ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 19ى تيرمه‌ها 2017ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1268 |
| 1 يۆرۆيێ ئه‌ورۆپى | 1455 |
| 1 ليرێ توركى | 359 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نیۆز،زنار تۆڤی:
بالیۆزا ئەمریکا ل نەتەوێن ئێکگرتی راگەهاندیه،کو وەلاتێ وێ رێزێ ل خواستا گەلێ کوردستانێ بۆ سەربەخۆیێ دگریت.
نیکی هالی بالیۆزا ئەمریکا ل نەتەوێن ئێکگرتی د کۆمبوونەکێدا ل گەل “یان کۆبیچ”هنارتیێ تایبەت یێ سکرتێرێ گشتی یێ نەتەوێن ئێکگرتی ل عێراقێ، پرسا شەرێ دژی تیرۆریستێن داعش گفتوگۆکریە.
هەروەسا نیکی هالی دەربارەی سەربەخۆیا کوردستانێ راگەهاندیە کو ئەمریکا رێزێ ل خواست و دۆزا گەلێ کوردستانێ بۆ سەربەخۆیێ دگریت.
ب ئەگەرێ هندێ کو هێزێن پێشمەرگێ کوردستانێ بەشەکێ گرنگن ل هەڤپەیمانیا نێڤدەولەتی ل دژی داعشێ،بالیۆزی ئەمریکا ل نەتەوێن ئێکگرتی،بۆچوونا وێ ئەوە کو ریفراندۆم و سەربەخوەبوونا باشۆرێ کوردستانێ دێ بیتە ئەگەرێ دوورخستنا وان ژ کارێ وان یێ پێشەنگی کو ئەو ژی شەرێ ل دژی داعشە.
هەروەسا پێشتر چەندین جاران فەرماندێن سەربازی و بەرپرسێن بلند یێن ئەمریکا ب شێوەیەکێ راستەوخۆ و نە راستەوخۆ پشتگیریا خوە بۆ سەربەخۆیا کوردستانێ راگەهاندیە.
ئەڤرۆ نیوز ، نەوزاد ھلۆری:
وەسا بریارە کو لرۆژا 22/7/2017 مەزنترین قارەمانیا بریک دانس ل عیراقێ ل ھەولێر ل فاملی مول بھێتە ئەنجامدان کو ژلایێ ئەمریکا ڤویسس ب ھەلکەفتا ١٠ سالیا بەس ئەکادیمی دێ ھێتە رێکخستن.
دڤی واریدا جوھان فێرگوسن رێکخەرێ ئەوێ قارەمانیێ بو ئەڤرۆ نیوز گۆت: ( ب مەرەما پشتەڤانیا 10 سالیا میراتێ زەنگینێ ھونەرێ نیشاندانا بەس ئەکادیمی ، و ژبەر ئەگەرا ئەو ھەموو وێرانکاریێن کو ل موسل ژلایێ داعشێ ڤە ھاتینە کرن ، ئەکادیمیا ئەمریکان ڤویسس ب ھەلکەفتا 10 سالیا بەس ئەکادیمی دێ مەزنترین قارەمانی لسەر ئاستێ عیراقێ ل ھەرێما کوردستانێ ل ھەولێر ب پشکداریا 16 یاریکەرێن بەغدا ، نەجەف ، کەرکوک و بەسرا دی َھێتە ئەنجامدان )
زێدەتر گۆت: ( قارەمانی دێ لرۆژا 22/7/2017 دەستپێکەت ، و تێدا کومەکا بریک دانسان ھێتە ئەنجامدان ژ وانان ئوگسترا گەنجان ، موزیک دانان ، گیتار ، ئامیرێن ھەوایی و پیانو ب پشکداریا 14 ماموستایێن ھەلبژارتی ل باشترین زانکویێن جیھانی ، مەەرم ژی دانا دەرفەتێ یە بو دانسکەرێن کورد داکو زێدەتر پەیوەندی دناڤبەرا ئەڤان گروپان درۆست ببیت )
رێکخەرێ ئەوێ قارەمانیێ ددرێژاھیا ئاخفتنێن خودا دیارکر ژی کو ئەڤ قارەمانیە دێ ل فاملی مول ل ھەولێر ل رۆژا شەمبی دەمژمێر 7ێ ئێڤاری دەستپێکەت و ھەر کەس ژی دکاریت پشکدار بیت.
ئه‌ڤرۆ نيوز:
وه‌زاره‌تا ده‌رڤه يا توركيا راگه‌هاند كو ئه‌و نه ل گه‌ل ريفراندۆمێ نه ل هه‌رێما كوردستانێ و گۆت: “ئه‌م دژى ريفراندۆما سه‌ربه‌خۆيێ نه بۆ ئيدارا هه‌رێما باكوورێ عيراقێ”.
حسێن موفتۆئۆغلۆ، ئاخفتنكه‌رێ وه‌زارتێ ئاماژه ب وێ چه‌ندێ كر كو ميديايێن “ئيدارا هه‌رێما باكوورێ عيراقێ” داخۆيانيه‌ك به‌لاڤكريه كو مه‌ولود چاوش ئۆغلۆ، وه‌زيرێ ژ ده‌رڤه، ب مه‌رج، سه‌ربه‌خۆيا هه‌رێما كوردستانێ قه‌بوولكريه، به‌لێ ئه‌و چه‌ند يا دووره ژ راستيێ.
د وێ روونكرنێ دا هاتيه، ئێكگرتيا سياسى يا ئاخا عيراقێ، سياسه‌ته‌كا نه‌گۆر يا توركيايه، “بێ دودلى، دژى بڕيارا ئه‌نجامدانا ريفراندۆما سه‌ربه‌خۆيا هه‌رێما كوردستانێ ينه چونكو گۆڕانكاريه‌ك د هه‌لويستێ مه دا نينه”.
ئه‌ڤرۆ نيوز:
ھنار ئێک ژ فێقیێن بەربەلاڤە و تامەکا خۆش یا ھەی، ل وەرزێ ھاڤینێ ژی ھنار خۆشیەکێ ددەتە مرۆڤی و ھناڤێن مرۆڤی ڤەدژینیت و گەلەک مفای دگەھینیتە لەشێ مرۆڤی، ھەروەسا تیڤلێن وێ یێن ھشککری گەلەک مفا تێدا ھەنە، ئەو ژی بکەیە ئاڤێ و بۆ دەمێ 10 دەقیقان بکەلینی و ڤەخۆی.
بھایێن خوارنێ یێن ھنارێ:
ھەر ھنارەکێ 10.1% کەرستێن شەکرێ تێدا ھەنە، 1% ترشاتی، 84.20% ئاڤ، 3% پرۆتین و 2.91 ریشالۆک، ھەروەسا یا دەولەمەندە ب ڤیتامینێن A و B و C، ھەروەسا ھندەک ئاسن، فسفۆر، کبریت، کلس، پوتاسیۆم و مەنگنیزیۆم د ناڤ دا ھەنە.
مفایێن ھنارێ ژ ئالییێ سیکسی ڤە:
ھنار شیانێن سیکسی بلند دکەت، ڤەخوارنا کۆپەکێ دۆشاڤا وێ یا سروشتی رۆژانە، ناھێلیت مرۆڤ پێدڤی ب دەرمانێن چالاککرنا سیکسی ببیت و بۆ ھەردو ھەژڤینان، ڤەخورانا دۆشاڤا ھناران رۆژانە و بۆ دەمێ دو حەفتیان، ئاستێ ھورمۆنێ توستیرۆن د ناڤ لەشێ مرۆڤی دا بلند دکەت.
ئه‌ڤرۆ نيوز:
نەخۆشیێن ھاڤینێ ب گەلەک رێیان تووشی مرۆڤی دبن، ل ڤێرێ ئەم دێ ئاماژێ دەینێ وان نەخۆشیان ئەوێن ب رێیا دەڤی دھێنە ڤەگوھاستن، چونکو میکرۆب دگەھنە وی ب رێیا خوارن و ڤەخوارنێ و بێھنژینێ و دبنە ئەگەرێ نەخۆشیان، کونترولکرنا ڤێ چەندێ یا ب ساناھی یە و ددەستێن ھەموویان دایە، بنیاتێ سەرەکی یێ خوپاراستنێ ژ نەخۆشیێن ھاڤینێ پالپشتیێ لسەر پاقژیێ و خودورکرنێ ژ خوارنا بەرچاڤ دکەت، ئەو دێ تە پارێزن ژ نەخۆشیان.
نەخۆشیێن ھاڤینێ بۆ سێ پشکان دھێنە دابەشکرن:
1- نەخۆشیێن کۆئەندامێ ھەرسێ وەکو ( تیفۆ، پاراتیفو، دوسنتاریا، پەژیێن ڤەگر، زکچوون). بەلێ یێن ژ ھەمیا بەربەلاڤتر نەخۆشیێن زکچوونێ نە کو دکەڤنە ل ژێر دژواری و ناڤنجیێ دا، ژ گرنگترین نیشانێن وێ پێکھاتینە ژ دلرابوون و بلندبوونا پلا گەرماتیا لەشی و دلنەچوونا خوارنێ و گوھورینا رەنگێ دەستئاڤێ، و ھندەک جارا خوین ل گەل ھەیە و فشارا خوینێ دھێتە خوارێ.
بۆ خوپاراستنێ ژ ڤێ چەندێ پێدڤیە پاقژیا خوارنێ بھێتە راگرتن و ھندی دشیاندابیت ل مال ئامادەبکەی، و خوارنێ ل وان خارنگەھا نەخوو یێن تە گومان ل سەر بجھئینانا مەرجێن ساخلەمیێ ھەبیت، دیسا باشترە ئاڤا دلوپکری ب کاربینی بۆ ڤەخوارنێ و فێقی و زەرزەواتی باش بشووی بەری خوارنێ.
2- نەخۆشیێن کۆئەندامێ ھەناسێ وەکو( ئێشا زراڤ، دفتیریا، خەندەکوک)، ئەڤە پتر ژ گوھورینا سەقای پەیدادبن و چوونا ئێکسەر ژ گەرمایێ ل بەر سەرمایێ دبیتە ئەگەرێ پەیدابوونا ئەنفلاوەنزایێ، کو ھندەک جارا دژواردبیت و دبیتە ھەودانا سەھان، ژ گرنگترین نیشانێن وێ بلندبوونا پلا گەرماتیا لەشی، کوخک و ب زەحمەتکرنا ھەناسەدانێ. بۆ خوپاراستنێ ژ ڤێ چەندێ پێدڤیە راستەوخو نەچیە ل بەر تیشکا رۆژێ و بێھنا خوە ڤەدەی و دەرنەکەڤی ل دەمێ گەرماتی یا دژواربیت. ئەو کەسێن نەخۆشیا خوە ژ کێمیا بەرگریا لەشی دبینن یان ھەستداریەکا دژوار ب نەخۆشیێن ھەناسێ ھەبیت پێدڤیە ڤاکسینان وەربگرن.
3- نەخۆشیێن چاڤا وەکو ( ھەستداریا ھاڤینێ)، گەلەک جارا نەخۆشیێن چاڤا ب رێیا مەلەڤانگەھان بەلاڤەدبن کو گەلەک کەس د ئێک دەمدا خو دئێخنێ، لەورا ھژمارەکا نەخۆشیان ڤەدگوھێزن، وەکو نەخۆشیێن پیستی و چاڤا کو پێدڤیە زوو ھزر ل چارەسەریا وان بھێتە کرن.
دەمێ تو سەرشوویێن گشتی ب کاردئینی ل دەمێ مەلەڤانیکرنێ باشترە تافیلکەرەکێ چاڤا ل گەل تەھەبیت و راستەوخو پشتی دەرکەتنێ ب کاربینی.
ھندەک جورێن دی یێن نەخۆشیا ھەنە تووشی کۆئەندامێ دەماران دبن وەکو ھەودانا سحایا ب ھەردو رەنگێن خوە یێن میکرۆبی و ڤایروسی، ئەو نەخۆشی ب رێیا ھەناسێ و بێھنژینا نەخوشی یان ھەلگرێ ڤایرۆسی دھێنە ڤەگوھاستن، بۆ خۆپاراستنێ ژڤان نەخۆشیان، پێدڤیە ڤاکسین بۆ ھەموو ئەندامێن خێزانێ بھێنە دانان.
ھندەک نەخۆشی ھەنە ب رێیا کێزکا دھێنە ڤەگوھاستن وەکو مەلاریێ و تایا زەر کو ب تایبەت ب رێیا پێشیا دھێنە ڤەگوھاستن ل وان جھێن گۆمێن ئاڤا راوەستیای لێ ھەین، نیشانێن وێ پێک دھێن ژ تایێ و رەجفینێ و خوھدانەکا دژوار، بۆ خوپاراستنێ پێدڤیە بەرھنگاریا کێزک و پێشیا ب رێیێن کیمیاوی بھێتە کرن و ل جھێن پێشی لێ ھەبن کولەیێن نڤستنێ بھێنە ب کارئینان.
ئه‌ڤرۆ نيوز:
ئەندامەکا لیژنا ساخلەمیێ ل پەرلەمانێ کوردستانێ ئاماژە ب ڤێ چەندێ دکەت، د دەمێ نوکە دا حوکمەتا عیراقێ ب تنێ 40%ێ بەھرا ھەرێما کوردستانێ ژ دەرمانان دھنێریت و دبێژیت: ل نەخۆشخانێن ھەرێمێ ئاریشا کێمیا دەرمانان پەیدابوویە و وەلاتی پتریا دەرمانان ژ دەرڤەی نەخۆشخانان دکڕن.
ئاواز حەمید ئەفەندی، ئەنداما لیژنا ساخلەمیێ ل پەرلەمانێ کوردستانێ بۆ رۆژناما ئەڤرۆ گۆت: “ھەتا نوکە بەغدا ب ھنارتنا پشکا دەرمانێن ھەرێما کوردستانێ یا پێگیر نینە و رێژەکا بەرچاڤ یا ھنارتنا دەرمانان بۆ ھەرێما کوردستانێ بڕیە، ئەڤە د دەمەکی دایە کو رێژەکا زۆرا دەرمانێن وەلاتیێن ھەرێما کوردستانێ بۆ چارەسەرکرنا ئاوارێن مووسلێ دھێنە بکارئینان، ساخلەمیا عیراقێ ژی یا ھاریکار نینە بۆ ڤێ چەندێ، ھەکە دەرمانان بۆ ھەرێمێ ژی زێدە نەکەت، دڤێت بەھرا وەلاتیێن خوە فڕێکەت یێن ژ لایێ ھەرێما کوردستانێ ڤە دھێنە چارەسەرکرن و رۆژانە ب سەدان ئاوارە ل نەخۆشخانێن ھەرێمێ دھێنە چارەسەرکرن”.
ئاواز حەمید ئەفەندی ئاماژە ب وێ چەندێ ژی کر، نوکە بەغدا ب تنێ 40%ێ ژ پشکا دەرمانێن ھەرێما کوردستانێ دھنێریت و ھیچ جارەکێ 100%ێ نەھنارتینە، لەوڕا نەخۆشخانێن ھەرێمێ تووشی ئاریشا کێمیا دەرمانان بووینە و گۆت: “ھەرچەندە ل ھەرێمێ ژی مە گۆمان ل سەر چاوانیا دانا دەرمانان بۆ نەخوشان ل نەخۆشخانان ھەیە، چونکو نۆشدار دەمێ چەند دەرمانەکا بۆ نەخۆشی دنڤیسیت ل دەرمانخانێن نەخۆشخانا ئەو راچێتە دھێتە وەرگرتن، بەلێ ب تنێ ھندەک دەرمانێن کێم بۆ نەخۆشی دھێنەدان و یێن دی ل دەرڤەی نەخۆشخانێ دھێنە کڕین، لەوڕا من گۆمان یا ھەی و دڤێت ئەڤ دەرمانێن نۆشدار بزانیت ل نەخۆشخانێ نینن بۆ نەخۆشی نەنڤیسیت”.
ئەڤرۆ نیوز:
پەیڤدارێ پارتیا دیموکراتیک یا گەلان راگەھاند کو سەرۆک کۆمارێ تورکیا ھەر رۆژ دبێژیت کورد برایێ مە نە، نھا ژی گەفان ل ھەرێما کوردستانێ و رۆژئاڤایێ کوردستانێ دکەت، ھەکە کورد برایێ تە نە تو بۆچی نھا گەفان ل برایێن خوە دکەی و راگەھاند کو ئەو وەکو ھەدەپە بێی مەرج پشتەڤانیێ ل ریفراندۆما ھەرێما کوردستانێ دکەن.
ئۆسمان بایدەمیر پەیڤدارێ پارتیا دیموکراتیک یا گەلان دوھی د کۆمبوونا پارتیا خوە دا ئاخڤی و دیار کر کو ئەردۆگان دبێژیت کورد برایێ مە نە، ھەکە کورد برایێ تە نە پا تو بۆچی دژبەریا دەولەتا برایێن خوە دکەی، تشتا تە بۆ خوە دڤێت بۆچی تە بۆ برایێن خوە یێن کورد ل ھەرێما کوردستانێ و رۆژئاڤایێ کوردستانێ نەڤێت و گۆت: (ھەرێما کوردستانێ بەر ب ئاڤاکرنا دەولەتا سەربخوە ڤە دچیت، ئەو یەک بۆ مە ھەموو کوردان پێشڤەچوونەکا مەزنە، ئەم وەکو پارتیا دیموکراتیک یا گەلان ب ھەموو رەنگەکێ پشتەڤانیێ ل برایێن خوە ل ھەرێما کوردستانێ دکەین و بێی مەرج پشتەڤانیێ ل راگەھاندنا دەولەتا کوردی دکەین).
پەیڤدارێ پارتیا دیموکراتیک یا گەلان ئەو یەک ژی دیار کر کو ھندەک کەسێن نێزیکی ئەردۆگانی دبێژن کو سەرخوەبوون بۆ کوردان تشتەکێ باش نینە و ھەتا دبێژن حەرامە، ھەکە سەرخوەبوون و دەولەت حەرامە پا بۆچی ھوون ھەر رۆژ دبێژن ئەم دەستان ژ سەرخوەبوونێ و ئیرادا خوە بەرنادەین. تشتا تە بۆ حەلال بیت بۆچی بۆ کوردان حەرام دکەن و گۆت: (دەم یێ ھاتی کورد ئێدی بریارا خوە بدەن و ب رەنگەکێ ئازاد ل سەر ئاخا خوە بژین، ئەڤرۆکە ل ھەرێما کوردستانێ دەلیڤەکا زێرین ھاتیە پێش ئەم وەکو ھەدەپە و کوردێن باکورێ کوردستانێ ژ دل و جان پشتەڤانیێ ل داخوازیێن برایێن خوە ل ھەرێما کوردستانێ دکەین و دبێژن ھوون ل سەر رێیەکا پیرۆز دانە و ئەم وە ب تنێ ناھێلین).
ھەژی ئاماژەپێدانێ یە کو ئەڤە چەندین جارن ئۆسمان بایدەمیر پەیڤدارێ پارتیا دیموکراتیک یا گەلان پشتەڤانیا خوە و پارتیا خوە بۆ ریفراندۆمێ و سەرخوەبوونا ھەرێما کوردستانێ دیار کریە، دو رۆژ بەری نھا ژی شەش پارتێن دی یێن کوردی ل باکورێ کوردستانێ د پرێس کۆنفرانسەکێ دا پشتەڤانیا خوە بۆ ریفراندۆمێ و سەرخوەبوونا ھەرێما کوردستانێ دیار کربوون، ئانکۆ مرۆڤ دشێت بێژیت نھا ھەموو پارت و ئالیێن سیاسی یێن باکورێ کوردستانێ پشتەڤانیێ ل ریفراندۆما ھەرێما کوردستانێ دکەن.
نيشاندان
