ئه‌ڤرۆ نیوز ، نه‌وزاد هلۆرى:

كومبوونا وه‌زاره‌تا پێشمه‌رگه‌ى و هه‌ڤپه‌یمانان ب سه‌رپه‌رشتیا ئه‌مریكا لسه‌ر بارودوخێ كه‌ركوكێ و شه‌ر و په‌ڤچونێن دناڤبه‌را هێزێن پێشمه‌رگه‌ى و حه‌شد شه‌عبى داوى هات و ل گوره‌ى راگه‌هاندنا وان عیراق به‌رپرسیاره‌ ژ هه‌ر روو ب روو بونه‌كا دناڤبه‌را هێزێن پێشمه‌رگه‌ى و عیراقێ درۆست دبیت
راگه‌هاندنا وه‌زاره‌تا پێشمه‌رگه‌ى و هه‌ڤپه‌یمانان دیاركر كو كومبوون ب سه‌رپه‌رشتیا كه‌ریم شنگالى وه‌زیرێ پێشمه‌رگى و چه‌ندان به‌رپرسێن هه‌ڤپه‌یمانان ل دیوانا وه‌زاره‌تا پێشمه‌رگه‌ى ب رێڤه‌چوویه‌ و تێدا هاتیه‌: ( وه‌زیرێ پێشمه‌رگه‌ى كورتیه‌ك ل بارا ره‌وشا كه‌ركوك و ئه‌و ئالوزیێن كو هاتینه‌كرن پێشكه‌شكر و دیاركر كو ئه‌ڤ یه‌ك پلانا هوشیاركرن و دوژمنكاریا حه‌شد شه‌عبى و سوپایێ پولیسێن عیراقێ بوویه‌ دژى خه‌لكێ كوردستانێ و ئه‌وێ ئارامیا كو ل ده‌ڤه‌رێ په‌یدابووى بو ڤه‌حه‌واندنا ئاواره‌ و په‌نابه‌رێن باشوور و ناڤه‌راستا عیراقێ )

وه‌زیرێ پێشمه‌رگه‌ى دیاركر كو حه‌شد شه‌عبى و سوپایێ عیراقێ ب چه‌كێ گرانێ هه‌ڤپه‌یمانان جاره‌كا دن هێرش كریه‌ سه‌ر ده‌ڤه‌رێن كوردان و باشوورێ كه‌ركوكێ و چوو بهانه‌ ژى بو سه‌روه‌ریا خاك و گه‌لێ عیراقێ نه‌هێلا و گۆت ژى: ( هێزێن پێشمه‌رگه‌ى ئێدى بێده‌نگ نابن و دێ به‌ره‌ڤانیێ ل خاكا كوردستانێ كه‌ن ، و زیانێن وێ ژى لسه‌ر حكومه‌ت و فه‌رمانده‌یێن سه‌ربازیێن عیراقێ یه‌ ژبه‌ركو ئه‌ون پشته‌ڤانیێ ل وان هێزان دكه‌ن ، دیسان دلگرانین ب دائێخستنا سنوورێن دناڤبه‌را هه‌رێما كوردستان و كومارا ئیسلامیا ئیرانێ ، ئه‌ڤ یه‌ك ژى بتنێ مه‌ره‌م دورپێچدانا خه‌لكێ كوردستانێ یه‌ ، پێدڤى یه‌ حكومه‌تا عیراقێ بزاڤان بكه‌ت ب رێیا دانوستاندنان ئاریشه‌یێن سیاسیێن خوه‌ ل گه‌ل هه‌رێما كوردستانێ چاره‌سه‌ر بكه‌ت به‌روڤاژى ئه‌ڤ بارودوخێ كو نها ل كه‌ركوكێ درۆست بوى وه‌كو خوه‌ نامینیت)

ل داویا كومبوونێ فه‌رمانده‌یێن هه‌ڤپه‌یمانان خواست كو ئاریشه‌یێن سیاسیێن دناڤبه‌را عیراق و هه‌رێمێ ب رێیا دانوستاندنان بهێنه‌ چاره‌سه‌ركرن و چو لایه‌ن ژى په‌نایێ بو شه‌ر و ته‌قه‌یان نه‌بن ، و دوپات ژى كر كو ئه‌و ب هویرى چاڤدێریا ده‌ڤه‌رێ و هه‌موو ئه‌وان گورانكاریان دكه‌ن.

ئه‌ڤرۆ نيوز، نيوار محه‌مه‌د سه‌ليم:

فه‌رمانده‌كێ پێشمه‌رگێ كوردستانێ راگه‌هاند كو نوكه‌ ل ميحوه‌رێ رۆژئاڤايێ ديجله‌ ژى ل ڤێ دووماهيێ چه‌كدارێن حه‌شه‌د شه‌عبى يێن هنده‌ك ليڤينێن نه‌يێن نورمال دكه‌ن.

شڤێدى پشتى به‌ردانا هنده‌ك سه‌نگه‌ران ژ لايێ پێشمه‌رگێن يه‌كا 70 يا ئێكه‌تيێ، چه‌كدارێن حه‌شه‌د شه‌عبى شيان هنده‌ك پێشڤه‌چوونان ل باشوورێ رۆژئاڤايێ كه‌ركووك بكه‌ن، به‌لێ هه‌ر زوو هێزێن پێشمه‌رگێ زێره‌ڤانى گه‌هشتنه‌ جهێ وان و بزاڤێن ڤه‌گه‌راندنا وان ده‌ڤه‌ران كرن.

شه‌رێ شه‌ڤا شڤێدى پشتى وان گه‌فێن سه‌رۆك وه‌زيرێن عيراقێ و چه‌كدارێن حه‌شه‌د شه‌عبى هات يێن بۆ چه‌ندين جاران به‌حس لێ كرى و جڤاتا ئاساشا هه‌رێما كوردستانێ ته‌كست ل سه‌ر كرى كو به‌رهه‌ڤى بۆ ڤێ هێرشێ دكرن.

ب گۆره‌ى راپۆرته‌كا جڤاتا ئاسايشا هه‌رێمێ شياينه‌ چه‌ندين زيانان بگه‌هيننه‌ چه‌كدارێن حه‌شه‌د شه‌عبى و پێنج هه‌مه‌رێن وان ژى ژناڤ ببه‌ن.

هه‌ر ل دووڤ وێ راپۆرتێ ئاماژه‌ ب وێ چه‌ندێ ژى كريه‌ كو چه‌كدارێن حه‌شه‌د شه‌عبى ژ لايێ سۆپايێ پاسدارێن ئيرانێ ڤه‌ هاتينه‌ هاندان و ب چه‌كێ ئه‌مريكا شه‌رێ كوردان دكه‌ن.

بالوێزێ به‌رێ يێ ئه‌مريكا ژى ته‌كست ل سه‌ر وێ چه‌ندێ كريه‌ و د تويته‌كى دا به‌لاڤكريه‌ كو ب فه‌رمانا تيرۆرست مه‌هدى موهه‌ندس هێرش كريه‌ سه‌ر كه‌ركووك.

خۆيا ژى كريه‌ كو حه‌شه‌د شه‌عبى ب فه‌رمانا سۆپايێ پاسدارێن ئيرانێ و ب چه‌كێ ئه‌مريكا هێرش كريه‌ سه‌ر هه‌ڤپه‌يمانێن ئه‌مريكا.

فه‌رمانده‌كى ژ ميحوه‌رێ رۆژئاڤايێ ديجله‌ ژى راگه‌هاند كو هه‌ر ژ ده‌سپێكرنا شه‌رێ داعش و هه‌تا نوكه‌ هێزێن پێشمه‌رگێ كوردستانێ ل ڤى سنورى يێن د ئاماده‌ باشيێ دا.

ئه‌ڤى فه‌رماندێ پێشمه‌رگى ئاماژه‌ ب وێ چه‌ندێ ژى كر كو هه‌ر ئێك ژ وه‌زاره‌تا پێشمه‌رگه‌ى و ليوا شنگال و فه‌رماندا زێره‌ڤانى و فه‌رماندا دهۆك و ليوايێن هه‌ڤپشك يێن يه‌كا 70 و 80 و پێشمه‌رگێ ژينگه‌هێ ب درێژاهيا ڤى ميحوه‌رى هه‌نه‌ و هه‌موو ب چه‌ك و پێدڤيێن شه‌رى و يێن يه‌ده‌ك ژى د ئاماده‌ باشيێ دانه‌.

ده‌رباره‌ى لڤينێن حه‌شه‌د شه‌عبى ژى ل وى سنورى دا زانين كو ل ده‌ڤه‌رێن تله‌عفه‌ر و عيازيه‌ هنده‌ك لڤينێن نه‌يێن سرۆشتى هه‌نه‌ كو جهێ گۆمانێ نه‌، “ب ره‌نگێ گشتى په‌يوه‌ندى د ناڤبه‌را پێشمه‌رگێ كوردستانێ و حه‌شه‌دش شه‌عبى ژى دا نه‌ماينه‌”.

ئه‌ڤى فه‌رماندێ پێشمه‌رگه‌ى نه‌ڤه‌شارت ژى كو ئه‌وان ئاماده‌كاريێن باش كرينه‌ چونكو گه‌له‌ك جاران د شه‌ران دا دێ ل ئه‌رده‌كى ئالوزيان په‌يدا كه‌ن و ل جهه‌كێ دى دێ ب ره‌نگه‌كێ گه‌له‌ك به‌رفره‌هـ هێرشێ به‌ن، “ژ به‌ر ڤێ چه‌ندێ ژى مه‌ هه‌موو ئاماده‌كارى بۆ هه‌ر روودانه‌كا نه‌خواستى كرينه‌”.

ته‌كست ژى ل سه‌ر وێ چه‌ندێ كر كو چو جاران پێشمه‌رگه‌ بۆ شه‌رى ده‌ستپێشخه‌ر نابيت، به‌لێ رێ ناده‌ت چو كه‌س و لايه‌نه‌ك ژى ده‌ستدرێژيێ بكه‌نه‌ سه‌ر ئاخا وان.