ئه‌ڤرۆ نیۆز،زنار تۆڤى:
پرودۆسه‌ر مه‌مه‌د ئاكتاش د دیداره‌كێدا بۆ ئه‌ڤرۆ نیۆز دیاركر:كو هه‌تاكو نوكه وى 25 فلمێن كوردى به‌رهه‌م ئیناینه و هه‌روه‌سا وى ئه‌ڤ ساله فلمه‌ك ل سه‌ر ژیانا سینه‌ماكارێ كورد یلماز گۆناى چێكریه و پشكدارى د فلمه فیستیڤالا دهوكێ یا پێنجێ دا كریه و گۆت ژى:ئه‌ز شانازێ ب ڤى فلمى دبه‌م،چونكى یلماز گۆناى بابێ سینه‌ما كوردى یه،ئه‌وى بنگه‌هێ سینه‌ما كوردى دانایه،له‌ورا ئه‌ز دبێژم سینه‌ما كوردى د زیندانێ دا ژ دایك بوویه،ئه‌و ژى ب سایا فلمێن یلماز گۆناى بووینه،هه‌رده‌م ئه‌ز قه‌ردارێ وى مه.
ناڤهاتى ئه‌و ژى گۆت:فلمێ “ئه‌ڤ سانه‌یا یلماز گۆناى” وه‌كى باره‌كێ بوو ل سه‌ر ملێن من و دڤیابا هه‌ر من چێكربا،من و ده‌رهێنه‌ره‌كێ كورد ب ناڤێ “حسێن تاباك”د ماوێ 7 سالان دا مه ئه‌ڤ فلمه چێكریه،ب ڤى فلمى مه رێزگرتنه‌كا مه‌زن ل ڤى سینه‌ماكارێ كورد كریه،هه‌روه‌سا ئه‌ڤ فلمه دێ پشكداریێ د فیستیڤالا تورنتۆ ل كه‌نه‌دا ژى كه‌ت،هه‌تاكو نوكه 50 فیستیڤالان داخوازا پشكداریكرنا ڤى فلمى كریه ل جیهانێ.
هێشتا دبێژیت:هه‌موو فلمێن من پشكدارى د فیستیڤالێن جیهانى دا كرینه،هه‌روه‌سا هه‌كه سینه‌ما كوردى مێژوویه‌كا نه‌ته‌وه‌یى هه‌بیت،دێ فلمێن كوردى پشكداریێ د هه‌موو فیستیڤالێن جیهانى دا كه‌ن،دیسا وى هیڤى هه‌نه كو فلمه فیستیڤالا دهوكێ ل نێزیك دێ بیته فیستیڤاله‌كا جیهانى و دێ پێنگاڤێن مه‌زن هاڤێژیت،هه‌روه‌سا نوكه سینه‌ما كوردى گه‌هشتیه ئاستێ سینه‌ما توركى و عه‌ره‌بى و ئه‌م ژ وان بورینه ژى،دیسا ئه‌و دێ گه‌ل حسێن حه‌سه‌ن و شه‌وكه‌ت ئه‌مین دێ فلمه‌كێ نوو چێكه‌ت،هه‌روه‌سا هه‌كه ئه‌م ل سه‌ر ئێش و ئازار و ژیانا رۆژانه یا كوردان و پێشمه‌رگێ كوردستانێ فلمان چێكه‌ین،دێ گه‌له‌ك سه‌ركه‌فتنێ تێدا ئینین و دێ سینه‌ما كوردى گه‌له‌ك پێشكه‌فتنێ ب خوه‌ڤه بینیت.
نيشاندان