ئەڤرۆ نیۆز،زنار تۆڤی:

دەرهێنەرێ کورد بەهمەن قوبادی ژناڤ 25 دەرهێنەرێن بەرچاڤ یێن سەدێ 21 یێن جیهانی،ژلایێ رەخنەگرێن سینەمایا رێکخراوا “رۆتین تۆمەیتۆ “هاتە دیارکرن.

پشتی ڤەکۆلینەکا تێروتەسەل و ل دووڤ باوەریا کارناسان و رەخنەگرێن پرۆفیشنال یێن سینەمایی و هەروەسا ل دووڤ پیڤەرێن رەخنەیی و نڤێسینێ ژلایێ رێکخراوا گرنگ یا سینەمایی رۆتین تۆمەیتۆ و مالپەرێ گرنگ یێ سینەمایی مێتاکریتیک 25 دەرهێنەرێن بەرچاڤ یێن سەدێ 21 یێن جیهانی رێزبەندکرینە.

وان ئەنجامان دەرێخستیە کو ئەڤ رێزبەندییە ل دووڤ فلمسازان بوویە کو ل سەرانسەری جیهانێ هاتینە دەستنیشانکرن،یێن کو ل دەستپێکا سالا (2000) ل دووڤ دا،ئانکو ل دەستپێکا سەدێ 21 هەتاکو نوکە،‌ب ‌لایێ کێم ڤە چار فلمێن سینەمایی سازکربن و ب وان بەرهەمان د فیستیڤالێن گرنگ یێن نێڤدەولەتی دا پشکداری کربیت.

دڤێ رێزبەندییا دەرهێنەرێن جیهانیدا، ناڤێ بەهمەن قوبادی فلمسازێ ناڤدارێ کورد یێ رۆژهه‌لاتێ كوردستانێ ژی بەرچاڤ دکەڤیت،ب ناڤونیشانێ ئێک ژ باشترین فلمسازێن سەدێ 21 یێ جیهانی هاتیە دیارکرن و بۆ حەژێکەرێن سینەمایا جیهانی هاتیە نیاسین.

بەهمەن قوبادی وەکو ئەندامێ کارا دناڤبەرا وان دەرهێنەرێن ناڤدار یێن سینەما جیهانی دا پێگەهێ خوە یێ تایبەت هەیە،هەروەسا ناڤێ هندەک ژ فلمسازێن ناڤدارێن دی ژی ئەڤەنە: ئالفۆنسۆ کوارۆن ،ئەلکساندەر پێین،پۆل تۆماس ئەندەرسۆن، برازەر داردەن، نوری بیلگە جەیلان و چەندێن دی ب بەرچاڤ دکەڤن.

هەروەسا کارناسان و رەخنەگرێن پرۆفیشنال یێن سینەمایی و رێکخراوا گرنگ یا سینەمایی رۆتین تۆمەیتۆ دڤێ راپرسیێ دا هەلسەنگاندن بۆ فلمێن سینەمایی دەمەک بۆ مەستا هەسپان ل سالا 2000، سترانێن وەلاتێ دایکا من ل سالا 2002، کیسەلە ژی دێ فرن ل سالا 2004، نیڤەکا هەیڤێ ل سالا 2006 و کەسێ ئاگەه ژ پشیکێن ئێرانێ نینە ل سالا 2009 ،یێن بەهمەن قوبادی کرینە.
د ئەنجامدا بەهمهن قوبادی بوویە دەرهێنەرێ 25 یێ جیهانی ل سەدەیێ 21.