ئه‌ڤرۆ نیۆز،زنار تۆڤى:

ئه‌ڤرۆ ئه‌ینیێ 22/9/2017 و ل ده‌مژمێر 3 ئێڤارى  و ب هەڤکاریا کۆمپانیا کار گرۆب ئاهه‌نگه‌كا جه‌ماوه‌رى یا مه‌زن بۆ پشته‌ڤانیا ریفراندۆما سه‌رخوه‌بوونا كوردستانێ ل ده‌شتا دوورێ ل ده‌ڤه‌را به‌روارى بالا”ناحیا كانى ماسێ” ب به‌رهه‌ڤبوونا ئه‌ندامێن سه‌ركردایه‌تیا پارتى و په‌رله‌مانتار و دامو ده‌زگه‌هێن حزبى و حكومى و هژماره‌كا مه‌زن یا خه‌لكێ ده‌ڤه‌رێ ژ موسلمان و كریستیانان هاته‌ سازكرن.

د وێ ئاهه‌نگێ دا سه‌ربه‌ست تروانشى ئه‌ندامێ سه‌ركردایه‌تیا پارتى و به‌رپرسێ لقێ ئێك یێ پارتى دیمۆكراتى كوردستان په‌یڤه‌ك پێشكێشكر و تێدا دیاركر:كو ب درێژاهیا مێژوویێ ب سه‌دان هزار وه‌لاتى بووینه‌ قوربانیێن سیاسه‌تێن شاش یێن ده‌ستهه‌لاتدارێن عێراقێ و مه‌ ل سه‌ر ده‌ستێ حوكمه‌تێن ئێك ل دووف ئێكێن عێراقى ئه‌نفال و كێمیا باران و ده‌ربه‌ده‌رى و مالوێرانى و ده‌رده‌سه‌رى دیتینه‌،هه‌روه‌سا گۆت ژى:چو جاران ملله‌تێ مه‌ نه‌بوویه‌ مه‌ترسى ل سه‌ر چو وه‌لاته‌كى،هه‌روه‌سا مافێ مه‌یه‌ كو ئه‌م ژى بگه‌هینه‌ مافێن خوه‌،له‌ورا دێ ریفراندۆمێ ئه‌نجام ده‌ین،داكو بگه‌هینه‌ ئارمانجا خوه‌ یا سه‌ره‌كى كو ئه‌و ژى ده‌وله‌تبوونا كوردستانێ یه‌.

هه‌روه‌سا د وێ ئاهه‌نگێ دا هونه‌رمه‌ندان حه‌سه‌ن شه‌ریف و سدقى بناڤى و سه‌لاح ئه‌مین و مێهڤان بێدۆهى و رێكێش سه‌یرانى و عۆدیشۆى ب سترانێن خوه‌ یێن نه‌ته‌وه‌یى و ب جۆشه‌كا مه‌زن خۆشیه‌كا تایبه‌ت دا ئاهه‌نگا پشته‌ڤانیا ریفراندۆما سه‌رخوه‌بوونێ ل ده‌ڤه‌را به‌روارى بالا.