ئه‌ڤرۆ نيوز:
بسپۆرەکێ ئابووری ئاشکرا کر کو ھەموو ئاماژە بۆ وێ چەندێ دچن کو رەوشا ئابووری ل ھەرێما کوردستانێ بەر ب باشتر بچیت و بڕیارە ھەیڤا بھێت پرەکا دی بۆ کاروبارێن بازرگانی د ناڤبەرا ھەرێما کوردستان و وەلاتێ تورکیا دا ل سنوورێ قەزا زاخۆ بھێتە چێکرن و دبێژیت: چێکرنا وێ پرێ دێ کاریگەریێن خوە یێن ئەرێنی ل سەر ئابوورێ ھەرێما کوردستانێ ھەبن.
دکتۆر سەباح خۆشناو، بسپۆرێ ئابووری بۆ رۆژناما ئەڤرۆ ئاشکرا کر، ژ ئەگەرێ قەیرانا دارایی د سێ سالێن بۆری دا؛ ھەرێما کوردستانێ د رەوشەکا دژوار دا دەربازبوو، بەلێ نوکە ھەموو پێشبینی ئەون کو رەوشا ئابووری ل ھەرێما کوردستانێ بەر ب باشتر بچیت و گۆت: “ئەز یێ گەشبینم د پێشەرۆژێ دا ئەڤ گرانیا نوکە ل سەر حوکمەت و خەلکێ کوردستانێ ھەی نامینیت، چونکو راستە ژ ئەگەرێ ئەنجامدانا ریفڕاندۆما سەربخوەیا ھەرێما کوردستانا عیراقێ بەحسێ گرتنا سنووران دھێتەکرن، بەلێ بەروڤاژی ژ لایەکێ دیڤە ئەگەرێن نەمانا کاریگەریێن قەیرانا دارایی زۆر بووینە، ژ وانا بڕیارە تورکیا پرەکا دی یا بازرگانی ل سنوورێ قەزا زاخۆ ل گەل ھەرێما کوردستانێ ڤەکەت، ل گۆرەی پێزانینێن ل بەردەستێ من ھەیڤا داھاتی ل کۆمەلگەھا ئیبراھیم خەلیل دێ دەست ب ڤی پڕۆژەی ھێتەکرن”.
دکتۆر سەباح خۆشناو دیار ژی کر، ژ لایێ ئابووری ڤە ڤەکرنا ڤێ پرێ دێ کاریگەریێن خوە یێن ئەرێنی بۆ زێدەکرنا بزاڤێن بازرگانی د ناڤبەرا ھەرێما کوردستانێ و وەلاتێ تورکیا دا ھەبن، دیسا ژ لایەکێ دیڤە رەوشا دارایی یا حوکمەتا ھەرێما کوردستانێ ژی گەلەک بەرەڤ باشتر چوویە و گۆت: “حوکمەتێ قەڕێ دو کۆمپانیا یێ دای کو ئێک ژ وانا کۆمپانیا دانا غازە و ئێدی ئەڤ کۆمپانیە داخوازا قەرەبووکرنێ ل ھەرێمێ ناکەت، ئەڤ قەڕێ وان کۆمپانیا ژی ل سالا 2015ێ ل سەر ھەرێمێ یێ مای کو پارە بۆ مووچێ فەرمانبەران ھاتبوو مەزاختن، دانا قەڕی ئەرکێ دارایی یێ حوکمەتێ یێ سڤک کری و دێ حوکمەت شێت ب پارێ داھاتێ ناڤخوە و پەتڕۆلێ گەلەک کارێن دی ب رێڤەبەت”.

ئه‌ڤرۆ نيوز:

ئەندامەکێ لیژنا پەروەردێ ئاماژێ ب ڤێ چەندێ دکەت کو بزاڤ یێ دھێنەکرن بھایێ کرێیا خواندنێ بۆ ئەڤ سالە ل زانکۆیێن ئەھلی بھێتە کێمکرن و دبێژیت: پێدڤیە وەزارەتا خواندنا بلند رەوشا ئابووری یا قوتابیان ل بەرچاڤ وەربگریت.
دکتۆر شوان قەلادزەیی، ئەندامێ لیژنا پەروەردێ ل پەرلەمانێ کوردستانێ بۆ رۆژناما ئەڤرۆ ئاشکرا کر، پێدڤیە حوکمەتا ھەرێما کوردستانێ رەوشا ئابووری یا وەلاتیان ل بەرچاڤ وەربگریت بۆ زانکۆیێن ئەھلی و بھایێ خواندنێ ل زانکۆیێن ئەھلی بھێتە ئەرزانکرن و گۆت: “ل گۆرەی زانیاریێن ل بەر دەستێ مە ھژمارەکا زۆرا قوتابیان ژ بەر نەبوونا پارەی بۆ کرێیا خواندنێ یێن ژ خواندنێ ل زانکۆیێن ئەھلی ھاتینە بێ بەھرکرن و ل زانکۆیێن حوکمەتێ ژی ژ بەر کێمیا نمرەیێن وانا نەھاتینە وەرگرتن، لەوڕا ئەم ژی یێ بزاڤا دکەین و داخوازێ ژ وەزارەتا خواندنا بلند و ڤەکۆلینێن زانستی دکەین، کار بۆ داشکاندنا بھایێ خواندنێ ل زانکۆیێن ئەھلی بکەت، ھەر چو نەبیت بلا 20%ێ بھایێ خواندنێ ل زانکۆیێن ئەھلی بھێتە کێمکرن”.
دکتۆر شوان قەلادزەیی ئاماژە ب وێ چەندێ ژی کر، ئاریشەکا دی قوتابیێن زانکۆیێن ئەھلی ڤەگرتیە، ئەو ژی بڕیارا وەزارەتا خواندنا بلندا یا حوکمەتا عیراقێ یە کو ژ بەر ھندەک ئاریشان و بڕیارا خواندنا بلندا ھەرێمێ کو دانپێدانانێ ب زانکۆیێن ئەھلیێن وەکی: زانکۆیا شێخان، پردێ و کەرکووکێ ناکەت و گۆت: “وەزارەتا خواندنا بلندا عیراقێ دانپێدانێ ب ھژمارەکا زانکۆیێن ئەھلیێن ھەرێما کوردستانێ ناکەت، ئەڤێ چەندێ ژی دلگرانی بۆ قوتابیان یا پەیداکری و کاریگەری ل سەر رەوشا خواندنێ ژی یا کری”.