ئه‌ڤرۆ نیوز ، هلورى:
جێگرێ سكرتێرێ ئێكه‌تیا نیشتمانیا كوردستانێ په‌یامه‌ك به‌لاڤكر و تێدا دیاكر كو گه‌لێ كوردستانێ ژبلى چیا چوو دوست نینن و هنده‌ك كه‌سان دناڤ ئێكه‌تى دا بو به‌رژه‌وه‌ندیێن خوه‌یێن تایبه‌ت ئه‌ڤ یه‌ك كریه‌.

كوسره‌ت ره‌سول جێگرێ سكرتێرێ گشتیێ ئێكه‌تیا نیشتمانیا كوردستانێ د په‌یاما خوه‌ دا دیاركر كو ماوه‌یێ سێ سالایه‌ گه‌لێ كوردستانێ ل شوونا هه‌موو ئازادیخوازێن جیهانێ شه‌رێ دژى تیرورستان دكه‌ت و گۆت: ( گه‌لێ كوردستانێ ژبلى چیا چوو دوستێن دن نینن ، و روودانێن چه‌ند رۆژێن بورى و ل كه‌ركوك و كوشتنا خه‌لكێ سڤێل ل دوزخورماتو و ده‌ڤه‌رێن دن و ده‌ركرن و سوتانا مالێن وان ژبلى ئه‌نفاله‌كا دن چوو رامانێن دن نینه‌ )

زێده‌تر گۆت: ( ئه‌ڤا كو برینێ كوتر دكه‌ت ئه‌وه‌ كو چه‌ند كه‌سه‌كان ل رێبازا ئێكه‌تى لادایه‌ بێى كو بزڤرن بو سه‌ركرداتیا حزبا خوه‌ كو ئێكه‌تى یه‌ و ب مه‌ره‌ما چه‌ند ده‌ستكه‌فته‌كێن ده‌مكى و كه‌سایه‌تى كو دبنه‌ هاریكارى بو داگیركه‌ران و بڤێ یه‌كى ژى ب كارێن خوه‌یێن درندانه‌ ب سه‌رشورى دێ دناڤا لاپه‌رێن دیروكا گه‌لێ مه‌ دا هێنه‌ نڤیسان)

د درێژاهیا ئاخفتنا خودا دیاركر ژى كو ئه‌وان بو پاراستنا كه‌ركوك چوو خه‌مسارى نه‌كرینه‌ و به‌لێ ژ ئه‌نجامێ ده‌ستره‌شێن نافخوه‌ پشكه‌ك ژ سه‌نگه‌ران هاتنه‌ چولكرن د به‌رژه‌وه‌ندیا دوژمنى دا و گۆت ژى: (هه‌موو زیانێن كو ژ ئه‌نجامێ له‌شكركێشا هێزێن عیراقى درۆست دبیت د ستوویێ وان كه‌سێن نافا ئێكه‌تى یه‌ ، به‌لێ ب بیروباوه‌رێن مه‌ ئه‌ڤ یه‌ك دوماهى نینه‌ و ئیرادا گه‌لێ ئازادیخوازێن كوردان و رابونه‌ڤه‌ لسه‌ر پیێن خوه‌ یا ب زه‌حه‌ت ژى نینه‌ ، داخوازێ ل هه‌موو لایه‌نێن سیاسى دكه‌م كو ناڤمالا خوه‌ بهێز بكه‌ن)

ئه‌ڤرۆ نیوز ، هلورى:
وه‌زاره‌تا پێشمه‌رگه‌ى یا حكومه‌تا هه‌رێما كوردستانێ راگه‌هاندنه‌ك به‌لاڤكر و تێدا دیاردكه‌ت كو جاره‌ك دن سه‌ر ژ نوو دێ هێلا ته‌ماس دناڤبه‌را هه‌ولێر و به‌غدا هێنه‌ رێكخستن.

ئاخفتنكه‌رێ وه‌زاره‌تا پێشمه‌رگه‌ى یا حكومه‌تا هه‌رێما كوردستانێ راگه‌هاندنه‌ك به‌لاڤكر و دیاركركو ل گوره‌ى رێكه‌فتنا ئوپه‌راسیوونا كونترۆلكرنا موسل كو دناڤبه‌را هه‌رێما كوردستان و حكومه‌تا فیدرالى یا عیراقێ ب چاڤدێریا هه‌ڤپه‌یمانان هاتیه‌ دانان و ئیمزاكرن و بریار لسه‌ر دابوو كو ئه‌و ژى هێلا ته‌ماسا دناڤبه‌را هێزێن پێشمه‌رگه‌ى و سوپایێ عیراقێ دێ ب ره‌نگه‌كێ مینیت كو روژه‌كێ به‌را ئوپه‌راسیوونا كونترولكرنا موسل ل رێكه‌فتى 17/10/2017 هاتبویه‌ ێگیركرن)

د راگه‌هاندنا وان دا زێده‌تر هاتیه‌: ( نها ژى هه‌ردوو لا دێ پێگیریێ ب ئه‌وێ رێكه‌فتێ كه‌ن و ل ڤان رۆژان ژى دا دێ جاره‌ك ده‌ن هێلا ته‌ماس ل گوره‌ى رێكه‌فتنێ دێ سه‌ر ژ نوو هێنه‌ رێكخستن ڤه‌)

ئه‌ڤرۆ نیوز ، نه‌وزاد هلۆرى:

سه‌رۆكێ هه‌رێما كوردستانێ مه‌سعود بارزانى لسه‌ر ره‌وشا كه‌ركوكێ و هاتنا هێزێن عیراقى بو كه‌ركوك و ده‌ڤه‌رێن ده‌رڤه‌یێ كارگێریا هه‌رێما كوردستانێ په‌یامه‌ك به‌لاڤكر و تێدا دیاركر كو ئه‌ڤا كو ل كه‌ركوك روویداى بریاره‌كا ئێكلایه‌نى چه‌ند كه‌سه‌كان بویه‌ دناڤا لایه‌نه‌كێ سیاسیێ نافخوه‌یا كوردستانێ ، و خوینا شه‌هیدێن گه‌لێ كوردستانێ بو سه‌ربخوه‌یێ به‌لاش ناچیت.

ئه‌ڤا ل خوارێ ده‌قا وێ یه‌

بناڤێ خودێ مه‌زن و دلوڤان

جه‌ماوه‌رێ خوشتیڤێ كوردستانێ

رایا گشتى یا كوردستان و عیراق و جیهانێ

ب درێژاهیا دیروكێ گه‌لێ كوردستان لژێر هه‌ره‌شه‌ و سته‌مێ دا بوویه‌ و مافێن وان هاتینه‌ بنپێكرن ، دڤێ دیروكێ دا گه‌لێ كوردستانێ به‌ره‌ڤانى ل ناسنامه‌یا خوه‌ كریه‌ و توشى جینوساید و كومكوژیان هاتیه‌ ، دوماهی جار ژى په‌له‌مارا دراندانه‌یا تیرورستێن داعشێ بویه‌ بو سه‌ر كوردستان و جینوسایدكرنا كوردێن ئێزدى بوویه‌

ل گه‌ل ڤێ یه‌كێ ژى گه‌لێ كوردستانێ هه‌رده‌م ب دیتنه‌كا ئاشتیانه‌ پێنگاڤێن چاره‌سه‌ریێ گرتینه‌ به‌ر و چو اران ژى مه‌ شه‌ر نه‌ڤیانه‌ ، به‌لكو شه‌ر لسه‌ر مه‌ هاتیه‌ سه‌پاندن و مه‌ هه‌موو بزاڤ كرینه‌ بو چاره‌سه‌ریا ئاشتیانه‌ داینه‌ بو مانه‌ڤا خوه‌ بو گه‌هشتن ب ئارمانجێن خوه‌ ، ئامانا سه‌ره‌كى ژى هه‌رده‌م ئاسایش و مافێن گه‌لێ كوردستانێ بوینه‌.

وه‌لاتیێن خوشڤى

ئه‌ڤا كو ل باژێرێ كه‌ركوكێ روویدایى ، ئه‌نجامێ بریارا ئێكلایه‌نیا چه‌ند كه‌سه‌كان بوویه‌ دناڤ لایه‌نه‌كێ سیاسیێ نافخوه‌یا كوردستانێ ،و بویه‌ ئه‌گه‌را وێ یه‌كێ كو هێزێن پێشمه‌رگه‌ى ب ره‌نگێ هاتیه‌ دیتن پاشڤه‌زڤرین و ژ ئه‌نجامێ ئه‌وێ پاشڤه‌زڤرینێ ژى ، هێلا ته‌ماسا به‌رى ده‌ستپێكرنا ئوپه‌راسیوونا ئازادكرنا موسل ل رێكه‌فتى 17/10/2016 دناڤبه‌را به‌غدا و هه‌ولیر بوویه‌ كو ببوویه‌ بنه‌مایێ تێگه‌هشتنا ل چه‌وانیا به‌لاڤكرنا هێزێن عیراقى و هه‌رێما كوردستانێ.
جه‌ماوه‌رێ كوردستانێ پشتراست دكه‌ین ئه‌وا كو پێدڤى یه‌ دێ هێته‌كرن ، دپێناڤ پاراستنا ده‌ستكه‌فتێن مه‌ و ئارامى و ئاسایشا خه‌لكى دێ ئه‌نجام ده‌ین.

نها ژى دوپاتیێ لسه‌ر پاراستنا ئێكرێزى و خوراگریا گه‌لێ كوردستانێ و هێزێن سیاسى دكه‌ین و داخوازێ ل هه‌موو ده‌زگه‌هێن راگه‌هاندنێ ژى دكه‌م ب ره‌نگه‌ك گشتى كو ب دیتنه‌كا هه‌ستیار و به‌رپرسیاره‌تیا نه‌ته‌وه‌یى و نیشتمانى ره‌فتارێ ل گه‌ل بارودوخێ هه‌ستیارێ كوردستانێ و عیراقێ بكه‌ن.

گه‌لێ خوه‌ راگرێ كوردستانێ ، جه‌ماوه‌رێ دلسووز و خوبه‌خش و پێشمه‌رگێن قاره‌مان و كه‌س و كارێن سه‌ربلندێن شه‌هیدان ، ئه‌و خوونا كو زاروكێن هه‌وه‌ د رێیا ئازادیا كوردستانێ دا رشتى ، ئه‌ڤرۆ ژى هه‌ر د رێژن ، ئه‌و ده‌نگێ زه‌لالێ كو بو سه‌ربخوه‌ى یا كوردستانێ هه‌وه‌ كرى و گه‌هاندیه‌ گه‌لان و وه‌لاتێن جیهانێ ، روژه‌كێ ل روژان به‌لاش ناچیت و به‌لاش ژى ناده‌ین.
گه‌لێ كوردستان ب هیمه‌ته‌كا ب هێز و قاره‌مانانه‌ چ زوو بیت یان دره‌نگ دێ جاره‌ك دن هه‌ر گه‌هیته‌ ئارمانا خوه‌ یا ره‌وا و پیروز ، ئه‌ڤرۆ رۆژا باوه‌ربوونه‌ ب هێز و ئێكرێزیا گه‌لێ مه‌.