ئەڤرۆ نیۆز،زنار تۆڤی:
فەرماندێ هێزێن پۆلیسێن فیدرالی یێن عێراقێ فەریق رائید شاکر جەودەت دا دیارکرن:کو هێزێن پۆلیسێن فیدرالی شیاینە پێشرەویێ ل شەرێ ئازادکرنا مۆسلێ دا بکەن و هەروەسا ئەو شاینە ل باژێرێ کەڤن 32 داعشان ب کوژن و دیسا هێزێن وان 4 ماتۆرسکل و سێ جهێن رەشاشەیان ژناڤبرینە و گۆت ژی هێزێن مە ب کووراتیا 200 مەتران چووینە دناڤ جادا فاروق دا،مە کونترۆل ل سەر مزگەفتا هادی و ئاڤاهیێ بەرەڤانیا باژێری ژی کریە.
ئەڤرۆ نیوز ، نەوزاد هلوری:
شڤێدی چەکدارێن داعش خوە گەهاندە سنورێ مێحوەرێ دوزخورماتو و پشتی سێ دەمژمێرێن شەرەکێ گران پێشمەرگیان شیان هێرشا داعش بشکێنن و هژمارەکا چەکدارێن وان ژی بکوژن.
ژێدرەکێ دناڤا هێزێن پێشمەرگەی ل مێحوەرێ دوزخورماتو تایبەت بو ئەڤرۆ نیوز گۆت: (شڤێدی دەردورێن دەمژمێر 1:00 ب شەڤ چەکدارێن داعش ژ سێ لایان ڤە شیان خوە بگەهینن سەنگەرێن پێشمەرگەی ل گوندێ زەرگە ل مێحوەرێ دوزخورماتو ل پارێزگەها
کەرکوکێ ، ھێزێن پێشمەرگەی ژی ب توندی بەرسڤا وان دا ، پشتی سێ دەژمێران ژ شەرەکێ گران ب هاریکاریا فروکێن هەڤپەیمانان هێرشا داعش هاتە شکاندن و هژمارەکا چەکدارێن داعشێ هاتینە کوشتن و تەرمێن وان کەفتینە دەستێن پێشمەرگەیان)
زێدەتر گۆت: (ب مخابنیڤە هێزێن پێشمەرگەی شەهیدەک هەیە کو خەلکێ پارێزگەها حەلەبچەیە ل گەل بریندارەکێ سڤک)
ل گۆرەی زانیارێن ئەوی ژێدەری شەرێ شڤێدی ب هێزترین شەربوویە ل مێحوەرێ دوزخورماتو و چەند ترومبێلەکێن TNT کری و چەکدارێن خوە کوژ ژی دناڤ دا هەبون بەلێ هەموو هاتن ژناڤبرن.
شەرێ شڤێدی دبیتە شەرێ سێ ل مەها رەمەزانا پیرۆز کو دناڤبەرا هێزێن پێشمەرگەی و داعش ل دەڤەرێ دروست دبیت.
ئه‌ڤرۆ نیۆز،زنار تۆڤى:
میدیایێن توركى وه‌سا داینه دیاركرن،كو هه‌تاكو نوكه بتنێ مه‌هه‌پێ وه‌ك چاره‌مین پارتا مه‌زن دناڤ توركیا دا،دژایه‌تیا خوه بۆ ریفراندۆمێ و سه‌ربخۆیا كوردستانێ ده‌ربریه،هه‌روه‌سا ئاكپارتى ژى كو مه‌زنه پارتا ده‌ستهه‌لاتداره ل توركیا هه‌تاكو نوكه بێده‌نگى هه‌لبژارتیه و هه‌ده‌پێ ژى پشته‌ڤانیا خوه بۆ ریفراندۆما كوردستانێ دوپاتكریه.
ژلایه‌كێ دیڤه گۆتیه،نوكه دناڤ په‌رله‌مانێ توركیا دا بتنێ 4 پارتێن سه‌ره‌كى چووینه دناڤ په‌رله‌مانى دا،ئه‌و ژى ئاكپارتى و جه‌هه‌په و هه‌ده‌په و مه‌هه‌په نه،پارتێن دى یێن توركیا،ژبه‌ركو نه شیاینه به‌ربه‌ستا هه‌لبژارتنا بشكێنن كو رێژا 10% یا ده‌نگانه،له‌ورا وان پارتان ئێك كورسییێ په‌رله‌مانى ژى نینه.
د ڤان هه‌لبژارتنێن دوماهیێ دا ئاكپارتى 317 كورسیێن په‌رله‌مانى ب ده‌ستڤه ئیناینه و شیایه بتنێ حوكمه‌تێ پێك بینیت،هه‌تاكو نوكه ئاكپارتیێ ب فه‌رمى دژایه‌یتا خوه بۆ سه‌ربخۆیا كوردستانێ رانه‌گه‌هاندیه،هه‌روه‌سا بتنێ وه‌زاره‌تا ده‌رڤه و هنده‌ك رایه‌دارێن حوكمه‌تا توركیا راگه‌هاندنه‌ك به‌لاڤكریه و گۆتیه،نوكه ده‌م نه‌یێ گونجایه بۆ سه‌ربخۆیا كوردستانێ و ئه‌م ل گه‌ل ئێكپارچه‌یا ئاخا عێراقێ داینه،به‌لێ هه‌تاكو نوكه ئاكپارتى چ به‌یاننامێن فه‌رمى دڤى وارى دا به‌لاڤ نه‌كرینه،هه‌روه‌سا ب فه‌رمى دژایه‌تیا خوه بۆ ریفراندۆمێ دیار نه‌كریه،دیسا هنده‌ك ئه‌ندام په‌رله‌مانێن ئاكپارتى ژى ب ئاشكرایى داخواز ژ پارتا خوه كرییه كو پشتگیریا سه‌ربخۆیا كوردستانێ بكه‌ن،چونكى ب چ ره‌نگان نابیته مه‌ترسى بۆ سه‌ر ئاخا توركیا.
میدیایا توركیا ئه‌و ژى دیاركریه،كو جه‌هه‌پێ ژى 134 كورسى دناڤ په‌رله‌مانێ توركیا دا هه‌نه،هه‌تاكو نوكه وان چ داخویانى ل سه‌ر ریفراندۆمێ و سه‌ربخۆیا كوردستانێ نه گۆتینه،هه‌ر چه‌نده هنده‌ك ژ نه‌ته‌وه په‌رستێن توركیا داخواز كریه كو جه‌هه‌په ب فه‌رمى بۆچوونا خوه ل سه‌ر ڤێ پرسێ دیار بكه‌ت،لێ جه‌هه‌پێ هه‌تاكو نوكه بێده‌نگى هه‌لبژارتیه،هه‌ر چه‌نده ئه‌م دشێین بێژین،كو بێده‌نگیا جه‌هه‌پێ بۆ هندێ بوویه،كو دژایه‌تیا ریفراندۆمێ و سه‌ربخۆیا كوردستانێ ناكه‌ت،چونكى وێ دڤێت سه‌رنجا كوردێن باكۆر بۆ خوه راكێشیت،داكو د هه‌لبژارتنێن سالا 2019 بشێت سه‌ركه‌فتنێ ب ده‌ستڤه بینیت.
هه‌روه‌سا هه‌ده‌په ژى مه‌زنترین پارتا كوردییه ل باكۆر كو 59 كورسى د په‌رله‌مانێ توركیا دا هه‌نه و پارتا سییێ یه دناڤ پەرلەمانێ توركیا دا،ب ئاشكرایى پشتگیریا خوه بۆ ریفراندۆمێ و سه‌ربۆخیا كوردستانێ دیاركریه و په‌یڤدارێ وى پارتیێ ئۆسمان بایده‌میرى ژى پشتگیریا خوه بۆ ریفراندۆمێ و سه‌ربخۆیا كوردستانێ ده‌ربریه،دیسا چه‌ندین په‌رله‌مانتارێن هه‌ده‌پێ ب رێیا سۆسیال میدیایێ دلخۆشیا خوه بۆ ڤێ پێنگاڤێ ده‌ربریه و پشتگیریا ریفراندۆما هه‌رێمێ كریه،هه‌روه‌سا مه‌هه‌په پارتیا ئێكانه‌یه دناڤ په‌رله‌مانێ توركیا دا كو ب فه‌رمى دژایه‌تیا خوه بۆ ریفراندۆمێ و سه‌ربخۆیا كوردستانێ ده‌ربریه،هه‌لویستێ ڤێ پارتیێ هه‌موو گاڤان ل دژى كوردانه،دیسا د هه‌لبژارتنێن بورى دا 40 كوردى ب ده‌ستڤه ئیناینه،هه‌روه‌سا ده‌وله‌ت باخچه‌لى كو سه‌رۆكێ ڤێ پارتیێ د گۆتاره‌كێ دا كو بۆ ئه‌ندامێن پارتیا خوه دناڤ په‌رله‌مانى دا پێشكێشكریه،داخواز ژ حوكمه‌تا توركیا كریه،كو هه‌لویسته‌كێ توند هه‌بیت هه‌مبه‌رى ریفراندۆما كوردستانێ و داخواز ژ حوكمه‌تا توركیا كریه،كو هێزێ ژى ب كار بینیت،به‌لێ ب چ ره‌نگان كه‌سێ پشته‌ڤانیا گۆتنێن وى نه‌كر و گۆتنێن وى كوردێن باكۆر نیگه‌ران كربوون.
پارتا وه‌ته‌نیا توركى كو دۆگۆ په‌رینجه‌ك سه‌رۆكاتیا وێ دكه‌ت و چ كورسى ژى د په‌رله‌مانێ توركیا دا نینن،د هه‌ڤپه‌یڤینه‌كێ دا گۆتیه،توركیا هه‌مبه‌رى ریفراندۆمێ بۆ سه‌ربخۆیا كوردستانێ نابیته بینه‌ر،چونكى ئه‌ڤە پلانه‌كا ئه‌مریكا یه و وێ دڤێت ده‌وله‌تا ئسرائیلا دویێ ل ڤێ ده‌ڤه‌رێ دروست بكه‌ت،هه‌روه‌سا هه‌كه كوردستان ببیته ده‌وله‌ت دێ كاریگه‌ریه‌كا خراب كه‌ته سه‌ر ئێكپارچه‌یا ئاخا توركیا،هه‌روه‌سا دۆگۆى دیاركریه ژى،ماده‌م ئه‌نقه‌ره رێك دایه هه‌رێما كوردستانێ كو نوونه‌راتیا خوه ل توركیا ڤه‌كه‌ت،ئه‌و دێ رازى ژى بیت كو ئه‌ڤ نوونه‌راتیه ببیته كۆنسلخانه و بالیۆزخانه ژى،دیسا داخواز كریه كو پێدڤیه توركیا بۆ ئێك پارچه‌یا ئاخا سوریێ و عێراقێ هێزێ ژى ب كار بینیت،چونكى د داهاتى دا ئه‌ڤه دێ بیته مه‌ترسى بۆ سه‌ر ئێك پارچه‌یا ئاخا توركیا.
ئه‌ڤرۆ نیۆز،زنار تۆڤى:
كریستیانۆ رۆنالدۆ یێ پرتۆگالى و یاریكه‌رێ یانا ریال مه‌درید یا ئیسپانى،مه‌رجه‌ك بۆ مانا خوه ل یاریگه‌ها “سانتیاگۆ برنابیۆ” دانایه،كو ژ یانا شاهانه نه‌چیت ل هاڤینا بهێت،هه‌روه‌سا ده‌زگه‌هێن راگه‌هاندنێ ل پرتۆگالێ ژى وه‌سا داینه دیاركرن،كو كریستیانۆ رۆنالدۆ گه‌له‌ك توره‌بوویه،كو خوه ژ دانا باجێ ڤه‌دزیه،له‌ورا وى ڤیایه كو ژ ئیسپانیا ب چیت و بۆ خوه ل یانه‌كا دى ب گه‌ریت.
هه‌روه‌سا ئه‌نجۆمه‌نێ رێڤه‌به‌رێ یانا شاهانه ب سه‌رۆكاتیا فلورینتینۆ پیرێزى چاڤه‌رێى هندێ نه،كو پشتى جاما كۆپا جیهانى یا كیشوه‌ران ل رووسیا ب دوماهى بهێت،ئه‌و دێ ل گه‌ل رۆنالدۆى ئاخڤن و دێ وى رازى كه‌ن،كو ب مینیته ل ناڤ رێزێن یانا شاهانه.
د ڤى وارى دا رۆژناما”میرۆر” یا بریتانى دیاركریه،كو كریستیانۆ رۆنالدۆى دڤێت یانا شاهانه وى گۆژمێ پاران بده‌ت،ئه‌وێ وه‌كو باج كه‌فتیه سه‌ر وى،كو ئه‌و ژى 14 ملیۆن و 700 هزار یورۆنه،ژ پێخه‌مه‌ت ئه‌و رازى بیت و ب مینیته دناڤ رێزێن یانا ریال مه‌درید یا ئیسپانى دا،ئه‌ڤه چاره‌سه‌ریا ئێكانه یه بۆ مانا رۆنالدۆى ل یاریگه‌ها”سانتیاگۆ بێرنابیۆ”،هه‌روه‌سا دادگه‌ها مه‌درید،كریستیانۆ گونه‌هباركریه ب خوه ڤه‌دزینێ ژ دانا باجێ ب گۆژمێ 14 ملیۆن و 700 هزار یورۆیا،هه‌روه‌سا دیاركریه كو ژ سالا 2010 هه‌تانوكه نوكه رۆنالدۆى داهاتیێ خوه ل ئیسپانیا ڤه‌شارتیه و باج ژى نه‌دایه،له‌ورا د ماوێ ڤان سالان دا هنده باج كه‌فتیه سه‌ر وى،هه‌روه‌سا راپۆرتێن رۆژنامه‌ڤانى داینه دیاركرن كو ستێرا پرتۆگالى زێده‌بارى هاتیه تۆمه‌تباركرن ب نه‌دانا باجێ،مه‌ترسیا هندێ ژى ل سه‌ر هه‌یه كو 7 سالان بهێته زیندانكرن،له‌ورا وى ڤیایه ژ ئیسپانیا ب چیت.
دهێته زانین كو كریستیانۆ رۆنالدۆ ل سالا 2009 ژ یانا مانجسته‌ر یۆنایتد یا ئنگلیزى په‌یوه‌ندى ب یانا ریال مه‌درید كریه،كو بهایێ گرێبه‌ستا وى ژى 94 ملیۆن یورۆ بوون،هه‌روه‌سا رۆنالدۆى به‌رى نوكه گرێبه‌ستا خوه هه‌تاكو سالا 2021 ل گه‌ل یانا ریال مه‌درید درێژ كریه.
ئەڤرۆ نیوز ، نەوزاد ھلۆری:
دەمەک بەریا نھا چەند چەکدارێن داعشێ خوە گەھاندنە سنوورێ گوندێ زەرگە ل مێحوەرێ دوزخورماتو و ھێزێن پێشمەرگەی ژی بەرسڤا وان دا و ھەتا بەرھەڤکرنا ئەڤی نوچەی شەر بەردەوامە.
ژێدەرەکێ ژ مێحوەرێ دوزخورماتو کو نەڤی ناڤی َخوە ئاشکرا بکەت و ژلایێ ئەڤرۆ نیوز ناڤێ وی پاراستی یە تایبەت بۆ ئەڤرۆ نیوز گۆت: (دەردورێن دەمژمێر1:00 ب شەڤ چەند چەکدارەکێن سەر ب رێکخراوا تیرورستی یا داعش ژ دوول لایان ڤە خوە گەھاندە مێحوەرێ دوزخورماتو ل گوندێ زەرگە یا سەر ب پارێزگەھا کەرکوک ، و ھێزێن پێشمەرگەی ژی ب توندی بەرسڤا وان دا و ھەتا نھا ژی شەر بەردەوامە)
زێدەتر گۆت: (ھەتا نھا چوو زیانێن داعش و پێشمەرگەی دیار نینن ، بەلێ شەرەکێ گەرم دناڤبەرا ھەردوو لایان بەردەوامە و پێشمەرگە بەرگریەکا باش دکەت و فرۆکەیێن ھەڤپەیمانان ژی ب دژواری چەکدارێن داعش بوردومان دکەن)
دھێتە زانین کو ئەڤە جارا سێیێ یە د مەھا رەمەزانێ دا چەکدارێن داعش ل ھەمان جھی ھێرشی سەر سەنگەرێن پێشمەرگەی دکەت.
ئەڤرۆ نیوز ، بێوار ھوکی:
ئەڤرۆ ژلایێ لژنا ئابووری یا قەزا سوران دەست ب سەر 161 پارچەیێن کەلوپەلێن دەم ب سەرڤەچویی ھاتە گرتن و پاشان ھەموو ھاتنە ژناڤبرن.
دڤی واریدا ئازاد تەوفیق سەرپەرشتیارێ لژنا ئابووری ل قەزا سوران بو ئەڤرۆ نیوز گۆت: (ئەڤرو د ھەوەکا لیگەریانێ دا بو چەند تاخ و بازارێن سەنتەرێ قەزا سوران شیاین دەست ب سەر 72 پارچەیێن قیمەیێ مریشکێ و 40 پارچەیێن قبمەیێ گوشتێ سوور و 29 پارچەیێن پەنیری و 24پارچەیێن دوویێ ئیرانی و 25 پارچەیێن ماسیێ بەستی بگرين کو ھەموو دبوونە 161 پارچە و دوڤدا ھەموو ھاتنە ژناڤبرن )
زێدەتر گۆت: (لژنا مە بو پاراستنا سەر و مال و ساخلەمیا وەلاتیان بەردەوامە و ھەر تشتەکێ ببینیت ئێکسەر دگریت و ژناڤ دەبەت ژ بەرڤێ داخوازێ ل دوکاندار و خودان بازاران دکەین کو کەلوپەلێن دەم ب سەرڤەچویی نەفروشن)
ئەڤرۆ نیوز ، نەوزاد ھلۆری:
پشتی مەغرەبیا ئەڤرۆ فروکەیێن شەرکەرێن تورکی ئاسمانێ باشوورێ کوردستانێ بەزاند و چەند جھەکێن دەڤەرا ئامێدیێ بوردومانکرن.
ژێدەرەکێ ل دەڤەرا نھێلێ یا سەر ب قەزا ئامێدیێ بۆ ئەڤرۆ نیوز گۆت: (ئەڤرو پشتی نڤێژا مەغرەب فرۆکێن شەرکەرێن تورکی ب بھانەیا ھەبوونا بنگەە و بارگایێن پارتا کرێکارێن کوردستانێ چەند جھەکێن دەڤەرا ئامێدیێ بوردومانکرن وەکو چیایێ گارە و چیایی َمەتین ، و دیسان گەلەک نزم ل ھنداڤیا چەند گوندەکێن دەڤەرا نھێل و سەنتەرێ ناحیا دێرەلوک ھاتن و چوونێ دکەن )
ژلایەکێ دی ڤە پەیامنێرێ ئەڤرۆ نیوز ل ناحیا دینارتە دیارکر کو ئەڤ شەڤە فروکێن تورکیا شەش جاران گوندێ کافیا یا سەر ب دەڤەرا زێبار بوردومانکر و ئاگر بەربویە رەز وبیستانێن وەلاتیان.
ل گورەی زانیاریێن ئەڤرۆ نیوز ژبەر ھاتنا ھژمارەکا سەربازێن سوپایێ تورکیا بو دەڤەرا زاب و چەلێ ماوەیێ چەند رۆژایە شەر و پەڤچوون دناڤبەرا گەریلایێن پەکەکێ و سەربازێن سوپایێ تورکیا دەست پێ کریە و ھژمارەکا زور یا سەرباز و گەریلایان ھاتینە کوشتن.
ئەڤرۆ نیۆز،زنار تۆڤی:
ژێدەرکێ هایدار بناڤێ خدر دیرۆ خانەسۆری بۆ ئەڤرۆ نیۆز دا دیارکرن:کو ل دەمژمێر 3 ئێڤاریا رۆژا دوشەمبی 19.6.2017 کەسەکێ ئێزدی بناڤێ”س،ع،م”کو شڤانێ پەزی بوو ل دڤەرا سەردەشتێ ل چیایێ شنگالێ،ژلایێ هندەک چەکدارێن نە نیاس ڤە تەقە لێ هاتیە کرن و د جهدا کوشتیە،هەروەسا ئەو چەکدار رەڤینە و ناسناما وان نەهاتیە زانین،ئەو ژی گۆتیە:کو ل هەیڤێن بوری ژی دا هندەک حالەتێن ب ڤی رەنگی رووداینە.
ئه‌ڤرۆ نیۆز،زنار تۆڤى:
سترانبێژێ باكۆرێ كوردستانێ ئاراس ئه‌رده‌لان د هه‌ڤپه‌یڤینه‌كێ دا بۆ ئه‌ڤرۆ نیۆز دیاركر:هه‌ر زوو حه‌زا سترانگۆتنێ ل ده‌ف من په‌یدا بوویه،هه‌روه‌سا ل ده‌ستپێكا كارێ من یێ سترانگۆتنێ دا من چه‌ندین ستران ب شێوه‌كێ ساده ل گه‌ل ئامیرێ سازێ گۆتینه و من كرینه د مالپه‌رێن جڤاكى دا و ب ڤى ره‌نگى ئه‌ز شیام هونه‌رێ خوه بۆ خه‌لكێ كوردستانێ ب ده‌مه نیاسین و ل دووڤ دامن سێ كلیپ ب ره‌نگه‌كێ پرۆفشیۆنال چێكرینه،هه‌روه‌سا ئه‌ز سترانان ب شێوه‌زارێ زازاكى ژى دبێژم و د سترانێ دا هه‌رده‌م من ڤیایه ئه‌ز ئێش و ئازارێن جڤاكێ خوه ب ده‌مه دیاركرن،ئاراس هێشتا دبێژیت:نوكه ئه‌ز مژوولى چێكرنا ئه‌لبۆما خوه یا نوو مه یا ب ناڤێ”ئه‌ز خه‌لكێ كوردستانێ مه” كو دێ ل دوماهیا ئه‌ڤ ساله دا كه‌ڤیته بازارى و چه‌ندین ستران ژى من تۆمار كرینه،هه‌روه‌سا پرانیا سترانێن خوه من په‌یڤ و ئاواز داناینه و دیسا من گه‌له‌ك په‌یڤ و ئاواز داینه چه‌ندین سترانبێژێن كورد ل هه‌موو پارچێن كوردستانێ،گۆت ژى:ئه‌ز ئامیرێ سازێ و گیتارێ دژه‌نم و هه‌روه‌سا ژه‌نینا ڤان هه‌ردو ئامیران گه‌له‌ك هاریكاریا من دكه‌ت بۆ دانانا ئاوازێن سترانان.
ئاراس ئه‌رده‌لان خه‌لكێ باژێرێ وانێ یه ل باكۆرێ كوردستانێ و چه‌ندین سالان ل ئورۆپا ژیایه و نوكه ژى ل باژێرێ سته‌نبۆلێ ل توركیا دژیت.
نيشاندان