‌لاتی دێ مفایى ژێ وه‌رگرن و بهایێ وێ ژى هه‌ر هه‌مان ميكانيزما فرۆتنا په‌ترۆلا خاما هه‌رێما كوردستانێ یه ل به‌نده‌را جیهان).
د پشكه‌كا دى یا رۆهنكرنا خوه دا، وه‌زاره‌تا ناڤبرى دیاركر كو پێشوه‌خت پاره ژ وان هاتیه وه‌رگرتن و به‌رده‌وام ژى ژمێریارى ل گه‌ل دهێته‌كرن. ديسا ب هه‌مان شێوه‌یێ كومپانیا تێگرێس و ب هه‌مان پرۆسه رۆژانه 50 هزار ته‌ن بۆ كومپانیا قه‌یوان ل ته‌قته‌ق هاتیه دابینكرن بۆ هه‌مان مه‌ره‌م.
ئه‌ڤرۆنيۆز:
مه‌قه‌سا ره‌نگێ ده‌ستكێ وێ برته‌قالى كو ل هه‌موو وه‌لاتێن جيهانێ يا به‌ربه‌لاڤه، ژلايێ ديزاينه‌رێ فلنه‌ندى ئولوف باكسترۆم هاتيه ديزاينكرن.
كۆمپانيا( فيسكارز) يا ئه‌ڤ مه‌قه‌سه چيكرى، مليار دانه ژێ ل گه‌له‌ك وه‌لاێن جيهانێ فرۆتينه وئه‌ڤ چه‌ندێ بوويه ئه‌گه‌ر ببيته ئێك ژ پترترين ئاميرێن هاتينه فرۆتن ل سه‌ر ئاستێ جيهانێ.
هه‌رچه‌نده ئه‌ڤ مه‌قه‌سه وه‌كو پارچه‌كا كلاسيكى يه ل هه‌موو جيهانێ، به‌لێ ئه‌و جهێ باكسترۆم لێ 1دايكبووين ل فنله‌ندا گرنگيه‌كا مه‌زن پێ دده‌ت وئه‌ڤ ساله مۆزه‌خانا هلسنگى بۆ ديزاينێ 50 ساليا دروستكرنا پارچا ئێكێ ژڤێ مه‌قه‌سێ دێ ساخ كه‌ت.
بيكا كورفينما ممۆستايا ديزاينێ وره‌وشه‌نبيريێ ل زانكۆيا ئيلتۆ ل فنله‌ندا دبێژيت كو ئه‌و پارچه ئاميره بوويه ژيده‌رێ شانازيا نيشتمانى ل وه‌لاتێ فنله‌ندا كو گرنگيێ ب هونه‌رێ ديزاينێ دده‌ت ودبێژيت كو مه‌قه‌سا فيسكارز ئێك ژ به‌لاڤترين ئاميرێن ديزاينكريه ل فنله‌ندا.
ل پتريا جاران ئه‌وێن ڤێ مه‌قه‌سێ بكاردئينن نهێنيا ديزاينا وێ يا ساويلكه نزانن، به‌لێ كورفينما دبێژيت، سه‌ركه‌فتن وبناڤۆده‌نگيا ڤێ مه‌قه‌سێ دزڤريت بۆ ديزاينا وێ وبۆ ب ساناهى بكارئينانا وێ ژ روويێ رۆخسار وجهێ ده‌ستى.
به‌لێ نه رۆخسار وديزاينا مه‌قه‌سێ ب تنێ به‌رێ خه‌لكى دايه وێ، به‌لكو كه‌ره‌ستێن هاتينه بكارئينان بۆ دروستكرنا وێ كو شۆره‌شه‌ك ل جيهانا مه‌قه‌سان ل سالا 1967 په‌يداكر، ژبه‌ركو مه‌قه‌س ژ ئاسنێ سه‌نگا وى گران دهاتن دروستكرن وتنێ به‌رگدۆرا هه‌بوو ژبه‌ر بهايێ وان يێ گران وكۆمپانيا فيسكارز شيا ڤێ چه‌ندێ هه‌موويێ ب گوهۆريت ب رێيا ديزاينكرا مه‌قه‌سان ژكه‌ره‌ستێن بهايێن وان كێمتر ژ ئاسنى وه‌كو فولازى بۆ ره‌خێن وێ يێن تيژ وئه‌ڤه ژى بۆ ئه‌گه‌ر كو ئاميرێ مه‌قه‌سێ ل ده‌ف پتريا خه‌كى هه‌بيت ول مالان به‌لاڤ ببيت.
ئه‌ڤرۆ نیۆز ، زنار تۆڤى:
عه‌بدولوه‌هاب حه‌مه‌د ئه‌حمه‌د یێ ناسیار ب عه‌بدولوه‌هاب شوانى ئه‌و نڤسیه‌ر و ده‌رهێنه‌ره بۆ ئه‌ڤرۆ نیۆز دبێژیت:هه‌تاكو نوكه من 4 په‌رتووكێن فه‌لسه‌فى و ئه‌ده‌بى نڤێسینه و دیسا من حه‌فت شانۆ پێشكێشى زارۆیان كرینه،هه‌روه‌سا پترى 40 سترانان من بۆ زارۆیان چێكرینه و ئێكه‌م دراما زارۆیان ب ناڤێ”وانه” كو ژ نڤێسین و ده‌رهێنانا من بوویه من نڤێسییه،دیسا من ده‌رهێنه‌رى بۆ 4 كورته فلمان كریه،هه‌روه‌سا دوماهیك كارێ من یێ سینه‌مایى كورته فلمێ”فرین” كو نوكه د پرانیا فیسته‌ڤالێن نافخۆ و جیهانیدا یێ پشكداره،هه‌روه‌سا هه‌بوونا فیستیڤالان ل باژێرێن كوردستانێ،كاره‌كێ گرنگه بۆ پێشخستنا هونه‌رێ سینه‌مایى،لێ ژ لایێ خرابیا ره‌وشا ئابوورى و نه‌بونا كادرێ ب هێز،كو نه‌شیایه كوالیتیا فیسته‌ڤالان بلند بكه‌ت بۆ ئاستێ جیهانى،لێ گرنگیا ڤان فیسته‌ڤالان ئه‌وه كو پتریا سینه‌ماكار و ده‌رهێنه‌ر و حه‌ز ژێكه‌رێن وارێ سینه‌مایێ كۆمڤه دكه‌ت و ئه‌ڤ دبیته ئه‌گه‌ر كو ئه‌ڤ كه‌سه پێكڤه كار بكه‌ن و هایدارى به‌رهه‌مێن ئێك ببن و ئه‌ڤه دبیته هوكاره‌ك بۆ دروستكرنا پرا په‌یوه‌ندیان دناڤبه‌را باژێر و سینه‌ماكارێن كورد دا ل هه‌موو جیهانێ،ناڤهاتى گوت ژى:ئێك ژ كێشێن مه‌زن یێن به‌رده‌م فیسته‌ڤالێن كوردستانێ كێمیا فلمێن كوردیه و یان ژى نه‌بوونا فلمێن كوردیه،له‌ورا هه‌ر سال فلمێن دوباره د فیستیڤالان دا دهێنه نیشاندان،ئه‌ڤه‌ژى ڤه‌دگه‌ریت بۆ نه‌بوونا سیسته‌مێ كاركرنا هونه‌رێ سینه‌مایێ ژ لایێ وان كه‌سان ڤه یێن كو دڤى وارى دا كار دكه‌ن،هه‌روه‌سا ئه‌و پارێن زۆر یێن كو د فیسته‌ڤالان دا دهێته مه‌زاختن،ئه‌م دشێین مه‌زنترین شۆره‌شا سینه‌مایى پێ به‌رپا بكه‌ین.
ناڤهاتى دیاركر ژى:هه‌تاكو نوكه چه‌ند فلمه‌كێن سینه‌مایى هاتینه به‌رهه‌مئینان،له‌ورا ئه‌م نه‌شێین ب ته‌مامى ئاستێ سینه‌ما كوردى ده‌ربێخین،چونكى ئه‌ڤ هه‌وله د تاكه كه‌سینه و نه هه‌ولێن نه‌ته‌وه‌كێ و حوكمه‌ته‌كێ نه،لێ ئه‌م دشێن بێژین كو هه‌ولێن باش هه‌نه بۆ ده‌رخستنا رۆخسارێ سینه‌ما كوردى،دیسا ئه‌ڤه دروستكرنا بناغه‌كێ یه بۆ دانانا فۆرمێ سینه‌ما كوردى،چونكى هه‌موو هه‌ولێن مه ره‌نگه د دوماهیێ دا خزمه‌تا نه‌ته‌وه‌یه‌كێ دیتر بكه‌ت،چونكى مه وه‌لات و كیانێ خوه یێ سه‌ربه‌خۆ نینه،ئه‌ڤه ژى وه دكه‌ت كو تۆ د ئاستێ سینه‌ما كوردى دا وه‌ك خودان پاشبه‌ندێ وه‌لاتێن خودان ده‌ستهه‌لات ده‌ركه‌ڤیت،ئه‌م ب نوونه‌راتیا وان پشكدارى فیسته‌ڤالان دبین و مه گرنگیا خوه نامینیت وه‌ك نه‌ته‌وه‌یه‌ك،چونكى مه وه‌لاتێ خوه نینه،به‌لێ ب گشتى هه‌وله‌ك هه‌یه بۆ هندێ كو بناغێ فۆرما سینه‌ما كوردى بهێته دامه‌زراندن،لێ مه پێدڤى ب ده‌مى هه‌یه.
عه‌بدولوه‌هاب شوانى زێده‌تر گوت:ب جیهانیكرنا سینه‌ما كوردى به‌رى هه‌موو تشته‌كێ پێدڤى ب هندێ هه‌یه،كو مه فۆرمه‌كا خوه د سینه‌مایێ دا هه‌بیت،لێ هاتاكو نوكه مه نینه،لێ هه‌ول ب زمانێن دیتر هاتینه‌دان وه‌ك “یلماز گۆناى و به‌همه‌ن قۆبادى”،لێ هه‌تاكو نوكه ئه‌ڤ جهێ دانوستاندنێ یه،كا ئه‌رێ فلمێن ڤان هه‌ردو ده‌رهێنه‌ران بۆ سینه‌مایى كوردى دهێنه هژمارتن؟،یان ژى بۆ سینه‌ما توركى و فارسى دهێنه هژمارتن،ئه‌رێ ئه‌و شیاینه سینه‌ما كوردى وه‌ك سینه‌ما نه‌ته‌وه‌كێ به‌ره‌ف جیهانێ ڤه ببه‌ن،لێ هێشتا ئه‌ڤه یا د دانوستاندنێ دا،هه‌ر چه‌نده بابه‌ت و كاره‌كته‌ر و جهێن فلمان ل كوردستانێ یه و ده‌رهێنه‌رێن وان كوردن،له‌ورا پێنگاڤێن وان دباشن بۆ به‌ره‌ف جیهانیبوونا سینه‌ما كوردى و وه‌رگرتنا ناسنامه‌یا كوردبوونێ،ئه‌و ژى ب ئه‌گه‌رێ نیشاندانا وان هه‌موو كاره‌سات و ئازارێن ب درێژاهیا مێژوویێ ب سه ركوردان دا هاتین،ده‌رباره‌ى نه‌چوونا خه‌لكێ بۆ هۆلێن سینه‌مایێ ل كوردستانێ.
ناڤهاتى گوت ژی:ئه‌ڤه بۆ دو هوكاران ڤه دگه‌ریت،ئێك ژ وان ئه‌وه هێشتا به‌رهه‌مێن سینه‌ما كوردى نه‌گه‌هشتینه وى ئاستى كو بینه‌رێ كورد بینیته ناڤ هۆلێن سینه‌مایێ دا،وه بكه‌ت كو خه‌لك پاران بده‌ن بۆ ته‌ماشه‌كرنا فلمێن كوردى،وه‌ك چاوا دده‌ن بۆ ته‌ماشه‌كرنا فلمێن بیانى،هوكارێ دویێ په‌یوه‌ندى ب خۆدێ تاكێ كورد و ژینگه‌ها په‌روه‌رده‌كرنا تاكێ كورد ڤه هه‌ى،كو ته‌ماشه‌كرنا فلمان نه‌بوویه كه‌لتۆره‌ك هه‌ر ژ زارۆكاتیێ سینه‌ما ل ده‌ف وان نه‌بوویه حه‌زه‌ك وه‌ك نه‌ته‌وێن دیتر ل جیهانێ،ئه‌ڤه ژى كارتێكرنى ل هندێ دكه‌ت كو هه‌رده‌مێ ئه‌و نفشه مه‌زن ژى ببیت بوهایێ سینه‌مایێ نه‌زانیت و سینه‌مایێ ل ده‌ف وى بوهایێ خوه نینه،ئه‌و ده‌رهێنه‌ره زێده‌تر دبێژیت:دوماهى كارێ من د وارێ سینه‌مایێ دا كورته فلمه‌كه ب ناڤێ”مێگه‌ل” كو هه‌موو كارێن ڤى فلمێ سینه‌مایى ب دوماهى هاتینه و ل سالا 2018 دێ پشكداریێ د فلمه فیسته‌ڤالێن جیهانى دا كه‌ت.
ئه‌ڤرۆنيۆز:
ئه‌ندامه‌كێ كورد ل په‌رله‌مانێ عيراقێ راگه‌هاند، په‌رله‌مانتارێن پێنج فراكسيۆنێن كوردى ل په‌رله‌مانێ عيراقێ كۆمبوونا ئه‌ڤرۆ يا په‌رله‌مانى بجه هيلا.
به‌ختيار شاويس، په‌رله‌مانتارێ فراكسيۆنا ئێكه‌تيێ بۆخه‌ندان گۆت، ئه‌و لژنا هاتيه دروستكرن ل سه‌ر وان په‌رله‌مانتارێن دريفراندۆما هه‌رێما كوردستانێ ده‌نگێ خوه‌داى، راپۆرتا خوه خواند وخواستن بێخنه ده‌نگدانێ.
گۆت ژى، په‌رله‌مانتارێن كورد داخوازكر ئه‌و ئه‌و ئه‌و راپۆرته نه‌چيته ده‌نگدانێ، له‌وما كۆمبوونا په‌رله‌مانى بجه هێلان.
خوياكر ژى، پشتى ده‌ركه‌فتنا په‌رله‌مانتارێن كورد ژ هۆلا په‌رله‌مانى، راپۆرت نه‌چو به‌ر ده‌نگدانێ.
ل 25 ئه‌يلۆلا بۆرى، ريفراندۆم ل دۆر جودابوونا هه‌رێما كوردستانێ ژ عيراقێ ل هه‌رێمێ وده‌ڤه‌رێن ناكۆكى ل سه‌ر هاته ئه‌نجامدان، هژماره‌كا په‌رله‌مانتارێن كورد ل په‌رله‌مانێ عيراقێ ب (به‌لێ) ده‌نگ دابوو، پاشى هنده‌ك په‌رله‌ماتارێن عيراقى باده‌كه‌ك دژى وا په‌رله‌مانتارێن كورد لڤاندبوو.
ئه‌ڤرۆنيۆز:
فراكسيۆنێن كوردستانى ل په‌رله‌مانێ عيراقێ به‌ياننامه‌ك ل دۆر ئاوارێن كه‌ركووكێ وخورماتوو وده‌ڤه‌رێن دى به‌لاڤكر وتيدا داخواز ژ حه‌يده‌ر عه‌بادى سه‌رۆك وه‌زيرێن عيراقێ كر پێنگاڤێن بله‌ز ب هاڤێژيت بۆ راگرتنا ده‌ستدرێژيێن ل سه‌ر مۆلك ومالێن وه‌لاتيان ل كه‌ركووكێ وخورماتوو وده‌ڤه‌رێن دى دهێته كرن.
ده‌قێ به‌يانناما فراكسيۆنێن كوردستانى ل به‌غدا:
هه‌تا نوكه ب ده‌هان هزار ئاوارێن سڤيل يێن كورد ل باژێرێن كه‌ركووكێ وخورماتوو ل باژێرێن كه‌ركووكێ وخورماتوو وده‌ڤه‌رێن ناكۆكى ل سه‌ر يێن ره‌ڤين ژبه‌ر هاتنا له‌شكرى وحه‌شدا شه‌عبى بۆ وان ده‌ڤه‌ران پشتى 16/10/2017 ودره‌وشه‌كا نه‌ئاسايى دا ژيان خوه دبۆرينن دوور ژ مال ومولك وبازارێن خوه ويێن دناڤ چادرگه‌هێن ده‌مكى وجهێن نه‌گونجاى ڤه كو كێمترين پێدڤيێن ژيانێ بۆ نه‌هاتينه دابينكرن، ئه‌و هه‌ر چاڤه‌رێ دكه‌ن كو حوكمه‌تا فيدرال ئاسايشێ وده‌ستهه‌لاتا قانوونێ بۆ باژێرێن وان بزڤرينيت هه‌تاكو بشێن بزڤرن بۆ ناڤ مال وحالێن خوه كو پشكه‌كا مه‌زن ب سلامه‌ت نه‌بوون ژتالانێ وسوتنێ وته‌قاندنێ ل سه‌ر ده‌ستێ هژماره‌كا گرۆپێن چه‌كدارى كو ب سه‌ر هێزێن ئه‌منى يێن عيراقى دهێنه هژمارتن.
ئه‌ڤرۆ كو ئێك هه‌يڤ دبۆريت ب سه‌ر وان روودانه، چو پێرابوون ژلايێ حوكمه‌تا عيراقێ نه‌هاتينه ئه‌نجامدان بۆ زڤراندنا هيڤى وئۆمێدێ بۆ وه‌لاتيێن كورد ولێپرسين نه‌هاتيه كرن ل گه‌ل وان كه‌سێن مال ودوكان وسامانێ وه‌لاتيان سوتين وته‌قاندين وتالانكرين.
پێكڤه‌ژيانا پێكهاتێن وان ده‌ڤه‌ران رووب روويێ مه‌ترسيه‌كا راسته‌قينه بوويه، چونكى وه‌لاتيێن سڤيل كو هه‌ست ب ئاراميێ نه‌كه‌ن ودلنيا نه‌بن ژژيان ومال ونامۆسا خوه، نه‌شێن بزڤرن بۆ جهێن خوه و كارێن خوه بجهبينن، ژئه‌گه‌رێ وێ شه‌پۆلا ئاوارابوونا ب هزاران فه‌رمانبه‌ران، دبيت كارێن خوه ژده‌ست بده‌ن وبده‌هان هزار زارۆك ژ خواندنا بێ به‌هر ببن ونه‌خوه‌شى گران ژى به‌لاڤ ببن ب تايبه‌تى وه‌رزێ زڤستانێ يێ ب رێڤه.
ب ناڤێ هه‌موو فراكسيۆنێن كوردستانى ل جڤاتا نوونه‌رێن عيراقێ، داخواز ژ به‌رێز سه‌رۆكێ جڤاتا وه‌زيران دكه‌ين كو پێنگاڤێن بله‌ز ودادپه‌روه‌رانه ب هاڤێژيت بۆ راگرتنا ده‌ستدرێژيێن ل سه‌ر مولك ومالێ وه‌لاتيان ل وان ده‌ڤه‌ران وئه‌و كه‌سێن ب وان كرياران رابووين روو ب روويێ قانوونێ بهێنه كرن ب تايبه‌تى ل خورماتوو، هه‌روه‌سا پێدڤيه ئه‌و باژێره ژدياردا چه‌كدارى بهێته پاقژكرن ژبلى پۆليسێن ناڤخوه‌يى وله‌ز بهێته كرن دهه‌لسه‌نگاندنا رێژا زيانان وبريار دان ل سه‌ر قه‌ره‌بووكرنا زيانداران ورێخوه‌شكرن ل به‌رامبه‌ر زڤرينا ئاواران بۆ جهێن خوه.
ئه‌ڤرۆنيۆز:
وه‌زاره‌تا ئه‌وقافێ ل هه‌رێما كوردستانێ راگه‌هاند رۆژا ئێكشه‌مبيا داهاتى ده‌واما فه‌رمى يه ونه بێهنڤه‌دانه.
نه‌به‌ز ئيسماعيل په‌يڤدارێ وه‌زاره‌تا ئه‌وقافێ گۆت، رۆژا ئێكشه‌مبى ل هه‌موو داموده‌زگه‌هێن حوكمه‌تا هه‌رێما كوردستانێ ده‌واما فه‌رمى يه.
به‌رى نوكه چه‌ندين ده‌زگه‌هێن راگه‌هاندنێ به‌لاڤكربوو كو رۆژا ئێكشه‌مبيا داهاتى ب هه‌لكه‌فتا رۆژا ژدايكبوونا پێغه‌مبه‌ر محه‌مه‌د (س.خ) بێهنڤه‌دانا فه‌رمى يه.
ئه‌ڤرۆنيۆز:
نوژدارێن يانا مانشستر سيتى يا ئێنگليزى ترسا خوه ژ تووشبوونا ستێرا يانێ وهه‌لبژارتيێ ئه‌رجه‌نتينێ سيرجيۆ ئه‌گوێرۆ ب نه‌خوه‌شيه‌كا گران دياركر كو دور نينه ببيته ئه‌گه‌رێ دووركه‌فتنا وى ب ئێكجارى ژ ياريا ته‌پا پێ.
پشتى بێهۆشبوونا ئه‌گوێرۆى دناڤبه‌را هه‌ردو كێمێن ياريا هه‌ڤالينى دناڤبه‌را ئه‌رجه‌نتينێ ونايجيريا ئه‌وا ل رۆسيا هاتيه ئه‌نجامدان وگه‌هاندنا وى بۆ نه‌خوه‌شخانه‌كا وى وه‌لاتى، تيمه‌كا نوژداريا يانا مانشستر سيتى سه‌ره‌دانا ئه‌گوێرۆى كر وپاشى راسته‌وخوه بۆ نه‌خوه‌شخانه‌كا باژێرێ مانشستر ڤه‌گۆهاست.
پشتى ئه‌نجامدانا پشكنينێن نوژدارى، دياربوو كو ئه‌گوێرۆى دژيێ 15 ساليێ دا نه‌شته‌رگه‌رىا دلى بۆ هاتيه كرن وبۆ ده‌مێ ساله‌كێ ژهه‌موو جۆره وه‌رزشه‌كێ هاتبوو دوورخستن.
نوژدارێن يانا مانشستر سيتى ترسا خوه راگه‌هاند ژسه‌رهلدانا وێ نه‌خوه‌شيا ئه‌گوێرۆى دياركر كو دبيت پێدڤى ب نه‌شته‌رگه‌ريه‌كا دى بيت وهه‌كه بۆچوونا وان نوژداران دروست ده‌ربكه‌ڤيت ونه‌شته‌رگه‌رى بۆ وى بهێته ئه‌نجامدان، وى ده‌مى پێدڤيه ئه‌گوێرۆ ب ئێكجارى ده‌ست ژ ياريا ته‌پا پێ به‌رده‌ت.
ئێك ژ نوژدارێن پشكنينێن نوژدارى بۆ ئه‌گوێرۆى ئه‌نجامدان ئاشكراكر كو پێدڤيه پشكنينێن زێده‌تر بۆ بهێنه ئه‌نجامدان وپاشى ئه‌نجامێن فه‌رمى يێن وان پشكنينا بهێنه به‌لاڤكرن.
ئه‌ڤرۆنيۆز:
بسپۆرێن نوژدارى دبێژن هه‌كه مێلاك يا ئاژه‌ل وبالندێن نه‌خوه‌ش نه‌بيت، يا ب مفايه بۆ چاره‌سه‌ركرنا كێم خوينيێ وكێميا رێژا ئاسنى دله‌شى مرۆڤى دا وب هيزكرنا هه‌ستى وددانان.
به‌لێ گه‌له‌ك كه‌س يێن هه‌ين شاشيه‌كێ دكه‌ن دده‌مێ به‌رهه‌ڤكرنا مێلاكێ دا بۆ خوارنێ، ئه‌وژى به‌رى به‌رهه‌ڤكرنا مێلاكێ ب ئاڤێ دشوون، يا راست ئه‌وه كو نابيت مێلاك بهێته شووشتن.
شاره‌زايێن نوژدارى دبێژن، مێلاك وه‌كو گوشتى نابيت بهێته شووشتن به‌رى به‌رهه‌ڤكرنا وێ بۆ خوارنێ، چونكى هه‌كه دهێته شووشتن ب ئاڤێ، گه‌له‌ك ژ مفايێن خوه ژده‌ست دده‌ت.
نيشاندان