ئه‌ڤرۆ نيوز:

ئامينا زكرى، په‌رله‌مانتارا كوردستانێ ل سه‌ر فراكسيۆنا پارتى ديموكراتى كوردستان، د روونكرنه‌كێ دا، ده‌رباره‌ى چوولبوونا پۆستێ سه‌رۆكاتيا هه‌رێما كوردستانێ رادگه‌هينيت كو د حاله‌تێ نوكه‌ دا، ماددێ 15 ژ قانوونا سه‌رۆكاتيا هه‌رێمێ ناهێته‌ بجهئينان.

ده‌قێ روونكرنا ئامينا زكرى: 

ب گۆره‌ى قانوونا سه‌رۆكاتيا هه‌رێمێ ماددێ 15 “هه‌كه‌ پله‌ و پايێ سه‌رۆكێ هه‌رێمێ ژ به‌ر هه‌ر ئه‌گه‌ره‌كى، چوول بوو، سه‌رۆكێ په‌رله‌مانێ كوردستانێ – عيراق ئه‌رك و فه‌رمانێن وى دێ گريته‌ ستوويێ خوه‌ هه‌تا ماوێ (60) رۆژان – ژ رۆژا چوول بوونا پله‌ و ده‌سته‌لاتا وى – پاشان سه‌رۆكه‌كێ نوو هێته‌ هه‌لبژارتن”.

ئانكۆ ب گۆره‌ى قانوونێ ئه‌وى ده‌مى سه‌رۆكێ په‌رله‌مانى دێ جهێ سه‌رۆكێ هه‌رێمێ گريت كو پشتى 60 رۆژان هه‌لبژارتن بهێنه‌ كرن، د ده‌مه‌كى دا په‌رله‌مانى د كۆمبوونا خوه‌ يا قانوونى دا ل 24ى چريا ئێكێ 2017 ژيێ خوه‌ بۆ دو وه‌رزێن دانانا قانوونان درێژ كريه‌، ب گۆره‌ى قانوونا هه‌لبژارتنێن سالا 1992ێ ژى هه‌لبژارتنێن په‌رله‌مان و سه‌رۆكاتيا هه‌رێما كوردێ د ئێك ده‌م دا هێته‌ كرن. ژ به‌ر هندێ ژى ئه‌ڤ مادده‌ كار پێ ناهێته‌ كرن، راڤه‌كرنا هنده‌ك لايه‌نێن سياسى ژى كو سه‌رۆكێ په‌رله‌مانى جهێ سه‌رۆكێ هه‌رێمێ بگريت هه‌ڤدژى قانوونێ يه‌.

ئه‌ڤرۆ نيوز:

مه‌سعود بارزانى سه‌رۆكێ هه‌رێما كوردستانێ نامه‌ك ئاراسته‌يى سه‌رۆكاتيا په‌رله‌مانێ كوردستانێ كريه‌ و راگه‌هانديه‌، “به‌رده‌وامبوونا من د ڤى پۆستى دا ره‌ت دكه‌م و نابيت قانوونا سه‌رۆكاتيا هه‌رێمێ بهێته‌ راستڤه‌كرن يان ژيێ سه‌رۆكاتيا هه‌رێمێ بهێته‌ درێژكرن”.

بارزانى دبێژيت: “پێدڤيه‌ ب زووترين ده‌م كۆم ببن بۆ وێ چه‌ندێ ئه‌ڤ بۆشايى يا قانوونى د ئه‌رك و ده‌سته‌لاتێن سه‌رۆكێ هه‌رێمێ دا دروست نه‌بيت و ئه‌ڤ بابه‌ته‌ بهێته‌ چاره‌كرن”.

ده‌قێ ناما سه‌رۆك بارزانى:

به‌رێز سه‌رۆكاتيا په‌رله‌مانێ كوردستانێ

سلاڤێن گه‌رم

ب گۆره‌ى فه‌رمانا هه‌رێمى (128) ل 12ى تيرمه‌ها 2017ێ مه‌ داخواز كربوو هه‌لبژارتنێن سه‌رۆكاتيا په‌رله‌مانى و سه‌رۆكاتيا هه‌رێمێ ل رۆژا 1ى چريا چريا دويێ يا 2017ێ بهێنه‌ ئه‌نجام دان، به‌لێ ژ به‌ر ئه‌گه‌رێن سياسى و ئه‌منى و ته‌كنيكى و نه‌بوونا كانديدان، كۆمسيۆنا بلندا سه‌ربه‌خۆيا هه‌لبژارتن و راپرسيان ئاماده‌كارى بۆ هه‌ردو هه‌لبژارتنان هه‌لپه‌سارتن.

ل 24ى چريا ئێكێ 2017 په‌رله‌مانێ كوردستانێ ژيێ حوكمه‌تا هه‌رێمێ و په‌رله‌مانى بۆ ماوێ دو خولێن قانوون دانانێ درێكر.

ده‌رباره‌ى پۆستێ سه‌رۆكاتيا هه‌رێمێ پشتى 1ى چريا دويێ 2017ێ به‌رده‌وام بوونا خوه‌ د ڤى پۆستى دا ره‌تدكه‌م و نابيت قانوونا سه‌رۆكاتيا هه‌رێمێ بهێته‌ راستڤه‌كرن يان ژيێ ماوێ سه‌رۆكاتيا هه‌رێمێ بهێته‌ درێژكرن، ژ به‌ر هندێ ژى ب زووترين ده‌م كۆم ببن بۆ وێ چه‌ندێ وێ بۆشايى يا قانوونى د ئه‌رك و ده‌سته‌لاتێن سه‌رۆكێ هه‌رێمێ دا دروست نه‌بيت و ئه‌ڤ بابه‌ته‌ بهێته‌ چاره‌كرن.

ئه‌ز ژى وه‌كو مه‌سعود بارزانى پێشمه‌رگه‌، ل ناڤ جه‌ماوه‌رێ گه‌لێ مه‌ و پێشمه‌رگێن ئه‌زيز ل خه‌بات و تێكوشانێ بۆ ب ده‌ستڤه‌ئينانا مافێن ره‌وا يێن گه‌لێ مه‌ و پارێزگاريكرن ژ وان ده‌ستكه‌فتێن ملله‌تى به‌رده‌وام بم.

مەسعود بارزانی

28-10-2017