ئەڤرۆ نیۆز،زنار تۆڤی:
د كۆمبوونەکا ئه‌نجومه‌نێ وه‌زیرێن هه‌رێما كوردستانێدا نێچیرڤان بارزانی سه‌رۆك وه‌زیرێن هه‌رێما كوردستانێ ئاشكراکریە:کو پارتى دیموكراتى كوردستان ب شێوه‌یه‌كى فه‌رمى داخوازا كۆمبوونەکێ ژ بزاڤا گۆران كریە و ئاماده‌یا خوە ژی نیشاندایە بۆ كاراكرنا بێ مه‌رج یا په‌رله‌مانێ كوردستانێ.
مالپه‌رێ فه‌رمی یێ حوکمه‌تا هه‌رێما كوردستانێ بەلاڤکریە كو رۆژا چارشه‌مبی 19/7/2017 ب سه‌رۆكاتیا نێچیرڤان بارزانى سه‌رۆك وه‌زیرێن هه‌رێما كوردستانێ،ئه‌نجومه‌نێ وه‌زیران كۆمبوویە.
د دەستپێکا كۆمبوونێ دا سه‌رۆك وه‌زیران پوخته‌یه‌ك ده‌رباره‌ى دۆخێ سیاسى ل هه‌رێما كوردستانێ پێشکێش کریە و روونكریە،كو هه‌ولێن وان دناڤا لایه‌نێن سیاسی دا د بەردەوامن بۆ كاراكرنا په‌رله‌مانێ كوردستانێ،هەروەسا دڤی واری دا پارتى دیمۆكراتى كوردستان ب شێوه‌یه‌كێ فه‌رمى داخوازا كۆمبوونێ ژ بزاڤا گۆران كریە و ئاماده‌یا خوە ژی نیشاندایە بۆ كاراكرنا بێ مه‌رج یا په‌رله‌مانێ كوردستانێ.
ده‌رباره‌ى ریفراندۆمێ ژی دیارکریە کو ریفراندۆم ب خوە ئارمانج نینه،به‌لکو رێیەکە بۆ ئارمانجەکا مەزنتر كو ئەو ژی سه‌ربه‌خۆیا كوردستانێ یە،هەروەسا ئێکرێزیا گه‌لێ كوردستانێ و لایه‌نێن سیاسی ژی ب گرەنتی بۆ سه‌ركه‌فتنا ریفراندۆمێ دانایە و دوپاتكریه،كو دێ هه‌موو هه‌ولان ده‌ن بۆ هندێ کو ریفراندۆم سه‌ربكەڤیت،گۆتیە ژی:ل دووڤ دا دێ کەڤنە د پرۆسه‌یه‌كا جددی یا گفتوگۆیێ دا ل گه‌ل عیراقێ بۆ هندێ کو ب شێوه‌یه‌كێ ئاشتیانه بگه‌هنه ئارمانجا خوە یا مه‌زن،کو ئەو ژی سه‌ربه‌خۆییه.
بارزانی جه‌خت ل هندێ ژی کریە،کو ریفراندۆم یا هه‌موو گه‌لێ كوردستانێ یە و بتنێ یا لایەنەکێ نینە،گوتیە ژی:د ریفراندۆمێدا یێ سەرکەفتی و یێ نە سەرکەفتی نینە،ئەم هەموو پێکڤە د سەرکەفتینە،وه‌ك چاوان بەرۆڤاژیا وێ ژی راسته،هه‌روه‌سا رووناهی ئێخستیه سه‌ر كارڤەدانێن نێڤده‌وله‌تى و هه‌رێمایەتی ده‌رباره‌ى ریفراندۆمێ و گوتیە کو كارڤەدان د ئاساینە و هندەکان تێبینی ل سه‌ر دەمێ ئه‌نجامدانا ریفراندۆمێ هه‌نه.
نێچیرڤان بارزانی ئه‌نجومه‌نێ وه‌زیران راسپاردیە ب هه‌ماهه‌نگى ل گه‌ل وه‌زاره‌ت و دامه‌زراوه‌یێن په‌یوه‌ندیدار کو دۆسیەکێ ب زانیاریێن هوور و هژمار ل سه‌ر بابه‌تێن په‌یوه‌ندیدار یێن دناڤبەرا هه‌رێما كوردستانێ و عیراقێ دا بۆ دانوستاندنێ ل گه‌ل به‌غدا بهێنە ئامادەکرن و تێدا بهێتە روونکرن،کو چاوا حوکمەتا عیراقێ مامه‌لەیەکا نە دادپه‌روه‌رانه و نەیاسایى ل گەل هه‌رێما كوردستانێ کریە دکەت ژی،ب تایبه‌تی ل وارێن په‌یوه‌ندیدار ب پێشمه‌رگه و بودجه و قه‌ره‌بووكرنا وان هه‌موو زیانێن ل سه‌ر ده‌ستێن رژێمێن ئێک ل دووڤ ئێکێن عیراقێ به‌ر هه‌رێما كوردستانێ كه‌فتینە، ب تایبه‌تی قه‌ره‌بووكرنا قوربانیێن ئه‌نفال و وێرانکرنا ژێرخانا هه‌رێما كوردستانێ،هه‌روه‌سا پشکا هه‌رێما كوردستانێ ژ قه‌رێن نێڤدەولەتی و مافێن دستووری یێن هه‌رێما كوردستانێ ب پشکدارکرن ژ مفابوونا داهات و ده‌ستهەلاتێن ل عیراقێ،سەرەرای هارینەکرنا هه‌رێما كوردستانێ بۆ حه‌واندنا وێ هژمارا زۆر یا ئاواره و په‌نابه‌ران كو مە پێشوازى لێ كریە.
نێچیرڤان بارزانی جه‌خت ل هندێ ژی کریە،کو هه‌رێما كوردستانێ یا ئاماده‌یه ل گه‌ل عیراقێ ب شێوه‌یه‌كى ئاشتیانه بكه‌ڤیته پرۆسه‌یه‌كا دانوستانا ساخلەم بۆ چاره‌سه‌ركرنا كێشه‌یان و گه‌هشتنا گه‌لێ كوردستانێ ب داخواز و مافێن خوە یێن رەوا.
نيشاندان
