ئه‌ڤرۆ نيوز:

نە پەیدابوونا موویان د ژیێ سنێلەیێ دا پالپشتیێ ل سەر گەلەک تشتان دکەت و ھەر ئێشانەک د ئەندامێ سێکسی دا رامانەکێ ددەت و ھندەک جاران وەکو ھەموو پشکێن لەشی کوئەندامێ سێکسی ژی تووشی نەخوشیێن مینا پیستی دبیت، دیاربوونا پنیێن رەنگا و رەنگ ل سەر جلکێن ژناڤدا ژی رامانێن خوە ھەنە و نەبوونا حەزا سێکسی ل دەڤ ژنێ گەلەک پەیوەندی ب ھەبوون و نەبوونا زارۆیان ڤە نینە و پێدڤی یە گەنج ژی ھشیاری ساخلەمیا خو بن دا تووشی بەرژەنگێن خراب نەبن.
ل دور پرسیارەکێ کا ئەگەرێن نەدیاربوونا موویان ل ریە و سمبێلان ھێشتا د قۆناغا سنێلەیێ دا چنە و ئەرێ کارتێکرنا وان ل سەر پەیدابوونا زارۆیان ھەیە؟ د.کامیران جەلالەدین، تایبەتمەندێ نەخوشیێن گولچیسکان و میزەرۆیێ دیارکر کو پێدڤی یە ئەم بزانین ھەبوونا گەلەک موویان ل ریە و سمبێلان پالپشتیێ ل سەر گەلەک فاکتوران دکەت ژوانژی، فاکتورێ زکماکی، ھندەک کەس و خێزان ھەنە موویێن وان د زێدەنە و ھندەک ژی بەرۆڤاژی بێی کو نیشانەک بیت ب نەخوشیەکێ، ژ ئەگەرێن دیتر ژی ئەون کو ئەگەر ددەمێ روودانان دا کارتێکرن ل گونێن سنێلەیان بھێتە کرن یان ھندەک نەخوشی پووچ بکەن یان ب درۆستی ب کارێ خو رانەبن یان تەنگەزاری د کرۆموسومان دا ھەبن و ئەڤە ھەلبەت دبنە ئەگەرێ نەزوکیێ و کێمبوونا شیانێن سێکسی.
بەلێ ھندەک گازندەیان دکەن کو ئێشانێن بێ ئەگەر ھەنە ل کوئەندامێ سێکسی د بێ ئارامن و ئەڤ ئێشانە ژ بنێ زکی دەستپێ دکەن ھەتا دگەھیتە ئێشانا پشتێ ئەڤە چ حالەتە؟ دکتوری گۆت:ئەڤە پتر ل دەڤ زوگوردان پەیدابیت و ب تایبەت ئەوێن پەنایێ دبەنە فیریانێن سێکسی ب شێوەیەکێ بەردەوام و دیسان دەستپەری و سواربوونا پایسکلان بۆ دەمەکێ درێژ و ژیانەکا بێ وەرزش ھەمیان رۆل دڤێ چەندێ دا ھەیە کو دبنە ئەگەرێ سۆتنا وێ دەڤەرێ و ب تایبەت پرۆستاتان کو ئەڤ نیشانە لێ پەیدادبن.
دەربارەی ئەگەرێن دیاربوونا پنیێن سپی ل ئەندامێ سێکسی و رێکێن چارەسەریا وان، د.کامیران خویاکر کو
ئەگەرێ وان نەخوشیەکە دبێژنێ سپیلکاتی و ئەو نەخوشیەکا ڤەگر نینە و چ کارتێکرنێ ل رەوشا ساخلەمیا نەخوشی ناکەتن، بتنێ ژ ئەنجامێ راوەستیانا شانەیێن رەنگا و رەنگ ژ کاری پەیدادبیت و رەنگێ سروشتی ژ پیستی دچیت، لەورا ئەڤ جورە پنی یە پەیدادبن کو رەنگێ وان دسپینە و ھەلبەت ل گەلەک جھێن دیتر ژی پەیدادبن و دبیت فاکتەرێن دەروونی و زکماکیێ و بێئارامیێ و ھێدمەیێن دەماران رۆل د پەیدابوونا واندا ھەبیت و بۆ چارەسەریێ پێدڤیە نەخوش پێکھێنەرێن سورالین بخوت و پشتی خوارنا وان بچیتە ل بەر تیرێژا رۆژێ و ھندەک جاران ژی دەرمانێن ب سەرڤەی دھێنە ب کارئینان وەکو کریم و ملحەمان بەلێ پێدڤی یە نەخوش ب ھووری ب کاربینیت ب تایبەت ل سەر ئەندامێ سێکسی داکو چ سەربارک ژێ پەیدانەبن و چارەسەریا وان دەمەک دڤێت ھەتا چارەدبیت.
بەلێ ھندەک جاران پنی ل سەر لباسێن زەلامان دیاردبن و رەنگێ وان ب سەر زەری یان شینی ڤەیە و ھندەک ژی ب سەر خوینێ ڤەنە، ئەرێ پەیدابوونا ڤان نیشانان رامانا تووشبونێ ب نەخوشیەکا سێکسی ددەن؟
دکتوری گۆت: ھەلبەت رەنگ و ئەگەرێن ڤان پنیان د ژێک جودانە، پنیێن زەر ئەوێن ل سەر لباسی دیاردبن، ئەو نیشانا پەیدابوونا نەخوشیا سیلانێ نە و ب تایبەت ئەگەر یا دژواربیت، بەلێ د حالەتێن دومدرێژ دا ب تنێ ل سپێدەھیان دیادبن و ھندەک جاران دگەل دەستئاڤێ و بۆ دەمەکێ درێژ.
ئەگەرەکێ دیتر ژی ھەیە بۆ پەیدابوونا ڤان پنیان ل سەر جلکێن ژناڤدا ئەوژی ل دەمێ گەلەک خوە ددەت و مرۆڤ بۆ دەمەکێ درێژ سەرێ خوە نەشووت، دیسان ھەودانێن میکروبی و ڤایروسی ژی دبنە ئەگەرێ ڤێ چەندێ.
بەلێ ئەو پنیێن خویناوی یان ژ ئەنجامێ خوراندنەکا زێدە پەیدادبن وەکو نەخوشیا گوڕیبوونێ، یان سپیە ھەنە کو ئەوژی نیشانا نەخوشەکا سێکسی نە کو ب رێکا پەیوەندیێن سێکسی یان ب کارئینانا کەل و پەلێن تووشبوی دھێنە ڤەگوھاستن.
سەبارەت کارتێکرنا نەمانا حەزا سێکسی ل دەڤ ژنێ ل سەر پەیدابوونا زارۆیان ژی، تایبەتمەندێ نەخوشیێن میزەرۆیێ دیارکر کو نەمانا حەزا سێکسی دیاروکەک بەرچاڤە ل دەڤ گەلەک ژنان و ژبەر گەلەک ئەگەران پەیداببیت ژوانژی بێئارامی و ئالوزی و ھەستکرن ب ترسێ، دبیت ژی کاودانێن جڤاکی و ژینگەھێ ددەمێ سنێلەیێ دا کارتێکرنا خو ل سەر ڤێ چەندێ ھەبیت و ھەر چاوا بیت ئەڤە نە نەخوشیەکا ئەندامی یە و مادەم ھێکێن ژنێ ئەندامێن دی ب دروستی کارێ خو دکەن، ئەڤێ چەندێ چ کارتێکرنا خو ل سەر پەیدابوونا زارۆیان نینە.