ئه‌ڤرۆ نیوز ، نه‌وزاد هلۆرى:
ئه‌ڤرۆ به‌رى نیڤرۆ جێگرێ سه‌رۆكێ پارتى دیموكراتى كوردستان لسه‌ر ده‌ستپێشخه‌ریا ئه‌میندارێ گشتیێ ئێكگرتوویا ئیسلامیا كوردستانێ سه‌ره‌دانا مه‌كویا سه‌ره‌كى یا ته‌ڤگه‌را گۆڕانێ ل سلێمانى كر و د كومبوونه‌كا دوو ده‌مژمێرى دا دانوستاندن لسه‌ر چه‌ند پرسه‌كێن هه‌رێمێ و عیراقێ هاتنه‌كرن.
نێچیرڤان بارزانى جێگرێ سه‌رۆكێ پارتى دیموكراتى كوردستان د هه‌ڤدیتنه‌كێ دا دیاركر كو ئه‌وان ل گه‌ل گۆڕانێ ئاشكراترین كومبوون ئه‌نجام دایه‌ و گۆت: ( ئه‌م به‌رهه‌ڤین كو گه‌شه‌پێدانێ ب كومبوونێن خوه‌ بده‌ن و ئه‌م چاڤه‌رێ گۆڕانێ دكه‌ین كو به‌رسڤا مه‌ بده‌ن )

ل بارا په‌یوه‌ندیێن دناڤبه‌را هه‌رێما كوردستان و عیراقێ ناڤبرى بو رووداو گۆت: (هه‌لویستێ هه‌رێما كوردستانێ ل گه‌ل به‌غدا روونه‌ و داخوازا دانوستاندنێن بى َمه‌رج ژى دكه‌ین ، بزاڤێن به‌غدا و په‌نابرنه‌ به‌ر ده‌رڤه‌یێ عیراقێ داكو گڤاشتنان لسه‌ر هه‌رێما كوردستانێ بكه‌ن د به‌رژه‌وه‌ندیا عیراق و وان وه‌لاتان ژى دا نینه‌ ، و دڤێت عه‌بادى ل وێ یه‌كێ تێبگه‌هیت كو بابه‌ت عیراقیه‌ نه‌ك ده‌ره‌كى)

ل گوره‌ى ئاخفتنێن نێچیرڤان بارزانى حه‌فتیا داهاتى فوئاد مه‌عسووم سه‌رۆك كومارێ عیراقێ بو ده‌ستپێكرنا دانوستاندن دناڤبه‌را هه‌موو لایه‌نان دێ راگه‌هینیت و ل بارا هه‌لبژاردنێن داهاتیێن هه‌رێما كوردستانێ ژى گۆت: ( حزبێن كوردستانێ لسه‌ر بابه‌تێ هه‌لبژاردنان دێ كوم بن و پاشان بریارا خوه‌ لسه‌ر ده‌ن)

ئه‌ڤرۆ نیوز ، هلورى:
سه‌رۆكێ په‌رله‌مانێ عیراقێ به‌ر ب هه‌ولێر كه‌فته‌ رێ بو كومبوون ل گه‌ل سه‌رۆكێ هه‌رێما كوردستانێ و ل گوره‌ى راگه‌هاندنا نڤیسینگه‌ها جبوورى دێ داوى گورانكاریێن كوردستان و عیراقێ دكومبوونا وان دا هێنه‌ به‌حسكرن.

نڤیسینگه‌ها سه‌لیم جبوورى سه‌رۆكێ په‌رله‌مانێ عیراقێ دراگه‌هاندنه‌كێ دا دیاركر كو سه‌لیم جبورى ده‌مه‌ك به‌ریا نها به‌ر ب هه‌ولێر كه‌فته‌ رێ و دێ ل گه‌ل مه‌سعود بارزانى سه‌رۆكێ هه‌رێما كوردستانێ كومبیت و كومبوونا وان ژى دێ دانوستاندن بیت لسه‌ر داوى گورانكارى و پێشهاتێن عیراق و كوردستانێ.

دهێته‌ زانین كود وهى مه‌سعود بارزانى سه‌رۆكێ هه‌رێما كوردستانێ دكومبوونه‌كا سێ قولى دا لگه‌ل هه‌ردوو جێگرێن سه‌روك كومارێ عیراقێ كومبوو و تێدا رێكه‌فتن لسه‌ر چوار خالان هاتنه‌كرن ژ وانان راكرنا هه‌موو وان سزایێن كو په‌رله‌مان و حكومه‌تا عیراقێ لسه‌ر هه‌رێما كوردستانێ سه‌پاندى.