ئەڤرۆ نیۆز،زنار تۆڤی:

دادگەها ڤەکۆلینا رەسافە فەرمانا دەستگیرکرنێ بۆ سەرۆک و ئەندامێن کۆمیسیۆنا بلند یا سەربەخۆیا هەلبژاردنا ل هەرێما کوردستانێ دەرکر،کو ئەڤە بەرۆڤاژی بریارا دادگەها فیدرالیا عێراقێ یە،کو سەرپەرشتیا گشتپرسیا سەربەخۆیا هەرێما کوردستیانێ کریە.

دادوەر عەبدولستار بەیرەقدار،پەیڤدارێ جڤاتا بلند یا دادوەری راگەهاند دادگەها ڤەکۆلینا رەسافە فەرمانا دەستگیرکرنێ بۆ سەرۆک و ئەندامێن کۆمیسیۆنێ دەرکر،یێن کو سەرپەرشتیا گشتپرسییێ کری ل هەرێما کوردستانێ.

بەیرەقدار هەروەسا دبێژیت ئەڤ فەرمانە پشتی هندێ هاتیە دەرکرن،دەمێ کو جڤاتا ئاسایشا نیشتمانی سکالایەک تۆمار کری،ژبەر هندێ کو ئەو گشتپرسی بەرۆڤاژی فەرمانا دادگەها بلند یا فیدرالی بوویە، جەخت ل هندێ ژی کریە کو بریارا دەستگیرکرنا تۆمەتباران،ل دووڤ ماددێ 329 یێ یاسایا سزادانێ یە.

رۆژا دوشەمبێ 18-9-2017، دادگەها فیدرالی ل عێراقێ ب ئامادەبوونا سەرجەم ئەندامان كۆمبوویە و ڤەکۆلین ل وان داخوازیان کریە یێن کو داخوازا راگرتنا رێكارێن ئەنجامدانا گشتپرسیێ دکر، پاشی ئەنجامدانا گشتپرسیێ رەتکریە و ب کارەکێ نە یاسایی و نە دستووری ب قەلەم دایە، بەلێ هەرێما کوردستانێ ل رۆژا 25 ئیلۆنێ، گشتپرسی یا سەربەخۆیێ ئەنجامدا و رێژەیا زێدەتر ژ 92% یا دەنگدەران د گشتپرسیێ دا، دەنگ بۆ سەربەخۆیا کوردستانێ دایە.

بریارا دادگەها رەسافە ژی د دەمەکێ دایە کو د کۆمبوونا 9-10-2017 یا جڤاتا ئاسایشا نیشتمانی یا عێراقێ ب سەرۆکایەتیا عەبادی، ب ئەگەرێ ئەنجامدانا گشتپرسیا سەربەخۆیا کوردستانێ، چەند بڕیارەکێن نوو ل دژی هەرێما کوردستانێ دەرکرن،کو ل دووڤ راگەهاندنا وێ کۆمبوونێ کو وێ جڤاتێ دووڤچوون بۆ بەرزکرنا داخوازیێ ژلایێ داواکارێ گشتی کریە،هەروەسا لیستەک ب ناڤێ تۆمەتباران هاتیە ئامادەکرن بۆ هندێ رێوشوێنێن یاسایی بەرامبەر بگرنە بەر.

ئەڤرۆ نیۆز،زنار تۆڤی:

دادگەها بلند یا عێراقێ رەتکر کو دۆسیا 10 پەرلەمانتارێن کورد وەربگریت کو لیژنەکا پەرلەمانێ عێراقێ بریارا دوورخستنا وان ل پەرلەمانێ عێراقێ پەسەند کربوو ، ب ئەگەرێ بەشداریکرنا وان د ریفراندۆمێ دا.

رۆژا 7-10-2017 لیژنا کاتیا پەرلەمانی کو ژ هەردو لیژنێن یاسایی و کاروبارێن پەرلەمانتاران پێکهاتیە، ب ئەگەرێ بەشداریکرنا وان د گشتپرسیێ دا، بریارا دوورخستنا 10 پەلەمانتارێن کورد دەرکریه.

ئەو پەرلەمانتارێن کو ناڤێن وان هاتینە بەرزکرن پێکهاتینە ژ: ئارێز عەبدولا، سەرۆکێ فراکسیۆنا ئێکەتیێ، عەرەفات کەرەم، سەرۆکێ فراکسیۆنا پارتی، موسەنا ئەمین، سەرۆکێ فراکسیۆنا ئێکگرتوویا ئیسلامی، شاخەوان عەبدولا جێگرێ سەرۆکێ فراکسیۆنا پارتی، هەروەسا پەرلەمانتاران نەجیبا نەجیب، ئەشواق جاف، عادل نوری، عەبدولعەزیز حەسەن و ڤیان دەخیل.
ل بەرامبەر بەرزکرنا وێ داخوازیێ بۆ دادگەها فیدرالی یا عێراقێ، دادگەهێ راگەهاند ،کو بریاردان دربارەی وان پەرلەمانتاران کارێ مە نینە.